‘முகத்தில் மார்க் போட்டதால் தலையை எடுத்தேன்!’ பழிக்குப் பழியாக ஒரு பகீர் கொலை!

பட்டப்பகலில் பொதுமக்கள் கூடும் இடங்களில் கொலையும் கொள்ளையும் நடப்பது சர்வசாதாரணமாகிவிட்டது என்றாலும் செங்கோட்டை நகராட்சியில் பகலில் நடந்த பகிரங்கக் கொலையினால், பகீராகிக் கிடக்கிறது, நெல்லை மாவட்டம்.தென்காசி மாவட்டம் செங்கோட்டை விஸ்வநாதபுரத்தைச் சேர்ந்த முருகன், தமிழ்ச்செல்வியின் (தி.மு.க. பொதுக்குழு உறுப்பினர்) மகன் ராஜேஷ். செங்கோட்டை நகராட்சியில் தூய்மைப் பணியாளர்களை சூப்பர்வைஸ் செய்யும் தாற்காலிக ஊழியர். கடந்த ஜூன் 13ம் தேதி காலை 10 மணிக்கு அலுவலகத்திற்கு வந்த ராஜேஷ், வருகைப் பதிவேட்டில் கையெழுத்துப் போட்டிருக்கிறார்.நகராட்சி அதிகாரி அவரை புளியங்குடி நகராட்சிக்குப் போகச் சொன்னதைத் தொடர்ந்து, அலுவலகத்தை விட்டு வெளியே வந்து, காம்பவுண்டுக்குள் நிறுத்தியிருந்த மோட்டார் சைக்கிளில் ஏறி அமர்ந்த விநாடியில் நடந்திருக்கிறது, அந்த பயங்கர சம்பவம்..அதை அப்படியே விவரித்தார், நேரில் பார்த்த ஆட்டோக்காரர் ஒருவர். “ராஜேஷ், பைக்ல ஏறி உக்கார்ந்து ஸ்டார்ட் பண்ணின சமயத்துல நகராட்சியோட கிழக்கு வாசல்ல இருந்து ஒருத்தன், படுவேகமா ஓடிவந்தான். ராஜேஷை மறிக்கிறாப்புல நின்னுகிட்டு, முதுகுல செருகியிருந்த அரிவாளை எடுத்து அப்படியே ஓங்கி வெட்டினான். என்ன நடக்குதுன்னு புரியாம திகைச்சு நின்ன ராஜேஷு, சுதாரிச்சுகிட்டு தடுக்க முயற்சி பண்ணுனதுல அவரோட ரெண்டு கையும் துண்டாகித் தொங்கிச்சு.அவரு அலறிகிட்டே கெஞ்சினாரு. ஆனா, வந்தவன் கொஞ்சமும் இரங்காம அவரோட தலை, கழுத்துன்னு பல இடத்துல வெட்டிட்டு, தன்னோட பைக்குல ஏறிப் பறந்துட்டான். ராஜேஷ் அப்படியே தன் பைக்கோட ஹாண்டில் பார்ல சரிஞ்சு இறந்துட்டாரு. எனக்கு அப்படியே திகீர்னு இருந்துச்சு. கையும் ஓடலை, காலும் ஓடலை. அப்புறம் ஊழியர்கள் எல்லாம் அலறிஅலறிச்சுகிட்டு ஓடிவந்து போலீஸுக்கு தகவல் குடுத்தாங்க. போலீஸ் வந்து ராஜேஷ் உடலை போஸ்ட்மார்டத்துக்கு அனுப்பிச்சு!” கண்களில் பயம் விலகாமல் சொன்னார்.விஷயம் காட்டுத்தீயாய் பரவ, ராஜேஷின் உறவினர்கள் 200 பேர் நகராட்சி அலுவலகம் முன்பு திரண்டு சாலை மறியலில் ஈடுபட்டனர். இதனைத் தொடர்ந்து அங்கிருந்த சி.சி.டி.வி. கேமரா மூலம் கொலையாளிகளை கண்டுபிடிக்க போலீஸ் முயற்சித்தது. இதற்கிடையில் அம்பாசமுத்திரத்தில் போலீஸார் வாகன சோதனை நடத்திக் கொண்டிருந்தபோது, டபுள்ஸில் வந்த பைக் ஒன்று நிற்காமல் செல்ல, அதனை துரத்திச் சென்ற போலீஸ் மறித்துப் பிடித்தது. விசாரணையில் அவர்கள்தான் ராஜேஷை கொலை செய்தவர்கள் என்று தெரிய வர, உடனடியாய் இருவரும் கைது செய்யப்பட்டு பாளையங்கோட்டை சிறையில் அடைக்கப்பட்டுள்ளனர்..ராஜேஷை அவர்கள் கொலை செய்தது ஏன்? என்று விசாரணை அதிகாரி ஒருவரிடம் கேட்டோம். “இது மிகவும் சென்சிட்டிவான வழக்கு. இருபிரிவினரிடையேயான மோதலாய் வெடித்து விடக்கூடாது!” என்று சொல்லி பேச மறுத்தவரை, வற்புறுத்தி பேச வைத்தோம்.“கொலை செய்யப்பட்டவர் தேவேந்திர குல வேளாளர் சமூகத்தைச் சேர்ந்தவர். கொலையாளிகள் இருவரும் தேவர் சமுதாயத்தைச் சேர்ந்தவர்கள். ஒருவன் பெயர் மந்திரமூர்த்தி. நெல்லை அருகே விளாகம் என்கிற கிராமத்தைச் சேர்ந்த சுடலைமுத்துவின் மகன். இன்னொருவன் பெயர் மாரித்துரை. நாங்குநேரியைச் சேர்ந்தவன்.