புதுக்கட்சி தொடங்குவாரா பன்னீர்?! கலாய்த்த நத்தம்... கலங்காத வைத்தி

`எங்கே செல்லும் இந்தப் பாதை?' என்ற பாடல் வரிகள், அ.தி.மு.க.வின் முன்னாள் ஒருங்கிணைப்பாளர் ஓ.பன்னீர்செல்வத்துக்கு ரொம்பவே பொருந்தும். ஏறக்குறைய அனைத்து ஆயுதங்களையும் இழந்து நிர்கதியாக தவிக்கும் அவர், புதுக்கட்சியைத் தொடங்கும் திட்டத்தில் இருப்பதாக வெளியான தகவல்தான், லேட்டஸ்ட் ஹாட் டாபிக்.``என்ன செய்யப் போகிறார் ஓ.பி.எஸ்?'' என அவரின் ஆதரவாளர்களிடம் பேசினோம். ``நான்கரை ஆண்டுகால ஆட்சியைத் தக்கவைக்க பன்னீர்செல்வத்தின் தயவு எடப்பாடி பழனிசாமிக்கு தேவைப்பட்டது. ஆட்சி அதிகாரம் கைவிட்டுப்போனதும் கட்சியின் அதிகாரத்தைக் கையில் எடுத்த எடப்பாடி, பன்னீருடன் இருந்த முனுசாமி போன்ற முக்கிய நிர்வாகிகளை தன்பக்கம் இழுத்துக் கொண்டார்.இரட்டைத் தலைமையை ஒழித்துக்கட்டிவிட்டு, பொதுச்செயலாளர் ஆகிவிட்டார். `இது அம்மா வகித்த பதவி' என்பதால் எடப்பாடிக்கு எதிராக இன்றளவும் சட்டரீதியாக போராடிக் கொண்டிருக்கிறார். இதில் தனக்கு பா.ஜ.க உதவி செய்யும் எனவும் நம்பினார். ஆனால், அனைத்தும் எடப்பாடி பழனிசாமிக்கு சாதகமாகவே போய்க்கொண்டிருக்கிறது. கடந்த ஆகஸ்ட் 25ம் தேதியன்று, அ.தி.மு.க. பொதுக்குழு தீர்மானங்களுக்கும் பொதுச்செயலாளர் தேர்தலுக்கும் தடைவிதிக்கக் கோரி பன்னீர்செல்வம் உட்பட 4 பேர் தாக்கல் செய்த மேல்முறையீட்டு வழக்குகளை சென்னை உயர்நீதிமன்றம் தள்ளுபடி செய்துவிட்டது.அதுமட்டுமல்ல, `அ.தி.மு.கவில் இருந்து ஓ.பன்னீர்செல்வம் உள்ளிட்டோரை நீக்கி பொதுக்குழுவில் இயற்றப்பட்ட சிறப்பு தீர்மானத்துக்கு தடைவிதிக்க முடியாது’ எனவும் நீதிமன்றம் கூறியிருப்பதுதான் கலக்கத்தை ஏற்படுத்தியுள்ளது. இதற்கு எதிராக அடுத்தகட்ட சட்டநடவடிக்கையை மேற்கொள்ள தயாராகி வரும் அதேவேளையில், அண்ணாமலை மூலமும் வியூகம் வகுத்துப் பார்த்தார், பன்னீர்செல்வம். ஆனால், டெல்லி மேலிடமோ, `எடப்பாடி தலைமையில்தான் தமிழகத்தில் கூட்டணி. அவர் சம்மதித்தால் மட்டுமே கூட்டணியில் நீங்கள் இடம்பெறமுடியும். அதேநேரம், 2026 சட்டசபைத் தேர்தலில் உங்களுக்கு உரிய முக்கியத்துவம் தரப்படும்’ எனக் கூறியதால், பன்னீர்செல்வம் படுஅப்செட்..`எவ்வளவு இழப்புகள் வந்தாலும் பன்னீர்செல்வத்தை அ.தி.மு.கவில் சேர்க்கக்கூடாது’ என்பதில் எடப்பாடி உறுதியாக இருக்கிறார். `2024 நாடாளுமன்றத் தேர்தலில் தனது பலம் என்ன என்பதை காட்டிவிட்டு, அதன் பிறகு வேண்டுமானால், பன்னீரை கட்சியில் சேர்த்துக்கொள்வது குறித்து யோசிக்கலாம்' என்பதுதான் எடப்பாடி ஆதரவு நிர்வாகிகளின் நோக்கம்.இதனால் வேறுவழியில்லாமல் புதுக்கட்சி தொடங்கும் முடிவுக்கு வந்திருக்கிறார், பன்னீர்செல்வம். 