கோவிட் காலத்திற்குப் பிறகு பெண்களின் பணிச்சுமை அதிகரித்திருக்கிறதா?

பெருந்தொற்றுக் காலத்தில் ஊரடங்கு அமல்படுத்தப்பட்டிருந்த நேரத்தில், உலகமே வீட்டிற்குள் முடங்கிக் கிடந்தது. புதிய நியூ நார்மலை நோக்கி உலகமே பயணிக்க ஆரம்பித்தபோதுதான் வீட்டிலிருந்தே அலுவலக வேலை செய்வது, வீட்டிலிருந்தே கல்வி கற்பது, வீட்டிலிருந்தே மருத்துவ ஆலோசனைகள் பெறுவது, வீட்டிலிருந்தே ஷாப்பிங் செய்வது என்று பல புதிய தொடக்கங்களைச் சந்தித்தோம்.ஆரம்பத்தில் வீட்டிலிருந்து வேலை செய்வது என்பது பலருக்கும் கடினமாக இருந்தது. ஆனால், கொரோனா காலத்தில், கார்ப்பரேட்டில் பணிபுரியும் அனைவருக்கும் இது ஒரு கட்டாய விதியாக மாறிவிட்டிருந்தது. ‘மாற்றம் ஒன்றே மாறாதது’ என்பதற்கேற்ப கார்ப்பரேட் நிறுவன ஊழியர்களும் நிலைமைக்குத் தகுந்தவாறு தங்களை மாற்றிக் கொண்டு புதிய நியூ நார்மலை நோக்கிப் பயணிக்க ஆரம்பித்தனர். இதனால் பெரும்பாலான கார்ப்பரேட் நிறுவன ஊழியர்கள் கடந்த மூன்றாண்டுகளாக வீடுகளிலிருந்தே வேலை செய்து வந்தனர். தேவைப்பட்டால் மட்டும் அலுவலகத்திற்குச் சென்று வந்தனர்.தற்போது கோவிட் பிரச்னை இல்லாமல் போனதால், மீண்டும் அலுவலகத்திற்கு நேரில் வந்து பணியைத் தொடர வேண்டும் என்று கார்ப்பரேட் நிறுவனங்கள் தங்கள் ஊழியர்களை பணித்துள்ளன. இதனால் மீண்டும் அலுவலத்திற்குச் செல்லத் தொடங்கியிருக்கும் இந்த ஊழியர்கள்... அதிலும் குறிப்பாக, பெண் ஊழியர்கள் பல புதிய பிரச்னைகளைச் சந்தித்து வருகின்றனர். இதனால் இவர்கள் அதிக அளவில் ராஜினாமா செய்யத் தொடங்கியுள்ளனர். இந்தப் பிரச்னை குறித்து மேலும் விரிவாகக் காண்போம்.உருமாறிய மனிதர்கள்!மார்ச் 25, 2020 உலகம் இதுவரை கண்டிராத நாள். இந்தியாவில் ஊரடங்கு அறிவிக்கப்பட்ட முதல் நாள். ஐந்தறிவு கொண்ட பறவைகள், விலங்குகள் என அனைத்து ஜீவராசிகளும் வெளியில் சுதந்திரமாகச் சுற்றித் திரிந்து கொண்டிருக்க, ஆறறிவு கொண்ட மனிதன் மட்டும் கண்ணுக்குக்கூடத் தெரியாத வைரஸ் பயத்தால் வீட்டிற்குள் முடங்கிய நாள். விமான சேவைகள், ரயில் போக்குவரத்து, பஸ் போக்குவரத்து என கிட்டத்தட்ட அனைத்து சேவைகளும் நிறுத்தப்பட்டன. தொழிற்சாலைகள் மூடப்பட்டன. அத்தியாவசியமான சேவைகளான மருத்துவமனைகள் மட்டும் திறந்திருந்தன.அன்று முதல் பல விஷயங்கள் மாற ஆரம்பித்தன. ஆரம்பத்தில், சில வாரங்கள் அல்லது சில மாதங்களில் சரி ஆகிவிடும் என்று நினைத்த கொரோனா உருமாறி, உருமாறி வருடக்கணக்கில் அதன் வேலையைக் காட்டிக் கொண்டிருந்தது. வைரஸே உருமாறும்போது மனிதர்கள் மாறமாட்டார்களா என்ன! மனிதர்களும் சூழ்நிலைக்குத் தகுந்தவாறு மாற ஆரம்பித்தனர். பள்ளிகள் முதல் பணியிடங்கள் வரை, அரசுத்துறை வேலைகள் முதல் தனியார் துறை வேலைகள் வரை அனைத்தும் ஆன்லைன் வேலை முறைக்கு மாறின. மனிதர்கள் அனைவரும் புதிய வாழ்க்கை முறைக்கு மாறத் தொடங்கினர்..