ஃப்ரி கரன்ட்டுக்கு வேட்டு வைக்குமா ப்ரிபெய்டு கரன்ட்?

“50 ரூபாய்க்கு கரன்ட்டை ரீசார்ஜ் பண்ணுப்பா” எனக் கேட்கும் நாள் வெகுதொலைவில் இல்லை. ஆம்! மத்திய அரசின் ஸ்மார்ட் மீட்டர் திட்டத்தில் இப்படியொரு வசதியிருக்க, `அதில் ஸ்மார்ட்டாக ஒளிந்திருக்கும் ஆபத்துகள் அதிகம்' என ஷாக் அடிக்க வைக்கின்றன, மின்வாரிய சங்கங்கள். `இந்தியா முழுவதும் ஸ்மார்ட் மீட்டர் பொருத்தப்பட வேண்டும்' என்பதில் மத்திய அரசு உறுதியாக இருக்கிறது. அதன்படி, நாடு முழுவதும் 22.98 கோடி ஸ்மார்ட் மீட்டர்கள் பொருத்தப்பட உள்ளன. இதில், தென்னிந்தியாவிலேயே தமிழ்நாட்டில்தான் அதிகளவு ஸ்மார்ட் மீட்டர்கள் வரவுள்ளன. அதன்படி, இங்கு பொருத்தப்பட உள்ள 3.01 கோடி ஸ்மார்ட் மீட்டர்களில் 1 லட்சத்து 26 ஆயிரம் மீட்டர்கள் ஏற்கெனவே பொருத்தப்பட்டுவிட்டன. `துல்லிய மின் கணக்கீடு, பிரீபெய்டாக பணம் செலுத்தும் முறை' என ஸ்மார்ட் மீட்டர் தொடர்பான தகவல்கள் அலையடித்தாலும், இதனால் ஏற்படும் அபாயங்களைப் பற்றியும் மின்வாரிய ஊழியர் சங்கங்கள் பேசத் தொடங்கியுள்ளன. “மத்திய மின்துறை அமைச்சகம், மின்சாரம் (நுகர்வோரின் உரிமைகள்) விதிகள் 2020 என்றிருந்ததை மின்சாரம் (நுகர்வோர் விதிகள்) திருத்த விதிகள் 2023-என சத்தம் இல்லாமல் மாற்றி, 2023 ஜூன் 14-ல் அரசிதழில் வெளியிட்டுள்ளது. இந்த அரசாணைப்படி எல்லா மின் இணைப்புகளிலும் ஸ்மார்ட் மீட்டர் பொருத்தப்பட வேண்டும். அதுவும், வர்த்தகம் மற்றும் தொழில் நிறுவனங்களில் 19 கிலோவாட்டுக்கு மேல் மின்சாரத்தைப் பயன்படுத்துகின்ற நுகர்வோர் 2024 ஏப்ரல் 1-க்கு முன்பாக ஸ்மார்ட் மீட்டர் பொருத்தப்பட வேண்டும். மேலும், விவசாய மின்நுகர்வோர்களைத் தவிர மற்ற அனைத்து மின்நுகர்வோரும் 2025 ஏப்ரல் 1-ம் தேதிக்கு முன்பாக ஸ்மார்ட் மீட்டர் பொருத்த வேண்டுமென அந்த அரசாணை கூறுகிறது'' எனக் குறிப்பிடும் மத்திய மின்ஊழியர் கூட்டமைப்பின் (சி.ஐ.டி.யு) மாநிலத் தலைவர் ஜெய்சங்கர், மேலதிக தகவல்களைப் பட்டியலிட்டார்..``சில மாதங்களுக்கு முன்பு சென்னை தி.நகர் பகுதியில் 1 லட்சத்து 23 ஆயிரத்து 500 ஸ்மார்ட் மீட்டர்கள் சோதனையில் அடிப்படையில் பொருத்தப்பட்டன. தற்போது மும்முனை மின்சாரத்தைப் பயன்படுத்துவோர் ஸ்மார்ட் மீட்டர் பொருத்த 7 ஆயிரம் கட்டணம் தர வேண்டும். ஒரு முனை மின்சாரத்தைப் பயன்படுத்தினால் 3 ஆயிரத்து 500 ரூபாய் தர வேண்டும். அதுமட்டுமன்றி, மாதம்தோறும் ஸ்மார்ட் மீட்டருக்கு வாடகையாக 72 ரூபாய் தர வேண்டும். தமிழகத்தில் இரண்டு மாதத்துக்கு ஒருமுறை மின் அளவீடு செய்யப்படுகிறது. அப்படியானால் 144 ரூபாயை மின்கட்டணத்துடன் சேர்த்து நுகர்வோர் செலுத்த வேண்டியது வரும். அடுத்து, ஸ்மார்ட் மீட்டர்களை தனியார் நிறுவனங்களே ஒப்பந்தம் மூலம் பொருத்துவார்கள். குறிப்பிட்ட காலம்வரை அவர்களே பராமரிப்பு பணி செய்வார்கள். தற்போது தமிழகம் முழுவதும் பயன்பாட்டில் உள்ள தரமான டிஜிட்டல் மீட்டர்களை குப்பைத் தொட்டியில் வீச வேண்டிய நிலை ஏற்படும். ஏற்கெனவே, மின்வாரியங்கள் கடனில் தவிக்கும் சூழலில், இது மேலும் கடன் சுமையை அதிகரிக்கின்ற நடவடிக்கை ஆகும். எதிர்காலத்தில் இந்த ஸ்மார்ட் மீட்டரை பிரீபெய்டு மீட்டராக மாற்றும் திட்டமும் உள்ளது. அதாவது, மொபைல் ரீசார்ஜ் போல எதிர்காலத்தில் மின்சாரத்தை எவ்வளவு யூனிட் தேவையோ அதற்கேற்ப ரீசார்ஜ் செய்து