37.என் சமையல் ரகசியங்கள் : எந்த உணவை எதனுடன் சேர்த்து சாப்பிடக் கூடாது?

இந்தத் தலைப்பிற்கேற்ப எழுதச் சொன்னபோது, ‘என்னால் எழுத முடியுமா?’ என்று பலமுறை யோசித்தேன். பல புத்தகங்களை வாசித்தேன். கூகுளில் தேடினால் குழப்பம்தான் ஏற்படுகின்றது.என்னுடைய சிநேகிதி பத்மப்ரியா, ஆயுர்வேத மருத்துவர். அவரிடம் பலமுறை இது குறித்து பேசி இருக்கின்றேன். அவர் பகிர்ந்து கொண்ட பல விஷயங்களோடு, பழைமையான புத்தகங்களில் வாசித்ததையும் இங்கே பகிர்ந்து கொள்கின்றேன்.இதில் முக்கியமான விஷயம், இயன்றவரை தவறானதைச் சொல்லிவிடக்கூடாது என்று பலமுறை சரிபார்த்தே இதை எழுதுகின்றேன். காரணம், இது உணவுடன் சம்பந்தப்பட்டது என்பது மட்டுமன்றி, உடல்நலத்துடனும் தொடர்புடையது. எனவேதான், இதனை யோசித்து யோசித்து எழுதியுள்ளேன்.எனக்கு மிகவும் பிடித்தமான சப்ஜெக்ட் ‘நியூட்ரிஷன்’. நம் நாட்டில் மட்டுமன்றி பல வெளிநாடுகளிலும் விஞ்ஞானிகள் ஆய்வுகள் நடத்தி, முடிவுக்கு வந்ததை நிரூபித்ததை பொதுமக்கள் அறியும்படி பகிர்வார்கள். அது பலரால் பின்பற்றப்படும் நிலையில், நிறைய வருடங்கள் கழிந்தபிறகு, வேறு ஒருவர் ஆராய்ச்சிகள் செய்து, முதலாமவர் சொன்னது, முழுக்க முழுக்கத் தவறு என்பார்.ஆனால், நம் நாட்டில் நம் முன்னோர் தந்த பொக்கிஷமாக இன்றுவரை போற்றப்படுவது, ஆயுர்வேதம். இப்பூமியில் முதலில் தாவரங்களைப் படைத்த பிறகே இறைவன் மனிதர்களைப் படைத்தான்!ஒரு சமயம் பார்வதிக்கு பரமேஸ்வரன் உபதேசம் செய்வதைக் கேட்ட, மகரிஷிகளான காஸ்யபர், பரத்வாஜர், வசிஷ்டர், கௌதமர், சுஸ்ருதர், ஆத்ரேயர், சரகர், பராசரர் உள்ளிட்டோர் உலக நலன் கருதி நமக்கு அளித்ததே ‘ஆயுர்வேதம்’.இது வெறும் வைத்திய நூல் மட்டுமல்ல, அதோடு சேர்ந்தே ‘சூப சாஸ்திரம்’ என்ற பல சமையல் நூல்களையும் உண்டாக்கினர். பஞ்ச நதிகளினாலான இந்தச் சரீரத்தை போஷிக்க, நோய் முதலானவை அணுகாமல் பாதுகாக்க என்ன செய்யவேண்டும் என அந்நூலில் தந்தார்கள்.அவற்றில் வெகு சிலவற்றை மட்டும்தான் (விஞ்ஞானம் நிரூபித்து இருப்பதை மட்டும்தான்) உலகளவில் இன்றுவரை நடைமுறையில் செயல்படுத்துகின்றார்கள். அதில் ஒன்றுதான் ‘விரதம் இருப்பது’ (Fasting). இது பற்றி கடந்த இரண்டு அத்தியாயங்களில் விரிவாக பார்த்தோம்.