காதல் தடத்தை அழிக்க காதலி கொலை? தாலி கட்டவிருந்த காதலன் கைக்கு காப்பு!

பெரியோர்கள் நிச்சயிக்கும் திருமணத்திற்கு ஜாதகப் பொருத்தம் பார்ப்பது சகஜம். ஆனால், காதல் திருமணத்திற்கு ஜாதிய பொருத்தம் பார்க்கும் குரூரம் சமீபகாலமாக அதிகரித்துவிட்டது. அப்படித்தான் அரியலூர் பஸ் ஸ்டாண்டில் மலர்ந்த காதல் ஜோடி ஒன்று ஜாதிய பொருத்தம் பார்த்ததால், காதல் மோதலாகி கடைசியில் காதலியை போட்டுத் தள்ளிவிட்டு விபத்து என்று கதை கட்டிவிட்டதாகப் பொங்குகிறது பெரம்பலூர்.இதுகுறித்து காவல்துறை வட்டாரத்தில் விசாரித்தோம். ” பெரம்பலூர் மாவட்டம் அல்லிநகரம் மெயின் ரோட்டைச் சேர்ந்த சண்முகசுந்தரம் _ அமுதா தம்பதிக்கு மூன்று மகள்கள், ஒரு மகன். சண்முகசுந்தரம் மூன்று வருடங்களுக்கு முன்பு இறந்துவிட, மூத்த மகள் அபிநயா, இரண்டாவது மகள் சவுந்தர்யா இருவரும் அரியலூர் டவுனில் உள்ள ஒரு மளிகைக் கடையில் வேலை பார்த்து குடும்ப பாரத்தைத் தாங்கிப் பிடித்தார்கள்.கிராமத்திலிருந்து அரியலூருக்கு பஸ்ஸில் வரும் அக்காவும் தங்கையும் பஸ் ஸ்டாண்டில் இறங்கி அங்கிருந்து நடந்தே தாங்கள் பணிபுரியும் கடைக்கு சென்றுள்ளனர். அப்போது, பஸ் ஸ்டாண்டில் உள்ள ஒரு டீ ஸ்டாலில் கேஷியராக வேலை பார்த்து வந்த தஞ்சை மாவட்டம் பந்தநல்லூரைச் சேர்ந்த பார்த்திபன் என்ற இளைஞர் அபிநயா மீது மையல் கொண்டு காதலித்து வந்துள்ளார். பார்த்திபனின் தந்தையும் இறந்துவிட்டார்..இருவரும் வெவ்வேறு சமூகம் என்பதால் விஷயமறிந்த பார்த்திபனின் தாயார் மகனின் காதலுக்கு ரெட் சிக்னல் காட்டியுள்ளார். அத்துடன், அவசர அவசரமாக மகனுக்கு மதுரையைச் சேர்ந்த உறவுக்கார பெண்ணை நிச்சயம் செய்து, ஜூன் 8-ம் தேதி திருமணத்திற்கும் நாள் குறித்துள்ளார். பத்திரிகை எல்லாம் அடித்து தடபுடல் ஏற்பாடு நடந்து வந்தது.இதனிடையே மே 31ம் தேதி காலை உடையார்பாளையம் காவல்நிலையத்திற்கு தொலைபேசியில் ஓர் அழைப்பு வந்தது. அதில் பேசியவர், ’பேரூராட்சிக்கு உட்பட்ட தேசிய நெடுஞ்சாலை அருகே அடையாளம் தெரியாத ஒரு பெண் முகமெல்லாம் ரத்தக் காயத்துடன் சடலமாகக் கிடக்கிறார்’ என்று கூற, ஜெயங்கொண்டம் டி.எஸ்.பி. ராஜாசோமசுந்தரம் தலைமையில் உடையார்பாளையம் இன்ஸ்பெக்டர் வேலுச்சாமி மற்றும் சில போலீஸாரும் ஸ்பாட்டுக்குச் சென்றனர். பெண்ணின் உடலைக் கைப்பற்றி அரியலூர் அரசு மருத்துவமனைக்கு போஸ்ட்மார்ட்டம் செய்வதற்காக அனுப்பி வைத்துவிட்டு, அப்பகுதிக்குச் செல்லும் வழியில் இருக்கும் சி.சி.டி.வி. பதிவுகளை ஆராய்ந்தனர்..அதில் ஒரு ரேஸ் பைக் போன்ற ஒரு ப்ளூ கலர் பைக்கில் இரண்டு பேர் செல்வதும் திரும்ப அதே டூவீலரில் ஒருவர் மட்டுமே வருவதும் அறிந்து அந்த டூவீலர் குறித்த விவரங்களை சேகரித்தனர். அதில், பந்தநல்லூர் பார்த்திபன் என்பவரின் பைக் என்பது தெரியவந்தது. இதையடுத்து, பார்த்திபனைத் தேடிப் போனபோது, அவர் ஒரு தனியார் ஆஸ்பத்திரியில் சிகிச்சை மேற்கொண்டு வருவதாகத் தெரிந்தது. இதையடுத்து க்ரைம் டீம் பார்த்திபனை தூக்கி வந்து விசாரிக்க, ’பைக்கில் வரும்போது சறுக்கி விழுந்துவிட்டேன். அதற்காகத்தான் சிகிச்சை எடுக்க வந்தேன்’ என சாதித்தான்.பிறகு சி.சி.டி.