உதயநிதி அதிரடி... டாஸ்மாக் இன்ப அதிர்ச்சி

``தமிழர்களும் தக்காளியும் என்ற தலைப்பில் சுடச்சுட ஒரு புத்தகம் போட்டால் லைஃப்ல செட்டில் ஆகிவிடலாம் போல இருக்கே?” என சூசகமாக எதையோ சொல்ல வந்த வம்பு, `இன்றைய ஸ்பெஷல் என்ன?' என்பதுபோல் சிஷ்யையை நோக்க அவருக்கு சுடச்சுட தக்காளி சூப் பரிமாறப்பட்டது.காஸ்ட்லியான அந்த சூப்பை ரசித்து அருந்தியபடி அதே டாபிக்கில் கச்சேரியைத் தொடங்கினார் வம்பு. ``மூன்றாவது வாரமாக, தக்காளி விலை 200 ரூபாய் வரை உயர்ந்து பொதுமக்கள் அல்லல்பட்டு வருகின்றனர். இதனால் மக்களைத் தக்காளி விலை உயர்வில் இருந்து காக்கும் பொருட்டு, ரேஷன் கடைகள், கூட்டுறவு கடைகள், அமுதம் சில்லறை அங்காடிகள் ஆகியவற்றில் 60 ரூபாய்க்கு அரசே தக்காளியை விற்பனை செய்து வருகிறது.தி.மு.க. ஆட்சி அமைந்து இரண்டு ஆண்டுகள் ஆனாலும், கூட்டுறவு சங்கத் தலைவர்களாக, உறுப்பினர்களாக அ.தி.மு.க.வினரே உள்ளனர். அந்தவகையில், தங்களது கட்டுப்பாட்டில் இருக்கும் கூட்டுறவு சங்கங்களுக்கு செல்லும் தக்காளியில் ஒரு குறிப்பிட்ட சதவிகிதம் தங்களுக்கு வந்தே தீரவேண்டுமென அவர்கள் அதிகாரிகளை மிரட்டுகிறார்களாம்.உதாரணத்துக்கு, ஒரு கூட்டுறவு சங்கத்துக்கு 100 கிலோ தக்காளி சென்றால், அதில் 30 முதல் 40 கிலோவை தட்டிப்பறித்து பிளாக்கில் விற்கிறார்கள். `இதனால் பொதுமக்களுக்கு தக்காளியை சீராக விநியோகம் செய்ய முடியவில்லை' என்ற புலம்பல்களை கூட்டுறவு வட்டாரத்தில் கேட்க முடிகிறது”.“உரிமைத்தொகையில் ஸ்கோர் பண்ணிவிட்டு, தக்காளியில் கோட்டை விடுகிறார்களே?’’“ அமலாக்கத்துறை ரெஸ்ட் கொடுத்தால்தானே தி.மு.க, இதில் எல்லாம் கவனம் செலுத்த முடியும்? தமிழக அமைச்சர்களை அடுத்தடுத்து டார்கெட் பண்ணும் அமலாக்கத்துறை, அவர்களின் பினாமிகள் என்று ஸ்கெட்ச் செய்து சிலரை வளைத்துக் கட்டி ரெய்டு நடத்துகிறது. அந்தவகையில், திண்டுக்கல் வேடசந்தூரில் தி.மு.க தெற்கு ஒ.செ வீரா சாமிநாதன் என்பவர் வீட்டில் நடந்த அமலாக்கத்துறை சோதனையும் இதே ரூட்டில்தான் பார்க்கப்படுகிறது..`செந்தில்பாலாஜிக்காக பல மாவட்டங்களில் டாஸ்மாக் பார்களில் பணம் வசூலித்ததாகக் கூறப்பட்ட புகாரின் பேரில் இந்த சோதனை' என்று சொல்லப்பட்டாலும் அதே மாவட்டத்தை சேர்ந்த இன்னொரு அமைச்சரையும் வட்டமிட்டுதான் இந்த சோதனையை நடத்தினார்களாம்.