வம்பானந்தா: ஐ.டி ரெய்டில் சிக்கிய ஆவணங்கள்…கலக்கத்தில் இரண்டு அமைச்சர்கள்!

“சென்னை சேப்பாக்கம் ஸ்டேடியத்தில் பிரபல நடிகைக்கு அருகே அமர்ந்து நீங்கள் மேட்ச் பார்த்தீர்களாமே சுவாமி?” ஜில்லென்று இளநீர் பாயாசத்தை பரிமாறியபடியே வம்புவை சீண்டினார் சிஷ்யை.“மாஜி முதல்வர் பன்னீர்செல்வம் - தி.மு.க. குடும்ப உறுப்பினர் சபரீசன் சந்திப்பின் பின்னணி வேண்டும். அதற்காகத்தானே இந்த பீடிகை? மே 6 அன்று சென்னை சேப்பாக்கத்தில் நடந்த போட்டியை ’கலைஞர் கருணாநிதி’கேலரியில் இருந்து பன்னீர் பார்த்துக்கொண்டிருந்தார். அப்போது யதேச்சையாகதான் இருவரும் சந்தித்துக்கொண்டார்கள். அப்போது ‘வாங்க உட்கார்ந்து பேசலாம்’ என்று சபரீசன் அழைத்ததாலேயே பன்னீர் தனியாக அமர்ந்து பேசியிருக்கிறார். பன்னீரின் உடல்நிலை உள்ளிட்ட பொதுவான விஷயங்கள்தான் ஆலோசிக்கப்பட்டனவாம். அதற்குள் இதற்கு கண், காது, மூக்கு வைத்து ‘பன்னீர் தி.மு.க-வுக்கு செல்கிறார்’ என்றெல்லாம் தகவல்கள் றெக்கைக் கட்டி பறக்கின்றன. ஆனால், பன்னீர் தரப்போ, ‘நான் இறந்தால் என் பூத உடல் மீது அ.தி.மு.க கொடியைத்தான் போர்த்த வேண்டும்’ என்று சொல்லியிருக்கிறேன். நான் எப்படி தி.மு.க-வுக்கு செல்வேன். நான் ஒரு கட்சியின் தலைவர். வெறும் நிர்வாகி அல்ல…’ என்று விளக்கம் கொடுக்கிறது.” “தி.மு.க ஆட்சியின் மூன்றாவது ஆண்டு தொடக்க விழா மூடில் இருக்கிறார்போல முதல்வர் ஸ்டாலின்?””பாவம், அவருக்கு தலைவலி எப்போதுதான் தீரும் என்று தெரியவில்லை... கவர்னரின் குடைச்சல் தாங்க முடியவில்லை என்கிறது அறிவாலய பட்சி. திராவிடம் காலாவதியாகிவிட்டது என்று நக்கலடித்த கவர்னர், அடுத்து சிதம்பரம் நடராஜர் கோயில் தீட்சிதர் விவகாரத்தை கையில் எடுத்துள்ளார். அதாவது, தீட்சிதர்கள் குடும்பங்களில் பலர் தங்கள் பெண் குழந்தைகளை சிறு வயதிலேயே திருமணம் செய்து வைக்கிறார்கள். இது சர்ச்சையைக் கிளப்பவே, சம்மந்தப்பட்ட தீட்சிதர்களை கைது செய்தது போலீஸ். அப்போது பாதிக்கப்பட்ட சிறுமிகளுக்கு மருத்துவ பரிசோதனை என்கிற பெயரில் ’இரட்டை விரல் பரிசோதனை’செய்யப்பட்டதாக குற்றம்சாட்டியிருக்கிறார் கவர்னர்..இதையடுத்து, ‘கவர்னரின் குற்றச்சாட்டுகள் உண்மைக்கு மாறானவை. இதை ஆதாரங்களுடன் விளக்கிய பிறகும் கவர்னர் வேண்டுமென்றே குற்றம் சுமத்துகிறார்’என விளக்கம் அளித்துள்ளது தமிழக அரசு.”“மூன்றாம் ஆண்டில் அடியெடுத்து வைக்கும் நேரத்தில் தி.மு.க கூட்டணி கட்சிகள் வாழ்த்து செய்திகூட சொல்லவில்லையே சுவாமி… கூட்டணியிலும் சில குழப்பங்கள் தலையெடுத்திருப்பதாக சொல்கிறார்களே?”“ஆமாம், தோழமை சுட்டல்கள் நெருப்பாக சுட ஆரம்பித்திருக்கின்றன. காவல்துறையின் அத்துமீறல்களை தமிழர் வாழ்வுரிமை கட்சி தலைவர் வேல்முருகன் சட்டசபையில் போட்டு உடைத்தார். காங்கிரஸ் தலைவர் கே.எஸ்.அழகிரியும் போலீஸாரை போட்டுத் தாக்கினார். வேங்கைவயல் விவகாரத்தில் வி.சி.