நீ பேசாம அமெரிக்காவுக்கே போயிடு பி.டி.ஆர்!

சீறும் சீனியர்கள் ”மட்டகரமான ஆடியோ அரசியல் பற்றி நான் எதுவும் பேச விரும்பவில்லை” – பி.டி.ஆர் ஆடியோ விவகாரம் தொடர்பாக முதல்வர் ஸ்டாலின் இப்படி விளக்கம் அளித்தாலும், சீனியர் அமைச்சர்களிடம் புகைச்சல் அடங்குவதாக தெரியவில்லை. இந்த விவகாரத்தை சி.பி.ஐ விசாரிக்க வேண்டும் என்று அ.தி.மு.க குரல் எழுப்பியிருப்பதால், எதிர்காலத்தில் சிக்கல் எழலாம் என்பதே சீனியர்களின் கவலை. இதையடுத்துதான், ”நீ பேசாம அமெரிக்காவுக்கே போயிடு பி.டி.ஆர்” என்கிற ரீதியில் மூத்த அமைச்சர்கள் சிலர் பழனிவேல் தியாகராஜனுக்கு எதிராக போர்க்கொடி உயர்த்தியிருக்கிறார்கள். நிதியமைச்சர் பி.டி.ஆர். பழனிவேல் தியாகராஜன் பேசியதாக சமூக வலைதளங்களில் வெளியான இரண்டு ஆடியோக்கள் தி.மு.க. அரசுக்கு தீராத தலைவலியை ஏற்படுத்தியிருக்கின்றன. பி.டி.ஆரின் அமைச்சர் பதவியை மட்டுமல்ல, அவரது ஆதரவாளர்களின் பதவியையும் பறிக்க வேண்டும் என்று சீனியர் அமைச்சர்கள் தலைமையிடம் வலியுறுத்துவதால் பி.டி.ஆர். தரப்பினர் கடும் அப்செட்டில் இருக்கிறார்கள். இந்த விவகாரம் குறித்து தி.மு.க-வின் மூத்த தலைவர் ஒருவரிடம் பேசினோம். “கடந்த ஏப்ரல் 19ம் தேதி நிதியமைச்சர் பி.டி.ஆர்.பழனிவேல் தியாகராஜன் பேசியதாக ஒரு ஆடியோ வெளியானது. அதில் முதல்வரின் குடும்ப உறுப்பினர்கள் பற்றிய சர்ச்சை பேச்சு ஒன்று இடம் பெற்றிருந்தது. இந்த ஆடியோ வெளியானவுடன் முதல்வர் ஸ்டாலினை சந்திக்க பி.டி.ஆர். மேற்கொண்ட முயற்சிக்குப் பலன் கிடைக்கவில்லை. வேறு வழியின்றி ‘இந்த ஆடியோவில் இருப்பது என் குரல் அல்ல” என தனது ட்விட்டர் பக்கத்தில் விளக்கம் அளித்திருந்தார் பி.டி.ஆர். தொடர்ந்து ஏப்ரல் 25-ம் தேதி மற்றொரு ஆடியோவை தமிழக பா.ஜ.க தலைவர் அண்ணாமலை வெளியிட, தி.மு.க.வில் மீண்டும் புயல் கிளம்பியது. அதற்கும் பி.டி.ஆர். வீடியோ ஒன்றை வெளியிட்டு, விளக்கம் அளித்தார். ஆனாலும் இந்த விவகாரத்தை அ.தி.மு.க., பா.ஜ.க. கட்சிகள் கையிலெடுத்து தி.மு.க.வுக்கு எதிராக அரசியல் ஈடுபட்டனர். இந்தநிலையில், முதல்வர் ஸ்டாலினை சந்திக்க பி.டி.ஆருக்கு நேரம் ஒதுக்கப்பட்டது. இந்த சந்திப்பில் ஆடியோ தொடர்பாக சில விளக்கங்களை அளித்தபோதும், முதல்வர் ஸ்டாலின் பி.டி.ஆரிடம் முகம் கொடுத்து பேசவில்லை என்று கூறப்படுகிறது..தொடர்ந்து ஆடியோ விவகாரம் தொடர்பாக சமீபத்தில் சித்தரஞ்சன் சாலை வீட்டில் ஆலோசனை நடத்தப்பட்டது. அப்போது குடும்ப உறுப்பினர்கள் சிலரும் மூத்த அமைச்சர்கள் சிலரும் பி.