உனக்கு 35 எனக்கு 35 - தாம்பரம் மாநகராட்சியைப் பங்குபோடும் எம்.எல்.ஏ-க்கள்!

தாம்பரம் மேயர் பராக் பராக் உள்ளாட்சியில் பெண்களுக்கு 50 சதவிகித இடங்களை ஒதுக்கி சட்டம் இயற்றினார் முன்னாள் முதல்வர் ஜெயலலிதா. ஆனால், அங்கு நின்றுவென்ற பெண்களை எல்லாம் அவர்கள் தம் குடும்பத்தினரும், அரசியல் கட்சியினர் பொம்மலாட்ட பொம்மைகளாக ஆட்டுவிக்கும் கொடுமை தொடர்கிறது. ஜனநாயக ரீதியாக வெற்றிபெற்று உற்சாகமாக பதவிக்கு வந்த பெண்கள், சுயமாக சிந்தித்து எதையும் செய்ய முடியவில்லை. தாம்பரம் மேயர் வசந்தகுமாரியும் இதற்கு விதிவிலக்கல்ல...தாம்பரம் மாநகராட்சியில் மொத்தம் 70 வார்டுகள். இதில் தி.மு.க கூட்டணியினர் 53 வார்டுகளையும், அ.தி.மு.க கூட்டணியினர் 9 வார்டுகளையும் மீதம் இருக்கும் வார்டுகளை சுயேச்சைகளும் வென்றுள்ளனர்.தாம்பரம் மாநகராட்சியாக அறிவிக்கப்பட்டதுமே, தி.மு.க சார்பில் தேர்தலில் போட்டியிட தற்போதைய மேயரின் தந்தை கமலக்கண்ணனுக்கு சீட் ஒதுக்கியது ஆளும் கட்சி. அந்த நேரம் பார்த்து தாம்பரம் மேயர் பதவி, பெண்களுக்காக ஒதுக்கப்பட, உடனே தனது ’மாஸ்டர்’ பிளானை ’டாட்டர்’ பிளானாக மாற்றி தனக்கு பதிலாக மகள் வசந்தகுமாரியை நிற்கவைக்க முடிவு செய்தார். இதையடுத்து, காட்டாங்குளத்தூர் அருகே வேங்கடமங்களம் ஊருக்கு வாக்கப்பட்ட போன வசந்தகுமாரியை தாம்பரத்தை அழைத்துவந்து தேர்தலில் போட்டியிட வைத்தார் கமலக்கண்ணன்..தாம்பரம் தி.மு.க-வின் கோட்டை என்பதால் வசந்தகுமாரி வெற்றி பெறுவதில் எந்த சிக்கலும் இல்லை. ஆனால், எதிர்பாராத விதமாக மேயரானது வசந்தகுமாரியின் அதிர்ஷ்டமா இல்லை, தாம்பரத்தின் துரதிர்ஷ்டமா என்று யோசிக்கும் அளவிற்கு தாம்பரம் மாநகராட்சியில் தலைவிரித்து தாண்டவம் ஆடுகின்றன குளறுபடிகள்!இதுகுறித்து தாம்பரத்தைச் சேர்ந்த தி.மு.க வி.ஐ.பி. ஒருவரிடம் பேசினோம். “பெயருக்குத்தான் வசந்தகுமாரி மேயர். ஆனால் அவரிடம் எந்த அதிகாரமும் இல்லை. அவரால் திட்டங்களை செயல்படுத்தவும் முடியவில்லை. இதற்கு காரணம், தி.மு.க-வில் இருக்கும் உட்கட்சி மோதல்கள் தான்.தாம்பரம் எம்.எல்.ஏ-வாக இருப்பவர் எஸ்.ஆர்.ராஜா. அவரின் மைத்துனர் காமராஜ்தான் தாம்பரம் நான்காம் மண்டலத் தலைவராக இருக்கிறார். இவர்கள் இருவரும் தாம்பரம் சட்டமன்றத்தில் உள்ள 35 வார்டுகளை தங்கள் கட்டுப்பாட்டில் வைத்துள்ளனர்.அடுத்து, பல்லாவரம் எம்.எல்.ஏ., கருணாநிதி. அவரின் அண்ணன் ஜோசஃப் அண்ணாதுரைதான் தாம்பரம் இரண்டாம் மண்டலத் தலைவராக இருக்கிறார். இவர்கள் கட்டுப்பாட்டில் 35 வார்டுகள் உள்ளன. அதாவது 70 வார்டுகளில் ஒரு கவுன்சிலர் கூட மேயரின் கட்டுப்பாட்டில் இல்லை. அப்படியென்றால் எப்படி மேயரை மதிப்பார்கள்?மேயரின் பேச்சுக்கு மரியாதையே இல்லாமல் போய்விட்டது. அவர் செய்ய நினைப்பதை செய்யவும் முடியவில்லை. சாலை போடுவது, சாக்கடை அமைப்பது, சமுதாயக் கூடங்கள் கட்டுவது என்று எதுவுமே நடைபெறவில்லை. ஒரு திட்டத்தை செயல்படுத்த நினைத்தால், இரண்டு கோஷ்டியில் ஏதாவது ஒரு கோஷ்டி வந்து கமிஷன் கேட்டு திட்டத்தை நிறுத்தி விடுகிறது..