மந்திரமூர்த்தி நன்றாக படிக்கக் கூடியவன். எஸ்.எஸ்.எல்.சியில் 484 மதிப்பெண்கள் வாங்கியிருக்கிறான். பாளையங்கோட்டையில் உள்ள ஒரு கல்லூரியில் பி.எஸ்சி. முதலாம் ஆண்டு சேர்ந்திருக்கிறான். அப்போது கல்லூரியில் ஏற்பட்ட சாதி மோதலில் தேவேந்திர குல வேளாளர் சமூகத்தைச் சேர்ந்த ஒருவரை குத்திக் கொன்றிருக்கிறான். இதனால் கைது செய்யப்பட்டு மூன்று மாத காலம் சிறையில் இருந்து விட்டு வெளியே வந்திருக்கிறான்.இனிமேல் ஊரில் இருந்தால் பிரச்னை வரும், திருந்தி வாழ நினைத்தாலும் விடமாட்டார்கள் என்று எண்ணி ஜெயிலில் தன்னுடன் பழகிய நாங்குநேரி மாரித்துரையையும் அழைத்துக்கொண்டு செங்கோட்டையில் போய் செட்டிலாகியிருக்கிறான். அங்கு பொதிகை ரயிலில் டீ விற்பதற்கான டெண்டர் எடுத்திருக்கிறார்கள். அங்கேயே ஒரு குடியிருப்பில் தங்கியிருந்து தினமும் டீ விற்றிருக்கிறார்கள்.ஓரளவு வருமானம் வரவே, மந்திரமூர்த்தி ராணுவத்தில் சேரலாம் என்று முடிவெடுத்து பயிற்சி மையத்தில் சேர்ந்திருக்கிறான். ரயில்நிலையத்தை ஒட்டி ஓடும் காட்டாற்றில் மந்திரமூர்த்தியும் மாரித்துரையும் குளிப்பது வழக்கம். ராஜேஷும் அங்கே குளிக்க வருவார். அப்படி வரும்போதெல்லாம், ‘வெளியூர்க்காரனெல்லாம் இங்கே ஏண்டா குளிக்க வர்றீங்க?’ என்று சொல்லி ராஜேஷ் தன் நண்பர்களுடன் சேர்ந்து, மந்திரமூர்த்தியையும் மாரித்துரையையும் அடித்து விரட்டுவது வழக்கமாம்.கடந்த வாரமும் ராஜேஷ் இதேபோல் தகராறில் ஈடுபட, மந்திரமூர்த்தி எதிர்த்துக் கேட்டிருக்கிறான். உடனே டென்ஷனான ராஜேஷ், மந்திரமூர்த்தியின் சாதியைச் சொல்லித் திட்டி, கல்லால் அடித்ததில் மந்திரமூர்த்தியின் தலை மற்றும் முகத்தில் காயம் ஏற்பட்டு எட்டுத் தையல் போடப்பட்டிருக்கிறது. இதுகுறித்து மந்திரமூர்த்தி போலீஸில் புகார் செய்தும், அவர்கள் ராஜேஷை விட்டுவிட்டு அவரது நண்பர்கள் ஏழு பேர் மீதுமட்டும் வழக்குப் போட்டிருக்கிறார்கள். ஆளும்கட்சி என்கிற அரசியல் செல்வாக்கினால் ராஜேஷ் மீது போலீஸ் வழக்குப் பதிவு செய்யவில்லை.இந்த நிலையில் கடந்த 10ம் தேதி ரயில் நிலையத்தில் டீ விற்றுக் கொண்டிருந்த மந்திரமூர்த்தியை வழிமறித்த ராஜேஷ் கோஷ்டி, அவரது தலை, முகத்தில் இருந்த வடுவை சுட்டிக்காட்டி, ‘இந்த மார்க் போதுமா? இன்னும் கொஞ்சம் வேணுமா?’ என்று கிண்டல் செய்திருக்கிறார்கள். பிழைக்க வந்த இடத்தில் பிரச்னைவேண்டாம் என்று எண்ணி அமைதியாய் இருந்திருக்கிறான், மந்திரமூர்த்தி.பின்னர் மறுநாள் பயிற்சி நிலையத்திற்குச் சென்றவனது முகத்தில் இருந்த வடுவைக் கண்ட பயிற்சியாளர், நடந்ததை விசாரித்துத் தெரிந்துகொண்ட பின், ‘தம்பி... இனிமேல் உனக்குப் பயிற்சி கிடையாது, முகத்தில் வடு இருந்தால் ராணுவத்தில் சேர்த்துக்கொள்ள மாட்டார்கள்’ என்று கூறியிருக்கிறார்.இதைக் கேட்டு அதிர்ச்சியான மந்திரமூர்த்தி, முகத்தில் மார்க் போட்டு மிலிட்டிரியில் சேரவிடாமல் தடுத்து, தனது வாழ்க்கையையே நாசம் பண்ணிய ராஜேஷை சும்மா விடக்கூடாது என்று எண்ணி நான்கு நாட்களாய் ஸ்கெட்ச் போட்டு 13ம் தேதி நகராட்சி அலுவலகத்தில் வைத்து போட்டுத் தள்ளியிருக்கிறான்” என்றார்.பழிவாங்கும் எண்ணம் பயங்கரமானது! -அ.துரைசாமி