டி.ஆரை அமைச்சர் பதவியிலிருந்து நீக்க வேண்டும் என்று அழுத்தம் கொடுத்தனர். அப்போது, ‘அவரை அமைச்சர் பதவியிலிருந்து இப்போது நீக்கினால், எதிர்க்கட்சிகளின் குற்றச்சாட்டு உண்மையாகிவிடும். அதற்கு பதிலாக அமைச்சரவை மாற்றம் செய்துவிடலாம்; அதுவும் முதல்வர் வெளிநாட்டுக்கு சென்றுவந்த பிறகு பேசிக்கொள்ளலாம்’ என்று முடிவு எடுக்கப்பட்டது. தொடர்ந்து மே 2-ம் தேதி நடைபெற்ற அமைச்சரவைக் கூட்டத்திற்குப் பிறகு, மூத்த அமைச்சர் ஒருவர் பி.டி.ஆரை அழைத்து, ‘தம்பி நீங்க ரிசைன் பண்ணிடுங்க. உங்களால தேவையில்லாம கட்சிக்கும் ஆட்சிக்கும் கெட்டப் பேரு...’ என்று முகத்துக்கு நேராகவே சொல்லிவிட்டார். இதை சற்றும் எதிர்பார்க்காத பி.டி.ஆர்., “நான் முதல்வரிடமே விளக்கம் அளித்துவிட்டேன். முதல்வர் சொல்லட்டும், ரிசைன் செய்துவிடுகிறேன்’ என்று பட்டென்று கூறிவிட்டு கிளம்பிவிட்டார். இதையடுத்து அன்றைய தினமே சென்னை கிரீன்வேஸ் சாலையில் சீனியர் அமைச்சர் ஒருவர் வீட்டில் மூத்த அமைச்சர்கள் சிலர் சந்தித்துப் பேசியிருக்கிறார்கள். அப்போது, ’அமெரிக்காவுல இருந்து வந்தவுடனே அவருக்கு சீட்டு கொடுத்து எம்.எல்.ஏ ஆக்கிட்டாங்க, தொடர்ந்து நாம ஆட்சிக்கு வந்தவுடனே அமைச்சர் ஆக்கிட்டாங்க. ஆனா, அவர் ஆரம்பத்தில இருந்தே அமெரிக்கா ரிட்டர்ன் அறிவுஜீவியாகவே தன்னை நினைச்சிக்கிட்டு, நம்ம யாரையும் மதிக்கிறதில்லை. மகளிர் உரிமைத் தொகைக்காக முதல்வரே பலமுறை கேட்டும் ரெண்டு வருஷம் நிதி ஒதுக்காம அலைக்கழிச்சாரு. கல்வி உதவித் தொகை, முதியோர் பென்ஷன், இலவசங்கள்னு சமூக நீதி திட்டங்களால்தான் தமிழ்நாடு முன்னேறிய மாநிலமாக மாறியிருக்கு. அந்த வகையில தேர்தல் வாக்குறுதியில அறிவிச்சபடி மகளிர் உரிமைத் தொகை திட்டத்துக்காக இவரை அணுகியபோது தேவையில்லாத கமென்ட் அடிச்சு அந்த திட்டத்தையே அலட்சியப்படுத்தினார். இவராலதான் ரெண்டு வருஷம் அந்த திட்டம் லேட்டாகி, மக்களிடம் பெரும் அதிருப்தியை ஏற்படுத்திடுச்சு. எதிர்க்கட்சிகளுக்கும் நம்ம ஆட்சியை விமர்சிக்க இடம் கொடுத்துடுச்சு. இதெல்லாம் செஞ்சது போதாதுன்னு இப்ப வாயைக் கொடுத்து மொத்த கட்சியையும் காவு வாங்க பார்க்குறாரு. பேசாம அவரு அமைச்சர் பதவியை ரிசைன் பண்ணிட்டு, அமெரிக்காவுக்கே போயிடலாம்... அவரால கட்சிக்கு ஒரு நன்மையும் இல்லை’ என்று புலம்பியிருக்கிறார்கள். இந்த தகவலும் அப்படியே சித்தரஞ்சன் சாலைக்கு பாஸ் செய்யப்பட்டது. தொடர்ந்து மே 4-ம் தேதி முதல்வரின் முக்கிய குடும்ப