எங்கே அசோக்? : கட்டிக் காக்கிறாரா வட்டிக்கடை அதிபர்…

கொச்சியில் வைத்து செந்தில் பாலாஜியின் சகோதரர் அசோக் கைதானதாக பரவிய தகவலால் அரவக்குறிச்சி பைனான்ஸ்சியர்கள் எல்லாம் ஆடிப்போய்விட்டார்கள். இதைத் தொடர்ந்து, ``இங்க அடிச்சா அங்க ஏன் வலிக்கிறது?” என்ற கேள்விக்கான விடைகள் அனைத்தும், அதிர்ச்சி ரகம்.`செந்தில் பாலாஜியின் சகோதரர் அசோக் எங்கிருக்கிறார்?' என்ற கேள்விக்கான விடை இன்னமும் முடிவுக்கு வரவில்லை. `பெங்களூருவில் சிக்கிவிட்டார்', `கொச்சியில் வளைத்துப் பிடித்தது அமலாக்கத்துறை' என்றெல்லாம் உறுதி செய்யப்படாத தகவல்களே வலம் வருகின்றன. அதேநேரம், அசோக் கைது என்ற செய்தி வெளிவந்தாலே கரூர் கம்பெனி வட்டாரத்தில் அதிர்ச்சியோ அதிர்ச்சி.இதன் பின்னணியை விசாரித்தோம். கரூர் கம்பெனி வட்டாரத்தில் நெருங்கிய தொடர்பில் இருந்த முக்கிய புள்ளி ஒருவர் நம்மிடம் பேசினார். அவர் கூறிய தகவல்கள் அப்படியே!``திருப்பூர் மாவட்டம் வெள்ளக்கோவில் அருகே உள்ள கிராமத்தை சேர்ந்த முக்கிய பிரமுகர் ஒருவர், 25 ஆண்டுகளுக்கு முன்பே கேரளாவுக்கு சென்று வட்டித் தொழிலை தொடங்கிவிட்டார். இன்று கேரளாவில் மட்டும் நூற்றுக்கணக்கான இடங்களில் வட்டிக்கடைகளை நடத்தி வருகிறார். கேரளாவில் பஸ் கம்பெனியும் நடத்தி வருகிறார்.கேரளாவில் அவ்வப்போது வட்டிக்கடை நடத்துகிறவர்களை போலீஸ் கைது செய்ய ஆரம்பிக்கும். அப்படி பிரச்னை வரும்போதெல்லாம், இவர் தலைமையில் மூலனூரில் ஒரு திருமண மண்டபத்தில் வட்டிக்கடைக்காரர்கள் எல்லாம் கூடி அதிகாரிகளையும் போலீஸையும் சமாளிக்க நிதி திரட்டுவார்கள். மண்டபத்திலேயே கோடிக்கணக்கணக்கான ரூபாய் சேர்ந்துவிடும். அந்தளவுக்கு செல்வாக்குமிக்கவராக இருந்தார்.இவரின் மனைவி அரவக்குறிச்சி அருகே உள்ள கிராமத்தைச் சேர்ந்தவர். இவருக்கும் ஊரில் சொந்தமாக பிரமாண்டமான பண்ணை வீடு இருக்கிறது. 2017ல் அரவக்குறிச்சி தொகுதியில் இடைத்தேர்தலின்போது, தி.மு.க தேர்தல் பொறுப்பாளராக தி.மு.க.வின் முக்கிய நிர்வாகி ஒருவர் வந்தார். அவர், இந்த பிரமுகரின் பண்ணை வீட்டில்தான் தேர்தல் முடியும் வரை தங்கியிருந்தார். தேர்தல் முடியும் முன்னரே அந்த நபரை குடும்பத்துடன் சென்னைக்குக் கூட்டிவந்து பைனான்ஸ் தொழிலை ஆரம்பித்துக் கொடுத்தார்.கேரளாவிலும் சென்னையிலும் பிசினஸ் கொடிகட்டி பறக்கும் நிலையில்தான், தி.மு.