விஜயகுமார் தற்கொலை: ஓ.சி.டி. நோய் இருந்தும் ஏன் ஓய்வு தரவில்லை? - காவல்துறையை உலுக்கும் ஐ.பி.எஸ். மரணம்

- எஸ்.ஷக்தி “கம்பீரத்துக்கும் துணிச்சலுக்கும் அடையாளம் காக்கிச்சட்டை. நேர்மறை எண்ணத்தோடு நிமிர்ந்து நில்லுங்கள்!” இந்த வரிகளைதான் அடிக்கடி சொல்வார் டி.ஐ.ஜி. விஜயகுமார். அவர் சொன்ன வார்த்தைகளையே பொய்யாக்கி அவரை பலிவாங்கிவிட்டது காலம். கோவை சரக டி.ஐ.ஜி.யாக இருந்த விஜயகுமார், துப்பாக்கியால் சுட்டுக்கொண்டு தற்கொலை செய்துகொண்ட விவகாரத்தை நம்ப முடியாமல் தவிக்கிறார்கள் காக்கிகள்! இன்னொரு பக்கம் மனஉறுதிக்கு ரோல்மாடலாக இருக்க வேண்டிய உயரதிகாரியே இப்படித் தற்கொலை செய்துகொண்டது, பெரும் சர்ச்சையையும் கிளப்பியுள்ளது..ஜெராக்ஸ் கடை வேலை டு ஐ.பி.எஸ். பதவி: தேனி மாவட்டம் அணைக்கரைப்பட்டிதான் விஜயகுமாரின் சொந்த ஊர். அப்பா செல்லையா வி.ஏ.ஓ.வாக இருந்தவர். அம்மா ராஜாத்தி ஆசிரியை. இருவருக்கும் தங்கள் மகனை டாக்டராக்கி பார்க்க வேண்டும் என்பது ஆசை. ஆனால் விஜயகுமாரோ மெக்கானிக்கல் எஞ்சினியரிங் படித்தார். அந்த சமயத்தில், கடை நிலை ஊழியரான தன் அப்பாவுக்கு அவரது மேலதிகாரிகள் தரும் மரியாதை மற்றும் அழுத்தங்களைப் பார்த்து வளர்ந்தவர் எப்படியாவது ஓர் அரசு உயரதிகாரியாக வர வேண்டும் என்று முடிவெடுத்தார். அதோடு போடி கலவரம், தேவாரம் கலவரம், கஞ்சா தோட்ட பஞ்சாயத்துகள் என்று எப்போதுமே கொதி நிலையில் இருந்த தேனி மாவட்டத்தில் அமைதி நிலவச் செய்யவேண்டும் எனவும் நினைத்தார். அதனால் ஐ.பி.எஸ். படிக்க தீர்மானித்தார். சென்னைக்கு சென்று தங்கி, ஜெராக்ஸ் கடை ஒன்றில் பார்ட் டைம் வேலை பார்த்துக் கொண்டே போட்டித் தேர்வுகளுக்கு தன்னைத் தயார் செய்துகொண்டார்.. 1999ல் குரூப் 4 தேர்வில் தோல்வி, அதேவருடத்தில் குரூப் 2வில் பாஸாகி, அறநிலையத்துறையில் ஆடிட்டிங் இன்ஸ்பெக்டர் பணியில் சேர்ந்தார். அதன்பின் குரூப் 1 தேர்வு எழுதி 2002ல் டி.எஸ்.பி. ஆனவர், பின்னர் ஐ.பி.எஸ். ஆவதற்காக ஆறு முறை முயன்று கடைசியில் வென்றிருக்கிறார். சிவில் சர்வீஸ் தேர்வுக்குப் படிப்பதற்கு நேரம் ஒதுக்க இவர் பட்ட சிரமங்கள் கொஞ்சம் நஞ்சமல்ல… சிவில் சர்வீஸ் தேர்வுக்குத் தயாராக ஒரு மாதம் விடுப்பு கேட்டு இவர் விண்ணப்பித்தாலே உடனடியாக டிரான்ஸ்ஃபர் ஆர்டரை நீட்டியிருக்கிறது காவல்துறை. இந்தக் கசப்பை பலமுறை விஜயகுமாரே சொல்லியிருக்கிறார். ஈரோடு, திருவள்ளூர், சி.