உறுப்பினர் ஒருவர் வெளிநாட்டில் இருந்து வீடு திரும்பியதும் அவரது தலைமையிலும் இதுகுறித்து ஆலோசிக்கப்பட்டது. இறுதியாக அவர்தான், ‘இப்போது அவசரப்பட்டு எந்த முடிவும் எடுக்க வேண்டாம். நான் பார்த்துக்கொள்கிறேன்’ என்று சீனியர்களை சமாதானப்படுத்தியிருக்கிறார்” என்றவர் இந்த விவகாரம் மதுரையில் எதிரொலித்தது பற்றியும் விவரித்தார்... ”இந்த விவகாரம் எழுந்தவுடனேயே கோட்டையில் இருந்து பி.டி.ஆர் தரப்புக்கு போன் போட்டிருக்கிறார்கள். அப்போது, ‘மதுரை சித்திரை விழா நெருங்குவதால் அங்கு பொதுவெளியில் கவனமாக பேசவும். யாரையும் விமர்சிக்க வேண்டாம்’ என்றவர்கள் தொடர்ந்து, ‘மதுரை மீனாட்சியம்மன் டிரஸ்டிகளை நியமிக்கும் விஷயங்களை இனி அறநிலையத்துறை அமைச்சர் சேகர்பாபு பார்த்துக்கொள்வார்’ என்று சொல்லிவிட்டு போனை கட் செய்துவிட்டார்கள். தற்போது மீனாட்சி அம்மன் கோயில் தக்காராக இருக்கும் கருமுத்து கண்ணனை மாற்றிவிட்டு, பிரபல நிறுவனத்தில் இருந்து ஒருவரை தக்காராகவும், ஏழுமலையான் பெயர்கொண்டவர் உட்பட தன் உறவுகள் சிலரை அறங்காவலர்களாகவும் நியமிக்க பி.டி.ஆர். தரப்பினர் காய்நகர்த்திவந்த நிலையில், கோட்டையில் இருந்து வந்த போன் இவை அனைத்தையும் ஒன்றும் இல்லாமல் செய்துவிட்டது..இதில் கடும் அப்செட் ஆனதால்தான் மே 2, 3, 4 ஆகிய நாட்களில் அடுத்தடுத்த நடந்த சித்திரை திருவிழா கொடியேற்றம், மீனாட்சி திருக்கல்யாணம், கள்ளழகர் ஆற்றில் இறங்குதல் ஆகிய நிகழ்ச்சிகள் எதிலுமே தலைக்காட்டவில்லை. அதனாலேயே பி.டி.ஆரின் தீவிர ஆதரவாளரான மதுரை மேயர் இந்திராணியும் மேற்கண்ட நிகழ்ச்சிகளைப் புறக்கணித்துவிட்டார். சித்திரை திருவிழாவில் அமைச்சர் மூர்த்தி சொல்லும் நபர்களுக்கே வி.வி.ஐ.பி. பாஸ் வழங்கப்பட்டது. சித்திரை திருவிழா களைகட்டிக் கொண்டிருந்த அதே நேரத்தில் பி.டி.ஆர்., மேயர் இந்திராணி மற்றும் ஆதரவாளர்களுடன் மதுரை விமான நிலையத்தில் ஆலோசனை நடத்தினார். அப்போது ’நான் எனது துறை சார்ந்த நடவடிக்கைகளில் மிகவும் நேர்மையாக நடந்துக்கொள்ளவே விரும்பினேன். நிறைய சீர்திருத்தங்களை கொண்டுவந்து தமிழகத்தை இந்தியாவின் நெம்பர் ஒன் மாநிலமாக்க விரும்பினேன். ஆனால், சிலர் என் கைகளைக் கட்டிப் போட்டது மட்டுமல்லாமல், அபாண்டமான அவதூறுகளை சுமத்தி என்னை வெளியேற்றத் துடிக்கிறார்கள். ஒருவேளை எனது பதவி பறிபோனால், உங்களையும் குறிவைப்பார்கள். பார்த்து ஜாக்கிரதையாக இருந்துக்கொள்ளுங்கள்’ என்று உருக்கமாக சொல்லியிருக்கிறார். தி.மு.