நமது உடலை ‘வாதம்’, ‘பித்தம்’, ‘கபம்’ என்று மூன்று வகையாக முதலில் பிரித்தார்கள். அதிலும் ஒன்றோடொன்று சார்ந்த உடல்களும் உண்டு. பஞ்ச பூதங்களாகிய வாயு, தேஜஸ், அப்பு, ப்ருத்வி, ஆகாசம் அளவாக தத்தம் நிலையில் நிற்கவும், ‘ஜடராக்னி’ என்னும் நெருப்பானது நமது சரீரத்தில் சமமாய் நின்று ஜொலிக்கவும், திரிகுணங்களாகிய ஸத்வம், ராஜசம், தாமஸம் ஆகியவற்றில் சத்வ குணம் மிகுந்தும் மற்றவை குறைந்தும் இருக்க நாம் நல்ல ஆகாரத்தைத் தேந்தெடுத்து உட்கொள்ள வேண்டும்.ஆனால் இன்று, கெடுதி செய்யும் உணவுகள் அதிகரித்து, மனிதனிடம் நல்ல குணங்கள் குறைந்து இருப்பதை கண்கூடாகப் பார்க்கின்றோம். அஜீரணமும் மந்த நிலையையும் சிறு வயது குழந்தைகளிடமே பார்க்கின்றோம். வியாபார நோக்கில் தரப்படும் பலவித மருந்துகள், ஜீரண மாத்திரைகள் இல்லாமல் அவர்களால் வாழ முடியவில்லை.எதனோடு எதைச் சேர்த்தால் நன்கு ஜீரணமாகும் எதையெல்லாம் தவறாகக் கலந்தால் நமது உடலில் நச்சுப் பொருள்கள் அதிகமாகும் என்றெல்லாம் விரிவாக எழுத இந்தப் பக்கங்கள் போதாது. எனவே உணவுமுறை தொடர்பாக பலரும் கேட்கும் சில கேள்விகளுக்கு மட்டுமாவது பதிலளிக்க முயலும் என்னுடைய சிறு முயற்சியே இது!1. தயிர், மோர் சாப்பிட்ட உடனே வாழைப்பழம் சாப்பிடக் கூடாது. அப்படி உண்டால், உடலில் கபம் அதிகரிக்கும். கப உடல்வாகு கொண்டவர்கள் தவிர்க்கலாம். ஒருசிலர் சிறுவயதிலிருந்து பழகியிருந்தால் அவர்களுக்கு ஒத்துக்கொள்ளலாம். மோரில் சேர்க்கும் இஞ்சி, சுக்கு, பெருங்காயத்தூள் ஓரளவு உதவும்.2. அசைவ உணவான மீன், இறைச்சி, கருவாடு சாப்பிடும்பொழுது பால், தயிர், மோர் சாப்பிடக்கூடாது. இதனால் தோல் சம்பந்தப்பட்ட வியாதிகள் வரும் வாய்ப்புகள் அதிகம்.3. காலையில் வெறும் வயிற்றில் காபி, தேநீர், குடிக்கக் கூடாது. சிறு வயதிலிருந்து குடித்து பழகியவர்கள் தவிர பலருக்கு அது ஒத்துக்கொள்வது இல்லை. பித்த உடல் இருந்தால், பித்த நீர் சுரப்பு அதிகமாகும். அதனால் சில நச்சுப் பொருள்கள் ரத்தத்தில் கூடுதலாகும். ஒரு சிலர் அதைத் தவிர்க்க, காபியுடன் ஓரிரு பிஸ்கட் சாப்பிடுகிறார்கள். அதுவும் அவர்களுக்கு ஒத்துக் கொண்டதாலேயே செய்கின்றார்கள்.4. தர்பூசணி, கிர்ணிப்பழம், முலாம் பழம் உள்ளிட்டவை காரத்தன்மை கொண்டவை. உண்ட உடனே செரிமானமாகும். அதோடு சமைத்த உணவை சேர்த்துச் சாப்பிடக்கூடாது. எல்லாமே ஒன்று சேர்த்தால் செரிமானம் தாமதமாகும். அதனால் ஜீரண மண்டலப் பிரச்னைகள் அதிகமாகும். உள்ளே உறிஞ்சப்படாமல் மாவுத்தன்மை அதிகமாகும். இதைப் போன்ற