நியூஸ் பெஞ்ச்

பாய் வீட்டு பிரியாணி... அப்பீட் ஆன ஆபீசர்ஸ் மயிலாடுதுறை, சீர்காழி நகராட்சி அலுவலக மேலாளர் காதர்கானின் சகோதரி திருமணம் கடந்த வாரம் சிதம்பரம் அருகே நடைபெற்றது. திருமண விருந்தில் கலந்துகொண்டு பிரியாணியை சுவைப்பதற்காக நகராட்சி ஊழியர்களும் அதிகாரிகளும் மதியம் 12 மணிக்கே அலுவலக வேலைகளை விட்டுவிட்டு கிளம்பிவிட்டனர். பாய் வீட்டு கல்யாணத்தை அறியாமல் நகராட்சிக்கு வந்திருந்த பொதுமக்கள், மாலை 4 மணி வரை காத்திருந்து ஏமாற்றத்துடன் திரும்பிச் சென்றனர். சீர்காழி நகராட்சி ஆணையர் ஹேமலதாவிடம் கேட்டபோது, “இன்றுதான் ஆணையராக பொறுப்பேற்கிறேன். விசாரிக்கிறேன்'' என்றார். பிரியாணிக்காக ஒட்டுமொத்த ஆபீஸே அப்பீட் ஆனதால் பொதுமக்கள் கொந்தளிப்பில் உள்ளனர். வேலை முக்கியமா? விருந்து முக்கியமா?.தஞ்சை அதிகாரி... சென்னையில் டேரா! தஞ்சை, திருவாரூர், நாகப்பட்டினம், மயிலாடுதுறை ஆகிய மாவட்டங்களில் கொசு, பூச்சிகளால் பரவும் நோய்களைக் கண்டறிந்து கட்டுப்படுத்த பரணிகுமார் என்ற அதிகாரி நியமிக்கப்பட்டார். ஆனால், சென்னையில் இருந்தபடியே வேலை பார்த்து வருகிறார். இதனால் இந்த நான்கு மாவட்டங்களிலும் மலேரியா, டெங்கு, டைஃபாய்டு உள்ளிட்ட நோய்கள் குறித்த கணக்கீடு விவரப் பணிகள் எதுவும் நடக்கவில்லை. பர்சேஸ் விவகாரங்களை கவனிப்பதால், இந்தச் சலுகை கொடுக்கப்பட்டதாக பொது சுகாதாரத்துறை ஊழியர்களே குமுறுகிறார்கள். பொது சுகாதாரத்துறை இயக்குநர் செல்வவிநாயகத்திடம் கேட்டபோது, ``எங்களுக்கு எங்கு தேவையோ, அங்கு மாற்றிப் பயன்படுத்திக் கொள்வோம். ஒவ்வொரு மாவட்டத்திலும் இதற்கான அதிகாரிகள் இருக்கிறார்கள். வேறு எங்காவது தேவைப்பட்டால் இப்படி மாற்றுவது இயல்புதான்'' என்கிறார். இப்படியும் ஒரு பதில்!.போக்சோ கைதிக்கு சப்போர்ட்... சிக்கிய எஸ்.ஐ! காரைக்காலை அடுத்த திருநள்ளாறு பகுதியில் வீட்டருகே விளையாடிக் கொண்டிருந்த 10 வயது சிறுமியிடம், கல்லூரி மாணவர் சக்திவேல் என்பவர் பாலியில் சீண்டலில் ஈடுபட்டுள்ளார். இதுகுறித்து சிறுமியின் பெற்றோர் திருநள்ளாறு போலீஸில் புகார் அளிக்கவே, போக்சோ சட்டத்தின்கீழ் கைது செய்யப்பட்டார். இந்நிலையில் குற்றவாளிக்கு ஆதரவாக திருநள்ளாறு எஸ்.ஐ. தனபால், சிறுமியின் தாயிடம் சென்று, `புகாரை வாபஸ் வாங்கு. இல்லைன்னா உன் குடும்பத்தையே காலி செய்துவிடுவேன்' என மிரட்டியுள்ளார். இந்த ஆடியோ சமூக வலைதளங்களில் வெளியாகி வைரலாக, விசாரணை வளையத்துக்குள் கொண்டு வரப்பட்டிருக்கிறார், எஸ்.ஐ தனபால். காக்கி உடைக்கே களங்கம்!.பன்னீர் வீட்டில் தங்கம்! முதல்வர், துணை முதல்வர், அமைச்சர் எனக் கோலோச்சினாலும் ஓ.பி.எஸ்ஸுக்கு தேனி அ.தி.மு.க மா.செ.வாக இருந்த தங்க.தமிழ்ச்செல்வன் கொடுத்த குடைச்சல் சாதாரணப்பட்டதல்ல. ஜெ., மறைவுக்குப் பிறகு சசிகலா பக்கம் நின்றதால், அவரின் எம்.எல்.ஏ பதவிக்கு சிக்கல் ஏற்பட்டது. இதன்பிறகு, தி.