வழி நெடுக மரண வலி ! வெறிகொண்டு சாதித்த காட்டுமல்லி பெரி

வெறி கொண்ட மனிதர்கள் துரத்தித் துரத்திக் கடித்ததால் ஏற்பட்ட ரத்தக்காயங்கள்... வாழ்நாள் முழுக்க விரட்டிய அவமானங்களை நண்பர்கள் ஸ்கிரீன் ஷாட்டுகளாகப் பகிர்ந்து, ‘ஆனந்தக் கண்ணீருடன் உன் வெற்றியைக் கொண்டாடுகிறோம் பெரி’என்று வாழ்த்துகிறார்கள். துளிர்க்கும் கண்ணீருடன் அதை நம்மிடம் காட்டி நிம்மதிப் பெருமூச்சு விடுகிறார் பெரி. மத்திய அரசின் உணவுப் பாதுகாப்புத் துறையில் பாதுகாப்பு அதிகாரியாகியிருக்கும் பட்டியல் சமூக மற்றும் முதல் திருநங்கைதான் இந்த பெரி! இந்த இடத்தைப் பிடிக்க அவர் பட்டபாடுகளைக் கேட்டால், வார்த்தைகளுக்கே வலிக்கும். “என் சொந்த ஊர் மதுரை, பொன்மேனி கிராமம். அப்பா அழகேசன், அம்மா லட்சுமி. அப்பா சின்ன வயசுல இறந்துட்டாரு. சொல்லிக்கிற அளவுக்கு வீட்டுல சப்போர்ட் இல்ல. பொருளாதார சூழலும் சரியா இல்ல. 11-ம் வகுப்புல பயோ மேத்ஸ்தான் படிப்பேன்னு அடம்பிடிச்சு சேர்ந்தேன். 12 ஆம் வகுப்புவரை தமிழ் மீடியத்துல படிச்சேன். 920 மார்க் வாங்கினேன்.பிரவுசிங் சென்டருக்கு போய் என்னென்ன கோர்ஸ் இருக்கு, என்ன படிக்கலாம்ன்னு நானே தேடினேன். சயின்டிஸ்ட் ஆகணும்னு ஆசை வந்தது. அண்ணா யுனிவர்சிட்டி கவுன்சிலிங்குல மெரிட்டுல சீட் கிடைச்சதால, சென்னை வேல்டெக் பொறியியல் கல்லூரியில் ஃபீஸே கட்டாம படிக்க முடிஞ்சது. சென்னைக்கு படிக்கப்போனதுக்கே எங்கம்மா துடைப்பக்கட்டையைக் கொண்டு அடிச்சது. ஐ.ஐ.டி-க்கான எக்ஸாம்ல ரெண்டு பேப்பரையுமே கிளியர் பண்ணிட்டேன். இன்டர்வியூ கூப்பிட்டாங்க. குடும்ப சூழல்... கையில் ஒத்தை ரூவாகூட இல்லை... அதனால போக முடியல.இதோ இந்த வேலை கிடைச்சிருக்க இந்த நிமிஷம் வரைக்கும் சென்னை ஆவடி பஸ் ஸ்டாண்ட் பக்கத்துல சின்ன ரூம்லதான் தங்கியிருந்தேன். கவர்ன்ட்மென்டு ஆஃபிஸரா ஆனபிறகுதான் இந்த இடத்தைவிட்டு போகணும்னு வைராக்கியமா இருந்தேன். இப்போ, அது நடந்துடுச்சு” என்று சொல்லும் பெரி சென்னைக்கு வர காரணமாக அமைந்தது, கிராமத்தில் நடந்த பாலியல் துன்புறுத்தல்தான் என்று இதயத்தை கனக்கவைக்கிறார். “ஸ்கூல் படிக்கும்போது பார்ட் டைம் டைப்பிங் வேலை முடிச்சுட்டு வீட்டுக்கு வந்துக்கிட்டிருந்தேன். அப்ப ஃப்ரெண்ட்ஸுங்க ’ஏய் இங்க வான்னு கூப்ட்டானுங்க. நம்பக்கூட படிக்கிற பசங்கதானேன்னு போனதுமே, அஞ்சு பேர் சேர்ந்து என்னை பாலியல் ரீதியா துன்புறுத்த ஆரம்பிச்சுட்டானுங்க. நான் கத்திக் கதற ஆரம்பிச்சதும் என்னை அடிச்சு குளத்துல தள்ளிட்டானுங்க. அதிலிருந்து தப்பிச்சு ஓடிவந்த என்னால அதோட பயங்கரத்தையும் வலியையும் மறக்கவே முடியல. இனிமே, இந்த ஊருக்குள்ள இருக்கக்கூடாதுன்னுதான் சென்னைக்கு ஓடிவந்தேன்”என்கிற பெரி, கல்லூரி படிப்புக்குப் பிறகு சென்னை ராஜிவ் காந்தி அரசு மருத்துவமனையில் ஒப்பந்தம் அடிப்படையில் டைப்பிஸ்ட் வேலை பார்த்திருக்கிறார். 