வி. ஃபுட்டேஜை காட்டியதும் உண்மையை ஒப்புக்கொண்டான். ’கடந்த 30-ம் தேதி இரவு அழைத்துச் சென்று உடையார்பாளையம் அருகே உள்ள முந்திரிக் காட்டில் நீண்ட நேரம் பேசிக்கொண்டு இருந்துவிட்டு பின்னர் வீட்டிற்கு பைக்கில் வரும்போது விபத்து ஏற்பட்டது. இதில் எனக்கும் தலையில் பலத்த அடிபட்டு ரத்தம் வந்தது. அபிநயா பேச்சு மூச்சின்றி கிடக்க, என்ன செய்வதென்று தெரியாமல் பயந்துபோய் வந்துவிட்டேன்’ என்று பார்த்திபன் கூறியதை அடுத்து அவன் மீது வழக்குப் பதிந்து சிறையில் அடைத்துள்ளனர்” என்றனர். இதுகுறித்து தமிழ்ப் பேரரசு கட்சித் தலைவரும் திரைப்பட இயக்குநருமான கௌதமன், மாவட்ட எஸ்.பி.யிடம் முறையிட்டு இருக்கிறார். அதுபற்றி அவரிடம் பேசியபோது, ” தனது திருமணத்திற்கு இடையூறாக அபிநயா இருந்து விடுவாரோ என்ற அச்சத்தில் அவரை திட்டமிட்டு கொலை செய்திருக்க வேண்டும். ஒருவேளை, விபத்து என்று போலீஸார் சொல்வதுபோல் இருந்தால் அந்த பையன் ஏன் ஓடி ஒளியவேண்டும்?ஆக, பெண் பிள்ளைகள் தங்களது படங்கள், வீடியோக்களை காதலனிடம் இருந்து கைப்பற்றி தங்களது வீட்டுக்குத் தெரியாமல் இருக்க வேண்டும் என்று எண்ணாமல் அனைத்தையும் பெற்றோரிடம் தெரிவித்தால் இதுபோன்ற விளைவுகள் வராது. ஆகவே, இப்படிப்பட்ட கயவர்களை மன்னிக்கக் கூடாது “ என்றார் ஆவேசமாக..இதுகுறித்து அபிநயாவின் தாய் அமுதாவை நேரில் சந்தித்துப் பேசினோம். ”முதல்ல எங்க வீட்டுக்கு கல்யாண பத்திரிகை வைக்க அந்தப் பையன் வந்தான். அப்போ என் பொண்ணு, ’ ஃபிரெண்டும்மா’ னு சொன்னா. ’இன்னும் சிலருக்கு பத்திரிகை வைக்கணுமாம். வீட்டை காட்டிட்டு வந்துடுறேன்’ னு சொல்லிட்டு அவனோட போனவ திரும்ப வந்துட்டா. செவ்வாய்க் கிழமை 30-ம் தேதி அரியலூரில் வேலை செய்த கடையில ’ உடம்பு சரியில்லை’னு சொல்லிட்டு, சாயங்காலம் 4 மணிக்கு கிளம்பி பஸ் ஸ்டாண்டுக்கு வந்து ஜெயங்கொண்டம் பஸ் ஏறியிருக்கா.என் பொண்ணு ஆரம்பத்திலயே, ’இவனைத்தான் காதலிக்கிறேன்’னு சொல்லியிருந்தா நாங்கள் விட்டிருக்கமாட்டோம். என் பொண்ணு அவனிடம் நியாயம் கேக்கவே போயிருக்கா. மனம் மாறிடுவான், திருமணம் செஞ்சிக்கலாம்ன்ற நம்பிக்கையில் போயிருக்கா. ஆனா, இப்படி செய்வான்னு நாங்க நினைக்கல. உடம்பு முழுவதும் ரத்தக் காயம். ரோட்டில் இருந்து இழுத்துச் சென்று வீசியதற்கான் அடையாளம் இருக்குது. இதிலிருந்தே தெரியலையா... இது கொலைதான்னு. அவனுக்கு கடுமையான தண்டனை தரவேண்டும்” என்று அழுதார்.பார்த்திபன் தரப்பில் பேசியபோது, ” கொலையெல்லாம் செய்யும் அளவிற்கு மோசமான பையன் இல்லை. எதேச்சையாக நடந்த விபத்தாகத்தான் இருக்கும். தேவையில்லாமல் கொலைப்பழி சுமத்த வேண்டாம்” என்றனர்.இதுகுறித்து உடையார்பாளையம் இன்ஸ்பெக்டர் வேலுச்சாமியிடம் பேசினோம். ”அந்தப் பொண்ணு வரச்சொன்னதால் இரண்டு பேரும் சந்தித்துள்ளார்கள். பேசிக்கொண்டு இருந்தபோது சண்டையும் ஏற்பட்டு இருக்கிறது. அதனாலேயே இது கொலை என்று சொல்லமுடியாது. விபத்தில் சிக்கியவரை காப்பாற்றாமல் விட்டது தவறு. அட்லீஸ்ட் ஆம்பலன்ஸுக்காவது தகவல் கொடுத்திருக்கலாம்” என்றார்.இதுகுறித்து அரியலூர் மாவட்ட எஸ்.பி. கா.பெரோஸ்கான் அப்துல்லாவிடம் கேட்டபோது, ” இருவரும் ஒன்றாக போகும் போது விபத்து ஏற்பட்டிருக்கிறது. ஆகையால், அந்த விபத்தில் இருந்து காப்பாற்ற முயற்சிக்காத அவன் மீது வழக்குப் போட்டிருக்கிறோம். இதற்கே அவனுக்கு ஆயுள் தண்டனை வரை கிடைக்கும். போலீஸ் மீது ஆதாரம் இல்லாமல் குற்றச்சாட்டு கூறக்கூடாது “என்றார்.போஸ்ட்மார்ட்டம் ரிப்போர்ட் பொய் சொல்லாது... அதுவரை பொறுத்திருப்போம். -பி.கோவிந்தராஜு