கில்லாடி லேடி : பார்வையற்ற முதல் இந்திய பின்னணிப் பாடகி! - வைக்கம் விஜயலட்சுமி

‘சொப்பன சுந்தரி நான்தானே!’ என்று தம்முடைய காந்தக் குரலால் கவனம் ஈர்த்தவர் பின்னணிப் பாடகி வைக்கம் விஜயலட்சுமி. மலையாளம், தமிழ் ஆகிய இரு மொழிகளிலும் இவர் பாடிய ஏராளமான பாடல்கள் பட்டி தொட்டியெங்கும் ஹிட்டடித்தன. வீணை மீட்டுவதிலும் இவர் வல்லவர்!‘திரைப்படத் துறை என்பது எளிதில் திறக்க முடியாத கதவுகளைக் கொண்ட இரும்புக் கோட்டை!’ என்பார்கள். அதில் நுழைந்து, வெற்றிக்கொடி நாட்டி வரும் வைக்கம் விஜயலட்சுமி, பார்வையற்ற மாற்றுத்திறனாளி!2013ஆம் ஆண்டு வெளியான ‘செல்லுலாய்ட்’ என்ற படம், ‘மலையாளத் திரைப்படத் துறையின் தந்தை’ என்றழைக்கப்படும் ஜே.சி.டேனியலின் வாழ்க்கையை அடிப்படையாக வைத்து எடுக்கப்பட்டதாகும். கமல் என்பவர் இயக்கிய இந்தப் படத்திற்கு கேரள அரசு, சிறந்த திரைப்படம் மற்றும் சிறந்த நடிகருக்கான விருது உள்பட ஏழு விருதுகளை அளித்திருக்கிறது. இந்தப் படத்தில்தான் வைக்கம் விஜயலட்சுமி பாடிய முதல் பாடலும் இடம்பெற்றது.முரளிதரன் - விமலா தம்பதியின் ஒரே மகள் இவர். வைக்கத்தில் உதயணபுரம் கோயிலுக்கு அருகிலிருந்த குடியிருப்பு ஒன்றில், 1981ஆம் ஆண்டு அக்டோபர் 7ஆம் தேதி விஜயதசமி தினத்தன்று பிறந்தவர். தங்கள் மகள் பிறந்த கொஞ்ச நாட்களிலேயே அவருக்குப் பார்வைக் குறைபாடு இருப்பதை உணர்ந்த பெற்றோர், சென்னைக்குக் குடியேறினர்.சிறு வயது முதலே திரைப்படப் பாடல்களைக் கேட்பதில் விஜயலட்சுமிக்குப் பேராவல் இருந்து வந்திருக்கிறது. ஒரு பாடலைக் கேட்டால், அதை அப்படியே நுட்பமாகத் திரும்பப் பாடும் ஆற்றலும் இவருக்கு இருந்துள்ளது. பாடகர் ஜேசுதாஸ், மகாராஜபுரம் சந்தானம் பாடிய பாடல்களின் ஒலிநாடாக்களை பெற்றோர் வாங்கிக் கொடுத்துள்ளனர். அவற்றை ஆர்வமுடனும் உன்னிப்பாகவும் கேட்பாராம் விஜயலட்சுமி.ஒரு சமயம் இவருடைய தந்தை, ‘ஒற்றைக் கம்பி வீணை’ ஒன்றைப் பரிசளித்துள்ளார். அதை மீட்டுவதில் விஜயலட்சுமி நாளடைவில் தேர்ச்சி பெற்றார். ஓராண்டுக்குள்ளாகவே 100 ராகங்களுக்கு மேல் கற்றுக்கொண்டார். தாமாகவே இசையமைக்கும் திறமையையும் வளர்த்துக்கொண்டார். அதுவரை முறையாக யாரிடமும் விஜயலட்சுமி சங்கீதம் கற்றுக்கொள்ளவில்லை என்பது குறிப்பிடத்தக்கது.பத்தாண்டு காலத்துக்கும் மேலாகத் திரைப்படங்களில் பாடல்களைப் பாடிவந்த இவர், தொலைக்காட்சி நிகழ்ச்சிகளிலும் பங்குபெற ஆரம்பித்தார். ‘நம்ம மதுரை சிஸ்டர்ஸ்’ என்ற தொடரில் இவருடைய காந்தக் குரல் கணீரென ஒலிக்க ஆரம்பித்தது..