அமெரிக்கா – சீனா விவகாரத்தில் இந்தியா என்ன செய்ய வேண்டும்?

நம் அண்டை நாடான இலங்கையில், சீனா பெட்ரோல் நிலையங்களை நிறுவி எரிபொருள் விற்பனை செய்வதற்கு ஆயுத்தமாகிறது. இதற்கான ஒப்பந்தத்தில் இரு நாடுகளும் கையெழுத்திட்டுள்ளன. தவிர, அமெரிக்கா உள்ளிட்ட சில நாடுகளுடனும் இலங்கை அரசு இதுபோலவே ஒப்பந்தம் செய்ய திட்டமிட்டுள்ளது. தற்போது இலங்கை அரசின் நிறுவனமும் இந்தியன் ஆயில் கார்ப்பரேஷனும் சேர்ந்து லங்கா - ஐ.ஓ.சி. என்ற பெயரில் இலங்கையில் பெட்ரோல் விற்பனை செய்துவரும் நிலையில்தான் இந்த திடீர் ஒப்பந்தம்! ஏன்?இலங்கை பொருளாதார பிரச்னையின் உச்சத்தில் ஏழைகளுக்கு உணவு மற்றும் மருந்துகளுக்கு தட்டுப்பாடு ஏற்பட்டால், நகர்ப்புறத்தின் பணக்காரர்களுக்கும் மத்தியதர மக்களுக்கும் பெட்ரோல், டீசல் தட்டுப்பாடு ஒரு அளவுகோலாகவே மாறியது. பின்னோக்கி பார்க்கும் போது, அந்த நாட்டிற்கு அள்ளி அள்ளி கொடுத்த இந்தியா, அப்போது பெட்ரோல் மற்றும் டீசலை அதிக அளவில் கொடுத்து உதவி இருந்திருக்க வேண்டுமோ என்று எண்ணத்தோன்றுகிறது. எனவேதான், தற்போது ஆட்சியில் இருக்கும் ஜனாதிபதி ரணில் விக்கிரம சிங்கே, விவசாயிகளுக்கு ரசாயன உரமும், நகர்புற மக்களுக்கு பெட்ரோலிய பொருள்களும்தட்டுப்பாடின்றி சப்ளை செய்ய வேண்டிய கட்டாயத்தை உணர்ந்து செயல்படுகிறார்..உசுப்பேற்றும் சீனா...அஞ்ச வேண்டியதில்லை இந்தியாஎன்றாலும், இந்தியாவில் சில அரசியல் மற்றும் பாதுகாப்பு ஆய்வாளர்கள், சீனாவிடம் இருந்து இலங்கை பெட்ரோல் இறக்குமதி செய்வதையும் அந்த நாட்டு நிறுவனங்களை சில்லறை விற்பனையில் ஈடுபட அனுமதிப்பதையும் விமர்சித்துள்ளார்கள். அவர்கள் விமர்சனத்தில் ஓரளவு நியாயம் இருக்கிறது. ஆனாலும், தெற்கு ஆசியாவின் மிகப்பெரிய பிராந்திய சக்தி என்று அனைவராலும் ஏற்றுக்கொள்ளப்பட்ட இந்தியா, இதுபோன்ற சலசலப்புகளுக்கு எல்லாம் அஞ்சாது என்று திரும்பத் திரும்ப நிரூப்பிக்க வேண்டிய நிர்பந்தத்தை நமது ஆய்வாளர்களே உருவாக்கிவிடுகிறார்கள். இதன் காரணமாகவும், சீனா நமது நாட்டின் சுற்று வட்டாரத்தில் இது போன்ற சில்மிஷங்களை மீண்டும் மீண்டும் அரங்கேற்றி நம்மை உசுப்பேற்றுகிறது.இலங்கை மட்டுமல்ல. தெற்கே மற்றுமொரு அண்டை நாடான மாலத்தீவிலும் சீனா அவ்வப்போது கால் பரப்பி வருகிறது. அந்த நாட்டில் உள்ள பிரச்னையே ஆளும் தரப்பினர் இந்தியா ஆதரவா, அல்லது சீனாவின் எடுபிடிகளா என்பதுதான். தற்போது இந்தியா ஆதரவாளர் இப்ராஹிம் சோலி அங்கு ஜனாதிபதியாக இருக்கிறார். செப்டம்பர் மாதம் ஜனாதிபதி தேர்தலில் அவருடையஅரசியல் எதிர்காலம் நிச்சயிக்கப்படும்..