பி.சி.ஐ.டி., சென்னை கமிஷனர் அலுவலகம், ஆவடி என்று தொடர்ந்து மாற்றல்கள். ஆனாலும் இந்த தடைகளையெல்லாம் மீறி வெறித்தனமாக உழைத்து சாதித்திருக்கிறார். ‘டி.எஸ்.பி.யாக இருந்துகொண்டே ஐ.பி.எஸ்.ஸுக்குப் படிக்க எப்படி நேரம் கிடைத்தது?’ என்று தேர்வு அதிகாரிகள் கேட்டதற்கு, ‘ஐ.பி.எஸ். ஆகணும் என்கிற டார்கெட்டை தவிர எனக்கு வேறேதுமே தெரியலை சார்’ என்று சொல்லி பிரமிப்பூட்டியுள்ளார், விஜயகுமார். .ஆபரேஷன் பவேரியா நாயகன்: 1995 முதல் 2005 வரை தென் மாவட்டங்களில் கொலை, கொள்ளை, கற்பழிப்பு என்று கொடூர ஆட்டம்போட்ட பவேரியா கொள்ளையர்களை ஒடுக்கி அடக்க, ஜாங்கிட் ஐ.பி.எஸ். அமைத்த தனிப்படையில் விஜயகுமார் முதன்மையானவர். இளம் டி.எஸ்.பி.யாக பஞ்சாப், ஹரியானா, டெல்லியில் சந்து பொந்தெல்லாம் புகுந்து தேடும் டீமுக்கு தலைமை தாங்கினார். கொள்ளை கும்பல் தலைவன் ஜெயில்தார் சிங்கை அடையாளம் கண்டு நெருங்கிய அதிகாரி விஜயகுமார்தான். பவேரியா கொள்ளையரின் பத்தாண்டு காலக் கொட்டத்தை அடக்கிய ஆபரேஷன் பவேரியாவின் மிக முக்கிய நாயகன் இவர். சென்னை ஃபெடரல் வங்கி மெகா கொள்ளை வழக்கு, தேர்வாணைய தேர்வில் மோசடி செய்தோரை மடக்கியது என்று விஜயகுமாரின் வெற்றிப் பதக்கங்களை அடுக்கிக்கொண்டே போகலாம். தொடக்கத்தில் பெரியாரிஸ்டாக இருந்திருக்கிறார், விஜயகுமார். கடவுள் மறுப்பு, இட ஒதுக்கீடு என்று பக்கம் பக்கமாக உரையாற்றுவார். ஆனால் வாழ்க்கை ஓட்டத்தில் சில அனுபவங்களுக்குப் பின் மிக அழுத்தமான ஆன்மிகவாதியாக மாறியுள்ளார். ‘சிவன், விநாயகரென்றால் விஜயகுமாருக்கு அவ்வளவு இஷ்டம்!’ என்கிறார்கள் அவரது உதவியாளர்கள்..மரியாதையைவிட மனுஷன் பெருசு: ‘அய்யா! அய்யா’ என்று தாங்கும் தனது கீழ் நிலைக் காவலர்களை புழுவாக மதிக்கும் உயரதிகாரிகளுக்கு மத்தியில் விஜயகுமார் நேர்மாறானவர். அவர்களை மதித்துப் பேசுபவர் என்கிறார்கள், இவருக்குக்கீழ் பணியாற்றியவர்கள். தனது சொந்த ஊரான தேனிக்கு பெற்றோரைப் பார்க்கச் செல்லும் சமயங்களில் ஒருபோதும் டி.ஐ.ஜி.யாக கெத்து காட்டியதில்லை. சாதாரண மனிதராக, எந்த பந்தாவும் இல்லாமல்தான் செல்வார். இவரது வருகையைக் தெரிந்துகொண்டு தேனி மாவட்ட எஸ்.