க தலைவர் திருமாவளவனும் கொந்தளித்துள்ளார். ஆனாலும், பொறுமையுடன் அமைதி காத்தார் ஸ்டாலின். இந்தநிலையில், வெந்த புண்ணில் வேல் பாய்ச்சுவதுபோல், மார்க்சிஸ்ட் கட்சியின் ரங்கராஜன் முடிந்துபோன விவகாரத்தை எடுத்து ஊதித் தள்ளினார்.அதாவது, 12 மணி நேர வேலை சட்ட மசோதாவை திரும்ப பெறுவதாக மே 1ம் தேதி அறிவித்தார் முதல்வர். ஆனால், அதேநாளில் நடந்த பொதுக்கூட்டத்தில் ரங்கராஜன், ‘தமிழகத்தை தி.மு.க ஆட்சி செய்கிறதா? அதிகாரிகளும், முதலாளிகளும் ஆட்சி செய்கிறார்களா?’ என்று கொளுத்திப் போட்டார். இதையடுத்துதான் முரசொலியில் பதிலடி கொடுத்திருக்கிறது தி.மு.க.” “அதுச் சரி, ரங்ராஜன் குறிப்பிடும் அந்த அதிகாரி யார்?”“விடமாட்டாய் போலிருக்கிறதே… நெம்பர் 2-வை கை காட்டுகிறார்கள். ஓசூரில் பிரபல ஐபோன் நிறுவனத்தின் தொழிற்சாலையை தொடங்க சிலர் அந்த அதிகாரியை அணுகி, 12 மணி நேர கோரிக்கையை முன்வைத்தார்களாம். இதுதான் இந்த மசோதாவுக்கே பிள்ளையார் சுழி போட்டதாம். அந்த அதிகாரிதான் இந்த சட்ட மசோதாவுக்கான அத்தனை வேலைகளையும் பார்த்தார் என்கிறார்கள் கோட்டை வட்டாரத்தில். இந்த விஷயம் தோழர் காதுக்கு செல்லவே அதைத்தான் ஊதிப் பெருக்கிவிட்டாராம். இன்னொரு பக்கம் இந்தக் கூட்டணி சலசலப்பை எல்லாம் உன்னிப்பாக கவனிக்கும் பா.ஜ.க., ’கூட்டணியை உடைக்க இதுதான் சரியான வேளை’என்று நினைக்கிறது.“அந்தளவுக்குப் போவார்களா சுவாமி?” “அதுதானே டெல்லி பா.ஜ.க-வின் அஜெண்டா. தி.மு.க அரசுக்கு நெருக்கடி கொடுத்து, அவர்களை மெல்ல மெல்ல பணிய வைக்க நினைக்கிறது பா.ஜ.க. ஒரு கட்டத்தில் தி.மு.கவில் தரப்பில் இருந்து ‘என்னதான் வேண்டும்’என்று கேள்வி வந்தால், ‘2019ல் நாங்கள் கொடுத்த அதே பழைய அஜெண்டாதான்… ’காங்கிரஸை மட்டும் கழட்டி விடுங்க’என்பார்களாம். இன்னொரு பக்கம் தி.மு.க-விலேயே சீனியர்கள் பலர் ‘காங்கிரஸ் தேவையில்லாத லக்கேஜ். அதை கழற்றிவிடுங்கள்’என்று தொடர்ந்து சொல்லி வருகிறார்கள். அவர்களை முறுக்கேற்றும் வேலைகளையும் டெல்லியில் இருந்து சில புள்ளிகள் பார்த்துக்கொள்வார்கள். ஆனால், இதற்கெல்லாம் முதல்வர் ஸ்டாலின் அசைவதாகத் தெரியவில்லை.”.“ரெய்டு சங்கதிகள் ஏதாவது உண்டா சுவாமி?” “அமைச்சர்கள் இருவர் கடும் கலக்கத்தில் இருக்கிறார்கள். முதல்வரின் குட்புக்கில் உள்ள அமைச்சர் ஒருவர், தனது கணக்கு வழக்குகளை நிர்வகிக்க ஆறு வட இந்திய ஆட்களை நியமித்திருக்கிறார். இவர்களை சத்தமில்லாமல் ரெய்டு வளையத்துக்குள் கொண்டுவந்து, ஏராளமான ஆவணங்களை அள்ளியிருக்கிறது வருமானவரித்துறை. அதனால், ஏகத்துக்கும் கவலையில் இருக்கிறாராம் அந்த அமைச்சர். இன்னொரு பக்கம் ’ஜி ஸ்கொயர்’ரெய்டில் சிக்கிய ஆவணம் ஒன்று சைதாப்பேட்டையை சுட்டுகிறதாம். இதனால் அப்செட்டான அந்த அமைச்சர் கடந்த ஒரு வாரமாக விசிட்டர்களை பார்ப்பதையே தவிர்த்துவருகிறார். இதுகுறித்து சித்தரஞ்சன் சாலை தரப்பிலும் அழைத்து விளக்கம் கேட்கவே மென்று விழுங்கினாராம் அமைச்சர்.“ஓஹோ…’”இன்னும் இருக்கிறது கேள்… தி.