இதில் ஆச்சர்யம் என்னவென்றால், `சாமிநாதனின் பின்னணி பற்றி பல தகவல்களை அமலாக்கத்துறையின் கவனத்துக்கு தொடர் மெயில்களாக தட்டிவிட்டதே தி.மு.க.வினர்தான்' என்ற தகவலும் வலம் வருகிறது.தொடக்கத்தில் கோவை மாவட்ட பொறுப்பாளராக அமைச்சர் சக்கரபாணி இருந்தபோது, வீரா சாமிநாதன் அங்கே ஓவர் பந்தா காட்டியதாக அப்போதே கோவை மாவட்ட தி.மு.க.வினர் கண் சிவந்தனர். `சாமியை ஈ.டி. வட்டம் போடுகிறது' என்று தெரிந்ததும் இவர்களும் தங்கள் பங்குக்கு சில ஸ்கூப்களை மெயில்களாக தட்டிவிட்டனராம்.இதுமட்டுமில்லாமல் ஈ.டி.யின் அடுத்த ஹிட் லிஸ்ட்டில் கோவையை சேர்ந்த ஒரு தொழிலதிபரின் பெயரும் முன்வரிசையில் இருக்கிறதாம். உபகரணத் தயாரிப்பில் இருக்கும் அந்த நபர், கடந்த இரண்டு ஆண்டுகளில் திண்டுக்கல், மதுரை உள்ளிட்ட பகுதிகளில் சில அமைச்சர்களின் பெயரை முன்னிறுத்தி ஏகத்துக்கும் உறிஞ்சியுள்ளதாக புகார். சொல்லப்போனால், `மேற்படி நபர்களின் பினாமிகளில் இவரும் ஒருவர்' என்றும் ஈ.டி.க்கு தகவல் கிடைத்துள்ளதாம்.இதே நபர் கடந்த ஆட்சியின்போது கொங்கு மண்டல சீனியர் அமைச்சரின் பங்களாவே கதி என்று கிடந்தவராம். `அ.தி.மு.கவின் விசுவாசி என்று தெரிந்தும்கூட இவரை பினாமியாக வைத்துக் கொண்டது எப்படி?' என்பதுதான் அமலாக்கத்துறையையே அதிர வைத்த விவகாரம்.சமீபத்தில் வாட்ஸ்ஆப் ஆடியோ சர்ச்சை ஒன்றில் சிக்கினார் ஆளுங்கட்சி நிர்வாகி ஒருவர். ஏற்கனவே, இவர் மீது வந்த சில புகாரால் கடுப்பில் இருந்த தலைமை, இந்தச் சூழலை பயன்படுத்தி இவரைக் கட்டம் கட்டும் முடிவுக்கு வந்துவிட்டதாம். இவரை நீக்கிவிட்டு, மாவட்டத்தையும் இரண்டாகப் பிரித்து இரண்டு நபர்களின் கைகளில் கொடுக்க முடிவெடுத்ததாம். இதில் கொடுமை என்னவென்றால், அந்த இரண்டு நபர்களில் ஒருவர் ஓவர் சர்ச்சை மனிதர் என்று தலையிலடிக்கின்றனர. ஆடியோ சர்ச்சையில் சிக்கிய புள்ளியோ, அரோகரா அமைச்சரின் கைகளை பிடித்துக் காப்பாற்றுமாறு கதறுகிறாராம்”.``ஒரு டிரங்குப் பெட்டியை வலைவீசி தேடி வருகிறார்களாமே?”