பி.க்கள் ‘சார் மரியாதை நிமித்தமா பார்க்க வரவா? பந்தோபஸ்துக்கு வீட்டு முன்னாடி போலீஸை நிறுத்தவா?’ என்று கேட்டால் ‘நான் எங்கய்யா, அம்மாவுக்கு மகனா வந்திருக்கேன். எனக்கெதுக்கு சார் அதெல்லாம்? மரியாதையை விட என்னைக்குமே மனுஷன்தான் பெருசு!” என்று லைனை கட் பண்ணிவிடுவாராம்..ஏன் சுட்டுக் கொண்டார்? அதிகாலையிலேயே எழுந்துவிடும் வழக்கம் உள்ள விஜயகுமார், கடந்த ஜூலை 7 வெள்ளிக்கிழமை அன்று காலையில் எழுந்து வழக்கம்போல் வாக்கிங் சென்றுவிட்டு வந்திருக்கிறார். வழிந்த வியர்வை காயும் முன்பே, கன்மேன் எனப்படும் தன் பாதுகாவலரிடம் இருந்து துப்பாக்கியைக் கேட்டு வாங்கி, அடுத்த சில நொடிகளில் தன் தலையில் சுட்டுக்கொண்டு விழுந்திருக்கிறார். இதை எதிர்பார்க்காத கன்மேன் அலற, அதைக்கேட்டு விஜயகுமாரின் மனைவி கீதாவாணியும் மகளும் ஓடோடி வந்து பார்த்து அதிர்ந்துள்ளனர். சிட்டி போலீஸ் கமிஷனர் உள்ளிட்டோருக்கு தகவல்கள் பறக்க, டாக்டர்கள் வந்து பரிசோதித்து விஜயகுமார் இறந்துவிட்டதாக தெரிவித்துள்ளனர். டி.ஐ.ஜி. விஜயகுமார் ஏன் தற்கொலை செய்து கொண்டார்? என்று அவருக்கு கீழ் பணிபுரிந்த சில போலீஸாரிடம் கேட்டபோது “சாரோட சாவுக்கு காரணம் குடும்ப பிரச்னைன்னு சிலர் சொல்றாங்க. ஆனா, அது இல்லை. ஓய்வே எடுக்க முடியாத அளவுக்கு அவருக்கு பணிச்சுமை அதிகம். கடந்த சில வருஷமாவே அவருக்கு மனசு சரியில்லை. சென்னையில குடும்பம் இருந்ததால, உயரதிகாரிகள்கிட்ட சென்னைக்கு டிரான்ஸ்ஃபர் கேட்டிருக்காரு. ஆனா, கிடைக்கலை. சமீபத்துலகூட சென்னைக்கு நேர்ல போய் ‘ஏதாச்சும் டம்மி போஸ்ட்டிங்னாக்கூட பரவாயில்லை. கொடுங்க, மனநிம்மதியா இருக்கேன்’ன்னு ஒருத்தர்கிட்ட கேட்டிருக்காரு. எதுவும் நடக்கலை. தவிர ஒரு மாசமா அவருக்கு லீவே கிடைக்கலை. இந்த நிலையில்தான் அவருக்கு நெருக்கமான உறவினர் ஒருத்தரு, ‘உனக்கு மேல இருக்குறவன் சம்பாதிக்குறான், கீழே இருக்குறவன்கூட சம்பாதிக்குறான். நீ எதுக்குமே லாயக்கி இல்லை’ன்னு திட்டியிருக்காரு. சில நாட்களுக்கு முன்னாடி கோவையில ஒரு அதிகாரி குழந்தையோட பிறந்தநாள் விழா நட்சத்திர ஹோட்டல்ல நடந்தது. அப்பவும் சிலர் இவர் குடும்பத்தை கம்பேர் பண்ணி பேசியிருக்காங்க. இதுல எல்லாம் அவர் மனசு உடைஞ்சு போயிருந்தாரு. இந்த மன அழுத்தம் நாளுக்கு