சேனல் பக்கம் : ‘‘வெற்றி பெறும்வரை செவிடாக இருங்கள்!’’ - நடிகை சசிலயா

நடிகையிடம் பேசுகிறோமா..? இல்லை, தன்னம்பிக்கை பேச்சாளருடன் பேசிக் கொண்டிருக்கிறோமா..? என்ற சந்தேகம் வந்துவிடுகிறது நடிகை சசிலயாவுடன் பேசும்போது! அவரின் பாசிட்டிவ் எனர்ஜியும் வைப்பும் நம்மையும் தொற்றிக்கொள்கிறது. சோஷியல் மீடியா, சின்னத்திரை, சினிமா என கலக்கிக் கொண்டிருப்பவரை, ஷூட்டிங் பிரேக்கில் பிடித்து பேசினோம்.உங்களின் தமிழ் உச்சரிப்பு எப்படி இவ்வளவு திருத்தமாக உள்ளது?‘‘சொன்னா நம்பமாட்டீங்க. சின்ன வயசுல எனக்கு ‘திக்குவாய் பிரச்னை’ இருந்தது. அதனால, நான் பேசவே கூச்சப்படுவேன். எங்க அப்பாதான் தைரியம் கொடுத்து பேசச் சொல்லுவாரு. எனக்குக் கூச்சம் போக, பள்ளியில் பேச்சுப் போட்டியிலும் சேர்த்து விட்டார். முதல் மேடையில் ‘வணக்கம்’ மட்டும் சொல்லிட்டு, அழுதபடி கீழே இறங்கிட்டேன். ஆனாலும், அவர் விடலையே. அடுத்தடுத்து பல மேடைகளில் ஏற்றினார். தமிழ் ஆசிரியராக இருந்த அனுராதா, மிகவும் ஊக்கம் கொடுத்தார். அடுத்தடுத்து மேடைகள் ஏறி, ஒரு கட்டத்தில் என் தமிழ்ப் பேச்சுக்களாலேயே அறியப்பட்டேன். பள்ளி, கல்லூரிகளில் பல பரிசுகளையும் வாங்கினேன். 1,000க்கும் அதிகமான மேடைகளில் பேசிவிட்டேன். தாய்மொழி தமிழ் மீது எனக்கு தீராப்பற்று உண்டு. அதனால், என் மகனுக்கு ‘யுகன் சர்வேஷ்’ என தமிழ்க் கடவுளான முருகனின் பெயரை வைத்தேன்.’’ஆடை விஷயத்தில் அதிக கவனம் செலுத்துகிறீர்களே?‘‘திண்டுக்கல்தான் சொந்த ஊர். அங்குதான் படித்தேன், வளர்ந்தேன். எனது பெற்றோர் தர்மராஜ் -_ ரூபிணி, அங்கு நெசவுத் தொழில் செய்து வந்தனர். எங்கள் வீட்டில் இப்போதும் தறி இருக்கிறது. நமது பாரம்பரிய தொழில்கள் விவசாயம், நெசவு மட்டும்தான். ஆனால், இன்று மகத்துவம் தெரியாத, அழிந்து வரும் தொழிலில் இருப்பதும் இவ்விரண்டும்தான். எனவேதான், நெசவுத் தொழிலுக்கு ஆதரவு தரும் விதமாக, கைத்தறிப் புடவைகளை மட்டுமே அணிகிறேன்.’’.உங்கள் ஹேர் ஸ்டைலின் ரகசியம்?‘‘ரகசியம் எல்லாம் ஒண்ணும் இல்லைங்க. கேன்சர் பாதித்த பெண்களுக்கு தன்னம்பிக்கை கொடுக்கும் விதமாக இந்த ஹேர் ஸ்டைலை பின்பற்றி வருகிறேன். 