“வைத்திலிங்கத்துக்குப் பைத்தியம் புடிச்சிருக்கு” “காமராஜ் ஒரு கோமாளி” இது டெல்டா கலாட்டா!

“உனக்குப் பைத்தியம் பிடிச்சிருக்கு..!”, “உனக்கு வெறி புடிச்சிருக்கு..!” - இவை ஏதோ ஸ்கூல் பையன்கள் திட்டிக்கொண்ட வார்த்தைகள் அல்ல... அ.தி.மு.க-வில் எடப்பாடி பழனிசாமி ஆதரவாளரான காமராஜும், பன்னீர்செல்வத்தின் ஆதரவாளரான வைத்திலிங்கமும் , ‘ நான் அவனைக் கேவலமா திட்டுவேன். பதிலுக்கு அவன் என்னைப் படு கேவலமா திட்டுவான்’ என்கிற ரேஞ்சில் நடத்திய நாறவாய் போர்தான் இது!சில தினங்களுக்கு முன்பு தஞ்சை மாவட்டம் மன்னார்குடியில் பேட்டியளித்த வைத்திலிங்கம், " கட்சியில் எடப்பாடியைவிட நான்தான் சீனியர். எடப்பாடிக்கு திராவிட வரலாறு தெரியாது. அ.தி.மு.க வரலாறும் தெரியாது. எடப்பாடி தினமும் ரகசியமாக சபரீசனுடன் பேசிவருகிறார். இது அவரது மனசாட்சிக்குத் தெரியும். நாங்கள்தான் உண்மையான அ.தி.மு.க. இன்னும் 20 நாட்களில் எங்களிடம் கட்சியும், இரட்டை இலைச் சின்னமும் வரும். அப்போது நாங்கள் எடப்பாடி இல்லாத அ.தி.மு.க-வை ஒருங்கிணைப்போம்.முன்னாள் அமைச்சர் ஜெயக்குமார் ராயபுரம் தொகுதியில் பல கோடி ரூபாய் அரசை ஏமாற்றி ஊழல் செய்திருப்பது பற்றி ஆளும் அரசு புகார் கூறியிருக்கிறது. வாக்கி டாக்கி வாங்கியதிலும் 12 கோடி ரூபாய் ஊழல் என்று எஃப்.ஐ.ஆர் பதிவு செய்யப்பட்டுள்ளது. ஊழலைப்பற்றிப் பேச ஜெயக்குமாருக்கு எந்தத் தகுதியும் இல்லை. அவர் ஒரு அரசியல் கோமாளி" என்றவர் தொடர்ந்து காமராஜை வெளுவெளு என்று வெளுத்தார்."முன்னாள் அமைச்சர் காமராஜ், எடப்பாடிக்கு ஆதரவாக கூட்டம் போட்டுள்ளார். தனது சொந்த ஊரான மன்னார்குடி தொகுதியில் போட்டியிட்டால் டெபாசிட்கூட வாங்க முடியாது என்பது அவருக்கே தெரிந்ததால்தான் பயந்துபோய் நன்னிலம் தொகுதிக்கு ஓடிப்போய்விடுகிறார். காமராஜ், ஒரிஜினல் அ.தி.மு.க.கிடையாது. அவர், தி.மு.க-விலிருந்து வந்தவர். அவருடைய வரலாறைச் சொல்கிறேன் கேளுங்கள்... தினகரனின் வீட்டு வேலைக்காரன்தான் காமராஜ்" என்று அடுப்பைப் பற்றவைக்க, அந்த நெருப்பு புகைந்துகொண்டே போய் காமராஜ் கூடாரத்தைப் பற்றிக்கொண்டது.."வைத்திலிங்கம் என்ற முண்டுக்கல்லை முதுகில் கட்டிக்கொண்டு கடலில் குதித்திருக்கும் பன்னீர், கேட்பார் பேச்சைக் கேட்டு இப்போது அரசியலில் அனாதையாகிவிட்டார். நான் சந்தித்த மனிதர்களிலேயே அறிவே இல்லாத முண்டம் என்றால் அது வைத்திலிங்கம்தான். தன் பக்கம் அ.தி.மு.க-வைச் சேர்ந்தவர்கள் யாரும் இல்லை என்பதால், வைத்தி, பைத்தியம் பிடித்துத் திரிகிறார். இப்போது அவருக்கு வெறியும் பிடித்து அவதூறு பரப்பிவருகிறார். வைத்திலிங்கத்தின் தொகுதி முழுவதும் எடப்பாடி பழனிசாமி கையில் வந்துவிட்டது. 'வீட்டு வேலைக்காரியெல்லாம் மகாராணியாகிவிடமுடியாது' என்று சசிகலாவை விமரித்தவர்தான் வைத்திலிங்கம்” என்று சகட்டுமேனிக்கு விளாசி தள்ளிவிட்டார்.