சிறப்புக் கட்டுரை : பிரச்னைகளை அகற்றும் பிள்ளையார் சதுர்த்தி!

பல ஆண்டுகளாகவே ‘விநாயகர் சதுர்த்தி’யானது ஆவணி மாதம் வருவது என்று சிறப்பித்துக் கூறி, அவருடைய பெருமை கூறுகின்ற பாடல்களையும் எல்லா இடங்களிலும் ஒலிப்பெருக்கி மூலம் கேட்டு வருகிறோம். ஆனால், இந்த வருடம் சற்று வித்தியாசமாக புரட்டாசி மாதத்தில் விநாயகர் சதுர்த்தி வருகிறது!ஆவணி மாத அமாவாசை மாதம் முடிவதற்கு நான்கு நாட்கள் முன் வருவதால் ‘சதுர்த்தி திதி’ பிறக்காமல் புரட்டாசி வந்துவிட, ‘கன்யா மாதம்’ பிறந்து, அதில் திதி சேர்ந்து விடுகிறது. விநாயகருக்கு உரிய அஸ்த நட்சத்திரம், முதல் நாளே போய் விடுவதால், அவருக்கு அமையும் சதுர்த்தி திதியில் மட்டுமே இந்த வருடம் பிள்ளையார் சதுர்த்தி விழாவைக் கொண்டாட வேண்டும்.இவ்வருட பிள்ளையார் சதுர்த்தியைக் கொண்டாடுவதால் ஏற்படும் பூரணமான பலனே தாய் - மகன், மகள் உறவு நன்றாக இருக்கும் என்று அறியலாம். ஆவணி மாத நாயகனும் புரட்டாசி நாயகியான தேவியும், மாமன் மகாவிஷ்ணு சேவை சாதிக்கும் புனிதமான ‘புரட்டாசி’ என்ற திங்களும் சேரும் ஓர் மகத்துவம் நிறைந்த சதுர்த்தியில், சங்கடம் தீர்க்கும் சங்கரன் புதல்வனின் அவதார திருநாளைக் கொண்டாடத் தயாராகுங்கள். சக்கரங்களில் கணபதி!மனித உடல் பல்வகை ஆற்றல்களைப் பெற்று விளங்குவதற்கு ஆறு அவதாரச் சக்கரங்களே முக்கியக் காரணம் என்று ‘யோக உலகம்’ விளக்குகிறது. அதன்படி ‘ஆக்ஞா சக்கரத்தில்’ சிவபெருமானும், ‘விசுக்தியில்’ அர்த்தநாரீஸ்வரரும், ‘அநாகதத்தில்’ பார்வதி தேவியும், ‘மணிபூரகத்தில்’ மகாவிஷ்ணுவும் இவர்களுக்கு முன்பாக மூலாதாரத்தில் கணபதியும் வீற்றிருக்கக் காணலாம். ‘யோகம்’ என்பது ‘இணைதல்’ என்று பொருளாகிறது. நம் உடலை இயக்க முதலில் தூண்டுபவர் கணபதியே என்று ஆரம்ப காலத்திலேயே சித்தர்கள் சொல்லியிருப்பதை இதன் மூலம் அறியலாம்!நம் உடலிலுள்ள கர்ம வினைகளை அகற்றி விடுவதால் பல்வகை நற்பலன்களை அடைய இயலும். அதற்கு வினைகளை அகற்றிவிட மூலாதாரச் சக்கரத்தில் கணபதியை சிந்தித்து வழிபடல் வேண்டும். கணபதியின் உருவத்தை மனதில் நிலை நிறுத்தி, மலர்களால் அர்ச்சனை செய்வது போல் பாவனை செய்து, ஓம் கம் கணபதயே நம: ‘என் உடலிலுள்ள தீவினைகளை அழித்து விடுவீர். இந்த உடலும் உள்ளமும் புனிதம் அடையட்டும். எண்ணம், சொல், செயல், யாருக்கும் தீங்கு விளைவிக்காமல் நல்லதே செய்யும் வாழ்க்கையை அருள்வாயாக!’ என்று பிரார்த்தனை செய்ய வேண்டும்..குறியீடு கூறும் தத்துவம்!