பணிக்குச் செல்லும் பெண்களின் நிலை!ஒவ்வொரு நாணயத்திற்கும் இரண்டு பக்கங்கள் இருப்பதைப் போலவே, உலகம் முழுவதும் போடப்பட்ட ஊரடங்கு பல விதமான விளைவுகளை ஏற்படுத்தியது. குறிப்பாக, பணிக்குச் செல்லும் பெண்களுக்குப் பலவிதமான விளைவுகளை ஏற்படுத்தியது. இவற்றில் நன்மைகளும் தீமைகளும் கலந்திருந்தன. பெண்கள் பணிக்காக வெளியே செல்லாததால், பணியிடத்தில் பாலியல் பலாத்காரம், பாலியல் வன்கொடுமை வழக்குகளின் எண்ணிக்கைக் கணிசமாகக் குறைந்தது. பெண்கள் வீட்டிலிருந்து பணிபுரியும்போது வீட்டை முறையாக கவனித்துக்கொள்வதோடு, குழந்தைகள், கணவன், மாமனார், மாமியார் என்று அனைவரையும் கவனித்துக் கொண்டு, அலுவலக வேலையையும் செய்ய முடிந்தது. வீட்டு வேலைகளுடன், அலுவலக வேலைகளையும் வீட்டிலிருந்தபடியே செய்து, வீடு, அலுவலகப்பணி என அனைத்து சூழ்நிலைகளையும் அழகாகச் சமாளித்து வந்தனர். சொல்லப்போனால், வீட்டிலிருந்தே அலுவலக வேலையைச் செய்வது சற்று வசதியாகக்கூட இருந்தது எனலாம். ஏனென்றால், காலையில் சிறு குழந்தையை வீட்டில் விட்டுவிட்டு, பேருந்திலோ ரயிலிலோ ஆட்டோவிலோ தொலை தூரம் சென்று வேலை பார்க்கும் சிரமங்கள் இல்லாதிருந்தது. பயண நேரம் மிச்சப்பட்டது.பெரும்பாலான இந்தியத் தாய்மார்கள் ஒரு குழந்தை பிறந்த உடனேயே ஏற்கெனவே பார்த்துக் கொண்டிருந்த வேலையை விட்டுவிட்டு குழந்தையை பராமரிப்பதற்காக வீட்டிலிருக்க ஆரம்பிக்கின்றனர். இப்படிப்பட்ட தாய்மார்களுக்கு, வீட்டிலிருந்தபடியே குழந்தைகளையும் கவனித்துக் கொண்டு, அவர்கள் விரும்பும் பணியைச் செய்வதற்கும் சம்பாதிப்பதிற்கும் இந்த ஊரடங்கு உதவியது.எதிர்கொண்ட சிக்கல்கள்!கணவனும் வீட்டிலேயே இருந்து வேலை செய்ததால் இப்பெண்கள் சந்தித்த தொல்லைகள் வேறு ரகம். சிலருக்கு வீடு என்பது பாதுகாப்பான இடமாக இருந்தாலும், அனைவருக்கும் அது பாதுகாப்பான இடமாக இல்லை என்பதை கோவிட் உணர்த்தியது. மனைவியைப் பணி செய்யவிடாமல் தொந்தரவு செய்தல், மாமியார் கொடுமைகள் என்று, பெண்கள் பலவிதமான பிரச்னைகளைச் சந்தித்தனர். ஊரடங்கு விதிக்கப்பட்டதில் இருந்து நாடு முழுவதும் குடும்ப வன்முறை வழக்குகளின் எண்ணிக்கை அதிகரித்ததாக தேசிய மகளிர் ஆணையம் தெரிவித்தது. குடும்ப வன்முறைகளால் பாதிக்கப்பட்டவர்கள் பலவிதமான உடல் மற்றும் மனரீதியிலான ஆரோக்கியக் கோளாறுகளை சந்தித்தனர். இதனால் இப்பெண்களுக்கு மன அழுத்தம் அதிகரித்து தற்கொலை செய்து கொள்பவர்களின் எண்ணிக்கையும் அதிகரித்தது.குடும்பத்தில் இருக்கும் நபர்களாலும் பாலியல் குற்றங்கள் அதிகரித்தன. வீட்டிலேயே இருந்ததால் சைபர் கிரைம் வழக்குகளின் எண்ணிக்கையும் பல மடங்கு அதிகரித்தது. காவல் நிலையத்திற்குச் சென்று புகார் சொல்ல விரும்பாமல் தங்கள் மனதிற்குள்ளாகவே சோகங்களைப் பூட்டி வைத்ததவர்களின் எண்ணிக்கை இதைவிட அதிகம். ஆக மொத்தம், ‘மத்தளத்திற்கு இரண்டு பக்கமும் அடி’ என்பது போல் பெண்களின் நிலைமை ஆகியது.