நிகழ்வுகள் : காலை உணவு இருக்க, இனி கவலை இல்லை சிறார்க்கு!

‘இது செலவு அல்ல முதலீடு’ என்கிற உயரிய நோக்கத்தோடு பள்ளி சிறார்களுக்காக சமீபத்தில் துவங்கப்பட்டுள்ளது தமிழக அரசின் ‘காலை உணவுத் திட்டம்’. காலை உணவு என்பதே ஏழைக் குழந்தைகளுக்கு பெரும் கனவாக இருக்கும் நேரத்தில் இத்திட்டம், பெற்றவர்களை பெறும் ஆறுதல் கொள்ள வைத்திருக்கிறது.‘‘இத்திட்டத்தினால் சத்துமிகுந்த காலை உணவு குழந்தைகளுக்கு கிடைக்கும், மாணவர்களின் இடைநிறுத்தல்கள் குறையும், புதிதாக மாணவர்கள் அரசுப் பள்ளிகளில் சேர்வதற்கும் நல்வாய்ப்பாக அமையும்!’’ என்கிறார்கள் கல்வித் துறையினர். இத்திட்டம் குறித்து பொதுமக்கள் சிலரிடம் கருத்து கேட்டோம்..கற்றல் திறன் மேம்படும்!வெ.செங்கமலநாச்சியார்,தலைமை ஆசிரியை.‘‘ஒரு ஆசிரியர் என்கிற முறையில் இந்த சிற்றுண்டி திட்டத்தை மிகவும் மகிழ்ச்சியாக வரவேற்கிறேன். தந்தையின் ஆதரவின்றி அல்லது தந்தை இல்லாமல் தாயார் மட்டும் உழைத்து வளர்க்கும் (சிங்கிள் பேரண்ட்) குழந்தைகளுக்கு இத்திட்டம் மிகவும் பயனுள்ளதாக இருக்கும். பெரும்பாலான குழந்தைகள் காலையில் சரியாகச் சாப்பிடாமல் தான் பள்ளிக்கு வருகிறார்கள். பொதுவாக ‘பசி’ என்பது அனைவருக்குமே கவனச் சிதறலை ஏற்படுத்தும் விஷயம்தான். இனி குழந்தைகளுக்கு காலை நேரத்தில் சூடான, சுவையான சத்தான காலைச் சிற்றுண்டி வழங்குவதால், உடல் நலன் மேம்படுவதோடு கற்றலில் கவனச் சிதறல் ஏற்படாமல், அவர்களின் படிப்புத் திறன் நிச்சயமாக மேம்படும். பத்தாம் வகுப்பு வரை இத்திட்டம் நீட்டிக்கப்பட வேண்டும் என்பது பெற்றோரின் எதிர்பார்ப்பாக இருக்கிறது.’’.பிள்ளைகளுக்கு பெருமகிழ்ச்சி!ம.ஜெயமேரி, இடைநிலை ஆசிரியை.‘‘கிராமத்துப் பள்ளியில் பயிலும் ஏழை பிள்ளைகளுக்கு இத்திட்டம் எவ்வளவு அவசியம் தெரியுமா? சிவகாசியில் பிள்ளைகளின் பெற்றோர் பெரும்பாலும் பட்டாசு தொழிற்சாலைகளில் வேலை பார்ப்பவர்களும், தூய்மைப் பணியாளர்களுமே. காலையிலேயே கூலி வேலைகளுக்குப் போவதால் வீட்டில் காலை உணவாக கஞ்சியோ அல்லது பழைய சோறோதான் இருக்கும். இனி விதவிதமான சிற்றுண்டிகள் கிடைக்கும் என்பதே பிள்ளைகளுக்கு பெரும் மகிழ்ச்சிதானே? தினமும் கிச்சடி, கோதுமை உப்புமா என்ற உணவு வகைகளைத் தாண்டி, இட்லி, சுண்டல் வகைகள், பால், புட்டு போன்ற உணவு வகைகளையும் தமிழக அரசு வழங்கினால் திட்டம் இன்னமும் செம்மை பெறும். மேலும் இத்திட்டத்தில் தொய்வு ஏற்படாமலிருக்க, அடிக்கடி ஆய்வுப் பணிகளை மேற்கொள்ள திட்டம் சார்ந்த அலுவலர்களை அரசு நியமிக்க வேண்டும்.’’.இப்போதான் எனக்கு நிம்மதி!சாந்தா, பெற்றோர்.‘‘இனி ஸ்கூல்ல பசங்களுக்கு காலைல டிபன் தர்றதால என்னால நிம்மதியா வேலைக்குப் போகமுடியும். காலையில 7 மணிக்கு அவசரஅவசரமா வேலைக்கு ஓடுவேன். காலை நேரத்துல பல நாள் பட்டினியாதான் பிள்ளைங்க போவும்ங்க. ஒரு சில நாள் சமைச்சு வச்சிட்டுப் போனாலும், குழந்தைங்க சாப்பிடாம போறதும் உண்டு. சில நாள் காசு இல்லாட்டா சமைக்க மாட்டோம். இனி பசங்கள சீக்கிரமாக ரெடி பண்ணி அனுப்பினா மட்டும் போதும்னு நினைக்கறப்ப நிம்மதியா இருக்கு. இனிமே வேலை நேரத்துல, ‘ஐயோ... குழந்தைங்க சாப்பிட்டாங்களா? இல்லையா?’ன்னு கவலைப்படத் தேவையில்லை.’’