கணபதிப் பெருமானின் அங்கமெல்லாம் ஒருசில குறியீடுகள் இருப்பதைக் காணலாம். அவற்றில் வலது கையில் இருப்பது ‘ஸ்வஸ்திக்’ குறியீடு. இந்த உலகத்தல் நான்கு திசைகளிலும் இறைவன் ஆட்சி செய்கிறான் என்பதை அது சுட்டிக் காட்டுகிறது. பரந்து விரிந்து கிடக்கின்ற இந்தப் பிரபஞ்சத்தில், ஒரவரை ஒருவர் சார்ந்து வாழ்தலையும் நான்கு வேதங்களின் கோட்பாட்டின்படி நாம் வாழ்ந்தால் இறைவனுடைய திருவடி நிழல் பட்டு நமது வாழ்க்கைக் சக்கரம் நன்றாகக் சுழலும் என்பதையும் குறிப்பிடுகிறது. அதிலுள்ள ஒவ்வொரு வளைவும் கூறுகின்ற தத்துவம் உயர்ந்தது. ஆன்மாவானது யோகம், ஞானம், சரியை, கிரியைகளைக் கடந்து, பகவானிடம் நெருங்க வேண்டுமானால், நீர், அக்னி, நிலம், காற்று, ஆகாயம் ஆகியவற்றைக் கொண்ட இந்த உலக தர்மங்களைக் கடைப்பிடித்து வாழவேண்டும் என்று சொல்கிறது.கணபதியை வழிபட்டால் நம் உடலிலுள்ள ஆணவம், மாயையை வென்று நலம் பெறலாம் என்கிற சூட்சுமத்தை ‘திருவிளையாடற் புராணத்தில்’ கூறி உள்ளனர்..அவதாரத்தில் ஓர் வியப்பு!‘சிவன் - பார்வதிக்கு உதித்தவரே விநாயகர்’ என்று இன்றுவரை நினைத்துக் கொண்டுள்ளனர். ஆனால், அவருடைய பிறப்பும் பல வகைகளில் வித்தியாசமாகச் சொல்லப்பட்டுள்ளது. ஒரு கல்பக்காலத்தில் சத்தியலோகத்தில் பிரம்மதேவன் வீற்றிருக்கும் போது மிகப்பெரிய கொட்டாவி விட்டிருக் கிறார். அதிலிருந்து ‘சிந்துரன்’ என்ற பலமுள்ள ஆண்மகன் வெளிவந்து, ‘எல்லோரையும் வெற்றி பெறுகின்ற பலம் தனக்கு மேலும் வேண்டும்’ என்று வரம் கேட்டான். தேவர், மூவர் பெருமக்களால் வெல்ல முடியாத வரத்தைக் கொடுத்தார் பிரம்மதேவன். இதைப் பயன்படுத்தி, யாரைக் கண்டாலும் ஆரத்தழுவிட அவர்கள் உடல் தண்ணீராய் மாறிவிட்டதாம். பிரம்மனையே ஒருநாள் கட்டிப் பிடிக்கத் துணிந்த சிந்துரனை, ‘மூடனே... கத்தியைத் தீட்டிய மரத்தையே வெட்டிவிட பார்க்கும் உன்னை, ஆனை முகன் ஒருவன் பிறந்து சம்ஹாரம் செய்வான்’ என்றார்.உடனே அவன், மகாவிஷ்ணுவிடம் சென்று முறையிட, அவரோ பிரம்மனிடம் கேட்கும்படி கூறி அனுப்பி விட்டார். மீண்டும் வந்து பிரம்மனிடம் கேட்டபோது, ‘அந்த சிவபெருமானிடம் மோதி உன்னுடைய பலத்தைக் காட்டு!’ என்று ஆலோசனை சொல்லியிருக்கிறார். இதைக் கேட்ட சிந்துரன், கயிலாய மலைக்குச் சென்று சிவபெருமானை எதிர்த்துப் போரிடப் பாய்ந்தான்.அங்கே வேதியர் வடிவம் எடுத்து வந்த கணேசர், ஒரு பராயுதத்தை நடுவில் நட்டுவிட்டார். இதைத் தாண்டி செல்ல முடியாததால் பயந்து பூவுலகிற்குச் சென்று அங்குள்ள அழகான வனங்கள், நாடுகள், நகரங்கள் எல்லாவற்றையும் கட்டித் தழுவி அழித்தான். இக்காட்சியை கண்ட தேவர்கள், கணபதியை போற்றினர். உடனே அவர் காட்சியளித்து, ‘யாம் உமையம்மையாம் பார்வதி தேவியின் வயிற்றில் பிறந்து, அரக்கன் சிந்துரனை அழித்து, உங்களுக்கும் பூவுலக மக்களுக்கும் நிம்மதியை தருவோம்!’ என்று வாக்குறுதித் தந்தாராம்..ஆனைமுகனின் அவதார தினம்!சிவபெருமான் தம்முடைய தேவி பார்வதி யோடு பூத கணங்களோடும் பூவுலகத்தில் உள்ள ‘பரியிலி’ என்னும் மலர்வனத்திலே தங்கியிருந்தார். அதே சமயத்தில் தன்னை எதிர்த்தவர்கள் அனைவரையும் அழித்திட ஓர் வனத்தில் தங்கியிருந்தான் சிந்துரன். அந்த நேரத்தில் அவன் கேட்கும்படி வானத்தில் தேவ ஒலி அசரீரியாய் வந்தது... ‘ஏ சிந்துரனே... உனக்கு முடிவுகாலம் நெருங்கிக் கொண்டிருக்கிறது. உன்னை யாருமே வெல்ல முடியாது என்று சொல்லிக் கொண்டு வருகிறாய். ஆனால், உன்னைக் கொல்வதற்கு உமாதேவியார் வயிற்றிலே கருவாகி, விநாயகப் பெருமான் வளர்ந்து வருகிறார்!’ என்றது அந்த அசரீரி.இதைக் கேட்ட சிந்துரன், பரியிலி பிருந்தாவனத்தில் தங்கியிருந்த பார்வதி தேவியின் கருவிலுள்ள ரத்தத்தில் காற்று வடிவத்தில் கலந்து, கருவை சிதைத்து, நர்மதை ஆற்றங்கரையில் போட்டு விட்டு சென்றான்.அந்தச் சிரசு விழுந்த இடமே மிகப்பெரிய பள்ளமாகி ‘கணேச குண்டம்’ எனவும் தலை யிலிருந்து பெருகிய உதிரம் ஆறாக ஓடி, ‘சோண நதி’யாக மாறியது என்கிறது புராணம்.பிறகு திருக்கயிலாயத்தை சிவபெருமானும் உமாதேவியாரும் அடைந்தபோது அங்கே குழந்தை வடிவமாக விநாயகர் தோன்றிட, அதைக் கண்ட தேவி அச்சமடைந்தார். தேவர்களும் விஷ்ணுவும் இந்த அதிசய குழந்தையைக் காண திரண்டு வந்தனர்.ஒரு காலகட்டத்தில் சிவபெருமான் ‘மகேசன்’ என்கிற அரசனுக்குக் கொடுத்த வரத்தால், ‘கஜமுகாசுரன்’ பிறந்து, அவர் கையால் அறுபட்டு, பிறகு அந்தத் தலையே இவருடைய பிள்ளையின் கழுத்துக்கு மேல் வந்து நின்றது என்று பிருகஸ்பதி விளக்கம் தந்தார்..அதே இடத்தில் முனிவர்களும் தேவர் பெருமக்களும் இக்காட்சியைக் கண்டு வணங்கி நின்றனர். இதன் காரணமாக விநாயகர், ‘கஜானனர்’ என்னும் திருநாமத்தைப் பெற்றார். நடப்பதையெல்லாம் அறிந்த அரக்கன் சிந்துரன், அவரை எதிர்த்துப் போரிட வந்தான். கட்டிப் பிடித்து நீராக மாற்றி விடலாம் என நெருங்கினான். அவனை எளிதாகத் தன்னுடைய துதிக்கையால் எடுத்து, சாந்துபோலப் பிழிந்து, தன்னுடைய மத்தகத்தில் (நெற்றிப் பகுதியில்) பூசிக் கொண்டார். தேவரும் மூவரும் மகிழ்ந்து, தங்களுடைய இடர்களெல்லாம் நீங்கியது என்று கொண்டாடினர்.