இப்படித்தான் கொஞ்ச காலத்திற்கு முன்பு மேயரின் வீட்டுக்கு அருகில் ஒரு கால்வாய் கட்ட முடிவெடுக்கப்பட்டது. அதற்காக ஒரு கோடி ரூபாய்க்கு டெண்டர் விடப்பட்டது. மேயரின் தந்தை கமலக்கண்ணனின் ஆட்கள்தான் அந்த டெண்டரை எடுத்தார்கள். பணிகள் தொடங்கிய நிலையில் நான்காம் மண்டலத் தலைவர் ‘மண்டகப்படி’ கேட்டு தொந்தரவு செய்தார். இது மேயரின் தந்தை என்று எவ்வளவோ சொல்லியும் கேட்கவில்லை. மேலிடம் வரை புகார் சென்றும் ஒன்றும் நடக்கவில்லை. அவருக்கு வேண்டியதை செய்த பிறகே பணிகளை தொடர முடிந்தது.பல்லாவரத்தில் 50 லட்ச ரூபாய் மதிப்பில் ஒரு பூங்கா கட்டப்பட்டது. அந்த பூங்காவை எம்.எல்.ஏ கருணாநிதி திறந்து வைக்க, அந்த விழா தொடர்பான போஸ்டர்களில் மேயரின் படங்களே இல்லை. திருநீர்மலை அருகே இரண்டு கிலோமீட்டர் தூரத்துக்கு சாலை அமைக்க டெண்டர் விடப்பட்டது. அங்கு ஜல்லிகள் கொட்டி பணிகள் தொடங்கிய பிறகு, திடீரென்று உள்ளே புகுந்த தி.மு.க குரூப் ஒன்று கமிஷன் கேட்டு தகராறு செய்து பணிகளை நிறுத்திவிட்டது. நியாயமாகப் பார்த்தால் மேயருக்கு உதவியாக மாநகராட்சி கமிஷனர் உறுதுணையாக இருந்து இந்தப் பணிகளை முடிக்க உதவியிருக்க வேண்டும். ஆனால் அப்போது மாநகராட்சி கமிஷனராக இருந்த இளங்கோவன், எஸ்.ஆர்.ராஜாவின் ஆள். அதனால் அவரும் மேயருக்கு எதிராகவே நடந்துக்கொண்டார்” என்றார் ஆதங்கத்துடன்..இன்னொரு தி.மு.க நிர்வாகி கூறுகையில், ”முதல் இரண்டு குரூப்களைத் தவிர தி.மு.க-வின் வடக்கு காஞ்சிபுர மாவட்டத் தலைவர் தா.மோ.அன்பரசன் குரூப்பும் தாம்பரம் மாநகராட்சியில் கோலோச்சுகிறது. ஆரம்பத்தில் இந்த குரூப்பும் மேயருக்கு பல விதங்களில் தொல்லை கொடுத்தபடியே தான் இருந்தது. ஆனால், இடையில் ஒரு கோயில் நில ஆக்ரமிப்பு விவகாரத்தில் எஸ்.ஆர்.ராஜாவோடு அன்பரசனுக்கு முட்டிக்கொண்டது. இதையடுத்து தாம்பரத்தில் தனது பிடியை உறுதிசெய்துக்கொள்ள மேயரை தனது அதிகார வட்டத்துக்குள் கொண்டுவந்துவிட்டார் ராஜா. அதன்பிறகாவது தாம்பரம் மாநகராட்சியில் மேயரின் கை ஓங்கும் என்று பார்த்தால், முன்பை விட நிலைமை மோசமாகிவிட்டது.மாநகராட்சியில் உள்ள 70 கவுன்சிலர்களும் மேயர் மீது அதிருப்தியில் உள்ளனர். ஏரியா கவுன்சிலர் என்ற முறையில் எந்த விஷயத்திற்கு சிபாரிசு கேட்டுப்போனாலும், மேயரால் செய்து கொடுக்க முடிவதில்லை. இதனாலேயே தங்கள் விசுவாசத்தை எம்.எல்.ஏ-க்களிடம் மொத்தமாக அடகு வைத்துள்ளனர். மாதம் ஒருமுறை கவுன்சிலர்கள் கூடி, கூட்டம் நடத்துவது வழக்கம். அதற்கு சிட்டிங் ஃபீஸ் ஆக ரூ.500 ஒவ்வொரு கவுன்சிலருக்கும் வழங்கப்படும். ’செயல்படாத மேயரை வைத்துக்கொண்டு எதற்காக இதுபோன்ற மீட்டிங் நடத்தவேண்டும்? இந்த 500 ரூபாயை வாங்குவதற்கு, 2000 ரூபாய்க்கு டீசல் போட்டு வரவேண்டியிருக்கிறது. இந்த மீட்டிங்கேவேஸ்ட். இனிமே மீட்டிங்கிற்கு கூப்பிடாதீங்க’ என்று மேயர் காதுபடவே சொல்லி வருகின்றனர்..