பழங்களுடன் பால், முட்டை, பொரித்த உணவுகள் சாப்பிடக் கூடாது. இப்படி ஒன்று சேர்ந்தால் நமது ஜீரண மண்டலத்தில் நச்சுக் கழிவுகள் வெளியேறாமல் பிரச்னைகளை ஏற்படுத்தலாம்.5. சமையலுக்கு தேன் உபயோகிக்கக் கூடாது. அப்படியே உட்கொண்டால்தான் அது மதுரமாகும். சமைத்தால் மெழுகு போலாகி, ரத்தக் குழாயில் படியும். தேனும் நெய்யும் சம அளவில் சேர்க்கக் கூடாது.6. சூடான பானங்கள் குடிக்கும்பொழுது மாம்பழம், சீஸ், மீன், அசைவம், தயிர் போன்றவற்றை உடனே சாப்பிடக் கூடாது.7. சுண்டல் வகைகளில் பீன்ஸ் போன்றவற்றில் புரதம் அதிகம் என்று அதோடு முட்டை, பால், சீஸ், தயிர், பழங்கள் சேர்த்து சாப்பிடுகின்றார்கள். ஆயுர்வேதத்தின்படி வெவ்வெறு வகை புரதம் ஜீரணமாக வெவ்வேறு விதமான சுரப்புகள் உண்டாகும். ஒரே வகையில் இருந்தால்தான், ஜீரண அமிலம் சரிவர சுரக்கும்.8. நெய்யை உணவில் முதலில் சாப்பிட்டால் நமது வயிற்றில் அக்னியை சரிவர உருவாக்கி நன்கு ஜீரணமாக உதவும். அதோடு பழங்கள் உண்டால், அது அக்னியைக் குறைக்கும். இரண்டும் முரண்பாடான உணவாகும்.9. பலப்பல காய்கறிகள் ஒன்று சேர்ந்து சமைத்தால் அதோடு சேர்க்கும் இஞ்சி, உப்பு போன்றவை அதைச் சமன்படுத்தும். நமது சமையலறை அஞ்சறைப் பெட்டியில் உள்ள மருந்தாகும் உணவுப் பொருள்கள் உணவில் சேரும்பொழுது ஜீரணப் பிரச்னைகள் வராமலிருக்க உதவும்.10. காரத்தன்மையுள்ள பச்சையான காய்கறிகளை ‘சாலட்’ போல செய்து சாப்பிட்டால், சுலபமாக ஜீரணமாகும். அதோடு சமைத்த உணவை சேர்ந்தே சாப்பிட்டால் அமிலத்தன்மை, காரத்தன்மை வெவ்வேறு நேரம் எடுத்துக்கொள்ளும். அதனால் வயிற்றில் குழப்பம் ஏற்பட்டு, வயிற்றுப் பொறுமல், அஜீரணத்தை ஏற்படுத்தும்.11. பழைய சாதத்தை புதிதாக சமைத்த உணவோடு சேர்த்து சாப்பிடக்கூடாது. நொதித்த, லேசாகப் புளித்த உணவு நமக்கு சுலபமாக ஜீரணமாகி, நல்லதைச் செய்யும் பாக்டீரியாக்கள் சிறுகுடலில் பல்கிப் பெருக உதவும். புதிய உணவுடன் ஒன்று சேர்ந்தால் அது, கெடும்.12. தவறான உணவு ஒன்று சேர்வதால் ஒவ்வாமை ஏற்படுத்தும் தன்மை அதிகமாகும்.13. உருளைக்கிழங்கின் வாய்வைப் போக்க அதோடு சிறிதே மிளகுத்தூளும் நெய்யும் சேர்க்கலாம். காபி அருந்தும்போது, பொரித்த உருளைக்கிழங்கு சாப்பிட்டால், உடலில் வாய்வு அதிகரிக்கும்.14. தானியங்களை சமைத்து சாப்பிடும் பொழுது கூடவே பழங்கள் உண்ணக் கூடாது. பழங்கள் சீக்கிரம் ஜீரணமாகும், உணவு தானியங்கள் செரிமானமாக