சிந்துரனைக் கொல்லும் பொருட்டு விநாயகப் பெருமான் அவதாரம் எடுத்த தினமே ஆவணி மாதம் பூர்வபட்ச சதுர்த்தி என்னும் வளர்பிறை சதுர்த்தி நாள். இதுவே ‘விநாயகர் சதுர்த்தி’ என்று பிரதி ஆண்டு கொண்டாடப்படுகிறது. விநாயகரின் அவதாரக் கதைகளில் குறிப்பிடத்தக்க இத்திருக்கதையை இந்த வருட பிள்ளையார் சதுர்த்தி அன்று படித்து, அந்தச் சிவமைந்தனின் அருட்பார்வையைப் பெறுங்கள். துன்பங்கள் நீங்கி,நலம் கண்ட அரசன்!சந்திரகாந்தன் என்ற அரசன், தான் பட்ட துன்பங்கள் எல்லாம், ‘விநாயகர் சதுர்த்தி’ அன்று வழிபட்டதால் நீங்கி நலம் பல கண்டதை ஒரு செய்யுள் கூறியுள்ளதைக் காணலாம்!அரும்பிய விடரெலாம் அறுக்கத் தக்கதுபெரும்பிணி முழுவதும் பெயர்க்கத் தக்கதுபொரும்பகை வலிகளும் போக்கத் தக்கதுவிரும்பிய பொருளெலாம் விளைக்கத் தக்கதுதேவர்கள் தேவன் சிந்துர முகத்தவன்மூவர்கன் முதல்வன் முத்தொழிற்குக் காரணன்மேவர மகிழ்வது விளம்பு நாமமுந்தாவறு விநாயக சதுர்த்தி மென்பரால்!எளிய பூஜையை ஏற்று, நம் வாழ்வில் ஏற்றங்களை தரும் விநாயகரைஅவருடைய அவதாரத் திருநாளில் போற்றி வணங்குவோமாக!.விநாயகரின் அருளை பெற வேண்டுமா?‘பிள்ளையாருக்கு என்ன பிடிக்கும்?’ என்று அகத்தியர் கேட்டார். முனிவர்களோ தங்கள் விருப்பப்படி, அப்பம், அவல், மாம்பழம், மாதுளை, கொய்யா, திராட்சை, பால், இளநீர், தேங்காய், வாழைப்பழம் என்று அடுக்கினர். அவர்கள் அனைவரும் ஒவ்வொன்றாக கூற, குறுமுனி அகத்தியரோ, ‘நீங்கள் எல்லோரும் உங்களுக்குப் பிடித்தவற்றையே சொல்லி வருகிறீர்கள். அந்த ஆனைமுகனுக்கு காதுகள் பெரிது. துதிகள் கூறுவது அவருக்குப் பிடிக்கும் என்றாலும், அவருடைய அவதாரச் சிறப்பையும் நாளையும் குறிக்கும் திருக்கதையையும் படியுங்கள்... அவர் மகிழ்ந்து, உங்களுக்கு ஆசீர்வாதம் செய்வார்!’ என்றாராம். எனவே ‘விநாயகர் சதுர்த்தி’ திருநாளில், பிள்ளையாரின் அவதாரக் கதையைப் படித்து, அருளை பெறுங்கள். சதுர்த்தி பூஜை செய்ய உகந்த நேரம்!செப்டம்பர் 18 (புரட்டாசி 1) ஆம் தேதி ‘சோமவாரம்’ என்ற திங்கட்கிழமையில் விநாயகர் சதுர்த்தி வருகிறது. செப்டம்பர் 17 ஞாயிற்றுக்கிழமை ஆவணி மாத கடைசி நாள் என்பதால், பிள்ளையார் பொம்மையை முதல் நாளே வாங்கி வந்து, வீட்டில் ஒரு மணைப்பலகையில் நெல் பரப்பி, அதன்மீது வைத்துவிடுங்கள். மறுநாள் திங்கட்கிழமை காலை 9 மணி முதல் 10:20க்குள் ‘விநாயகர் சதுர்த்தி பூஜை’ செய்யலாம். அப்போது செய்யத் தவறினால், மதியம் 1 மணிக்கு மேல் 2:25 மணிக்குள் செய்யலாம். சதுர்த்தி திதி தாமதமாக வருவதால், மாலை 4 மணிக்கு மேல் 6:30 மணி வரையிலும் ‘விநாயகர் சதுர்த்தி பூஜை’ செய்து முடிக்கலாம். - கே.குமாரசிவாச்சாரியார்

சிறப்புக் கட்டுரை : பிரச்னைகளை அகற்றும் பிள்ளையார் சதுர்த்தி!

Related Stories