காலியாகும் அ.ம.மு.க. கூடாரம்! அ.தி.மு.க-வில் ஐக்கியமாகும் நிர்வாகிகள்...

அடுப்பில் வைத்து ஐந்தாண்டுகளைக் கடந்தும் குக்கர் இன்னும் விசில் அடிக்கவில்லை. இதனால் பசி தாங்காத நிர்வாகிகள் பலரும் டி.டி.வி.தினகரன் முகாமை விட்டு ஓட்டம் பிடிப்பதுதான் அ.ம.மு.க கட்சியின் லேட்டஸ்ட் அப்டேட்!அ.தி.மு.க.வில் இருந்து நீக்கப்பட்ட தினகரன் 2018, மார்ச் 15ம் தேதி அ.ம.மு.க-வை தொடங்கினார். 6ம் ஆண்டு துவக்க விழாவை கடந்த மார்ச் மாதம் நடத்திய அந்தக்கட்சி, இதுவரை ஒரு சட்டமன்றத் தேர்தல், ஒரு நாடாளுமன்றத் தேர்தல், ஊரக உள்ளாட்சி மற்றும் நகர்ப்புற உள்ளாட்சித் தேர்தலை சந்தித்துள்ளது. ஆனாலும் 2.3 சதவிகித வாக்குகளைத் பெற்றதை தாண்டி பெரிதாக சோபிக்கவில்லை. இந்த நிலையில்தான் அ.ம.மு.க.வில் இருந்து பல்வேறு நிர்வாகிகள் வெளியேறி அ.தி.மு.க.வில் ஐக்கியமாகத் தொடங்கியிருக்கின்றனர்.குறிப்பாக, தினகரனின் ஸ்ட்ராங்க் ஏரியா என்று கருதப்பட்ட தென் மாவட்டங்கள் மற்றும் டெல்டா மாவட்டங்களைச் சேர்ந்த நிர்வாகிகள் வெளியேறி வருவதுதான் பலரையும் புருவம் உயர்த்த வைத்துள்ளது. கடந்த மார்ச் மாதம் அ.ம.மு.க. மாநில இளைஞரணிச் செயலாளராக இருந்த கோமல் அன்பரசன், அ.ம.மு.க. தலைமை நிலையச் செயலாளராக இருந்த முன்னாள் எம்.எல்.ஏ. கே.கே.உமாதேவன் ஆகியோர் எடப்பாடி பழனிசாமியை சந்தித்து அ.தி.மு.க-வில் இணைந்தனர்..அதன்பிறகு மயிலாடுதுறை மாவட்டத்தில் அ.ம.மு.க. நிர்வாகிகள் பலர் விலகி அ.தி.மு.க.வில் இணைந்தனர். இதையடுத்து அ.ம.மு.க. மாநில இளம்பெண்கள் பாசறைச் செயலாளர் டாக்டர் ராதாகிருஷ்ணன் மற்றும் அமைப்புச் செயலாளரும் முன்னாள் எம்.எல்.ஏ-வுமான கே.கே.சிவசாமி ஆகியோரும் அ.தி.மு.க-வில் இணைந்தனர்.இதுபற்றி அ.தி.மு.க. நிர்வாகி ஒருவரிடம் பேசினோம்... “சசிகலா, தினகரன், ஓ.பன்னீர்செல்வம், எடப்பாடி பழனிசாமி என அ.தி.மு.க. நான்காகப் பிரிந்து கிடக்கிறது எனும் விமர்சனம் தொடர்ச்சியாக எதிர்க்கட்சிகளால் விமர்சிக்கப்பட்டு வருகிறது. இவ்வளவு ஏன், கூட்டணிக் கட்சியான பா.ஜ.க.வின் மேலிட தலைவர்களேகூட ஒருங்கிணைந்த அ.தி.மு.க.வை வலியுறுத்தி வருகின்றனர்.அடுத்த ஆண்டு நடைபெறவுள்ள நாடாளுமன்றத் தேர்தலில் அ.தி.மு.க. தலைமையிலான கூட்டணியில் பா.ஜ.க. இடம்பெறுவது உறுதியானாலும், சசிகலா, அ.ம.மு.க., ஓ.பன்னீர்செல்வத்தை இணைத்துக்கொள்ள வேண்டும் என்று டெல்லி பா.ஜ.க. வலியுறுத்துகிறது. கடந்த 2021 சட்டமன்றத் தேர்தலின்போதே அ.ம.மு.க.வை அ.தி.மு.க. கூட்டணியில் சேர்த்துக்கொள்ள வேண்டுமென டெல்லி பா.ஜ.க. தலைமை கடும் அழுத்தம் கொடுத்தது.அதை எப்படியோ எடப்பாடி தடுத்துவிட்டார். ஆனாலும், டெல்டா மற்றும் தென்மாவட்டங்களில் முக்குலத்தோர் வாக்குகள் அ.தி.மு.க. கூட்டணிக்குக் கிடைக்க வேண்டுமென்றால் சசிகலா, தினகரன், ஓ.பன்னீர்செல்வம் ஆகியோர் அ.தி.மு.க. கூட்டணியில் சேர்த்து நாடாளுமன்றத் தேர்தலை சந்தித்தால் மட்டுமே பா.ஜ.க.விற்கு சில தொகுதிகள் கிடைக்கும் என பா.ஜ.க. தலைவர்கள் நினைக்கிறார்கள்.சமீபத்தில் நடந்த எடப்பாடி - அமித் ஷாவை சந்திப்பில்கூட “நாடாளுமன்றத் தேர்தலில் அ.தி.மு.க. போட்டியிடும் தொகுதிகள் தவிர்த்து மற்ற தொகுதிகளை எங்களிடம் கொடுத்துவிடுங்கள், நாங்கள் கூட்டணிக் கட்சிகளைப் பார்த்துக்கொள்கிறோம்”எனக் கூறியது அ.