10 ஆண்டுகளுக்கு முன்பு ஒரு நிகழ்ச்சிக்குப் போயிருந்தேன். அங்கிருந்த 50க்கும் மேற்பட்ட பெண்கள், வழுக்கைத் தலையுடன் இருந்தார்கள். என்னவென்று விசாரித்தால், கேன்சரால் பாதிக்கப்பட்டு முடியை இழந்தது தெரியவந்தது. அதோடு, தன்னம்பிக்கையை இழந்து, வேலைக்கோ வெளியிலோ செல்லவும் தயங்கிக் கொண்டிருந்தனர். அது என் மனதை ரொம்பவே பாதித்துவிட்டது.பட்டுப் புடவை, நகைகள் அணிந்து அலங்காரத்தோடு ஒரு ஏழையிடம் பேசுவது எப்படிப் பொருத்தமற்றதோ, அதேபோல, நீளமான கூந்தலோடு அவர்களுடன் பேசுவது பொருத்தமற்றது என நினைத்தேன். எனது முடியை அவர்களுக்கு தானமாக வழங்கிவிட்டு, நானும் அவர்களுடன் இருப்பதாகச் சொல்லி நம்பிக்கை தெரிவித்தேன். தைரியமாக வெளியில் வந்து சமூகத்தை எதிர்கொள்ள முடியும் என தன்னம்பிக்கையுடன் பேசினேன். அப்போதிருந்து கடந்த 10 ஆண்டுகளாக நான் கூந்தல் வளர்ப்பது இல்லை.’’உங்களின் துணிச்சலான இந்த முடிவுக்கு விமர்சனம் ஏதும் வந்ததா?‘‘அப்போது ஒரு டி.வி.யில் சமையல் நிகழ்ச்சிக்கு வி.ஜே.,வாக இருந்தேன். மொட்டைத் தலையுடன் போனதால் எனக்கு அந்த வேலையே போய்விட்டது. விமர்சனங்களும் இருக்கத்தான் செய்தது, அதையெல்லாம் நான் கண்டுகொள்ளவில்லை. ‘நமது வாழ்க்கை நம் உருவத்தைப் பொறுத்து அமைவதில்லை. எண்ணத்தைப் பொறுத்துதான் அமையும்!’ என்பதில் தீர்க்கமாக இருந்தேன்.அப்போது ‘டிக்டாக்’ உள்ளிட்ட சமூக வலைதளங்களில் பலரும் ஆடிக் கொண்டும் பாடிக் கொண்டும் இருந்தனர். நான் மொட்டைத் தலையோடு பேசி, வீடியோ வெளியிட்டேன். நேர்மறை சிந்தனை, சுய முன்னேற்றம் என தன்னம்பிக்கை விஷயங்களைப் பேசினேன். அதற்காக பல புத்தகங்கள் படித்தேன். எனது பேச்சும் தமிழ் உச்சரிப்பும் பெரிய அளவில் என்னை கொண்டு போய் சேர்த்தது. சோஷியல் மீடியாவில் எனது பேச்சைக் கேட்டு, தற்கொலை எண்ணத்தை கைவிட்டதாக பலரும் சொல்லியிருக்கிறார்கள். இதையே, என் பேச்சுக்குக் கிடைத்த வெற்றியாகப் பார்க்கிறேன்.’’.சிங்கிள் பேரண்ட்டாக இருக்கீங்க, சிரமமா இருக்கா?‘‘ஒரு சிரமமும் இல்லை, ரொம்பவே சந்தோஷமா இருக்கேன். என்னோட பெயர்தான் என் மகனோட இனிஷியல். நான் சாம்பாதிக்கிற பணத்துல அவனைப் படிக்க வைக்கிறேன். கணவன் இல்லாத பெண்களை ‘வாழாவெட்டி’ எனச் சொல்லி ஒதுக்கும் சமூகம், ஆண்களை அப்படிச் சொல்வதில்லை. ‘சிங்கிள் பேரண்ட்’டாக இருக்கும் பெண்கள் தன்னம்பிக்கை, தைரியத்தோடு வெளியே வர வேண்டும், வெல்ல வேண்டும்.’’‘பகாசுரன்’ படத்தில் உங்களின் நெகட்டிவ் ரோல் விமர்சனத்திற்கு உள்ளானதே?