க ஆட்சி அமைந்தது. முக்கிய நிர்வாகியும் முக்கியப் பொறுப்புக்கு வந்துவிட்டதால் அவருக்கு ஜாக்பாட் அடிக்கத் தொடங்கியது. ஏராளமான ஒப்பந்ததாரர்கள் இவரை சந்திக்க வந்தனர். இந்தநேரத்தில் சட்டவிரோத பார்களை மாவட்டவாரியாக ஏலம்விடும் தகவல் அறிந்து மேற்கு மண்டலத்தில் உள்ள ஒரு பகுதியை பல கோடி ரூபாய்க்கு ஏலம் எடுக்கிறார்.இதன்மூலம் செந்தில் பாலாஜியின் தம்பி அசோக்குமாரை நெருங்குகிறார். அவரை கேரளாவில் பிரபல ஆயுர்வேத புத்துணர்வு மையத்துக்கு அடிக்கடி அழைத்துச் செல்கிறார். அசோக்குடன் நெருக்கம் அதிகமான பிறகு ஒருகட்டத்தில் அரவக்குறிச்சி பகுதியில் பழம்பெரும் தி.மு.க.வினரை எல்லாம் ஓரம் கட்டிவிட்டு, பவர்சென்டராக மாறினார்..காடு, தோட்டம் என எது விலைக்கு வந்தாலும் வாங்கி குவித்துக்கொண்டே இருந்தார். இந்த நிலையில், கடந்த மே மாதம் 20ம் தேதி வருமான வரித்துறை கரூரிலுள்ள செந்தில்பாலாஜியின் தம்பி அசோக் வீட்டுக்கு வந்த சில நாட்களிலேயே கரூர் கம்பெனி கலைக்கப்பட்டு சட்டவிரோத பார்கள் மூடப்பட்டன. ஆனால், இவர் மட்டும் சட்டவிரோத பார்களை நடத்திவந்தார். பின்னர் மேலிடத்திலிருந்து ரெட் சிக்னல் வந்த பிறகுதான் பார் தொழிலை இழுத்து மூடினார்.தொடர்ந்து மீண்டும், மீண்டும் கரூரில் ரெய்டு நடந்ததால் கரூர் கம்பெனியை சேர்ந்த பைனான்ஸியர்கள் பலரும் தலைமறைவாகிவிட்டனர். இவரும் கொஞ்சம் அடக்கிவாசிக்க ஆரம்பித்தார். செந்தில்பாலாஜி கைது செய்யப்பட்ட நிலையில், அசோக்குக்கு நான்கு முறை சம்மன் அனுப்பியும் ஆஜராகவில்லை.`அசோக் எங்கு இருக்கிறார்?' என்கிற கேள்வி அரசியல் வட்டாரத்தில் பரபரப்பானபோது, `கரூர் கம்பெனியின் பாதுகாப்பில் கரூர் அல்லது கோவையில்தான் இருப்பார்' என்று சொல்லபட்டது. தற்போது கொச்சியில் கைதானதாக தகவல் வெளியானபோது, `கேரளாவில் முக்கிய நபரின் பாதுகாப்பில் மட்டுமே இருந்திருக்க முடியும். இதைப் பற்றி தனக்கு வேண்டிய மூத்த நிர்வாகியிடம் பேச்சுவாக்கில் கூறப்போய், அந்த ரகசியம் கசிந்திருக்கலாம். முதல் நாள் மதியம் கைது என்கிற செய்தியை, அடுத்தநாள் மதியம்தான் அமலாக்கத்துறை மறுக்கிறது. அசோக் எங்கு இருக்கிறார் என்பதுதான் மர்மம் என்றால், அவரின் கைது செய்தியும்கூட மர்மமாகவே இருக்கிறது’’ என்றார் விரிவாக.இதுபற்றி அரவக்குறிச்சி ஒன்றிய தி.மு.க பொறுப்பாளர் ஒருவர் நம்மிடம், ”10 வருடமாக எதிர்க்கட்சியாக இருந்து கட்சிக்காக உழைத்த நாங்கள் எல்லாம் நடுத்தெருவில் நிற்கிறோம். கட்சிக்கு சம்பந்தமில்லாதவர்களின் வீடுகளில் வருமானவரித்துறை சோதனையும் அமலாக்கத்துறையும் சோதனையும் நடக்கிறது. ஆனாலும், அவர்கள் எல்லாம் கொழிக்கிறார்கள்'' எனப் புலம்புகின்றனர்.கண்ணாமூச்சி ஆட்டம் முடிவுக்கு வருமா? - அரவிந்த்