“இப்படித் தரைமட்டத்துக்கு இறங்கி அடித்துக்கொள்கிறார்களே... டெல்டா அ.தி.மு.க-வில் என்னதான் நடக்கிறது?” என்று அ.தி.மு.க வட்டாரத்தில் பேசினோம். "டெல்டா மாவட்டங்களில் அ.தி.மு.க-வில் சொல்லிக்கொள்ளும்படியான தலைவர்கள் என்றால் அது ஆர்.காமராஜ் மற்றும் வைத்திலிங்கம்தான். வைத்தியின் சொந்த மாவட்டமான தஞ்சை மாவட்டத்திலேயே காமராஜ் பெரும் ஓட்டைபோட்டு, முக்கிய நபர்களையெல்லாம் தன் ஆதரவாளராக மாற்றிவிட்டார். கடந்த வருடம் காமராஜ் வீட்டில் லஞ்ச ஒழிப்பு போலீஸார் சோதனை செய்தனர். அப்போது போலீஸாருக்கு காமராஜின் சொத்து குறித்த விவரங்களைக் கொடுத்ததே வைத்தி தரப்புதான் என்று ஒரு பேச்சு உலா வந்தது. இதனால் கடுப்பான காமராஜ், வைத்தியை அரசியலை விட்டே விரட்டவேண்டும் என்று கங்கணம் கட்டிக்கொண்டு செயல்படுகிறார்.எடப்பாடியும் காமராஜை ஊக்கப்படுத்தும் விதமாக அவர் ஏற்பாடு செய்திருந்த துரைக்கண்ணுவின் சிலை திறப்புவிழாவிற்கு வந்ததோடு, வைத்தியின் சொந்த ஊரான ஒரத்தநாட்டில் நடைபெற்ற பொதுக்கூட்டத்திலும் கலந்துக்கொண்டார். பாபநாசம் பகுதியில் உள்ள வன்னியர் மற்றும் ஒரத்தநாட்டுப்பகுதியில் உள்ள கள்ளர் சமுதாய ஓட்டுகளை மனதில் வைத்துதான் எடப்பாடியின் வருகை இருந்தது.இதற்கிடையே ஒரத்தநாட்டில் தினகரனின் வலதுகரமாக இருந்த அ.ம.மு.க மாவட்டச் செயலாளர் சேகரையும் அ.தி.மு.க-விற்குள் காமராஜ் வளைத்துக்கொண்டுவர பன்னீர் தரப்பு ஆடிப்போய்விட்டது. பன்னீருக்கு டெல்டாவில் ஒரே பலம், வைத்தி மட்டுமே. இந்த சூழலில் எடப்பாடி தரப்பு வைத்தியையும் தங்கள் வசம் இழுக்க பெரும் முயற்சி மேற்கொள்ள, அதற்கு அவர் மசியவில்லை. இருந்தாலும் டெல்டா தனது கோட்டைதான் என்று பன்னீரை நம்ப வைத்துக்கொண்டிருக்கும் வைத்தி, அதற்காக பெருமுயற்சி எடுத்துவருகிறார். இதில் தளபதி ஆகப்போவது யார், தள்ளுபடி ஆகப்போவது யார் என்பது போகப்போக தெரியும்” என்றார்கள்.மேற்படி காரசார அறிக்கைகள், டெல்டா தளபதிக்கான போட்டி ஆகியவற்றிற்காக விளக்கம் பெற முன்னாள் அமைச்சர் ஆர்.காமராஜை பலமுறை தொடர்பு கொண்டும் நம் அழைப்பை அவர் ஏற்கவில்லை. அவருடன் இருப்பவர்களோ, "அண்ணன் தனியா எந்த பத்திரிகை நிருபரிடமும் பேசமாட்டார். தேவைப்பட்டால் பத்திரிகையாளர் சந்திப்பில் மட்டுமே பேசுவார்" என்றனர்.வைத்திலிங்கத்தை தொடர்பு கொண்டபோது, “அவர் எப்படி வேண்டுமானாலும் ஏசிவிட்டுப் போகட்டும். இது தொடர்பாக நான் இரண்டு நாள் கழித்து பேசுகிறேன்" என்று சுருக்கமாக முடித்துக்கொண்டார்.அரசியல்வாதியைச்சுற்றியும் பத்துப் பேர், பைத்தியக்காரனைச் சுற்றியும் பத்துப் பேர்! -ஆர்.விவேக் ஆனந்தன்

“வைத்திலிங்கத்துக்குப் பைத்தியம் புடிச்சிருக்கு” “காமராஜ் ஒரு கோமாளி” இது டெல்டா கலாட்டா!

Related Stories