‘‘அந்தப் பாடல் வரிகள் பெண்களுக்கான அதிகாரம் பற்றியது. சித்து குமார் அமைத்திருந்த இசை எனக்கு மிகவும் பிடித்தது. வைக்கம் கௌரி ஸ்டூடியோவில் அந்தப் பாடலை நான் பதிவு செய்து இணையம் மூலம் அனுப்பினேன்!’’ என்று மகிழ்ச்சியாக சொல்கிறார் விஜயலட்சுமி.2016ஆம் ஆண்டு, பஹ்ரைனில் பணியாற்றும் சந்தோஷ் என்பவருடன் விஜயலட்சுமிக்கு நிச்சயதார்த்தம் நடைபெற்றது. இவருடைய பார்வைக் குறைபாட்டை சந்தோஷ் குத்திக் காட்டியதாலும், மேடை நிகழ்ச்சிகளில் கலந்துகொள்ளக்கூடாது என நிபந்தனை விதித்ததாலும் திருமணத்தை நிறுத்திவிட்டார் விஜயலட்சுமி.2018ஆம் ஆண்டில், பல குரல் மன்னனான அனூப் என்பவரைத் திருமணம் செய்துகொண்டார். ஆனால், அந்த மண வாழ்க்கை துயரம் நிரம்பியதாக இருந்து வந்துள்ளது. விஜயலட்சுமியையும் அவர் பாடும் பாடல்களையும் தரக்குறைவான முறையில் மட்டம் தட்டிக்கொண்டே இருப்பாராம் அனூப். தவிர, பெற்றோரிடமிருந்து விஜயலட்சுமியைப் பிரித்திருக்கிறார். அவர்களைச் சந்திக்கக்கூட அனுமதி மறுத்திருக்கிறார்.பாடுவதையும் மகிழ்ச்சியையும் தம்முடைய வாழ்க்கையில் இழக்க விஜயலட்சுமி விரும்பவில்லை. சேடிஸ்டான கணவரின் செயல்பாடுகளால் இந்தப் பாடகியின் பார்வையற்ற கண்களில் கண்ணீர் வழிந்தோடிய வண்ணம் இருந்திருக்கிறது. எனவே விஜயலட்சுமியே விரும்பி மணமுறிவு பெற்றார்.‘‘தாங்கிக்கொள்ளும் வரை பல் வலியைப் பொறுத்துக்கொள்ளலாம். தாங்க முடியாமல் போகும்போது பல்லைப் பிடுங்குவதைத் தவிர வேறு வழியில்லை. பெற்றோரும் என்னுடைய விருப்பப்படியே செயல்படுமாறு சொல்லிவிட்டார்கள். எனவே நான் சமரசம் செய்துகொள்ள விரும்பவில்லை’’ என்ற விஜயலட்சுமி, கடந்த 2021ஆம் ஆண்டு விவாகரத்து பெற்றார்.2012ஆம் ஆண்டு ‘செல்லுலாய்ட்’ படத்தில் இவர் பாடிய, ‘காற்றே காற்றே’ பாடலுக்காக கேரள அரசின் விருது கிடைத்திருக்கிறது. 2013ஆம் ஆண்டு, ‘நாடன்’ படத்தில் இவர் பாடிய ‘ஓற்றைக்கு படுன்ன’ பாடலுக்காக சிறந்த பாடகிக்கான விருதை கேரள அரசு வழங்கியது. அதே ஆண்டில், மெல்லிசைக்காக வழங்கப்படும் ‘சங்கீத நாடக அகாடமி’ விருதையும் விஜயலட்சுமி பெற்றார்.2022ஆம் ஆண்டு, ‘கேரளா ஸ்ரீ’ என்ற விருது இவருக்குக் கிடைத்திருக்கிறது. இது கேரளா அரசால் குறிப்பிட்ட அளவு சாதனை புரிந்தவர்களில் சிலருக்கு வழங்கப்படும் மிக உயரிய விருதாகும். இவர் பெற்ற இன்னும் பல விருதுகளின் பட்டியல் மிக நீண்டது!அமெரிக்காவில் இருக்கும் சர்வதேச தமிழ்ப் பல்கலைக் கழகம் இவருக்கு கௌரவ டாக்டர் பட்டம் வழங்கிச் சிறப்பித்திருக்கிறது. ஏராளமான திரைப்படப் பாடல்களைப் பாடியிருக்கும் இவர், ‘ஸ்வாமி சரணம்’ மற்றும் ‘ஏழு தேசங்களுக்கு மகளே’ ஆகிய திரைப்படங்களிலும் நடித்திருக்கிறார். -லதானந்த்