ம.மு.க., சசிகலா, பன்னீர் அணிகளை மனதில் வைத்தே என்பது எடப்பாடிக்கு புரியாமல் இல்லை. இதையடுத்தே ‘அ.ம.மு.க. எனும் ஒரு கட்சி இருந்தால்தானே தொகுதி ஒதுக்கித் தரும்படி கேட்பார்கள், அ.ம.மு.க. கூடாரத்தை காலி செய்துவிட்டால் அந்தக் கட்சியை பா.ஜ.க கூட்டணியில் சேர்த்துக் கொள்ள முடியும்?’ எனும் யுக்தியை கையில் எடுத்து எடப்பாடி அதற்குச் செயல்வடிவம் கொடுத்து வருகிறார்.இதற்காக மாவட்டந்தோறும் அ.ம.மு.க. நிர்வாகிகளை அ.தி.மு.க.வில் இணைப்பது தொடர்பாக மாஜி அமைச்சர்கள் தொடர்ந்து பேச்சுவார்த்தை நடத்தி, அவர்களுக்குத் தேவையான பொருளாதார உதவி மற்றும் 2026 சட்டமன்றத் தேர்தலில் போட்டியிட கண்டிப்பாக வாய்ப்பு, தேர்தல் செலவு, கட்சியில் பதவி என வாக்குறுதிகளை கொடுத்து அ.தி.மு.க-வில் இணைத்து வருகிறார்.அந்த வகையில் கடந்த ஏப்ரல் மாதம் அ.தி.மு.க. நிர்வாகிகள் விரித்த வலையில், அ.ம.மு.க. தஞ்சாவூர் தெற்கு மாவட்டச் செயலாளர் ஒரத்தநாடு மா.சேகர், அ.ம.மு.க. பொருளாளர் திருச்சி மனோகரன், பெரம்பலூர் மாவட்ட அ.ம.மு.க. துணைச் செயலாளர் கிருஷ்ணகுமார், வழக்கறிஞர் பிரிவு இணைச் செயலாளர் துரை உள்பட நூற்றுக்கணக்கான தொண்டர்களும் அ.தி.மு.க.வில் இணைந்தனர்.இன்னும் பல அ.ம.மு.க. நிர்வாகிகள் அ.தி.மு.க.வில் இணைய கடிதம் அளித்துள்ளனர். தினகரனுக்கு அடுத்தபடியாக விரல்விட்டு எண்ணக்கூடிய சில முக்கிய நிர்வாகிகள் மட்டுமே அ.ம.மு.க.வில் உள்ளனர். அவர்களிடமும் அ.தி.மு.க. மாஜிக்கள் பேச்சுவார்த்தை நடத்தி வருகின்றனர். கூடிய விரைவில் அ.ம.மு.க. கூடாரம் காலியாகிவிடும்” என்றார் தெம்பாக.அ.ம.மு.க-வில் இருந்து வெளியேறிய அக்கட்சியின் மாநில இளைஞரணிச் செயலாளர் கோமல் அன்பரசனிடம் பேசினோம். “டி.டி.வி.தினகரன், அம்மாவின் அடியொற்றி பயணிப்பார் என்று எண்ணித்தான் அ.ம.மு.க.வில் சேர்ந்தோம். ஆனால், அவரோ அம்மாவின் பாதையில் இருந்து விலகி செல்கிறார். அதனால், அம்மாவுக்கு அடுத்து எடப்பாடிதான் என்பதை அ.தி.மு.க. தொண்டர்கள் உணர்ந்துவிட்டார்கள். ஆகையால்தான் அவரை நோக்கி அணிவகுக்கிறார்கள். எனவே அ.ம.மு.க.வில் இருந்து வெளியேறும் நபர்கள் பற்றி விமர்சனம் செய்யாமல் டி.டி.வி., தன்னை சுயபரிசோதனை செய்துகொள்ள வேண்டும்!” என்றார்.இதுகுறித்து அ.ம.மு.க.வின் கொள்கை பரப்புச் செயலாளர் சி.ஆர்.சரஸ்வதியிடம் கேட்டோம். “சிலர் சுயநலத்திற்காக அ. ம.மு. க-வை விட்டு விலகிச் சென்றிருக்கலாம். ஆனால், உண்மையான அம்மா தொண்டர்கள் டி.டி.வி.யின் பக்கம்தான் நிற்கிறார்கள். தற்போது விலகிச் செல்பவர்களால் அ.ம.மு.க.விற்கு எந்த பாதிப்பும் ஏற்படாது. ஜெயகுமார், ‘அ.ம.மு.க.வெல்லாம் ஒரு கட்சியே கிடையாது’ என்கிறார். அப்படியென்றால், எங்கள் கட்சி நிர்வாகிகளை கோடிகளில் விலைபேசி அழைத்துச் செல்வது ஏன்? ஒருவர் சென்றால் நூறு பேர் வருவார்கள். எடப்பாடி முதல்வராய் இருந்தபோதே நாங்கள் இங்கே வந்தவர்கள். யாருக்கும் அடிபணியமாட்டோம்” என்றார்.எடப்பாடியின் காய்நகர்த்தலில், எஞ்சியிருக்கும் டி.டி.வி.யின் நிர்வாகிகளாவது எஞ்சுவார்களா? பார்ப்போம். - ரய்யான் பாபு

காலியாகும் அ.ம.மு.க. கூடாரம்! அ.தி.மு.க-வில் ஐக்கியமாகும் நிர்வாகிகள்...

Related Stories