மு.க-வின் மாஜி மத்திய அமைச்சர் ஒருவரையும் நீண்ட கால விசாரணைக்கு பிறகு அமலாக்கத்துறையிடம் வசமாக சிக்கி இருக்கிறார். அதாவது, சட்டவிரோத பணபரிமாற்றம் மூலம் 65 கோடி ரூபாய் மதிப்புள்ள ஒரு சொத்தை வாங்கியதில் இவரை பொறி வைத்து பிடித்துள்ளது அமலாக்கத்துறை. 2020ம் ஆண்டில் சென்னை நுங்கம்பாக்கம் மற்றும் குரோம்பேட்டையில் உள்ள இவரது வீடு மற்றும் அலுவலகங்களில் அதிரடி சோதனை நடந்தது.அப்போதுதான் இவரது 65 கோடி ரூபாய் சொத்து விவரம் வெளிச்சத்துக்கு வர, அவரை அமலாக்கத்துறை அதிகாரிகள் விசாரிக்க துவங்கினர். இடையில் கிணற்றில் போட்ட கல்லாக இருந்த இந்த விவகாரம் மீண்டும் சூடுபிடித்துள்ளது. அவரிடம் இருந்து பெறப்பட்ட தகவல்கள் அடிப்படையில் அறிக்கை தயாரிக்கும் பணிகள் வேகமெடுத்துள்ளன.ஆனால் அவரோ கூலாக, ‘அமலாக்கத்துறை என்னிடம் எந்த விசாரணையும் நடத்தவில்லை’ என தலைமை வரை சொல்லி இருக்கிறார்” என்ற வம்பு கடைசி செய்தியாக கர்நாடக தேர்தல் நிலவரத்துக்குத் தாவினார். “கர்நாடக மாநில தேர்தல் முடிவுகள் காங்கிரஸ் கட்சிக்கு சாதகமாக இருக்கும் என்று தகவல்கள் கசிய தொடங்கிவிட்டன. இது டெல்லி மேலிடத்தை அப்செட் ஆக்கியிருக்கிறது. இதைத் தொடர்ந்து பா.ஜ.க-வும் ஒரு ஸ்பெஷல் டீமை வைத்து சர்வே எடுத்திருக்கிறது. அதில், ‘எந்தக் கட்சிக்கும் மெஜாரிட்டி கிடைக்காது’என்று ரிசல்ட் வரவே குஷியான பா.ஜ.க., ’தேர்தல் முடிவுகளுக்கு பிறகு வழக்கமான அரசியல் ஜித்து விளையாட்டை வைத்து கொள்ளலாம்’ என்ற மூடில் இருக்கிறது. ஒருவேளை பா.ஜ.க தோல்வியடைந்தால், கர்நாடக மாநிலத்தை சேர்ந்த பா.ஜ.க தேசிய பொதுச்செயலாளர் பி.எல்.சந்தோஷ் பதவிக்கு ஆபத்து வரலாம். அப்படி ஒரு நிலை ஏற்பட்டால் அது தமிழக பா.ஜ.க-வையும் பாதிக்கும். அதாவது தமிழக பா.ஜ.க-வுக்கு அண்ணாமலையை தலைவராக கொண்டுவந்ததே சந்தோஷ்தான். எனவே சந்தோஷின் தலை எகிறும்போது, அண்ணாமலைக்கும் அது பாதிப்பை ஏற்படுத்தும் என்கிறார்கள்”என்று புன்னகைத்தபடி நடையைக் கட்டினார் வம்பு..பாக்ஸ்டெல்லி வாத்தியார்டெல்லி திகார் சிறையில் கடந்த 25 ஆண்டுகளாக தமிழக போலீஸார்தான் பாதுகாப்பு நடவடிக்கைகளை மேற்கொண்டிருந்தனர். ஆனால், திடீரென்று டெல்லியின் துணை நிலை ஆளுநர், தமிழக போலீஸ் டீம் மீது குற்றம்சாட்டி தமிழக போலீஸ் பாதுகாப்பை ரத்து செய்துவிட்டார். இது தமிழக காவல்துறைக்கு பின்னடைவாகவே பார்க்கப்படுகிறது.வரும் ஜூன் மாத இறுதியில் மத்திய உள்துறை அமைச்சர் அமித் ஷா தமிழகம் வருகிறார். அப்போது எடப்பாடி பழனிசாமியை மட்டுமல்லாமல், பா.ம.க., தே.மு.தி.க உள்ளிட்ட தலைவர்களையும் சந்திப்பார் என்று கூறப்படுகிறது. மேலும் அந்த சந்திப்பின்போது, ’கூட்டணிக்கு அ.தி.மு.க-தான் தலைமை தாங்கும்’ என்று அறிவித்து எடப்பாடியின் வயிற்றில் பால் வார்ப்பார் என்கிறது டெல்லி செங்கோட்டை பட்சி!

வம்பானந்தா: ஐ.டி ரெய்டில் சிக்கிய ஆவணங்கள்…கலக்கத்தில் இரண்டு அமைச்சர்கள்!

Related Stories