122. அசுர வளர்ச்சி காணும் அற்புத மோசோ!

“வாரத்தின் ஏழு நாட்களும், பதினான்கு மணி நேரம் வேலை பார்த்தால் நான் அதிர்ஷ்டசாலி ஆவேன்.’’- டாக்டர் ஆர்மெண்ட் ஹாமர் ‘‘நீ ரொம்ப அதிர்ஷ்டசாலி. ஆங்கிலத்தில் அதிகம் பேசமுடியாத மக்கள் வாழும் நாட்டில், உனக்கென்று எப்படித்தான் ஆங்கிலம் பேசும் நபர்கள் வலியவந்து உரையாடுகிறார்களோ?’’ என்றார் என் கணவர்.“இதில் அதிர்ஷ்டம் எங்கே இருந்து வருகிறது, எல்லாம் என் முகராசி!’’ என்று கண்களை சிமிட்டினேன்.“ஆஹா, ரொம்பத்தான் ஆகிப்போனது உனக்கு!’’ என்று என்னவர் சிரித்தார்.எங்களுடைய இந்தச் சம்பாஷணை முற்றிலும் தமிழிலேயே இருந்தது.“நீங்கள் என்ன மொழியில் பேசுகிறீர்கள்?’’ என்றாள் அந்த ஜப்பானியப் பெண்.“தமிழ்! இது எங்கள் மாநிலத்தில் பேசப்படும் மொழி. இந்தியாவில் மொத்தம் 398 மொழிகள் பேசப்படுகின்றன’’ என்றேன்.“மை காட்! இவ்வளவு மொழிகளா!!’’“ஆமாம். இதில் 11 மொழிகள் மறைந்துவிட்டன. மிஞ்சியிருப்பது 387 மொழிகள்தான்!’’ என்றேன்.“அதுசரி, இந்த இநாரி டாய்சா கோயில் 24 மணி நேரமும் திறந்திருக்கும் என்கிறார்களே... இரவு நேரத்திலும் இவ்வளவு பெரிய கூட்டம் வருமா?’’“நோ... நோ... இதில் பாதிக்கூட வராது.’’“ஏன்?’’“இந்த மலைப்பாதையின் வழியை, மிகவும் கொஞ்சமாகத்தான் ஒளியூட்டி இருப்பார்கள். ஏனெனில், காலையில் மிக அதிகமாக வேலை பார்த்த கடவுள்கள், இரவில் ஓய்வு எடுப்பார்கள். அப்போது அதிக வெளிச்சம் அவர்களுக்குத் தொந்தரவாக இருக்கும்தானே?’’“ஓ... அப்படியா!’’ என்றார் என் கணவர்.“மேலும், இரவில் மலை ஏறிச் செல்லும்போது தடுக்கிவிழுந்து எலும்பை உடைத்துக்கொண்டால், ஆம்புலன்ஸ் சர்வீஸ் வந்து உங்களை மருத்துவமனைக்கு அழைத்துச்செல்வது மிகவும் கடினமான வேலை ஆகிவிடும். தவிர, இங்கே இரவில் காட்டுப்பன்றிகள் நடமாட்டமும் அதிகமாக இருக்கும்.’’‘‘சிவா... நல்லகாலம் நாம் பகல் வேளையிலேயே வந்துவிட்டோம்!’’ என்று கூறி நிம்மதி அடைந்தேன்.“மேடம்... ஜூலை மாதம் ‘யோமியா மாட்சுரி’ (Yoimiya Matsuri) என்றொரு திருவிழா நடக்கும். அப்போது டிரம்களை முழங்கியபடி நடனக்கலைஞர்கள் ஆடுவார்கள். ஆயிரக்கணக்கான விளக்குகள் இந்த இநாரி மலைப்பாதைகள் முழுக்க ஏற்றப்பட்டிருக்கும். 400_க்கும் மேற்பட்ட ஜப்பானிய ஓவியக் கலைஞர்களுடைய பெயின்டிங்குகள் இங்கே வைக்கப்பட்டிருக்கும்.