ராஜினாமா செய்யும் பெண் ஊழியர்கள்!தற்போது ‘மல்டி நேஷனல் நிறுவனங்கள்’ அனைத்தும் ஊழியர்கள் அனைவரும் பணிக்கு நேரில் வரவேண்டும் என்று தங்கள் ஊழியர்களை அழைத்துள்ளன. இதனால் பெண் ஊழியர்கள் அதிக அளவில் ராஜினாமா செய்யத் தொடங்கியுள்ளனர் என்று அண்மையில் வெளியான செய்திகள் அதிர்ச்சியை ஏற்படுத்துகின்றன. இந்தியாவின் மிகப்பெரிய ஐ.டி. சேவை நிறுவனமான டாடா கன்சல்டன்சி சர்வீசஸ் (டி.சி.எஸ்.) தற்போது வீட்டிலிருந்தே ஊழியர்கள் வேலை செய்வதை நிறுத்த முடிவு செய்துள்ளது. டி.சி.எஸ். எடுத்த இந்த முடிவின் காரணமாக ராஜினாமா செய்யும் பெண் ஊழியர்களின் எண்ணிக்கை தொடர்ந்து அதிகரித்து வருகிறது.சமுதாயம் முழுதாக மாறவில்லை!பெண்கள் வேலைக்குச் செல்வது இன்றைய காலத்தின் கட்டாயம். ஒரு பெண் வேலைக்குச் செல்வதால், பொருளாதாரரீதியாக அவர் தன்னிறைவு பெறுகிறார். யாரையும் சார்ந்திராமல் சொந்தக் காலில் நிற்கும் தைரியத்தையும் பெறுகிறார். இத்தனை நன்மைகளையும் மீறி, பார்த்துக் கொண்டிருக்கும் வேலையை ராஜினாமா செய்கிறார் என்றால், ‘அப்படி அவர்களுக்கு என்னதான் பிரச்னை?’ என்பதை அனைவரும் சிந்தித்துப் பார்க்க வேண்டும். பெண்கள் பணிக்குச் செல்வதால் குடும்பத்தில் மட்டுமல்லாமல் சமூதாயத்திலும் பல்வேறு மாற்றங்கள் ஏற்பட்டுள்ளன. இருந்தாலும், பெண்களுக்கான பாலின சமத்துவம் இன்னும் முழுமையாகக் கிடைக்கவில்லை.இன்றைய இளைஞர்களின் சிந்தனைகளில் மாற்றங்கள் வந்துள்ளன என்பதை மறுக்க முடியாது என்றாலும் சமுதாயம் முழுமையாக மாறிவிடவில்லை. பெண்கள் பணிக்குச் சென்றாலும், வீட்டிலும் வேலை பார்த்துவிட்டுத்தான் பணிக்குச் செல்ல வேண்டிய கட்டாயம் இன்றும் உள்ளது. இதனால் அவர்கள் உடலளவிலும் மனதளவிலும் பாதிக்கப்படுகிறார்கள் என்பதே நிதர்சனம். வேலைக்குச் செல்லும் ஆண்களைக் காட்டிலும் பெண்களே அதிகளவில் மன அழுத்தத்துக்கும் மனச்சோர்வுக்கும் ஆளாகிறார்கள் என்று சில ஆய்வு முடிவுகள் தெரிவிக்கின்றன..உடல் மற்றும் மனரீதியான பாதிப்புகள்!கோவிட் காலத்திற்குப் பிறகு பணிக்குத் திரும்பும் பெண்களுக்கு அலுவலகத்திலும் முன்பைவிட பணிச்சுமை அதிகமாகியுள்ளது. முன்பெல்லாம் பணி முடிந்து வீடு திரும்பிவிட்டால் அலுவலக வேலை இருக்காது. ஆனால், தற்போது வாட்ஸ்அப், கூகுள் மீட்டிங் என்று இரவு வீட்டிற்கு வந்தாலும் பணிகள் இருந்து கொண்டே இருக்கின்றன. 24 ஙீ 7 பணியாளர்களாக மாறும் நிலைக்குத் தள்ளப்பட்டுள்ளனர். இதனால் குழந்தைகளையும் கணவனையும் கவனிக்க முடியாத நிலைக்கு ஆளாகின்றனர். இதன் காரணமாக உடல்ரீதியாகவும் மனரீதியாகவும் பாதிக்கப்படுகின்றனர்.