கில்லாடி லேடி: கேரளா டூ நார்த் இண்டியா! புல்லட்டில் பறந்த அம்பிகா !

பொதுவாகவே நாற்பது வயதைக் கடந்தாலே பெண்களுக்கு ‘மெனோபாஸ்’ நிலை ஏற்பட்டு உடலளவில் பலவீனமாகி வீட்டிலேயே முடங்கிவிடுவார்கள். ஆனால், 45 வயது நிரம்பிய பெண் ஒருவர் கேரளாவிலிருந்து வடமாநிலங்களுக்கு விழிப்பு உணர்வுப் பயணத்தை புல்லட் வண்டியில் மேற்கொண்டு வெற்றிகரமாக நிறைவு செய்திருக்கிறார்.அவர்தான் கேரளாவைச் சேர்ந்த அம்பிகா. இவருக்கும் விமானப்படையில் அதிகாரியாக இருந்த சிவராஜ் என்பவருக்கும் 1996ஆம் ஆண்டு திருமணமானது. அடுத்த வருடமே தம்முடைய கணவரை சாலை விபத்தில் பறிகொடுத்த அம்பிகாவுக்கு அப்போது 19 வயதுதான். கல்லூரியில் முதலாம் ஆண்டு படித்திருந்த அவருக்கு ‘ஆர்யா’ என்ற மூன்று மாதப் பெண் குழந்தையும் இருந்தது.புகுந்த வீட்டிலிருந்து எவ்வித ஆதரவும் இல்லை. பிறந்த வீட்டில் ஓரளவு ஆதரவு கிடைத்தது. பல்வேறு சிரமங்களுக்கிடையே குழந்தையை தனியொருத்தியாக வளர்த்து ஆளாக்கினார். திருமணத்தால் நின்றுபோன தமது படிப்பை மீண்டும் தொடர்ந்தார். படிப்பை முடித்தப் பிறகு கொச்சி தனியார் வானொலி நிலையத்தில் ரேடியோ ஜாக்கியாக பணியாற்றும் வாய்ப்பு அம்பிகாவுக்குக் கிடைத்தது..தம்முடைய 39ஆவது வயதில் புல்லட் மோட்டார் சைக்கிள் ஓட்டக் கற்றுக்கொண்டார். இந்தியாவின் பல பாகங்களுக்கும் அந்த வாகனத்திலேயே சுற்றுப்பயணம் மேற்கொண்டார். போரில் இறந்த வீரர்களின் மனைவிகளுக்கு உற்சாகமும் தன்னம்பிகையும் ஊட்டும் குறிக்கோளுடன் அவருடைய பயணம் அமைந்தது. கொச்சியிலிருந்து ஷில்லாங் அங்கிருந்து அமிர்தசரஸ் மீண்டும் டெல்லி திரும்பும் வகையில் பயணத்தை அமைத்துக்கொண்டார்.2018ஆம் ஆண்டு புல்லட் வாங்கியபோது அவருக்கு அதை ஓட்டத் தெரியாது. கேரளாவில் வெள்ளம் வேறு. காலக் கிரமத்தில் ஓட்டவும் கற்றுக்கொண்டார். தம்முடைய அந்த புல்லட் மோட்டார் சைக்கிளுக்கு ஆசையாக ‘வாசு’ என்று பெயரும் வைத்தார். அதற்கும் ஒரு காரணம் இருக்கிறது. தமக்கு ஆண் குழந்தை பிறந்தால் அதற்கு ‘வாசு’ எனப் பெயரிடுவதாக எண்ணியிருந்தாராம். ஆனால், பிறந்ததோ பெண் குழந்தை. அதனால் தமது வாகனத்துக்கு ‘வாசு’ எனப் பெயர் சூட்டிவிட்டார்.இவர் கொச்சி பண்பலை வானொலியில் 2019ஆம் ஆண்டு பணியாற்றிக் கொண்டிருந்தபோது இவருடைய மகள் சங்கணாச்சேரியில் இருக்கும் கல்லூரியில் படித்துக் கொண்டிருந்தார். மகளை அடிக்கடி பார்க்க முடியாத மன அழுத்தம், தனிமை உணர்விலிருந்து தன்னை மீட்டெடுக்கத்தான் புல்லட் மோட்டார் சைக்கிளில் சுற்றுப் பயணம் மேற்கொள்ளும் எண்ணம் இவருடைய மனதில் உதயமாகியுள்ளது.