நாள் அதிகமானதுல, , தூக்கம் போயிருச்சு. இதனால, தன்னோட உயரதிகாரிட்ட ‘எனக்கு தற்கொலை எண்ணம் அதிகமா வருது சார்’ன்னு சமீபத்துல அய்யா சொல்லியிருக்காரு. அவரு திட்டி அறிவுரை சொல்லி அனுப்பினதால, இயல்பா இருக்க முயற்சி பண்ணினார். ஆனாலும் முடியாம இப்படி தனக்குத் தானே எமனாயிட்டார்” என்கிறார்கள்.. ஓ.சி.டி.க்கு ஏன் ஓய்வு தரவில்லை?: கோவையில் விஜயகுமாரின் உடலுக்கு அஞ்சலி செலுத்துவிட்டு, விசாரணை நடத்த வந்த சட்டம் ஒழுங்கு ஏ.டி.ஜி.பி. அருண் “விஜயகுமார் இரண்டு ஆண்டுகளாக மன அழுத்தத்திற்கான சிகிச்சை எடுத்து, மருந்து சாப்பிட்டு வருகிறார். இதனால் அவரது மனைவி, மகள் சென்னையிலிருந்து கோவை வந்து அவர் கூடவே இருந்திருக்கிறார்கள். இவரது மரணத்துக்கு பணி சுமையோ, குடும்ப சூழலோ காரணமில்லை. ஓ.சி.டி. எனும் மன அழுத்த நோயால் அவர் அவதிப்பட்டது தெரிய வருகிறது” என்றார். தேனியில் விஜயகுமாரின் இறுதி சடங்கில் கலந்து கொண்ட தமிழக டி.ஜி.பி. சங்கர் ஜிவால் “துடிப்பு மிக்க, நல்ல அதிகாரி. அவர் மன அழுத்தத்தில் இருப்பது தெரிந்ததும் சென்னையில் இருந்து கோவைக்கு அனுப்பி வைக்கப்பட்டார். டாக்டர்கள் மெடிக்கல் லீவு எடுக்கச் சொல்லி வலியுறுத்தியும் அவர் விரும்பியே பணிக்கு வந்தார்’’ என்றார். ஓய்வுபெற்ற காவல்துறை உயரதிகாரிகள் சிலர் “ஓ.சி.டி. எனும் மன அழுத்த பிரச்னையில் இருந்தவரை எப்படி சட்டம் ஒழுங்கை கவனிக்கும் டி.ஐ.ஜி.யாக, அதுவும் ஆயுத புழக்கத்தின் நடுவில் பணியிலிருக்க உயரதிகாரிகள் அனுமதித்தார்கள்? அவரே மறுத்திருந்தாலும் கண்டிப்பான உத்தரவு போட்டு அவரை ஓய்வில் அமர வைத்து, கவுன்சலிங் தந்திருக்க வேண்டும்’ என்கிறார்கள். தமிழக எதிர்கட்சிகளோ, விஜயகுமார் இறந்து கிடக்கும் வீடியோ, புகைப்படம் எதையும் காவல்துறை வெளியிடவில்லை. இது உண்மையில் தற்கொலைதானா? இந்த வழக்கை சி.பி.ஐ. விசாரிக்க வேண்டும்! என்று அதிரடி கோரிக்கை வைக்கின்றனர். தீரனான விஜயகுமார் இப்படியொரு அகால மரணத்தை தழுவியிருப்பது ஒரு தவறான முன்னுதாரணமாகிவிடக் கூடாது. ‘டி.ஐ.ஜி. அய்யாவாலேயே பிரச்னையை சமாளிக்க முடியலை. நாமெல்லாம் எம்மாத்திரம்?’ என்று கீழ்நிலை காவலர்கள் மனம் புரண்டுவிட கூடாது. தேவை, மொத்த காவல்துறைக்கும் அவசர கவுன்சிலிங். காக்க காக்க காவல்துறையைக் காக்க!