“திராவிடத்தை ஏற்கமாட்டோம்!” சென்னையில் கோஷமிட்ட பட்டியல் சமூகத்தினர்…

சத்தம் இல்லாமல் ஒரு யுத்ததுக்கான அறைக்கூவலை விடுத்திருக்கிறார்கள் பட்டியல் சமூகத்தினர். ஆம், பட்டியலின மற்றும் பழங்குடியின மக்கள் சென்னையில் முதல்முறையாக திரண்டு நடத்திய பொதுக்கூட்டத்தில் “இனி திராவிடத்தை ஏற்கமாட்டோம்” என்ற உறுதிமொழியால் திராவிட முகாமில் ஏற்பட்டிருக்கிறது கிலி! ‘பட்டியல் சமூக மக்கள் மீதான திராவிட விரோத போக்கு விளக்க’ நிகழ்ச்சியும் இரட்டைமலை சீனிவாசன் பிறந்தநாள் விழா பொதுக்கூட்டமும் சென்னை நந்தனத்தில் உள்ள ஒய்.எம்.சி.ஏ. திடலில் ஆகஸ்ட் 12ம் தேதி நடந்தது. நிகழ்ச்சி தொடங்கியதுதான் தாமதம், மழை பொத்துக்கொண்டு கொட்டத் தொடங்கியது. ஆனாலும் ஆங்காங்கே ஒதுங்கி நின்றபடியும், குடையை பிடித்தபடியும் பட்டியல் சமூக மற்றும் பழங்குடியின மக்கள் திரளாக பங்கேற்றனர். ஏதேதோ கூட்டங்களுக்கு அனுமதி அளித்த காவல்துறை, இதற்கு இழுத்தடித்த பிறகே அனுமதி அளித்ததுதான் முரண். அப்படி அனுமதி அளித்தபிறகும்கூட ஏகப்பட்ட இடையூறுகள்.கூட்டம் தொடங்கியதும் அங்கு வந்த போலீஸார் மேடைக்குப் பின்பு 40 அடியில் வைக்கப்பட்டிருந்த இரட்டைமலை சீனிவாசன் படம் அடங்கிய பேனரை அகற்றும்படி வலியுறுத்தினர். அதற்கு மறுப்பு தெரிவித்தது மட்டுமின்றி, ‘வேண்டும் என்றால் எங்கள் மீது வழக்குப் போட்டுக்கொள்ளுங்கள்’ என்றதும், வேறு வழியின்றி போலீஸார் கலைந்து சென்றனர். இரட்டை மலை சீனிவாசன் என்ன பயங்கரவாதியா, இல்லை இரட்டைமலை சீனிவாசன் மீது தமிழக அரசுக்கு என்ன காழ்ப்புணர்ச்சியா? என்கிற கேள்விகள் அங்கே கோஷங்களாக மாறின.தொடர்ந்து இரட்டை மலை சீனிவாசன் படத்துக்கு பட்டியல் சமூக அமைப்புகளின் தலைவர்கள் மலர்தூவி மரியாதை செலுத்தினர். பிறகு பௌத்த மதப்படி பிரார்த்தனைப் பாடல் மேடையில் இசைக்கப்பட்டது. பொதுக்கூட்டத்தில் பங்கேற்பதற்காக திருவண்ணாமலையைச் சேர்ந்த பழங்குடியின மக்கள் வந்த பேருந்துகளை தாம்பரம் அருகே மறித்த போலீஸார், ‘டிராஃபிக்’அதிகமாக இருக்கிறது. மாற்றுப் பாதையில் செல்லுங்கள்’என்று அலைக்கழிக்க விட்டதால் அவர்கள் வந்துசேர இரவு 8 மணி ஆகிவிட்டது. அதேபோல் பொதுக்கூட்டத்தை முன்னின்று நடத்தியவர்கள், ‘இக்கூட்டத்தை தடுக்க வி.சி.க தலைவர் தொல்.திருமாவளவனும், தமிழக அரசில் சிலரும் தீவிர முயற்சிகளை மேற்கொண்டனர். ஆனால் அதை நாங்கள் போராடி தடுத்துவிட்டோம்” என்றார்கள் ஆதங்கத்துடன்.கூட்டத்தில் பேசிய இந்திய குடியரசு (அத்வாலே) மாநிலச் செயலாளர் கவுதம சித்தார்த்தன், “பஞ்சமி நிலங்களை மீட்டெடுப்பதாக கூறிய அன்றைய முதல்வர் கருணாநிதி, சொன்னபடி செய்யவில்லை. ஏழை மக்களுக்கு 5 ஏக்கர் நிலம் தருவதாக கொடுத்த உறுதிமொழியையும் நிறைவேற்றவில்லை. பட்டியல் சமூக மக்களுக்கான நிதியை கூட்டுறவுத் துறைக்கு மாற்றிய வகையில் தி.மு.க. எங்களுக்கு துரோகத்தைச் செய்தது” என்றார் கோபத்துடன்!அம்பேத்கர் மக்கள் கழகத் தலைவர் இளையபாபு, “நம் வாக்குகளைப் பெறுவதில் மட்டுமே திராவிட அரசுகள் கவனம் செலுத்துகின்றன. ஆனால், நமக்கான அடிப்படை வசதிகளைக்கூட செய்து தருவதில்லை. இதை மாற்ற நமக்கென ஒரு கட்சியைத் தொடங்கி, தேர்தலுக்கு தயாராக வேண்டும்” என்றார் ஆவேசமாக.இறுதியாக, “ஏற்கமாட்டோம். ஏற்கமாட்டோம். திராவிடத்தை ஏற்கமாட்டோம். திராவிடத்துக்கு வாக்கு கேட்டு யார் வந்தாலும் வீட்டுக்குள் சேர்க்கமாட்டோம்” என உறுதிமொழி வாசிக்க, அதைக் கூடியிருந்தவர்கள் திரும்பச் சொல்லி மைதானத்தை அதிரவைத்தனர்.திராவிடம் யோசிக்க வேண்டிய தருணம் இது! - கணேஷ்குமார்