”நூறு வருஷமா காதலை எதிர்க்கிறோம்!”...இதயத்தை நொறுக்கும் இரக்கமில்லா கிராமம்...

-பொ.அறிவழகன்பெற்ற தந்தை பிணமாகக் கிடக்க… அந்த துக்கத்தையும் மீறி, தன்னை ஊரார் காலில் விழச்சொன்ன அவமானத்தில் தலைகுனிந்து கண்களில் கண்ணீருடன் நின்றுக்கொண்டிருக்கிறார் மகன். கணவன் பிணமாகக் கிடக்க… மகனை நடைப்பிணமாக்கி வேடிக்கை பார்க்கும் கிராமத்து நாட்டாமைகளை நினைத்து கதறி அழுதுகொண்டிருந்தார் தாய். இறந்தவரின் குடும்பம் செய்த ஒரே தவறு, தங்கள் மகனின் காதலுக்கு பச்சைக் கொடி காட்டியதுதான். ஊர்க் கட்டுப்பாடு என்கிற சமூகக் கேடு ஆட்டிப் படைக்கும் அந்த கிராமத்துக்கு ஆஜரானோம்..தேனி-குமுளி தேசிய நெடுஞ்சாலையில் உள்ளது கோட்டூர் கிராமம். இங்கே ஒரே சமுகத்தை சேர்ந்தவர்கள், கிறிஸ்தவர்களாக உள்ளனர். காதல் திருமணம் செய்யக்கூடாது என்ற கட்டுப்பாடு இவர்களிடையே உள்ளது. இந்தக் கட்டுப்பாட்டை யாராவது மீறினால், அவர்களின் சுக, துக்கங்களில் யாரும் கலந்துகொள்ளமாட்டார்கள். குடும்பத்தில் யாராவது இறந்தால் சடலத்தை கல்லறையில் புதைக்கவும் அனுமதிப்பதில்லை. இந்த தண்டனைகளைத் தவிர்க்கவேண்டுமானால், ஊர் கூட்டத்தை கூட்டி நெடுசாண்கிடையாக எல்லோர் காலிலும் விழ வேண்டும். இப்படியான கிராமத்தில்தான் தன் மகனின் காதலுக்கு பச்சைக்கொடி காட்டியுள்ளார், ஜான் பீட்டர். அவரது இறப்பில்தான் இத்தனை அவலங்கள்!தந்தையை இழந்த துக்கத்துடனிருந்த ஆரோனிடம் பேசினோம். “என்னோட மூணு அண்ணன்கள்ல ஒருத்தர் போலீஸ், இன்னொருத்தர் காலேஜ் ப்ரொஃபசர், அடுத்தவர் ராணுவத்துல பார்மசிஸ்ட். நான் ஜே.சி.பி. ஓட்டறேன். படிக்கற சமயத்துல என்கூட படிச்ச பொண்ணை காதலிச்சேன். ஒரு கட்டத்துல அந்தப் பொண்ணு, என்னைத் தேடி என் வீட்டுக்கே வந்துட்டா. என்னை நம்பி, அவ வீட்டைவிட்டு வந்துட்டதை அப்பாகிட்ட சொன்னேன். அவர், ’பயப்படாதேம்மா... நான் உங்களுக்குக் கல்யாணம் செஞ்சு வைக்கறேன்’னு சொல்லி பெண் வீட்டார்கிட்டயும் சம்மதம் வாங்கினார்.பிறகு ஊர்த் தலைவர், சர்ச் பாதர்கிட்டேபோய் விஷயத்தைச் சொன்னோம். ஆரம்பத்துல சரின்னவங்க, திருமண ஏற்பாடுகள் நடந்த சமயத்துல ஊர்க் கூட்டம்போட்டு, திருமணத்தை நடத்த மறுத்து சர்ச்சைப் பூட்டிட்டாங்க. வேற வழியில்லாம நாங்க பக்கத்து ஊர் சர்ச்ல திருமணம் செய்துகிட்டோம். திரும்பி இங்கே வந்ததும், ஊர் காலுல விழுந்து மன்னிப்பு கேட்காமல் எப்படி இருப்பீங்கன்னு பார்த்துக்கறோம்னு மிரட்டிக்கிட்டே இருந்தாங்க.