சென்ற இதழ் தொடர்ச்சி ... முதுமையில் இனிமை காண பெற்றோருக்கு 10 கட்டளைகள்!

1. உங்கள் பிள்ளைகள் ‘ஆல் போல் தழைத்து அருகு போல் வேரோடி மூங்கில் போல் சுற்றம் முழுமையாய்ச் சூழப் பதினாறும் பெற்றுப் பெருவாழ்வு வாழ’ வேண்டுமென்றால் நீங்கள் உங்கள் பிள்ளைகளைப் புரிந்து நடந்துகொள்ள வேண்டும். இன்றைய அவசரமான, நிச்சயமில்லாத உலகத்தில் உங்கள் பிள்ளைகள் பல்வேறு பிரச்னைகளை சமாளித்து வாழ வேண்டிய நிலையில் உள்ளார்கள். அவர்களை வாழவிடுங்கள்.வண்ணத்துப்பூச்சி தானாகக் கூட்டை உடைத்து வெளியே வருவது போல், உங்கள் பிள்ளைகள் தங்கள் பிரச்னைகளையெல்லாம் சமாளித்து வெளியே வருவார்கள். நீங்கள் உதவி செய்கிறேன் என்பது, வண்ணத்துப்பூச்சியின் கூட்டை குச்சி வைத்துக் கிழித்து, அதனை வெளியே கொண்டுவருவது போலத்தான். இப்படிச் செய்வது அந்த வண்ணத்துப்பூச்சியின் சிறகுகளை பிய்த்துப்போடுவதற்குச் சமம். ஆகவே சற்று விலகியே இருங்கள். ‘என் பிள்ளை... என் பிள்ளை...’ என பதறாதீர்கள். சிறகு முளைத்த பறவைகள் அவர்கள் என்பதை நினைத்து அமைதியாக இருங்கள். 2. காலம் மாறிக் கொண்டேயிருக்கிறது என்பதை நீங்கள் முதலில் புரிந்துகொள்ள வேண்டும். முடிந்தால், திருமணமானதும் பிள்ளைகளைத் தனிக் குடித்தனம் வைத்துவிடுங்கள். இதனால் பாதிப் பிரச்னைகள் குறையும். இல்லாவிட்டால், உங்களுடைய சுதந்திரம் அனைத்தும் பறிபோவது மட்டுமல்லாமல் உங்கள் பிள்ளைகளின் சுதந்திரமும் பறிபோகக்கூடும். ஜாக்கிரதை! 3. ‘பொருள் இல்லார்க்கு இவ்வுலகம் இல்லை’. உங்கள் கையில் பணம் இல்லாவிட்டால், பிள்ளைகளிடம்கூட மதிப்பும் மரியாதையும் உரிமையும் நிச்சயம் இருக்காது. சேமிப்பு மற்றும் சுய சம்பாத்திய சொத்துகளை உயிருடன் இருக்கும்வரை யாருக்கும் கொடுக்க வேண்டாம். உங்கள் காலத்துக்குப் பிறகு சொத்துகள் யாருக்கு என்பதை ‘உயில்’ வேண்டுமானால் எழுதி வைக்கலாம். 4. உங்கள் வாழ்நாள் முழுதும் பிள்ளைகளின் உயர்வுக்காகப் பாடுபட்டு பல இழப்புகளை சந்தித்திருப்பீர்கள். ஆனாலும், அவற்றைத் திரும்பத் திரும்பச் சொல்லிக் காட்டவேண்டாம். ‘நம்முடைய கடமையைத்தான் செய்தோம்’ என்ற நிறைவுடன் இருக்கக் கற்றுக்கொள்ளுங்கள். 5. வீட்டுக்கு வந்த மருமகள் முன்பாக மனைவியையோ கணவனையோ விட்டுக் கொடுத்துப் பேசாதீர்கள். இருவரில் ஒருவரை யாராவது குறைத்துப் பேசினாலும் எதிர்குரல் கொடுக்கத் தவறாதீர்கள்.. 6. பிள்ளைகள் வீட்டுக்குச் சென்றால், கூடவே தேவையான மருந்து, மாத்திரை, எண்ணெய், பவுடர், சீப்பு, சோப் உள்ளிட்டவற்றை எடுத்துச் செல்லுங்கள். யாருக்கும் சுமையாக இருக்கவேண்டாம். 7. கூட்டுக்குடும்ப வாழ்வு சிதைந்துபோன தலைமுறையில் வாழ்கிறோம் என்பதை ஒருபோதும் மறவாதீர்கள். 8. அவ்வப்போது பரிசுப் பொருள்களுடன் சென்று பேரன், பேத்திகளுடன் சந்தோஷமாக இருந்துவிட்டு வாருங்கள். பேரக்குழந்தைகள் மீது அதிக உரிமை எடுத்துக்கொள்ள வேண்டாம். அதிக பாசம், ஆசை வைத்திருக்கிறோம் என்ற பெயரில் அதிகாரம் செய்யவேண்டாம். அவர்களின் குழந்தைகளை வளர்க்கும் பொறுப்பு அவர்களுடையது என்று எண்ணுங்கள். அவர்கள் குழந்தையை அவர்கள் கவனித்துக்கொள்வார்கள். குழந்தை வளர்ப்பில் மகனுக்கோ மகளுக்கோ உங்கள் அனுபவங்களைக்கூட அளவோடு சொல்லுங்கள். உதவியாக மட்டும் இருங்கள். அறிவுரைகளைத் தவிர்த்துவிடுங்கள். 9. இன்றைய நவீன கார்ப்பரேட் வாழ்க்கையில் செலவுகள் அதிகம். அந்தக் காலத்தில் ஆடம்பரப் பொருள்களாய்க் கருதப்பட்டவையெல்லாம் இன்றைக்கு அவசியப் பொருள்களாய் மாறிவிட்டன. ஆனால், அவற்றையெல்லாம் மகன் உங்களுக்கும் வாங்கித் தர வேண்டுமென ஒருபோதும் எதிர்பார்க்காதீர்கள். 10. நன்கு படித்திருந்தாலும் நல்ல பதவியிலிருந்து நீங்கள் ஓய்வு பெற்றிருந்தாலும் எல்லா விஷயங்களிலும் மூக்கை நுழைக்காதீர்கள். உங்கள் பிள்ளைகள் அறிவிலும் திறமையிலும் சிறந்தவர்கள் என்பதை மனதார ஏற்றுக்கொள்ளுங்கள். அவர்கள் வாழ்க்கையை அவர்கள் பார்த்துக் கொள்வார்கள். - கீதா ராஜகோபாலன்

சென்ற இதழ் தொடர்ச்சி ... முதுமையில் இனிமை காண பெற்றோருக்கு 10 கட்டளைகள்!

Related Stories