ஐ.டி. துறையானது பெண்களுக்கு அற்புதமான வேலைவாய்ப்புகளை உருவாக்கியிருந்தாலும், மல்டி நேஷனல் நிறுவனங்கள் வெளிநாட்டில் இருக்கும் கிளையண்டுகளைத் தொடர்பு கொள்ள இரவு நேரத்தில் வேலை பார்க்கச் சொல்கின்றன. நேரம் காலம் இல்லாமல் கிளையண்ட் மீட்டிங், குடும்பம், குழந்தை வளர்ப்பு, மாதவிடாய் தொல்லைகள், ஓய்வு இல்லாத சூழல் போன்ற பல காரணங்களால் இப்பெண்கள் கடும் மன அழுத்தத்துக்கு உள்ளாகின்றனர். பணிக்குச் செல்வதால் பொருளாதாரரீதியாக பெண்கள் முன்னேற்றம் அடைந்தாலும், வீட்டையும் கவனிக்க முடியாமல், பணியிலும் தொடர்ந்து கவனம் செலுத்த முடியாமல் கவனம் சிதறி, வேறு வழியில்லாமல் அந்தப் பணியையே விட வேண்டிய கட்டாயத்திற்கு ஆளாகின்றனர்.இந்தப் பிரச்னைக்கு என்ன தான் தீர்வு?இது போன்ற பிரச்னைகளுக்கு ஒரே தீர்வு, பெண்ணின் வருமானத்தை எதிர்பார்க்கும் குடும்பங்கள், அவளுக்குத் தர வேண்டிய சுதந்திரத்தைத் தர வேண்டும். அவளின் சுயம், விருப்பு, வெறுப்புகளை புரிந்து கொள்ள வேண்டும். பெண்ணுக்குரிய அங்கீகாரம், அன்பு, பாராட்டு போன்ற அனைத்து உரிமைகளையும் குடும்ப உறுப்பினர்கள் தர வேண்டியது அவசியம். இப்பெண்களின் மனநலனை மேம்படுத்தும் வகையில் போதுமான ஆதரவை அளித்தால், அவர்கள் வானத்தையே வளைத்து வானவில் ஆக்குவார்கள்!அதே போல், பெண்கள் வேலை பார்க்கும் இடங்களிலும் அவர்களுக்கு ஒரு நல்ல சூழலை ஏற்படுத்தித் தர வேண்டும். நெகிழ்வான பணி நேரம் மிகவும் அவசியம். பணியிடத்தில் குழந்தைகளை பராமரிக்கும் வசதிகளும் தேவை. இவையெல்லாம் ஊழியர்களுக்குக் கொடுக்கப்படும் கூடுதல் சலுகையாக நிறுவனங்கள் கருதக்கூடாது. இப்படிப்பட்ட சூழலை அமைத்துக் கொடுத்தால் பெண்களால் கூடுதல் பொறுப்புகளையும் சிறப்பாகக் கையாள முடியும்!கூகுள் தலைமை நிர்வாக அதிகாரி சுந்தர் பிச்சை அவர்கள், கோவிட் குறைய ஆரம்பித்த சமயத்தில், கூகுள் நிறுவனத்தில் ஒரு பெரிய மாற்றத்தை முன்னெடுத்தார். ஊழியர்கள் அனைவரும் வாரத்தில் மூன்று நாட்கள் அலுவலகத்திலிருந்து வேலை செய்யலாம் என்றும் மற்ற இரண்டு நாட்கள் எங்கிருந்து வேண்டுமானாலும் வேலை செய்யலாம் என்றும் தெரிவித்தார். இந்த நெகிழ்வுத் தன்மை ஊழியர்களுக்கு நல்ல ஒரு சமநிலையை வழங்கும் என்றும் அவர் கருத்து தெரிவித்திருந்தார். இதைப் போன்று அனைத்து நிறுவனங்களும் ஊழியர்களுக்கு... குறிப்பாக, பெண் ஊழியர்களுக்குத் தேவையான, நல்ல வேலை சூழலை அமைத்துக் கொடுத்தால், பெண் ஊழியர்களின் ராஜினாமா எண்ணிக்கைக் குறையும். நிறுவனங்களின் வளர்ச்சியும் அதிகரிக்கும்.‘பெண்கள் வீட்டின் கண்கள்’ என்று டயலாக் சொல்வதோடு நிறுத்திவிடாமல், ‘பெண்கள் நாட்டின் கண்கள்’ என்பதை இனியாவது உணர்ந்து செயல்படுவோம்! - முனைவர் சுடர்க்கொடி கண்ணன்