அரசியலை தாண்டி மேயரை செயல்படவிடாமல் தடுப்பதற்கு சாதிரீதியிலான காழ்புணர்ச்சியும் ஒரு காரணம். மேயர் வசந்தகுமாரி பட்டியல் சமூகத்தைச் சேர்ந்தவர். இதனாலேயே அவரை மட்டம் தட்டி தொடர்ந்து செயல்படவிடாமல் இரண்டு குரூப்களும் தடுக்கின்றன. இந்தப் பகுதிக்கு முதல்வர் வரும்போது கூட, வசந்தகுமாரி ஓரம் கட்டப்படுகிறார்.இந்தநிலையில்தான் மாநகராட்சியின் புதிய ஆணையராக பொறுப்பு ஏற்ற அழகு மீனா ஐ.ஏ.எஸ்., தாம்பரத்தின் நிலைமையைப் பார்த்து அதிர்ச்சி அடைந்துவிட்டார். டெண்டர்களில் ஏகத்துக்கும் குளறுபடிகள் இருந்தன. திட்டப்பணிகள் பாதியில் நின்றிருந்தன. உடனடியாக விடப்பட்ட டெண்டர்களையெல்லாம் கேன்சல் செய்தவர், மாநகராட்சியின் பொது நிதியை முடக்கினார். சொல்லப்போனால் அழகு மீனாவின் நடவடிக்கைக்குப் பிறகே மாநாகராட்சியின் நிதிநிலைமை ஓரளவு தப்பிப் பிழைத்திருக்கிறது” என்றார். .அ.தி.மு.கவைச் சேர்ந்தவரும், 70வது மாமன்ற உறுப்பினருமான தேவேந்திரன் நம்மிடம், ”எங்கள் பகுதியிலும் எக்கச்சக்க பிரச்னைகள் உள்ளன. குறிப்பாக, குடிநீர் பிரச்சனை. இங்குள்ள நூத்தன்சேரி குளம் தூர்வாரப்படவே இல்லை. நடைபாதையும் அமைக்கப்படவில்லை. மாடம்பாக்கத்தில் 26 ஆர்.ஓ குடிநீர் சுத்திகரிப்பு ஆலைகள் முடங்கிக்கிடக்கின்றன. இதுப்பற்றி பல முறை புகார் தெரிவித்தும் எந்த நடவடிக்கையும் இல்லை. சுகாதாரமான குடிநீர் கிடைப்பதில்லை. தற்போது கோடைக் கொளுத்தி வரும் நிலையில் குடிநீர் பஞ்சம் உருவாகியுள்ளது ” என்றார்..இந்து முன்னணி அமைப்பின் மாவட்ட நிர்வாகி கனகராஜ் நம்மிடம்,”கோயம்பேட்டிற்கு அடுத்ததாக மக்கள் கூட்டம் அலைமோதும் இடம் தாம்பரம் பஸ் நிலையம். அங்கே பஸ் நிறுத்தவே போதிய இடம் இல்லை. எஸ்.ஆர்.ராஜா குரூப் தாம்பரம் பழைய குளம் அருகில் ஒரு கிரவுண்ட் நிலத்தை ஆக்ரமித்து சிமென்ட் குடோன் நடத்தி வருகிறது. மாநகராட்சிக்கு சொந்தமான பல கடைகளிலிருந்து வாடகையே வருவது கிடையாது. கேட்டால் கட்சியின் பெயரைச் சொல்லி மிரட்டுகின்றனர்“ என்றார். மேயர் வசந்தகுமாரி கமலக்கண்ணனிடம் பேசினோம். ”தாம்பரம் மாநகராட்சியில் 48 கோடி ரூபாய் மதிப்பில் எல்.இ.டி விளக்குகள் அமைக்கும் பணிகள், 30.75 கோடி ரூபாய் மதிப்பில் வெள்ளத் தடுப்பு பணிகள், 9.90 கோடி ரூபாய் மதிப்பில் 12.422 கி.மீ தூரம் சாலைகள் இடும் பணிகள் தொடங்கியிருக்கின்றன. எங்கள் எம்.எல்.ஏ-க்கள் தொல்லை தருவதாக சொல்லப்படுவது தவறான தகவல். மாநகராட்சியில் இரு சட்டமன்றத் தொகுதிகள் இருப்பதால், இங்கு என்ன நடக்கிறது என்பதை அவ்வப்போது அவர்களும் வந்து பார்த்துச் செல்வது இயல்பு. அதேப்போல அமைச்சர் அன்பரசனும்மிகவும் ஆக்டிவாக மாநகராட்சிப் பணிகளை உற்று நோக்கி வருகிறார். இதைத்தான் பலர் தவறுதலாக தலையீடு என்கிறார்கள். மொத்தத்தில் தாம்பரம் மாநகராட்சி சிறப்பாகவே செயல்பட்டு வருகிறது” என்று முடித்துக் கொண்டார்.நம்புறோம் மேடம்!

உனக்கு 35 எனக்கு 35 - தாம்பரம் மாநகராட்சியைப் பங்குபோடும் எம்.எல்.ஏ-க்கள்!

Related Stories