. எம்புள்ள பசியில்லாம படிக்கும்!மகாலட்சுமி, தூய்மை பணியாளர்.‘‘எனக்குப் பள்ளியில் தூய்மை பணியாளராக வேலை, வீட்டுக்காரருக்கு மத்தாப்புக் குச்சி செய்யற வேலை. நான் காலைல வந்து, ஸ்கூல் பாத்ரூம், ஸ்கூல் வராண்டான்னு சுத்தம் பண்ணிட்டு, அப்படியே 100 நாள் வேலைக்குப் போயிடுவேன். புள்ளைங்க பல நாள் வெறும் வயித்தோடதான் பள்ளிக்கூடம் போவும். சில நாள், இருக்குறதை வைச்சி காலையில அவசரமா ஏதோ பொங்குவேன். பல சமயம் பழைய சோறு பிடிக்காதும்பாங்க. இப்ப அரசாங்கம் டிபன் குடுக்கற திட்டம் கொண்டு வந்தது எனக்கு நிம்மதியாக இருக்கு. இனி எம்புள்ள காலையில பட்டினியா இருக்காதுல்ல. மதிய சோத்துக்காக காத்திருக்க வேண்டியதுமில்லை. இனி எம்புள்ள பசியில்லாம படிக்கும்.’’.சுறுசுறுப்படைவார்கள் குழந்தைகள்!மு.பாரதி, உதவி ஆசிரியை.‘‘பணி கிடைத்து அரசுப்பள்ளியில் நுழையும்போது நான் முதலில் கவனித்தது, அரசுப்பள்ளிக் குழந்தைகளின் தோற்றமானது தனியார் பள்ளிக் குழந்தைகளின் தோற்றத்திலிருந்து எவ்வளவு வேறுபட்டிருக்கிறது என்பதைத்தான். குழந்தைகளின் பலவீனமான தோற்றத்திற்கும், காலை பத்து மணிக்குள்ளாகவே சோர்ந்து போகும் மன, உடல்நிலைக்கும் அவர்கள் காலை உணவு சாப்பிடாமல் வருவதே காரணம் என்று எனக்குப் புரிவதற்கே கொஞ்சம் காலம் தேவைப்பட்டது.‘வறுமை’ என்பது ஒரு புறம் பெரும் பிரச்னை எனில், ஏழை பெற்றோர் உணவு தயாரித்துக் கொடுக்க நேரமில்லாமல் வீட்டு வேலைகளுக்கோ கூலி வேலைக்கோ போவதும் பிரச்னை என்பதும் புரிந்தது. பழைய உணவுகளை சாப்பிட விரும்பாமை மற்றும் பெரியவர்களோடு சேர்ந்து காலை வேளைகளில் பிஸ்கட்டும் டீயும் மட்டும் சாப்பிடும் பழக்கமும் பெரும்பான்மை குழந்தைகளிடத்தில் காலை உணவைத் தவிர்க்க வைத்திருந்ததை அறிந்தேன். இன்றைய சூழலில் பல குழந்தைகளிடையே ஊட்டச்சத்து குறைபாடு என்பதும் அதிகளவில் இருப்பதாக உணர்கிறேன். தற்போது குழந்தைகளுக்கு சத்தான மற்றும் எளிதான காலை உணவுக் கிடைப்பது என்பது மிகவும் வரவேற்கத்தக்கது. இனி குழந்தைகள் மகிழ்வாய், சுறுசுறுப்பாய் பாடங்களை கவனிப்பார்கள். குழந்தைகளின் ஆரோக்கியத்தில் நல்ல மாற்றத்தை இந்தத் திட்டம் உறுதியாக ஏற்படுத்தும். அதனால் அவர்களின் படிப்போடு பண்பிலும்கூட நிறைய நேர்மறை மாற்றங்களை எதிர்பார்க்கலாம்.’’.சத்துணவு சாப்பிட்டு முன்னேறினேன்!என்.எஸ். உமாகாந்தன்,ஓய்வு பெற்ற அரசு அலுவலர்.‘‘இந்தத் திட்டம் மிகவும் அவசியமான ஒன்று. ஏனெனில், நான் பள்ளியில் படிக்கிற காலத்தில் எங்கள் குடும்பம் வறுமையில்தான் இருந்தது. அப்போது காலை உணவு எல்லாம் சாப்பிட்டதே கிடையாது. நேரடியாக மதிய உணவுதான். அப்போது நான் படித்த கார்ப்பரேஷன் பள்ளியில் மதிய உணவு திட்டம் இருந்தது. தினமும் அதைத்தான் சாப்பிட்டேன். சாயந்திர நேரத்தில் பாலும்கூட கொடுப்பார்கள். பள்ளி நெடுந்தொலைவில் இருந்ததால் வீட்டுக்கு எல்லாம் போய்விட்டு வரமுடியாது. அப்படிச் சிரமப்பட்டு சாப்பிட்டு படித்துதான், நான் நல்ல நிலைமைக்கு வந்தேன். தற்போது ‘காலை உணவு திட்டம்’ நடைமுறைக்கு வந்துள்ளதால், நிறைய குழந்தைகள் தங்களின் காலை நேர பசியை போக்கிட உதவும். அதன் காரணமாக உற்சாகமாக படிப்பைத் தொடர ஊக்குவிக்கும்!’’ - தனுஜா ஜெயராமன்