க அரசு மூன்றாம் ஆண்டில் அடியெடுத்து வைப்பதை அடுத்து, மதுரையில் மே 7, 8, 9 ஆகிய தேதிகளில் தி.மு.க அரசின் சாதனை விளக்க பொதுக்கூட்டங்கள் ஏற்பாடு செய்யப்பட்டிருக்கின்றன. இந்த சாதனை விளக்க கூட்டங்களுக்கு அச்சடிக்கப்பட்ட நோட்டீஸ், பேனர் எதிலும் பி.டி.ஆர் பெயர் இடம்பெறவில்லை. இதுவும் பி.டி.ஆருக்கு வைக்கப்பட்ட செக்காகவே பார்க்கப்படுகிறது” என்று விரிவாக சொல்லி முடித்தார். இதுகுறித்து எல்லாம் விளக்கம் கேட்க பி.டி.ஆர். பழனிவேல் தியாகராஜனை பலமுறை அழைத்தும் அவர் நமது அழைப்பை ஏற்கவில்லை. தொடர்ந்து வாட்ஸ்ஆப் எண்ணிலும் தகவல் அனுப்பியிருக்கிறோம். அதற்கும் பதில் வரவில்லை. பி.டி.ஆரின் ஆதரவாளர்களோ, “பி.டி.ஆர் மீது சொல்லப்படும் குற்றச்சாட்டுகள் அனைத்தும் அபாண்டமானவை. அவர் அமைச்சர் பதவியில் அல்லது அரசியலில் இருந்துதான் சம்பாதிக்க வேண்டும் என்றில்லை. தமிழகத்தை முன்னேறிய மாநிலமாக்க நினைத்துதான் அவர் அமெரிக்காவில் இருந்து தமிழகத்துக்கே வந்தார். இப்போது நிம்மதி பறிபோன நிலையில் அவர் முகத்தை எங்களால் பார்க்கவே முடியவில்லை... பேசாமல் அவர் அமெரிக்காவுக்கே போய்விடலாம். நிம்மதியாகவேனும் இருப்பார்...” என்று கண்கலங்கினார்கள். ’சிவாஜி’ படத்தில் நாட்டை சீர்திருத்த ரஜினி எடுக்கும் முயற்சிகளுக்கு கடும் சோதனை ஏற்படும். அப்போது அவரின் நண்பரான விவேக், “நீ பேசாம அமெரிக்காவுக்கே போயிடு சிவாஜி...” என்று தழுதழுப்பார். பதிலுக்கு ரஜினி, “இல்லை இதான் என் ஊரு..’ என்பவர் சிங்கப்பாதையில் செல்லப்போவதாக சூளுரைப்பார். இனி பி.டி.ஆர் செல்லப்போவது பூப்பாதையா, சிங்கப்பாதையா என்பதை அவர்தான் முடிவு செய்ய வேண்டும்!.பாக்ஸ் பிரபல ஸ்வீட் கடையின் பெயர்கொண்ட பெண் வி.ஐ.பி அவர். சேலத்தைச் சேர்ந்தவரான அவர் பி.டி.ஆர். பழனிவேல் தியாகராஜனின் சமூகத்தை சேர்ந்தவரும்கூட. அவர்தான் தற்போது பி.டி.ஆர் சார்பில் மதுரை மாநகராட்சி தொடர்பான அனைத்து பணிகளையும் நிர்வகிக்கிறாராம். கோப்புகள் அனைத்தும் இவர் வழியாக வந்தால் மட்டுமே பாஸாகும் என்கிறார்கள் மதுரை உடன்பிறப்புகள். தவிர, யாருக்கு எவ்வளவு பர்சன்ட் கமிஷன், யாருக்கு டெண்டர் வழங்க வேண்டும் என்பதெல்லாம்கூட அந்த பெண்தான் முடிவு செய்து பி.டி.ஆர் தரப்பிடம் ஒப்புதல் வாங்குவார் என்கிறார்கள். அந்த வகையில் மதுரையைச் சேர்ந்த பெண் வழக்கறிஞர் ஒருவர் ஆவின் டெண்டர் உட்பட ஏகத்துக்கு ஆதாயங்களை அனுபவித்திருக்கிறாராம்! பாலா, பாபு படங்கள் : ம.செந்தில்நாதன்

நீ பேசாம அமெரிக்காவுக்கே போயிடு பி.டி.ஆர்!

Related Stories