71. போற்றிப் பாடடி பெண்ணே : சிரஞ்சீவியாக வாழும் அந்தச் சித்தர்!

கற்காலம் தொட்டு இக்காலம் வரை கலைநயம் என்றால் கல் சிற்பங்களும் கோயில் கோபுரங்களும் ஓவியங்களும்தான் நம் நினைவுக்குவரும். அதிலும், நம் அனைவருக்கும் தெரிந்த சிற்பங்கள் பெரும்பாலும் கடவுளர் உருவங்கள்தான்.மாமல்லபுரம் பக்கத்தில் கருங்கல் சிலை வடிக்கும் சிற்பக்கூடங்கள் ஏராளமாக உள்ளன. அங்கு பெரும்பாலும் கடவுள் சிற்பங்கள்தான் வடிக்கப்படுகின்றன. சில சமயங்களில் கடவுளர் அல்லாத கலைநயமிக்க சிற்பங்களும் வடிக்கப்பட்டு, வீடுகளுக்கும் வெளிநாடுகளுக்கும் கலைக்கூடங்களுக்கும் அவை அனுப்பி வைக்கப்படுகின்றன.தென்னாட்டில் கருங்கல் கடவுளர் சிற்பங்களைப் போலவே, வடநாட்டில் பெரும்பாலும் வெள்ளைப் பளிங்கில் செய்யப்பட்ட கடவுள் சிற்பங்களை கோயில்களில் காணலாம். ஒரிசாவில் பூரி ஜெகந்நாதர் ஆலயத்தில் மரத்தாலான கிருஷ்ணர், பலராமர், சுபத்திரையின் உருவங்களைக் காணலாம். பூரி ஜெகந்நாதரைப் பார்க்கும் வாய்ப்பு எனக்கு மூன்றுமுறை கிட்டியது. பூரி கோயில் அழகோ அழகு! கிருஷ்ணரும் ஜெகந்நாதரும் அவருடைய சகோதர சகோதரிகளும் அதைவிட கொள்ளை அழகு!!.அதுபோல தமிழ்நாட்டில் கல்லிலே மட்டும் கலைவண்ணத்தை நிறுத்தாமல், பல பொருள்களில் கலைநயத்தோடு வடிவமைக்கப்பட்ட சுவாமி சிலைகளை காணலாம். குறிப்பாக, பழனி முருகன் கோயிலில் நவபாஷாணத்தால் செய்யப்பட்ட பழனி முருகன் சிலை. போகர் என்னும் சித்தர், மிகவும் வீரியம் வாய்ந்த, ஒன்பது வகையான மூலிகைப் பொருள்களைக்கொண்டு உருவாக்கிய சிலையே பழனி முருகன் சிலை!ஆயிரமாயிரம் ஆண்டுகள் கழித்தும் இன்றும் காலத்தால் அழியாதப் பரம்பொருளாக பழனி முருகன் தண்டாயுதபாணியாகக் காட்சியளிக்கிறார் என்றால், இதை இன்றைய அதிசயம் என்று சொல்லாமல் வேறு என்ன சொல்வது? நான் மதுரை பயணப்படும்போதெல்லாம் பழனி முருகனை தரிசனம் செய்துவிடுவேன். அதுவும் தவக் கோலம், ஆண்டி கோலம், ராஜ அலங்காரம் என எல்லா அருட்கோலங்களிலும் பழனி தண்டாயுதபாணி தெய்வத்தைத் தரிசித்திருக்கிறேன். பேரக் குழந்தைகளுக்கான பிரார்த்தனையை கூட அண்மையில் பழனியில்தான் நிறைவு செய்தேன்..