‘‘சமூகத்திற்கு நல்ல செய்தி சொன்ன படம் அது. சினிமா கதாபாத்திரம் வேறு, ரியல் லைஃப் வேறு. நிஜ வாழ்க்கையில் நான் எப்படி இருக்கிறேன் என்பதைத்தான் பார்க்க வேண்டும். அந்தப் படத்திற்கு அடுத்து, தெலுங்கு, மலையாளம் உள்பட 4 படங்களில் நடித்து வருகிறேன். விக்ரம் பிரபு உடன் நடிக்கும் ‘பகையே காத்திரு’ படத்தில் பிரதானமான வில்லி கேரக்டர். ஆர்கன் திருட்டு சம்பந்தமான அந்தப் படத்தில் டாக்டர் ரோல். ஹீரோ உடன் சண்டை காட்சிகள் எல்லாம் உண்டு. அதேபோல, ஆஷா சரத்துடன் ஒரு படத்தில் லீடு ரோலில் நடிக்கிறேன்.’’உங்கள் வீட்டில் இன்னொரு நடிகை இருக்கிறாராமே?‘‘என்னோட தங்கை தியா, ‘மலர்’ சீரியலில் நடித்து வருகிறார். இயக்குநர் விஜய் சந்தரின் ‘கார்டியன்’ படத்தில் செகண்ட் ஹீரோயின் அவர்தான்.’’இளைஞர்களுக்குச் சொல்ல விரும்புவது?‘‘நாம் என்ன செய்தாலும் இந்த உலகம், ஏதாவது சொல்லிக் கொண்டேதான் இருக்கும். நாம் வெற்றி பெறும்வரையில் நமது காதுகளை செவிடாக வைத்திருக்க வேண்டும். இன்றைய இளைஞர்களிடம் முயற்சியும் பொறுமையும் இல்லை. எதுவும் உடனே கிடைத்துவிட வேண்டும் அவர்களுக்கு. சிறு தோல்விகளுக்கும் துவண்டு விடுகிறார்கள். நாம் விரும்புவதை இந்தப் பிரபஞ்சம் நிச்சயம் நமக்குத் தரும். பொறுமையோடும் நம்பிக்கையோடும் காத்திருந்தால் அது நிச்சயம் கிடைக்கும். இந்த வாழ்க்கையை வாழ, பிக்னிக் போல பூமிக்கு வந்திருக்கிறோம். இந்த 60 வருஷத்தை அடுத்தவருக்காக இல்லாமல், நமக்குப் பிடிச்ச மாதிரி வாழ்வோமே!’’.வாசகி வாய்ஸ்பரிசு ரூ.100/-கலகலப்புக்கு பஞ்சமில்லை!ஞாயிறு இரவு 8:30 மணிக்கு ‘ஜீ தமிழ்’ தொலைக்காட்சியில் ஒளிபரப்பாகும் கேம் ஷோ, ‘டக்கர் டக்கர்’. கலகலப்புக்குப் பஞ்சமில்லாத இந்த நிகழ்ச்சி, நான்கு சுற்றுகளைக் கொண்டது. இந்த நான்கு சுற்றுகளில், அதிகச் சுற்றுகளை வென்றவர்கள் பரிசுச் சுற்றில் நுழையலாம். நான்கு கதவுகளில் இரண்டு கதவுகளுக்குப் பின்னால் பரிசு எதுவும் இருக்காது. அவை எவை என கண்டுபிடித்து, அவற்றை நீக்க வேண்டும். இரண்டு கதவுகளுக்குப் பின்னால் ஓர் அறையில் பெரிய பரிசும் மற்றொரு அறையில் சிறிய பரிசும் இருக்கும். அணியினர் தேர்ந்தெடுப்பதைப் பொறுத்து அவர்களுக்குப் பரிசு கிடைக்கும். அல்லது ஏமாற்றமே மிஞ்சும்.- கீதா, திருச்சி - 21. - சி.எம். ஆதவன்