பகீர் பாளையங்கோட்டை மைதானம்… ஒப்பந்ததாரர் மீது என்ன நடவடிக்கை?

நெல்லை பாளையங்கோட்டை வ.உ.சி. மைதானம் 15 கோடி ரூபாய் செலவில் சீரமைக்கப்பட்டு எட்டு மாதங்களே ஆன நிலையில் அரை மணி நேர மழைக்கு மேற்கூரை இடிந்துவிழுந்து அதிர்ச்சியை ஏற்படுத்தியுள்ளது. நல்லவேளையாக உயிரிழப்புகள் இல்லையென்றாலும், ஒருவேளை பொதுமக்கள் இதில் பலியாகியிருந்தால் நிலைமை என்னவாகியிருக்கும் என்பதே பலரும் முன்வைக்கும் கேள்வி!இந்து முன்னணி மாநிலச் செயலாளர் வக்கீல் குற்றாலநாதன் இதுகுறித்து நம்மிடம் பேசினார். “வ.உ.சி. மைதானத்தின் புதிய கேலரியை 2022ம் ஆண்டு செப்டம்பர் மாதம் முதல்வர் ஸ்டாலின் திறந்து வைத்தார். திறந்து வைக்கப்பட்ட சில நாட்களிலேயே நான் அங்கு சென்றேன். அப்போதே அதன் கட்டுமானப் பணிகள் சரியில்லை. மேற்கூரை அமைக்கப்பட்டிருந்த கான்கிரீட் பில்லரில் விரிசல்கள் காணப்பட்டன. உடனே நான், கலெக்டர் மற்றும் மாநகராட்சி கமிஷனரிடம் புகார் கொடுத்ததோடு சமூக வலைதளங்களிலும் பதிவிட்டிருந்தேன். ஆனால், யாரும் கண்டுகொள்ளவில்லை.தற்போது சிறிது நேரமே அடித்த சூறாவளியில் மேற்கூரைகள் கான்கிரீட் பில்லரோடு இடிந்து விழுந்திருக்கின்றன. இந்த கேலரியில் எப்போதும் சுமார் நூறு பேராவது அமர்ந்திருப்பர்கள். அன்றைய தினம் மழை என்பதால் யாரும் அங்கு போகவில்லை. இல்லாவிட்டால் பெரும் உயிர்ச்சேதம் ஏற்பட்டிருக்கும்” என்றவர் இதைக் கட்டிய நிறுவனம் பற்றியும் விவரித்தார்.... “இந்தப் பணியை அ.தி.மு.க. ஆட்சியில் நாமக்கல்லைச் சேர்ந்த ஜே.வி. கன்ஸ்ட்ரக்ஷன் என்ற நிறுவனம் டெண்டர் எடுத்திருந்தது. இது எடப்பாடிக்கு வேண்டப்பட்ட நிறுவனம் என்றும் கூறப்படுகிறது. அ.தி.மு.க. ஆட்சியில் பணி நிறைவு சான்றிதழ் கொடுக்கப்பட்டு பில் பாஸ் செய்யப்பட்டிருக்கிறது. அப்போது பில்டிங் தரத்தை அதிகாரிகள் ஆய்வு செய்யவில்லையா? அ.தி.மு.க. அமைச்சர்கள் 20 சதவிகித கமிஷன் பெற்றுக் கொண்டதால்தான் கட்டிடம் தரமானதாக கட்டப்படவில்லை என்று தி.மு.க.வினர் கூறுகிறார்கள். ஆனால், கட்டிடப் பணிகள் தி.மு.க. ஆட்சியிலும் கடந்த ஒன்றரை ஆண்டுகளாக நடைபெற்றன. இவர்களும் கமிஷன் பெற்றுக்கொண்டு சும்மா இருந்துவிட்டார்களா? பாளையங்கோட்டையில் உள்ள நேருஜி கலையரங்கம், காந்தி மார்க்கெட் ஆகியவற்றைக் கட்டுவதும் இந்த ஜே.வி. கன்ஸ்ட்ரக்ஷன்தான். காந்தி மார்க்கெட்டில் ஆயிரக்கணக்கானோர் வந்து செல்வார்கள். அங்கு இதுபோல இடிந்துவிழுந்தால் என்னாவது? எனவே இந்த ஒப்பந்த நிறுவனம் மீது நடவடிக்கை எடுக்க வேண்டும்” என்றார் சீரியஸாக.நெல்லை மாநகராட்சி கமிஷனர் சிவகிருஷ்ணமூர்த்தியோ, “சென்னை அண்ணா பல்கலைக்கழக டெக்னிக்கல் எக்ஸ்பர்ட் டீம் ஒன்று வரவழைக்கப்பட்டிருக்கிறது. அந்த டீம் ஆய்வு செய்து அறிக்கை கொடுத்த பிறகு சம்பந்தப்பட்ட ஒப்பந்ததாரர் மீது நடவடிக்கை எடுக்கப்படும்” என்றார்.இதுகுறித்து ஜே.வி. கன்ஸ்ட்ரக்ஷன் நிறுவனத்திடம் பேச பல முறை முயன்றும் யாரும் பேச முன்வரவில்லை. இதற்கிடையே தமிழகம் முழுவதும் நடந்திருக்கும் ஸ்மார்ட் சிட்டி திட்டப் பணிகளை ஆராய தமிழக அரசு உத்தரவிட்டிருக்கிறது. அநேகமாக இது மாஜி அமைச்சரான வேலுமணிக்கு சிக்கலை ஏற்படுத்தும் என்கிறார்கள் இந்த விவகாரத்தை உற்றுநோக்குபவர்கள்! கட்டுமானத்தில் ஊழல் கரையான்கள் ஒழியட்டும்! -அ.துரைசாமி

பகீர் பாளையங்கோட்டை மைதானம்… ஒப்பந்ததாரர் மீது என்ன நடவடிக்கை?

Related Stories