29 வயதாகும் பெரிக்கு சென்னையிலும் பாலியல் தாக்குதல்கள் தொடர்ந்திருக்கின்றன..“என்கூட ஃப்ரெண்டா பழகின ஒருத்தன் திடீர்ன்னு ஆறு மாசத்துக்கு முன்னால என்னை தப்பா கூப்பிட்டான். நான், மறுத்ததும் ’நீ பொட்டைதானே பொண்ணு ஒண்ணும் கிடையாதில்ல. ரொம்ப ஓவரா பண்ற, கூப்ட்டா வரமாட்டியா? ஒம்போது’ன்னு என்னை அவமானப்படுத்தினான். அவன் அனுப்பிய வாட்ஸ் ஆப் ஸ்க்ரீன்ஷாட் தான் இது. (நம்மிடம் காட்டுகிறார்...) ஒரு கசப்பான ஞாபகமா இருக்கட்டுமேன்னு இன்னும் டெலிட் பண்ணாம வெச்சிருக்கேன்.அப்புறம் ஒருநாள் டியூட்டி முடிச்சு சென்ட்ரல் டு ஆவடி ரயில்ல வந்துக்கிட்டிருந்தேன். ஒரு சின்ன பையன், அவன் ஏறினதும் நான் திருநங்கைன்னு தெரிஞ்சுக்கிட்டு என்கிட்ட தப்பா நடந்துக்க முயற்சி பண்ணினான். ஒரு கட்டத்துல அம்பத்தூர் ரயில்வே ஸ்டேஷன் வந்ததும் இறங்கியவன், ’வரமாட்டீயா? போன் நம்பர் தரமாட்டியா? ரொம்ப ஓவரா பண்ற?’ன்னு சொல்லிக்கிட்டே திடீர்ன்னு என் முகத்தை பிடிச்சு ரயில் கம்பியில மோதிட்டான். ரத்தக்காயம் ஆயிடுச்சு... (தழும்பைக் காட்டுகிறார்) சரி, நாம ஒரு நல்ல பொசிஷனுக்கு வந்தபிறகு இந்த சமூகம் நம்பளை புரிஞ்சுக்கும்னு நினைச்சேன். அதுக்காகத்தான், கஷ்டப்பட்டு போட்டித்தேர்வுகளுக்கு படிச்சேன்” என்கிறவரின் வெற்றியைக் கொண்டாட அவரது அம்மா லட்சுமி இப்போது உயிரோடு இல்லை.“2109 லேயே சர்க்கரை வியாதியால அம்மா இறந்துட்டாங்க. அம்மாவுக்கு 18 வயசு இருக்கும்போது, அப்பா இறந்ததால ரெண்டாவது மேரேஜ் பண்ணிக்கிட்டாங்க. அதனால தம்பி இருக்கான், அவனை நான்தான் படிக்க வைக்கிறேன். அம்மா இருக்குறவரைக்கும் நான் திருநங்கையாக மாறாம இருந்தேன். சொல்லப்போனா நான் திருநங்கைன்னு அவங்ககிட்ட சொல்லவே இல்ல. ஆனா, அம்மா இல்லையா... அவங்களுக்கு தெரியாமயா இருக்கும். அம்மா இறந்தபிறகு இப்போ பெண்ணா மாறிக்கிட்டிருக்கேன். என் விருப்பப்படி என்னோட பாலினத்தை நானே தேர்வு செய்துகொண்டேன்” என்கிறவர், வழி நெடுக தனக்கு நேர்ந்த பெருவலிக்கு மருந்தாக இந்த இந்தப் பணி அமையும் என்று நம்புகிறார். ‘என் வாழ்க்கைல ஒவ்வொரு நாளும்... ஒவ்வொரு நிமிஷமும்... ஏன், ஒவ்வொரு நொடியும் நானா செதுக்குனது டா!’ என்கிற அஜித்தின் அல்டிமேட் வசனம் திருநங்கை பெரிக்கும் அத்தனை கச்சிதமாய் பொருந்துகிறது. வாழ்த்துகள் பெரி! - மனோசெளந்தர்

வழி நெடுக மரண வலி ! வெறிகொண்டு சாதித்த காட்டுமல்லி பெரி

Related Stories