இது போன்றே, பங்களாதேஷில் தொடர்ந்து பதவியில் இருந்து வரும் பிரதமர் ஷேக் ஹசினா, இந்தியாவின் ஆதரவாளர். அவருக்கு 75 வயதானாலும் திடகாத்திரமாகவே இருக்கிறார். என்றாலும் எதிர்வரும் தேர்தல்களில் ஆட்சி மாற்றம் ஏற்பட்டால், புது ஆட்சியாளர்கள் சீனா மற்றும் பாகிஸ்தான் ஆதரவாளர்களாகவே இருப்பார்கள். மற்றொரு அண்டை நாடான நேபாளத்தில் தற்போதைய ஆட்சியே இந்தியாவிற்கு முகத்தையும் சீனாவிற்கு வாலையும் காட்டும் இடதுசாரி தலைமையே.இல்லையென்று சொல்லாமல், பூடான் நம்முடன் இருக்கிறதுதான்.ஆனாலும், சீனாவுடனான எல்லைப் பிரச்னையை தீர்க்கும் பேச்சுவார்த்தைகளை இந்தியா இல்லாமலே தொடர்வதின் மூலம் பூடான் அரசும் தனது இறையாண்மையை தனது மக்களுக்கே நிரூபிக்க வேண்டிய நிர்பந்தத்தில் உள்ளது. மற்றபடி, பாகிஸ்தான், ஆப்கானிஸ்தான் ஆகிய இரு நாடுகளையும் பற்றி கேட்கவே வேண்டாம்.கடல் வழி போர் புரியுமா சீனா?உண்மை நிலை இவ்வாறிருக்க, நாட்டின் உள்ளேயும் வெளியேயும் மோடி ஆதரவாளர்கள் நமது அரசின் அண்டைநாட்டு கொள்கையைபோல் வேறில்லை என்று தொடர்ந்து பில்ட் அப் கொடுத்து வருகிறார்கள். இதில் மோடியின் முயற்சியும் முன்னெடுப்புகளும் வரவேற்க தக்கவைதான். ஆனால், இவர்களின் குரல் சீனாவின் காதில் விழுவதில்லை.அந்த விதத்தில், சீனாவுடனான எல்லை பிரச்னையை பேச்சுவார்த்தை மூலம் தீர்த்துக்கொள்ள வேண்டும் என்றால் இந்தியா, சீனா ஆகிய இரு நாடுகளே போதும். வாஜ்பாய் காலம் துவங்கி, இந்தியா கடந்த 25 ஆண்டுகளுக்கும் மேலாக சாய்ந்து வரும் அமெரிக்காவுக்கு அங்கு வேலை இல்லை. மேலும், சீனா, பாகிஸ்தான் ஆகிய நாடுகளுடனான எல்லை பிரச்னையை, தீர்ப்பதற்கு ஐநா சபை உள்ளிட்ட மூன்றாம் தரப்புகளின் உதவியை நாடப்போவதில்லை என்று இந்தியா அரசு பல தசாம்சங்களாக உறுதியாக இருக்கிறது. அப்படியானால், அமெரிக்கா என்ன செய்துவிட முடியும்?அதே சமயம், இந்தியா - சீனா இடையே போர் உருவாகிவிட்டால், அதிலும் அமெரிக்கா உள்ளிட்ட மேலை நாடுகளின் பங்களிப்பு ஆயுதம் விற்பதோடு முடிந்துவிடும். மன்மோகன் சிங் அரசு தொடங்கி தற்போதைய மோடி வரையிலான மத்திய அரசு தலைமையும், ஏதோ சீனாவும் பாகிஸ்தானும் நமது கடற்பகுதி வழியே போரிடுவார்கள் என்று இந்திய பெருங்கடல் பிராந்தியத்தில் அமெரிக்கா தலைமையிலான குவாட் அமைப்பில் அங்கம் வகிக்கிறது..ஆனால், அங்கு பாகிஸ்தான் தவிர்த்து அமெரிக்கா, ரஷ்யா உள்ளிட்ட மூன்றாம் நாடுகளுக்கு இடமில்லை. சீனா அடுத்தடுத்து இருக்கும் எல்லைபகுதிகளில்தான் போரிடும். கடல் வழியாக வந்து தாக்குவது, சுற்றிவளைத்து மூக்கை தொடுவதற்கு சமம். அவ்வாறிருக்கையில் சீனா எதற்காக, கடல் வழி போரை முன்னெடுக்க வேண்டும்?