மு.க.வுக்குத் தாவியதால் தற்போது தேனி வடக்கு மாவட்ட செயலாளராக வலம்வந்து கொண்டிருக்கிறார். இருந்தாலும், `கட்சியில் மரியாதை இல்லாததால் மீண்டும் தாய்க்கழகம் செல்வார், எடப்பாடியை ரகசியமாக சந்தித்தார்' என்றெல்லாம் ஹேஸ்யங்கள் கொடிகட்டிப் பறக்கின்றன. இந்நிலையில், பெரியகுளத்தில் உள்ள ஓ.பன்னீர்செல்வம் வீட்டில் அவரை தங்க.தமிழ்செல்வன் சந்தித்தது புகைச்சலை கிளப்பியுள்ளது. தனது மகளின் திருமண அழைப்பிதழை கொடுக்கவே சென்றதாகவும் அப்போது பழைய நினைவுகளில் இருவரும் மூழ்கியதாகவும் சொல்கிறார்கள். அந்த நாள் ஞாபகம் நெஞ்சிலே வந்ததே!.கமிஷன் கலாட்டா... சேர்மன் மீது புகார்! பேரணாம்பட்டு நகர சேர்மனாக இருப்பவர் பிரேமா வெற்றிவேல். துணை சேர்மனாக இருப்பவர் தி.மு.க. ந.செ ஆலியார் ஜுபேர். ஆனால், நகர சபைக் கூட்டத்தில் பிரேமாவை ஓவர்டேக் செய்து பேசும் ஜுபேர், டெண்டர், கமிஷன் விஷயத்திலும் அவரே தலையிட்டு கவுன்சிலர்களுக்கு பிரித்துக் கொடுக்கிறார். இதில் சில சதவிகிதங்களை மறைத்துப் பங்கிட்டதை கவுன்சிலர்கள் விரும்பவில்லை. இதனை சேர்மன் கவனத்துக்குக் கொண்டு சென்றனர். ஆனால் பிரேமாவோ அமைதி காத்தார். இதனால் கொதித்துப்போன தி.மு.க. கவுன்சிலர்கள் 7 பேர், இதர 3 கவுன்சிலர்கள் ஒன்றுசேர்ந்து பிரேமா மீது நம்பிக்கையில்லா தீர்மானம் கொண்டுவர கமிஷனரிடம் மனு கொடுத்துள்ளனர். `பதவிக்கு ஆபத்தில்லை' என்றாலும் விவகாரம் மா.செ நந்தகுமார் வரை போனது. `நமக்கு கட்சிதான் முக்கியம், நகர்மன்றத்தை நீங்கள் பாருங்கள். நகர செயலாளரை நான் பார்த்துக் கொள்கிறேன்’ என்று எல்லையைப் பிரித்து அனுப்பியுள்ளார். இதனால், மனு கொடுத்தவர்களில் நான்கு பேர் பிரேமா பக்கம். எல்லாம் கமிஷன் படுத்தும்பாடு!.காங்கிரஸை கலங்கடித்த பா.ஜ.க மா.செ! காரைக்குடி நகராட்சியின் பாதாள சாக்கடை திட்டம் 2016ம் ஆண்டில் தொடங்கப்பட்டது. அந்தப் பணி இன்னும் முழுமை பெறவில்லை. ``ஊழல் நிறைந்திருக்கும் இத்திட்டம் குறித்து சி.பி.ஐ. விசாரிக்க வேண்டும்'' என்று சிவகங்கை மாவட்ட பா.ஜ.க. மா.செ நாகராஜன் பீதியைக் கிளப்பியுள்ளார். இதுகுறித்து பேசிய அவர், ``குழாய்களைப் பதிக்கும்போதே பல்வேறு இடங்களில் நொறுங்கிவிட்டது. கழிவுநீர் மேனுவல்களும் ஜங்ஷன் பெட்டிகளும் உடைந்துபோய்விட்டன. அதை சரிசெய்யாமல் வீடுகளுக்கு இணைப்பு கொடுத்து வருகின்றனர். மழைக்காலம் தொடங்கும்போது, காரைக்குடி நகர்ப்பகுதி முழுவதும் வெள்ளத்தில் மிதக்கப்போவது உறுதி'' என்கிறார். காரைக்குடி காங்கிரஸ் எம்.எல்.ஏ. மாங்குடியோ, `` அதிகாரிகளிடம் சரிசெய்யுமாறு நேரடியாக அழைத்துச்சென்று காட்டினேன். அவர்களும், `கசிவு தொடர்பான பணிகளை சரிசெய்துவிட்டோம்' என்றார்கள். வீடுகளில் இருந்து கழிவுநீர் குழாய்களைப் பதித்துக்கொண்டு வருகிறார்கள். இனிமேல்தான் நிஜ பிரச்னை தெரியவரும்'' என்கிறார்.என்னவொரு அக்கறை?