நவம்பர் மாதத்தில் ‘ஹிட்டாகிசாய்’ (Hitaki-sai) என்கிற திருவிழாவின்போது பெரிய நெருப்பை மூட்டுவார்கள். அதில், வருடம் முழுவதும் வேண்டுதலாக அளிக்கப்பட்ட மெழுகுவர்த்திகளை போட்டு எரிப்பார்கள்’’ என்றாள் அந்த ஜப்பானியப் பெண்.இன்னும் அவளுடன் பேசி நிறைய தகவல்களை சேகரிக்க ஆசையிருந்தாலும் நேரம் அதற்குத் தடையாக இருந்தது. அவளிடம் விடைபெற்றுக்கொண்டு கிளம்பி, தெருவில் இறங்கி நடந்தோம்.சாப்பிட்ட ஐஸ்க்ரீம், வயிற்றை மட்டும் குளிர வைக்கவில்லை, மனதையும் குளிரச் செய்திருந்தது!.“சாந்தி... அவசியம் நாம் மூங்கில் காட்டை பார்க்கவேண்டுமா?’’“என்ன இப்படிக் கேட்குறீங்க? சின்னது, பெரியது, மிகப்பெரியது என்று ஜப்பானில் மொத்தம் 250 வகையான மூங்கில்கள் இருக்காம். அதுலே ‘மோசோ’ (Moso) என்கிற வகைதான் மிகப் பெரியதாம். நிலத்திலிருந்து வளர ஆரம்பித்தால் 35_40 நாட்களிலேயே தன்னுடைய முழு வளர்ச்சியையும் இந்த மோசோ மூங்கில்கள் பெற்றுவிடுமாம்.’’“சாந்தி... அப்படியா! எப்படி இதைப் பற்றியெல்லாம் நீ தெரிஞ்சுக்கிட்டே?’’“இங்கே கியோட்டோவிலே இருக்கிற ‘சகானோ மூங்கில் காடு’ (Sagano bamboo forest) பற்றி படிச்சேன். அதனால்தான் அங்கே போக ஆசைப்படறேன். இந்த வகையான மோசோ மூங்கில்கள்தான் அங்கே இருக்கின்றன. அதுவும் அறுபது அடி உயரமானவையாம். கேட்கவே பிரமிப்பாக இருக்கு இல்லே. அகலம் எவ்வளவு தெரியுமா 10_25 அடி!’’“அம்மாடி!’’ என்று வியந்து கூவினார் என் கணவர்.“சிவா... மற்றொரு சுவாரஸ்யமான விஷயமும் இருக்கிறது. ஒரு நாளைக்குள் இந்த மூங்கில்கள் ஒரு மீட்டர் உயரம் வளர்ந்து விடுமாம்!’’“அசுர வளர்ச்சியாக இருக்கிறதே!’’“இயற்கை அன்னையின் அற்புத திருவிளையாடல்களில் இதுவும் ஒன்று என்றுதான் நாம் எடுத்துக்கொள்ள வேண்டும்.’’“அதுசரி, இப்போதே மணி பகல் மூன்றாகிறது. எப்படி அங்கே சென்று சுற்றிப் பார்த்துவிட்டு மீண்டும் ரயில் ஏறி, ஜப்பான் அரசாங்கம் அளிக்கும் விருந்தில் கலந்து கொள்வது?’’“சிவா... அது இரவு ஒன்பது மணிக்குத்தானே... சமாளித்துவிடலாம்! வாழ்க்கையில் இப்படிப்பட்ட மூங்கில் காட்டைப் பார்க்கும் வாய்ப்பைத் தவறவிடலாமா? ‘அரசியாமா’ (Arashiyama) என்கிற இந்தக் காடு 24 மணி நேரமும் திறந்திருக்கும்.’’“என்னது... முதலில் ‘சகானோ’ என்றாயே?’’(பயணிப்போம்)- முனைவர் சாந்தகுமாரி சிவகடாட்சம்

122. அசுர வளர்ச்சி காணும் அற்புத மோசோ!

Related Stories