நேரம் எடுக்கும்.15. எலுமிச்சையோடு தக்காளி, தயிர், வெள்ளரி, பால் ஆகியவை சேர்க்கக் கூடாது என்கிறது ஆயுர்வேதம். எலுமிச்சையின் முழுப் பயனும் நமக்குக் கிடைக்காமல் போகலாம்.16. பப்பாளியோடு பால், தயிர் சேர்த்து ஸ்மூத்தி செய்கிறார்கள். இவை இரண்டையும் ஒன்று சேர்த்தால் வெவ்வெறு குணம் உடையதால் ஒவ்வாமை ஏற்படலாம். இதே போல வாழைப்பழம், அன்னாசி இரண்டையும் சேர்ப்பதைத் தவிர்க்கலாம். அதற்குப் பதிலாக தேங்காய்ப்பால், பாதாம் பவுடர் வேறு ஏதாவது கொட்டை வகைகள் சேர்க்கலாம்.17. ஆப்பிளோடு சீஸ் சேர்த்து செய்யும் ‘சாலட் மிக்ஸ்’ பிரபலம். பலரும் விரும்பி சாப்பிடும் ஒன்று. இதையும் ஒன்று அல்லது இரண்டு துண்டுகள் சாப்பிட்டால் எந்தப் பிரச்னையும் வராது. அதிகமாக சாப்பிட்டால் ஒவ்வாமை வர வாய்ப்புகள் அதிகம்.18. சமோசா, பஃப் போன்ற பொரித்த உணவுகள் சாப்பிட்ட பிறகு ஜில்லென்ற ஐஸ்க்ரீம் போன்றவை தவிர்க்கப்பட வேண்டும். நமது ரத்தக்குழாயில் அதிக கொழுப்பு சேரும். அதனால் இதய நோய்க்கு அடிகோலும். என்றோ ஒரு நாள் சாப்பிட்டால் எதுவுமில்லை; அடிக்கடி சாப்பிடுவது தவிர்க்கப்பட வேண்டும். சூடான பானம் குடிக்கலாம்.19. நூடுல்ஸ், பாஸ்தா போன்றவை மந்த நிலை ஏற்படுத்தும், ஜீரணமாகாது. குறைந்தபட்சம் நாலரை மணி நேரம் ஆகலாம். அதனோடும் பழங்கள் சாப்பிடக்கூடாது. சாலட் போன்ற பச்சைக் காய்கறிகள் சாப்பிடுவதும் வயிற்றில் குழப்பம் ஏற்படுத்தும். அதோடு கோலா போன்ற பானங்கள் குடித்தால் அதிகமான நச்சுகளை உருவாக்கும்.20. வெளிநாடுகளுக்கு செல்லும் பொழுது Continental Breakfast என்று வைத்திருப்பார்கள். அங்கு பலரும் பாலில் கார்ன்ஃப்ளேக்ஸ் போட்டு சாப்பிட்டு, ஆரஞ்சு ஜூஸும் குடிப்பார்கள். கடைசியில் காபியும் குடிப்பார்கள். இது இரண்டும் எதிரெதிர் குணமுடையவை. சரிவர குடலில்உறிஞ்சப்படாது. அதிக நச்சுகளை உருவாக்கும். ஆரஞ்சும் பாலும் ஒரே நேர உணவில் கூடாது. காபியும் இதோடு குடித்தால் வாயுத்தன்மை அதிகம் ஏற்படும்.21. பச்சைக் காய்கறிகள் சேர்த்த ‘சாலட்’ சாப்பிடும் பொழுது பழ சாலட் தவிர்க்கப்பட வேண்டும். காய்கறிகள் சாப்பிடும் பொழுது செல்கள் உற்பத்திக்கு உதவும். பழங்கள் நச்சுகளை வெளியேற்ற உதவும். வெவ்வேறு நேரம் சாப்பிடுவது நல்லது.