2017ல் தர்மயுத்தம் நடத்தியபோதே `அனைத்திந்திய அம்மா திராவிட முன்னேற்றக் கழகம்’ என்ற பெயரில் கட்சியைத் தொடங்க தேர்தல் கமிஷனை அணுகினார் பன்னீர். ஆனால், பா.ஜ.க. மேலிடம் அதை தடுத்து நிறுத்திவிட்டது. இதனால், அ.தி.மு.க நிறுவனர் எம்.ஜி.ஆர். பெயரில் கட்சி தொடங்கலாமா என்பது குறித்தும் ஆலோசித்து வருகிறார்.இதுதொடர்பாக, ஏற்கெனவே எம்.ஜி.ஆரின் தீவிர விசுவாசியும் இயக்குநருமான பாக்யராஜை தொடர்புகொண்டு பேசியிருந்தார். அப்போது பாக்யராஜ், ‘ஆதித்தனார் கையில் இருந்த ‘நாம் தமிழர்’ என்ற இயக்கத்தைத்தான் சீமான் நடத்தி வருகிறார். அதேபோல் வேண்டுமானால் நான் தொடங்கி நடத்தி வந்த ‘எம்.ஜி.ஆர். மக்கள் முன்னேற்றக் கழகம்’ என்ற கட்சியை சட்டப்படி நீங்கள் எடுத்துக்கொள்ளுங்கள்’ எனக் கூறியிருந்தார்.ஆனாலும், முடிவு எதுவும் எடுக்க முடியாமல் குழப்பத்தில் தவிக்கிறார். ஒருபக்கம் புதுக் கட்சி யோசனையில் மூழ்கி இருந்தாலும், இன்னொரு பக்கம் 2024 நாடாளுமன்றத் தேர்தல் நெருங்கும்வரை சட்டப்போராட்டத்தில் தொடர்ந்து ஈடுபடலாமா என்பது குறித்தும் ஆலோசனை நடத்தி வருகிறார். டி.டி.வி.தினகரனின் அ.ம.மு.கவுடன் கூட்டணி வைத்துக்கொண்டு, பா.ஜ.க.வை பகைத்துக்கொள்ளவும் அவருக்கு மனம் இல்லை. ஆனால், தன் மகன் ரவீந்திரநாத்தை எப்படியாவது மீண்டும் எம்.பி.யாக்க வேண்டும் எனவும் நினைக்கிறார். இப்படி பலவித எண்ண ஓட்டங்களில் சிக்கி தவிக்கிறார் பன்னீர்" என்று முடித்தனர்..ஓ.பி.எஸ்ஸின் சட்டப்போராட்டம் குறித்து முன்னாள் அமைச்சர் நத்தம் விஸ்வநாதனிடம் கேட்டபோது, ``எடப்பாடி பழனிசாமிதான் அ.தி.மு.க.வின் நிரந்தர பொதுச்செயலாளர். ஓ.பன்னீர்செல்வம் எந்த சட்டப்போராட்டம் நடத்தினாலும் அதைப்பற்றி நாங்கள் கவலைப்படப் போவதில்லை. அவரின் பேச்சுக்கும் செயலுக்கும் ஒரு துளிகூட தொடர்பு இருக்காது. ஓ.பி.எஸ் யாரையும் நம்பமாட்டார். ஏன், தன்னையேகூட நம்பமாட்டார்.கருணாநிதியின் `பராசக்தி' வசனத்தை மனப்பாடம் செய்து வைத்திருக்கும் பன்னீர்செல்வத்தை ஜெயலலிதாவின் ஆன்மாவும் எம்.ஜி.ஆரின் ஆன்மாவும் மன்னிக்காது. எனவே, அவர் யார் பெயரில் கட்சி தொடங்கினாலும் எங்களுக்கு கவலை கிடையாது. அந்தக் கட்சி எந்த நிலையிலும் போணி ஆகாது'' என்றார்.ஓ.பன்னீர்செல்வத்தின் புதுக் கட்சி பிளான் குறித்து முன்னாள் அமைச்சர் வைத்திலிங்கத்திடம் கேட்டபோது, ``2024 நாடாளுமன்றத் தேர்தலில் `மெகா’ கூட்டணியில் நாங்கள் இயங்குவோம். புதுக்கட்சியைத் தொடங்குவது குறித்து இதுவரை எந்த முடிவுக்கும் வரவில்லை. அதற்கான அவசியம் எங்களுக்கு ஏற்படவில்லை. அ.தி.மு.க சட்டரீதியாக எங்கள் கைகளை தேடி விரைவில் வரும். எதைக் கண்டும் நாங்கள் சோர்ந்துவிடவில்லை’" என்றார் நம்பிக்கையுடன்.இன்னும் எவ்வளவு காலத்துக்குத்தான் இந்த நம்பிக்கை?- கணேஷ்குமார்படங்கள்: ம.செந்தில்நாதன்