கொள்ளும் முறையைக் கொண்டு வரவும் மத்திய பாஜக அரசு திட்டமிட்டுள்ளது. முதலில், 10 ஆயிரம் யூனிட் மற்றும் 5 ஆயிரம் யூனிட் மின்சாரம் வரை பயன்படுத்தும் நுகர்வோர்களுக்கும் படிப்படியாக ஆயிரம் முதல் 500 யூனிட் வரை பயன்படுத்துவோருக்கும் கொண்டுவந்துவிடுவார்கள். இதனால், முன்கூட்டியே பணத்தை செலுத்தினால் மட்டுமே மின்சாரம் என்கிற நிலைக்கு மக்கள் தள்ளப்பட்டு விடுவார்கள். ஸ்மார்ட் மீட்டர் பொருத்திவிட்டால், வீடு தேடி மின் அளவீடு செய்ய பணியாளர்கள் வரமாட்டார்கள். ஏற்கெனவே உள்ள பணியாளர்கள் வேறு பணிக்கு மாற்றப்படுவார்கள். வரும் நாட்களில் மின் அளவீட்டாளர்கள் பணிகளுக்கு ஆட்கள் எடுப்பதே நிறுத்தப்பட்டுவிடும். இதனால் எதிர்காலத்தில் வேலைவாய்ப்புகள் பறிபோகும்'' என்கிறார்..அடுத்து, ஸ்மார்ட் மீட்டர் திட்டத்தால் தனியாருக்குக் கிடைக்கப் போகும் பலன்கள் குறித்து விவரித்த ஜெய்சங்கர், ``மின்வாரியக் கட்டமைப்பில் தற்போதுள்ள மின்பாதைகளில் மின்நுகர்வோரைத் தேர்ந்தெடுக்கும் உரிமை, தனியார் மின் விநியோக நிறுவனங்களுக்கு வழங்கப்பட்டுள்ளது. அவர்கள், அதிக மின் பயன்பாடு செய்பவர்களையே தேர்ந்தெடுப்பார்கள். இதன்மூலம் மின்சாரம், சந்தைப்பொருளாக மாறிவிடும். இதனால், `வசதி உள்ளவருக்கே மின்சாரம் அளிப்பதில் முன்னுரிமை' என்ற நிலை ஏற்படும். தனியார்கள் மின் விதியோக உரிமையைப் பெறுவதால் மின் கட்டணம் உயரும். மின்சார விஷயத்தில், மாநில அரசின் உரிமை ஒட்டுமொத்தமாகப் பறிபோகும். மாநில அரசு தற்போது விவசாயத்துக்கு அளிக்கும் இலவச மின்சாரம், கைத்தறி நெசவுத் தொழிலுக்கான மானிய மின்சாரம், வீட்டு மின் இணைப்புக்கு வழங்கும் 100 யூனிட் மின்சாரம் யாவும் கேள்விக்குறியாக மாறும். மத்திய அரசின் நோக்கம் மானியத்தைப் பறிப்பதுதான். ஸ்மார்ட் மீட்டர் மூலம் மின் அளவீடு துல்லியமாக இருக்கும், 15 நிமிடத்துக்கொரு ஒருமுறை மின்சாரப் பயன்பாடு தெரியும் என்பதெல்லாம் நன்மைகள் என்று சொல்வார்கள். ஆனால், ஸ்மார்ட் மீட்டருக்குப் பின்னால், இத்தனை பேராபத்துகள் மறைந்திருக்கின்றன” என்றார். இதற்கிடையே, தமிழக அரசு ஸ்மார்ட் மின் மீட்டர் திட்டத்தை மாநிலம் முழுவதும் மூன்று தொகுப்புகளாக மேற்கொள்ளத் திட்டமிடப்பட்டிருந்தது. முதற்கட்டமாக, மேற்கு மாவட்டங்களில் சுமார் ஒரு கோடி ஸ்மார்ட் மீட்டர்களும் தென் மாவட்டங்களில் 80 லட்சம் மீட்டர்களும் பொருத்துவதற்கான டெண்டர் கோரப்பட்டு இருந்தது. இந்த டெண்டருக்கு 40-க்கும் மேற்பட்ட நிறுவனங்கள் விண்ணப்பித்து, டெண்டர் இறுதி செய்யப்படவிருந்த நேரத்தில், ஆகஸ்ட் 1ம் தேதி டெண்டரை ரத்து செய்து மின்வாரியம் அறிவித்துள்ளது. ``டெண்டர் ரத்து ஏன்?'' என மின்வாரியத்தில் கேட்டபோது, “எதிர்காலத்தில் 5ஜி தொழில்நுட்பத்தைப் பயன்படுத்தும் வகையில் ஸ்மார்ட் மீட்டர் இருக்க வேண்டும் என்று அரசு சார்பில் கருதப்படும் காரணத்தால் டெண்டர் ரத்து செய்யப்பட்டுவிட்டது”என்கின்றனர். ஸ்மார்ட் மீட்டர் சர்ச்சைகள் குறித்து மின்துறை அமைச்சர் தங்கம் தென்னரசுவிடம் பேசினோம். “அரசாணையை அமுல்படுத்தும்படி மத்திய அரசிடமிருந்து எந்தவித அழுத்தமும் வரவில்லை’’ என சுருக்கமாக முடித்து கொண்டார். ஸ்மார்ட்டாக காலி செய்யாமல் இருந்தால் சரிதான்! - அரியன் பாபு

ஃப்ரி கரன்ட்டுக்கு வேட்டு வைக்குமா ப்ரிபெய்டு கரன்ட்?

Related Stories