வாசகி அனுபவம்: குரங்கை அனுப்பி காப்பாற்றிய கோட்டை விநாயகர்!

ராஜஸ்தானிலுள்ள ரண்தம்பூர்கோட்டையைச் சுற்றிப் பார்க்க நானும் என் மகள்களும் பல ஆண்டுகளுக்கு முன்பாக சென்றிருந்தோம். அங்குள்ள விநாயகரை, ‘கேட்ட வரமளிக்கும் கோட்டை அரசர்!’ என்று அழைப்பார்கள்.விநாயக பக்தர்கள் தங்கள் பிரச்னைகளை கடிதமாக எழுதி, அவை தீர வரமளிக்குமாறு கோட்டை விநாயகருக்கு அனுப்பும் வழக்கம் இன்றும் உள்ளது. கடிதம் எந்த மொழியில் வேண்டுமானாலும் இருக்கலாம். அவற்றை விநாயகரின் பாதங்களில் வைத்து, பூஜை, ஆரத்தி முடிந்ததும் அந்தந்த பாஷை தெரிந்தவர்களை அழைத்துப் படிக்கச் சொல்லுவார்கள். அதன்பிறகு சில நாட்களிலேயே, கடிதம் எழுதியவருடைய பிரச்னை தீர்க்கப்பட்டுவிடுமாம். விநாயகருக்கு வரும் கடிதங்களைக் கொண்டு வந்து கொடுப்பதற்காகவே தனியாக தபால்காரர் இருந்தார் என்பது கூடுதல் தகவல்..விநாயகரை நாங்கள் தரிசித்துவிட்டு கோட்டையின் பிற பகுதிகளை பார்த்து முடிப்பதற்குள் மாலை ஐந்தரை மணியாகிவிட்டது. கோட்டையைச் சுற்றிப் பார்க்க வந்த வட இந்தியக் குடும்பத்தைச் சேர்ந்த சிறுவன், தான் கொண்டு வந்திருந்த கால்பந்தாட்டப் பந்தை மேலும் கீழுமாய்ப் போட்டு விளையாடிக் கொண்டே வந்தான். இச்செயலை அவனுடைய அம்மா பலமுறை தடுக்க முயன்றும், அவனோ நிறுத்தவில்லை.நாங்களும் இன்னும் சில குடும்பங்களும் கோட்டைக்குள் இருப்பதை பார்க்காத வாட்ச்மேன், வெளிக் கதவுகளைப் பூட்டிவிட்டான். நாங்கள் அனைவருமே கவலையில் ஆழ்ந்தோம். அப்போது கைப்பேசியெல்லாம் கிடையாது. ‘வெளியே போக என்ன செய்வது? விநாயகா காப்பாற்று!’ என்று அனைவரும் வேண்டினோம். அப்போது எங்கிருந்தோ ஒரு குரங்கு, சிறுவன் மேலே எறிந்த பந்தைப் பிடித்துக் கொண்டு கோட்டை சுவரின் மேல் தாவி ஏறி வெளியே குதித்தது. சிறிது நேரத்திலேயே வாயில் கவ்விக் கொண்டு வந்த பை ஒன்றை சிறுவன் மீது எறிந்து விட்டு ஓடியது..வெளியே ஒரே அலறல் சத்தம். பரபரப்புடன் கோட்டையின் கதவு திறக்கப்பட்டது. வந்தது வேறு யாருமல்ல... அந்த வாட்மேன்தான். ‘‘நீங்க எப்படி உள்ளே இருக்கீங்க?’’ என்று கேட்டவன், தன் கையிலிருந்த பந்தை சிறுவனிடம் கொடுத்து விட்டு பையைக் வாங்கிக்கொண்டான். ‘‘பந்தை என் மேலே எறிஞ்சுட்டு என் கையிலிருந்த பையைப் பிடுங்கிக்கிட்டு அந்தக் குரங்கு, கோட்டைக்குள் குதிச்சிடுச்சு. அதுலதான் என்னோட பர்ஸ், வீட்டுச் சாவி, தண்ணீர் பாட்டில் எல்லாமே இருக்கு. சாவி இல்லாம நான் எப்படி வீட்டுக்குப் போக முடியும்?’’ என்று வாட்ச்மேன் சொன்னதைக் கேட்டு திகைத்தோம். ‘கேட்ட வரம் தருபவர் அவர்’ என்பதை உணர்ந்த நாங்கள், கோயில் வரை போய் விநாயகருக்கு நன்றி சொல்லிவிட்டு கிளம்பினோம். - லக்ஷ்மி ரமணன், மயிலாப்பூர்.