அந்த மோட்டார் சைக்கிளிலேயே கொச்சியிலிருந்து சங்கணாச்சேரிக்கு அடிக்கடி பயணம் செய்து நன்கு ஓட்டவும் கற்றுக்கொண்டார். அப்போதுதான் அவருக்கு இந்தியா முழுக்க விழிப்பு உணர்வைத் தூண்டும் வகையில் பயணம் மேற்கொள்ள வேண்டும் எனவும் தோன்றியிருக்கிறது. அதைச் செயல்படுத்தி வெற்றியும் கண்டிருக்கிறார் அம்பிகா. இவர் புல்லட் ஓட்டுவதைப் பார்த்துப் பலரும் இவர் ஓர் ஆண் என்றே நினைத்துக் கொள்வார்களாம்..கடந்த ஆண்டு ஏப்ரல் 11ஆம் தேதியன்று கேரளாவிலிருந்து பயணத்தைத் தொடங்கி யிருக்கிறார். இவர் பணியாற்றும் தனியார் வானொலி நிலையத்துக்கு இந்தியாவில் 25 கிளைகள் இருக்கின்றன. அங்கெல்லாம் சென்று தமது பயணத்தைப் பற்றி எடுத்துச் சொல்லி, தங்குமிடம் போன்ற வசதிகளைப் பெற்றுக் கொண்டார். கேரளாவிலிருந்து, சென்னை, பெங்களூரு, ஹைதராபாத், விஜயவாடா, விசாகப்பட்டினம் வழியாக வட மாநிலங்களுக்குச் செல்லும்படி இவருடைய பயண நிரல் அமைந்திருக்கிறது. கேரளாவில் அவருடைய பயணத்தை ஆரம்பித்த மூன்றாவது நாளே சென்னையில் விபத்து ஒன்றில் சிக்கிக்கொண்டார். இருந்தாலும், மனம் தளராமல் சிகிச்சை எடுத்துக்கொண்டு பயணத்தைத் தொடர்ந்தார்.45 வயதாகும் அம்பிகா தமது பயணத்தில் 75 ‘ஆகாச வாணி’ பண்பலை வானொலி நிலையங்களுக்கும் செல்லத் திட்டமிட்டிருக்கிறார். டெல்லியில் தமது கணவர் பணிசெய்த அலுவலகத்துக்குச் சென்றபோது மிகவும் நெகிழ்ந்துவிட்டார்! காரணம், கிட்டத்தட்ட 25 ஆண்டுகளுக்கு முன்னர் கொச்சியிலிருந்த தமக்கும் தமது குழந்தைக்கும் டெல்லி வருவதற்கு டிக்கெட் முன்பதிவு செய்யப்போனபோது மேற்கு டெல்லியில் சாலை விபத்தில் உயிர் துறந்த கணவரின் நினைவுகள் நிழலாடியுள்ளன.தம்முடைய விழிப்பு உணர்வுப் பயணம் பற்றி அம்பிகா சொல்கையில், ‘‘எனக்கு அதிக சிரமங்கள் இல்லை. உத்தரப்பிரதேசத்தில் ‘அக்னிபாத்’ எதிர்ப்பாளர்களால்தான் சிறு தடங்கல் ஏற்பட்டது. கடினமான வெப்பம், தொடர்ந்து பெய்த மழை, தனிமையான நெடுஞ்சாலைகள், புழுதி படர்ந்த குண்டும் குழியுமான சாலைகளை மன உறுதியோடு கடந்தேன். சுமார் 50 நாட்கள் கொண்ட என்னுடைய பயணத்தில் உத்தரப்பிரதேசம் வந்ததும் காய்ச்சல் காரணமாக இரு நாட்கள் பயணம் தள்ளிப்போனது. இறந்த ராணுவ வீரர்களின் மனைவிகளைச் சந்தித்து, அவர்களுக்குத் தைரியமும் தன்னம்பிக்கையும் அளிக்கும் வகையில் பேசி, உத்வேகம் ஊட்டி வருவது மனதுக்கு நிறைவாக இருக்கிறது. என்னுடைய பயண அனுபவங்களை டெல்லி ‘ஆல் இண்டியா ரேடியோ’ மூலமாக நேயர்களுடன் பகிர்ந்து கொண்டதில் மகிழ்ச்சி’’ என்கிற அம்பிகாவுக்கு, புகைப்படம் எடுப்பதிலும் அதற்கெனவே தனிச் சுற்றுலாக்கள் செல்வதிலும் மிகவும் விருப்பமாம்.-லதானந்த்

கில்லாடி லேடி: கேரளா டூ நார்த் இண்டியா! புல்லட்டில் பறந்த அம்பிகா !

Related Stories