இதுக்கு இடையில எங்க தாத்தாவும், மாமாவும் இறந்துட்டாங்க. அவங்க இறுதி நிகழ்ச்சியில ஊர்க்காரங்க யாரும் கலந்துக்கலை. இப்போ எங்க அப்பா ஹார்ட் அட்டாக்ல இறந்துட்டார். அவரைப் புதைக்கறதுக்காக கல்லறைத் தோட்டத்துல குழிதோண்டப்போனபோது அனுமதி மறுத்துட்டாங்க. நாங்க எவ்வளவோ கெஞ்சிப்பார்த்தும் மனசு இரங்கலை. சரி, அப்பாவோட உடலை இப்படி வைச்சுகிட்டு இருக்கறதைவிட, ஊர் மக்கள் காலுல விழுந்துடுவோம்னு தீர்மானிச்சு, ஊர்க் கூட்டத்தைக் கூட்டி, காலுல விழுந்தோம்..ஆனா, அதை ஏத்துக்காம, ‘நீங்க சரியா விழலை, இப்படி இல்லை அப்படி விழணும்’னு எல்லாம் சொல்லி மறுபடிமறுபடி காலுல விழச்சொல்லி அவமானப்படுத்தினாங்க. ஒரு கட்டத்துல அவமானம் தாங்க முடியாமல் கிளம்பி வந்துட்டோம். எங்க அப்பாவோட உடலைப் புதைக்க அரசாங்கம்தான் நடவடிக்கை எடுக்கணும்” என்றார், தழுதழுக்க.இறந்த ஜான்பீட்டரின் மனைவி லிகோரியா, “மூணு வருஷமா எங்களை ஒதுக்கியே வைச்சிருக்காங்க. என் அப்பா செத்தப்பகூட என்னைப் பார்க்க அனுமதிக்கலை. இப்போ என் கணவரைப் புதைக்க கல்லறையில இடம் தரமாட்டேங்கிறாங்க. படிச்சவங்களும் பெரிய பெரிய ஆபீஸர்களும் வசிக்கற ஊரு. ஆனாலும் இப்படி ஒரு அவல நிலை” என்று கதறினார்.திருச்சபையின் பொறுப்பாளரும், பெருந்தனக்காரருமான கவிக்கான்ராஜாவோ, “இந்தக் கட்டுப்பாடு நூறு வருடங்கள் ஐந்து தலைமுறையா இருக்குது. சின்ன வயசுப் பிள்ளைகள் கெட்டுப் போகமல் இருக்கத்தான், இந்த கட்டுப்பாடு. அப்படியும் காதல் திருமணம் செய்துக்கறவங்களை பெரிசா தண்டிக்கறதில்லை. ஆயிரம் ரூபாய் அபராதம், ஊர்மக்கள் காலுல விழுந்து மன்னிப்பு கேட்கணும் அவ்வளவுதான். இப்போ ஜான்பீட்டர் குடும்பத்துகிட்டேயும் அதேதான் சொன்னோம். அதுவும் அவங்க தாத்தாவே ஊர்த் தலைவரா இருந்து இதே தண்டனையை மத்தவங்களுக்கு கொடுத்தவர்தான். ஆனா, அவங்க குடும்பத்துக்குன்னு வரும்போது ஏற்கமாட்டேங்கறாங்க. ஊருக்கு ஒரு நியாயம், உங்களுக்கு ஒரு நியாயமான்னுதான் கேட்டோம்!”என்றார் கேஷூவலாக!.பேசவே தயங்கிய தூய வியாகுல அன்னை ஆலய பாதிரியார் ஆரோக்கியம், “பட்டியல் சமூகத்துல இருக்கிற 200 குடும்பம்தான் இங்கே வசிக்கறாங்க. இவங்க தங்களை தற்காத்து கொள்ளவும், வெளியூர்லேர்ந்து காதலிச்சு வர்ற வேறு சாதியினருடனான உரசல்களை தடுப்பதற்காகவும்தான் இந்தக் கட்டுப்பாட்டு. இந்த விஷயத்துல எங்களால எதுவும் செய்யமுடியாது ”என்றார் தயங்கியபடியே.ஜான் பீட்டர் குடும்பம் மன்னிப்பு கேட்க தொடர்ந்து மறுக்க, ஊர் மக்கள் நிர்பந்திக்க, விஷயம் தொடர்ந்து சூடேறிக்கொண்டிருந்து. தொடர்ந்து அங்கு வந்த காவல் துறையினர், பல மணி நேரம் பேச்சுவார்த்தை நடத்திய பிறகே, ஜான்பீட்டரின் சடலத்தைப் புதைக்க ஊர் மக்கள் அனுமதித்தனர். ஆனாலும் ஒருவர்கூட அவரது இறுதி சடங்குகளில் கலந்துக்கொள்ளவில்லை!இவர்கள் தெரிந்தேதான் பாவம் செய்கிறார்கள் என் தேவனே!

”நூறு வருஷமா காதலை எதிர்க்கிறோம்!”...இதயத்தை நொறுக்கும் இரக்கமில்லா கிராமம்...

Related Stories