நல்ல உணவுப் பழக்கத்தினால் நமக்கு ஜீரண மண்டலம் நன்கு வேலை செய்யும். உமிழ்நீரோடு சேர்த்து நன்றாக மென்று உண்ணும் பொழுது நன்றாக ஜீரணமாகும். ‘பசித்துப் புசி’ என்பதை நாம் நினைப்பதே இல்லை. நேரம் தவறி சாப்பிடுவதும் நமக்குப் பலவித வியாதிகள் வர வழிவகுக்கும். நம் நாட்டு உணவுகள் நமக்கு நல்லதை செய்யும்.நமக்கு உள்ளே இருக்கும் மரபணுக்களுக்கு காலம் காலமாக பலவற்றை பொதிந்து வைக்கும் திறன் உள்ளது. அதை மாற்றாமல் இருந்தால் பல தலைமுறைகள் ஆரோக்கியமான வாழ்க்கை வாழலாம். மொத்ததில், நாம் தெரிந்து கொள்ள வேண்டியது, நமது உடலுக்கு ஒத்துக்கொள்ளும் உணவுகளை மட்டும் சாப்பிட்டால் நமக்கு நல்லதே நடக்கும்.ஒவ்வொரு உணவுக்கும் பொருளுக்கும் ஒரு தோஷம் இருக்கும். அதற்கேற்றாற்போல ஒன்று சேர்க்க வேண்டும். தவறாகச் சேர்த்தால் பாதிப்பு நமக்கு மட்டுமல்ல, நமது அடுத்த சந்ததியினர் பிறக்கும் பொழுதே பல உணவுகள் அவர்களுக்கு ஒவ்வாமையை ஏற்படுத்தும் எனபதை கண்கூடாக இப்பொழுதே பார்க்கின்றோம். இதைப் பற்றி பலரும் தெரிந்து கொள்ள ஆர்வம் காட்ட வேண்டும். நம் ஆரோக்கியம் நம் கையில்தான். ருசியாக சாப்பிடலாம்... ஆனால், ஒருபோதும் தவறாகச் சாப்பிடக் கூடாது!.இஞ்சித் துவையல்50 கிராம் இஞ்சியை தோலெடுத்து, வட்ட வடிவில் நறுக்கவும். கால் தேக்கரண்டி எண்ணெ¬யை சூடாக்கி, 4 சிகப்பு மிளகாய், 2 தேக்கரண்டி கடலைப் பருப்பு, ஒன்றரை தேக்கரண்டி உளுந்து சேர்த்து நன்கு வறுத்து தட்டில் கொட்டவும். இஞ்சியை தனியாக வதக்கி எடுக்கவும். எல்லாவற்றையும் ஒன்று சேர்த்து, சிறிதளவு புளி, தேவையான அளவு உப்பு சேர்த்து கரகரப்பாக அரைத்து எடுக்கவும். வாணலியில் சிறிதளவு எண்ணெய் விட்டு, கடுகு தாளித்து சேர்க்கவும்.குறிப்பு: இந்தத் துவையலை சிறிதளவு சாப்பிட்டாலே, உண்ட உணவு நன்றாக செரிமானம் ஆகும்!.கீரை மசியல்மிகப்பொடியாக நறுக்கிய கீரையோடு, நறுக்கிய வெங்காயம், பச்சைமிளகாய், சிறிதளவு மாங்காய், 2 கத்திரிக்காய் சேர்க்கவும். பின்னர் சிறிதே புளி, உப்பு, மிளகாய்த்தூள், 1 பல் பூண்டு, 1 தக்காளி சேர்த்து நன்றாக வேகவைத்து மசிக்கவும். வாணலியில் சிறிதளவு எண்ணெய் விட்டு, கடுகு, சீரகம், வெந்தயம், பெருங்காயத்தூளை தாளித்து சேர்க்கலாம்.குறிப்பு: கீரையோடு பனீர், சீஸ், தயிர் போன்றவற்றை சேர்த்தால், ஜீரணமாவதில் தாமதம் ஏற்படும். கால்சியம் ஆக்ஸலேட் போன்ற கற்கள் உருவாகி, சிறுநீரகத்தில் சேரும் வாய்ப்புகள் அதிகம். (சமையல் ரகசியங்கள் தொடரும்) தொகுப்பு: ஜெயாப்ரியன்படம்: கே.கஸ்தூரி