“அமலாக்கத்துறைதானே... ஆமாம். ஆனால் இது டிரங்குப் பெட்டி நம்பர் 2. சில வாரங்களாக அமலாக்கத்துறையின் சந்தேக வளையத்தில் இருக்கிறார் அமைச்சர் ஒருவர். அவரது சகோதரர்களுக்கு சம்மன் அனுப்பி அவர்களை நேரில் வரவழைத்து அமலாக்கத்துறை விசாரணை நடத்தியது. இதை தொடர்ந்து உஷாரான அவரது சகோதரர்கள், ஒரு பெரிய ‘ட்ரங்க்’ பெட்டி முழுவதும் ஆவணங்களை நிரப்பி அதை உறவினர் ஒருவர் வீட்டில் பதுக்கி வைத்து இருக்கிறார்கள். இப்போது இந்த விஷயத்தையும் மோப்பம் பிடித்த அமலக்கத்துறை அதிகாரிகள், அந்த ‘ட்ரங்க்’ பெட்டியை வலைவீசி தேடி வருகிறார்களாம்.’’“ ஓ.பி.எஸ். வட்டாரத்தில் புது உற்சாகம் தென்படத் தொடங்கியுள்ளதே?”``அங்கேயும் சில புகைச்சல்கள் இருக்கவே செய்கின்றன. கோடநாடு கொலை வழக்கில் தி.மு.க. அரசு நடவடிக்கை எடுக்க வேண்டும் என்பதை வலியுறுத்தி ஓ.பி.எஸ் அணியினர் தமிழகம் முழுவதும் ஆர்ப்பாட்டம் நடத்தினார்கள் அல்லவா? சென்னையில் எழும்பூர் ராஜரத்தினம் ஸ்டேடியம் அருகே ஆர்ப்பாட்டம் நடத்தினர்.அந்த நிகழ்ச்சியில் மாஜி எம்.எல்.ஏ., ஜே.சி.டி.பிரபாகர் கலந்து கொண்டார். இவருக்கும் கொளத்தூர் கிருஷ்ணமூர்த்திக்கும் ஏழாம் பொருத்தம். இதனால், ’பிரபாகர் இருக்கும் மேடையில் ஏறமாட்டேன்’ என சபதம் செய்த கிருஷ்ணமூர்த்தி, தனது ஆதரவாளர்களுடன் வள்ளுவர் கோட்டத்தில் ஆர்ப்பாட்டம் நடத்தினார். `ஓ.பி.எஸ் டீமிலும் கோஷ்டி பூசலா?’ என்பதை அறிந்த எடப்பாடி தரப்பு, ஜே.சி.டி.க்கு வலைவீசத் தொடங்கியுள்ளது”.“கிருஷ்ணகிரி பட்டாசு விவகாரம் டெல்லி வரை புகைந்துகொண்டிருக்கிறதே?’’``கிருஷ்ணகிரி பட்டாசு விபத்து குறித்து ராஜ்யசபாவில் அ.தி.மு.க. எம்.பி, தம்பிதுரை கேள்வி எழுப்பினார். அதற்கு மத்திய அமைச்சர் ஹர்தீப்சிங் பூரி, `கிருஷ்ணகிரியில் நடந்த பட்டாசு கடை வெடி விபத்துக்கு சிலிண்டர் வெடித்தது காரணமல்ல. குடியிருப்பு பகுதியில் பட்டாசுக் கடை இருந்ததே விபத்துக்குக் காரணம். அந்தப் பகுதியில் சமையல் சிலிண்டர் விநியோகமே செய்யப்படவில்லை' என பதிலளித்தார்.அப்பகுதி மக்களும், `சட்டவிரோத கல் குவாரிகளுக்கான வெடிமருந்தைப் பதுக்கியதுதான் காரணம்' எனக் குற்றம் சுமத்தினர். ஓட்டல் இருந்து சிலிண்டர் வெடித்துதான் விபத்து ஏற்பட்டதாக காவல்துறையும் தடய அறிவியல் துறையும் கூறிய நிலையில், வெடிவிபத்து சம்பவத்தால் மத்திய, மாநில அரசுகளுக்கு இடையே மோதல் உருவாகியுள்ளது.''.”ஒரு குரூப் குற்றாலம் போய் கும்மாளம் அடித்திருக்கிறதே?”