அதேபோல சிறப்பு வாய்ந்த இன்னொரு சிற்பம், காஞ்சிபுரத்திலுள்ள உலகளந்த பெருமாளின் சிற்பம். ஊரகத்தான், காரகத்தான், நீரகத்தான், கார்வண்ணப் பெருமாள் என நான்கு திவ்ய தேசங்களை உள்ளடக்கிய சிறப்பு தலம். இதில் ஒரு காலை தூக்கி விண்ணிலும் மறு காலை நிலத்திலும் ஊன்றி, மூன்றாம் அடிக்கு எங்கே காலை வைப்பது? என்று மகாபலி மன்னனை வினவும் விதமாக கால்களை நோக்கி விரல்களை காட்டும் விஷ்ணு பகவானின் விஸ்வரூப தோற்றமே உலகளந்த பெருமாளின் பிரமாண்டமான அழகு தோற்றம். பால், தயிர், நீர் அபிஷேகம் தினமும் செய்யமுடியாத அளவுக்கு மிகப்பெரிய சிற்பம். பூமாலைகளும் பாமாலைகளும் அவருக்கு நித்திய அபிஷேகம். இந்தக் கோயிலை எவ்வாறு கட்டினார்கள், சிற்பத்தை யார் வடித்தார்கள் என்பது பல்லவ மன்னனுக்கே வெளிச்சம்!.அதே காஞ்சிபுரத்தில் பாண்டவதூதப் பெருமாள் கோயிலின் மூலவராக விஸ்வரூபக் காட்சி தரும் கிருஷ்ணரின் சுதை சிற்பம் இன்னோர் அதிசயம்! கருங்கல் அல்லது சுண்ணாம்பு, மூங்கில் குச்சிகள் ஆகியவற்றை தேன் மற்றும் பல மூலிகைச்சாறுகளுடன் பிசைந்து கூழாக்கி, அதை மூங்கில் மேல் பூசி, 26 அடி உயரத்துக்கு அமைக்கப்பட்ட கிருஷ்ணர் சிலை அது. அமர்ந்த கோலத்தில் அழகிய வேலைப்பாடுகளுடன்கூடிய பஞ்சகச்சம் கட்டிய கிருஷ்ணர் சிலைக்குத் தைலக்காப்பு மட்டுமே சாற்ற முடியும்..அதுபோல மதுரை மாநகரிலுள்ள அழகர் கோயிலின் உற்சவரான கள்ளழகர். அவரைக் கண்டால் நான் அப்படியே பக்திப் பரவசத்தில் பாய்ந்தோடிவிடுவேன். உயர உயரமான கோயில் படிகளின் மீது குதித்து குதித்துத் தாண்டி ஓடுவேன். அந்த சுந்தரராசப் பெருமாள் அவ்வளவு அழகாக இருப்பார். நின்ற கோலத்தில் உயரமாக நிற்கும் அழகரை காண கண் கோடி வேண்டும். அந்தச் சுதை சிற்பங்களின் பெரியப் பெரிய பாதங்களில் சரணாகதி அடைந்துவிடமாட்டோமா? என ஏங்கவைக்கும் அளவுக்கு அந்தக் கலை வண்ணம் அழகோ அழகு!செங்கல்பட்டு மாவட்டத்தில் திருப்போரூர் முருகனை அடிக்கடி தரிசனம் செய்யும் பாக்கியம் அண்மைக்காலமாகக் கிட்டி வருகிறது. அங்கு இருப்பது பழைய கோயில். உள்ளே இருக்கும் முருகன் சிலையோ, பனைமரத்தடி வேரில் புதைந்துக் கிடக்கிறது. திருச்செந்தூர், திருப்பரங்குன்றம், திருப்போரூர் என்ற மூன்று இடங்களில்தான் வீரவேல் முருகன், போர் புரிந்ததாக வரலாற்று கதைகள் உள்ளன. மூலவர் பனைமரத்து வேரில் புதைந்து கிடப்பதால் பால், தயிர் அபிஷேகம் கிடையாது. புணுகு சாற்றப்படுகிறது. கனமான பூமாலைகளுக்கு மாற்றாக வெறும் அரளிப்பூச்சரம் மட்டுமே சாற்றப்படுகிறது. ஏனென்றால், முருகன் சிலை கற்சிலை அல்ல, பனைமரத்தடி வேர் என்பதால் உருவமும் மொழுமொழுவென்று இருக்கும்..