அண்மையில், ஜப்பான் மற்றும் ஆஸ்திரேலியா சென்ற பிரதமர் மோடி, இரண்டு நாடுகளிலுமே மேற்குலக தலைவர்களோடு பேச்சுவார்த்தைகள் நடத்தினர். ரஷ்யாவுடனான போரில் எதிர்த்து நிற்கும் உக்ரைன் அதிபர் செலன்ஸ்கியுடனும் தனியாக பேச்சுவார்த்தை நடத்தினார். தவிர, ஆஸ்திரேலியாவின் வடக்கே இருக்கும் பப்புவா நியூ குனியா நாட்டில் பசுபிக் பெருங்கடலில் இருக்கும் பத்து சிறிய தீவு நாடுகளின் தலைவர்களுடன் பேச்சுவார்த்தை நடத்தினார். அது வளர்ச்சி மாநாடு என்று இந்தியா கூறுகிறது. ஆனால், மோடியின் ஆஸ்திரேலியா, ஜப்பான் விஜயங்களுக்கு இடையே அது ஒரு ராணுவம் சம்மந்தமான அரசியல் விஜயம் என்றே கருதப்படுகிறது. காரணம், மோடி விஜயத்திற்கு இடையே இந்தியாவின் நண்பனான அமெரிக்காவும், பப்புவா நியூ குனியாவும் ஒரு ராணுவ ஒப்பந்தம் செய்துகொண்டதுதான்.உறவு மேம்பட வேண்டும்!சீனா விஷயத்தில் இந்தியா இப்போது கவனம் செலுத்த வேண்டியது அண்டை நாடுகளைதான். காரணம், முதலில் கூறிய தெற்கு ஆசிய நாடுகளுக்கு அப்பால், கடந்த சில மாதங்களில் சீனா நமது பிற சுற்றுப்புற நாடுகளை உள்ளடக்கிய மேற்கு ஆசியா மற்றும் மத்திய ஆசிய நாடுகளில் தனது உறவை மேம்படுத்தி உள்ளது. இந்த இரண்டு பகுதிகளுமே இந்தியாவிற்கு அரசியல், பொருளாதாரம் மற்றும் பாதுகாப்பு விஷயங்களில் மிகவும் முக்கியம் வாய்ந்தவை.இவற்றில், மேற்கு ஆசிய நாடுகளில் இந்தியாவிலிந்து... குறிப்பாக, தென்னிந்தியாவில் இருந்து லட்சக்கணக்கானவர்கள் வேலை செய்கிறார்கள். கடந்த இரண்டு மூன்று வருடங்களில் மோடி, அந்த பகுதியில் முக்கியம் வாய்ந்த நாடுகளான சவுதி அரேபியா மற்றும் ஐக்கிய அரபு குடியரசு ஆகியவற்றுடன் உறவை மேம்படுத்தி, முத்திரை பதித்துள்ளார் என்று கொண்டாடப்படுகிறார்.அவ்வாறு எனில் சர்வதேச அரங்கில் இந்தியாவின் நண்பனான அமெரிக்காவுக்கு எதிரியான சீனாவுடன் இந்த நாடுகள் இப்போது மட்டும் அதீத சொந்தம் கொண்டாடுவது ஏன்? அந்த முஸ்லீம் நாடுகளுடன் சீனாவின் உறவு வலுப்பெறுமானால், அது இந்தியாவை எவ்வாறெல்லாம் பாதிக்கும்? பிராந்திய அரசியல் மற்றும் பாதுகாப்பு விஷயங்களை மனதில் கொண்டு, இந்தியா இந்த நாடுகளுடனான உறவை மேம்படுத்த வேண்டும் அல்லது சீர் செய்ய வேண்டும். பசிபிக் பெருங்கடல் நாடுகள், ஏன், அமெரிக்கா உள்ளிட்ட மேற்குலக நாடுகள் அதுவரை காத்திருக்க வேண்டும். அதனை நமது தலைமைகளும் புரிந்து செயல்பட வேண்டும்! -என்.சத்தியமூர்த்தி, கொள்கை மற்றும் அரசியல் ஆய்வாளர்

அமெரிக்கா – சீனா விவகாரத்தில் இந்தியா என்ன செய்ய வேண்டும்?

Related Stories