``மதுரை மாநகர் தி.மு.க மாவட்ட செயலாளர் தளபதி, தன்னுடைய ஆதரவு கவுன்சிலர்கள், வட்டச்செயலாளர்களுக்கு குற்றாலத்தில் கறி விருந்து கொடுத்து அசத்தியிருக்கிறார். எதிரும் புதிருமாக இருந்த மாநகராட்சி மேயர் இந்திராணி பொன்வசந்த், அந்த விருந்தில் கலந்து கொண்டது மதுரை மாவட்ட உடன்பிறப்புகளுக்கு அதிர்ச்சியைக் கொடுத்திருக்கிறது.அமைச்சர் பி.டி.ஆர் கடைக்கண் பார்வை விழுந்ததால் யாரும் எதிர்பாராதவிதமாக மேயர் ஆனவர், இந்திராணி. மதுரை மாநகராட்சியில் பி.டி.ஆர் இன்றி ஓர் அணுவும் அசையாது என்று இருந்த நிலையில் ஆடியோ விவகாரத்துக்குப் பின்னர் அவர் அமைதியானது தெரிந்த விஷயம்தான். இந்தநிலையில், `மேயரை மாற்றியே தீருவேன்' என்று சபதம் எடுத்திருந்த மா.செ தளபதியுடன், மேயர் தன் குடும்பத்துடன் கறிவிருந்தில் கலந்து கொண்டதன் பின்னணி மர்மமாகவே இருக்கிறது. இந்தக் கறி விருந்துதான் மதுரையின் ஹாட் டாபிக்.``ஹாட்’ டாபிக் என்றவுடன் இன்னொரு சமாசாரமும் நினைவுக்கு வருகிறது. டாஸ்மாக் என்றாலே கட்டிங், பெட்டிங் என்று ஆகிவிட்ட நிலையில், நம்பமுடியாத காரியம் ஒன்றை செய்திருக்கிறார், அமைச்சர் உதயநிதி. 500 கடைகளை குறைத்த பின்னர் பெரிய அளவில் இடமாறுதல் நடந்தது அல்லவா? அதில் 2,444 பேருக்கு நடந்த இடமாறுதலில் நயா பைசாகூட கொடுக்கல் வாங்கல் இல்லாமல் கவுன்சலிங் அடிப்படையிலேயே இடமாறுதல் நடந்திருக்கிறது என வியந்துபோய் சொல்கிறார்கள்.”.``ஜெயிலர்’ ஆடியோ விழாவில் ரஜினி அவ்வளவு நேரடியாக வம்பிழுத்தும் அமைதி காக்கிறாரே விஜய்?”“ரஜினி, ஜெயிலர் தொடர்பாக ஒரு வார்த்தைகூட பேசக்கூடாது என்பதில் உறுதியாக இருக்கிறார் விஜய். அவரது கவனம் முழுக்க அடுத்தடுத்த அரசியல் நகர்வுகளில்தான் இருக்கிறது. இதுதொடர்பாக, மக்கள் இயக்க நிர்வாகிகளை சந்தித்து வரும் விஜய், வரும் 5 மற்றும் 6-ம் தேதி வழக்கறிஞர்களை சந்தித்து ஆலோசனை நடத்த உள்ளார். வழக்கம்போல், பனையூரில் இந்த ஆலோசனை கூட்டம் நடைபெறவுள்ளது. இந்தக் கூட்டத்தை ஒட்டி தனது கட்சிக்கு வழக்கறிஞர் பிரிவைத் தொடங்கவுள்ள விஜய், 234 தொகுதிகளிலும் இலவச சட்ட ஆலோசனை மையத்தைத் தொடங்கும் அதிரடி முடிவுக்கும் வந்திருக்கிறார்” என்றபடியே வாக்கிங் கிளம்பத் தயாரானார், வம்பானந்தா. - சுவாமி வம்பானந்தா