ஆனால், அங்கு ஏற்படும் உடல் அதிர்வானது நம் கண்களில் தாரைத்தாரையாகக்- கண்ணீரை வரவழைத்துவிடும். பக்திக்கும் உண்டோ அடைக்கும் தாழ்? அந்தச் சிலையைப் பார்த்தபோது என்னுடைய கணவர் மருத்துவர் அன்புமணிக்கும் அதே அதிர்வலைகள் ஏற்பட்டு கண்கள் கலங்கி கண்ணீர் வழிந்தோடியது. எப்பேர்ப்பட்ட மன உறுதி மிக்கவருக்கும் ஓர் உன்னத உணர்வு திருப்போரூர் முருகனிடம் ஏற்படும் என்பதை அன்று நான் கண்கூடாகக் கண்டேன்.நாமக்கல் மாவட்டம் திருச்செங்கோடு அர்த்தநாரீசுவரர் கோயிலிலுள்ள முருகனிடம்கூட, அந்த அதிசயம் நிகழ்வதை நானே அனுபவித்திருக்கிறேன். ஆம்! திருச்செங்கோடு அர்த்தநாரீசுவரரும் முருகக்கடவுளும் கற்சிலைகள் அல்ல, சுயம்பு உருவங்களே! கொம்பு போல இருக்கும். சந்தனம் பூசப்பட்டு ஒரு பக்கம் வேட்டி, ஒரு பக்கம் புடவை சாற்றப்பட்டு இருக்கும். ‘செங்கோட்டு வேலவர்’ என்னும் முருகப்பெருமானும் அவ்வாறே காட்சி கொடுப்பார். சிவபெருமான் என்றாலே லிங்கமாகக் காட்சி தருவார். இங்கே சுயம்பு உருவமாக வெள்ளை பாஷாணத்தால் ஆன நெடிய உருவத்தில் அர்த்தநாரீசுவரராக பாகம் பிரியாளும் செங்கோட்டு வேலவரும் காட்சி அளிப்பார்கள்..மற்றோர் அழகிய பெருமாளை எங்கள் ஊர் தைலாபுரம் அருகில் விழுப்புரம் மாவட்டத்திலுள்ள கிளியனூரில் கண்டேன். அமர்ந்த கோலத்திலுள்ள அந்த ஆதிகேசவ பெருமாளுக்கு வருடத்துக்கு ஒருமுறை தைலக்காப்பு மட்டுமே சாற்றப்படும். ஏனென்றால், பெருமாள் சிலைமீது நவபாஷாண வர்ணம் பூசப்பட்டிருக்கிறது. ஆதிகேசவ பெருமாளுக்குத் தைலக்காப்பு சாற்றும் கைங்கரியத்தைச் செய்யும் பாக்கியம் எனக்கும் ஒரு முறை கிடைக்கப்பெற்றது. அதுவும் புராதன கோயில், ஒன்பதாம் நூற்றாண்டு கால பல்லவர் கோயில்.நாம் சோழர்களுக்கும் பாண்டியர்களுக்கும் பல்லவ அரசர்களுக்கும் நன்றிக்கடன் பட்டிருக்கிறோம். இப்படிப்பட்ட அதிசய கோயில்களை கட்டி, நமக்கு வழிகாட்டிய அரசர்களுக்கு நாம் நன்றிசொல்லிக் கொண்டே இருப்போம். இப்படிப்பட்ட வியத்தகு அதிசயங்களை வெளிநாடுகளில் சென்று தேட வேண்டியதில்லை. நம்முடைய தமிழ்நாட்டிலேயே காணலாம். பாரிஸ் ஈஃபில் டவர், சாய்ந்த பீஸா நகர இத்தாலிய கோபுரம் போன்ற அதிசயங்களைவிட தமிழ்நாட்டின் கோயில் அதிசயங்கள் என்னை பிரமிக்க வைக்கின்றன. சித்தர்கள் மீதும் நம்மை ஆண்ட மன்னர்கள் மீதும் மரியாதையும் நன்றியும் நிறையவே கூடுகிறது! கல்லிலே மட்டும் கலைவண்ணத்தைக் கண்டவன் இல்லை தமிழன், இகத்திலுள்ள எல்லாவற்றிலும் கலைவண்ணத்தைக் கண்டு இறைபக்தியை வளர்த்த நம் முன்னோருக்குப் பல்லாயிரம் நன்றிகள்!(போற்றுவோம்)- முனைவர் சௌமியா அன்புமணி

71. போற்றிப் பாடடி பெண்ணே : சிரஞ்சீவியாக வாழும் அந்தச் சித்தர்!

Related Stories