டிஷ்யூம்...டிஷ்யூம் : புரட்சித் தமிழரா, பழனிசாமி?

`புரட்சித் தலைவர்', `புரட்சித் தலைவி, `புரட்சித் தளபதி' வரிசையில் `புரட்சித் தமிழர்' பட்டத்தை சுமக்கத் தொடங்கியிருக்கிறார், எடப்பாடி பழனிசாமி. `புரட்சிக்கு அர்த்தம் தெரியுமா?' என எதிர்முகாமில் கொதிக்க, `அவர் செய்ததெல்லாமே புரட்சிதான்' என அ.தி.மு.க.வினர் வரிந்துகட்ட, சோசியல் மீடியாக்களுக்கு செம தீனி. அது சரி... இவர்கள் என்ன சொல்கிறார்கள்?“என்ன புரட்சி செய்தார் எடப்பாடி?”சி.ஆர்.சரஸ்வதி, (அ.ம.மு.க. கொள்கை பரப்புச் செயலாளர்)மாநாட்டுக்கு வந்த தொண்டர்கள் பசியோடு சென்றதுதான் மிச்சம். ஹெலிகாப்டர் மூலம் மலர்தூவி வரவேற்கும் அளவுக்கு எடப்பாடி என்ன செய்துவிட்டார்? தொடர்ந்து தோல்வியைத்தான் சந்தித்து வருகிறார். முதலமைச்சர் பதவிகூட தானமாகத்தான் வந்தது. துரோகத்தைத் தவிர வேறு என்ன செய்திருக்கிறார் எடப்பாடி பழனிசாமி? இந்த மாநாட்டை வைத்து தென்மாவட்ட மக்களின் ஆதரவு இருக்கிறது என்கிறார்கள். மதுரையில் இருக்கும் முத்துராமலிங்கத் தேவர், மருது சகோதரர்கள் ஆகியோரின் சிலைகளுக்கு மாலை அணிவிக்கக்கூட அவர் செல்லவில்லை.மாநாட்டில் பேசியவர்கள் ஒருவராவது மக்களின் பிரச்னைகளைப் பற்றி பேசினார்களா? தன்னை புகழ்ந்து பேசச் சொல்லி வேடிக்கை பார்த்துக் கொண்டிருக்கிறார், எடப்பாடி. நீட் தேர்வை முன்வைத்து தி.மு.க.வை விமர்சிக்கிறார். ஆனால், எடப்பாடி பழனிசாமி ஆட்சியில் இருந்தபோதுதானே நீட் தேர்வு வந்தது. ஜெயலலிதா இருந்தவரையில் தமிழ்நாட்டுக்குள் நீட் வரவே இல்லை.உண்மையான தலைவர்கள், தொண்டர்களுடன் நிற்பவர்கள்தானே தவிர, பணத்தை வைத்துத் தொண்டர்களை வாங்குபவர்கள் அல்ல. இதில் `புரட்சித் தமிழர்' பட்டம் வேறு. நீங்கள் என்ன புரட்சி செய்தீர்கள்? ‘தூத்துக்குடி துப்பாக்கிச் சூடு நடந்ததே எனக்குத் தெரியாது, நான் டி.வி.யை பார்த்துதான் தெரிந்துகொண்டேன்’ என்றுகூறி ஒரு மாநிலத்தின் முதல்வராக எடப்பாடி செய்ததுதான் பெரிய புரட்சி.கஜா புயலின்போது உணவில்லாமல் மக்கள் ஓடினார்களே... கன்னியாகுமரியில் மீனவ மக்கள் கடலில் தத்தளித்து உயிரிழந்தார்களே... உடனே போய்ப் பார்க்காமல் எல்லாரும் கூறிய பிறகு பொறுமையாக சென்று பார்த்தாரே... இதுதான் எடப்பாடி செய்த புரட்சிகள்..செலுத்தாமல் தங்களை வளப்படுத்திக் கொள்வதில் முனைப்பாக இருந்திருக்கிறார்கள் என்பதைத்தான், இப்படியொரு ஆடம்பர மாநாடு உணர்த்துகிறது.“உழைப்பால் உயர்ந்ததற்கான பரிசு!”-ஆர்.பி.உதயகுமார், (அ.தி.மு.க. முன்னாள் அமைச்சர்)எடப்பாடி பழனிசாமி முதலமைச்சராக பொறுப்பேற்றுக் கொண்டபோது. `அவரால் இந்தப் பதவியில் நிலைத்து நிற்க முடியுமா?' என்று பலரும் கேள்வி எழுப்பினார்கள். ஆனால், நான்கரை ஆண்டுகள் வெற்றிகரமாக ஆட்சி நடத்தினார். குடிமராமத்துப் பணிகளை மேற்கொண்டு நீர்நிலைகளை சுத்தப்படுத்தி நிலத்தடி நீரை உயர்த்தினார். யாரும் செய்யாததை செய்தால் அது புரட்சிதானே!2000 அம்மா மினி கிளினிக்குகள் திறக்கப்பட்டன, 4 கிராம் தங்கத்தை 8 கிராம் என உயர்த்தியது, கொரோனாவை கையாண்டவிதம், அம்மா உணவகத்தில் இலவச உணவு வழங்கியது, வெளிமாநில தொழிலாளர்களைப் பாதுகாத்தது, விவசாயிகளுக்கு நன்மை பயக்கும் வகையில் திட்டங்களை அறிவித்தது என இந்தப் புரட்சிகரமான செயல்கள் அனைத்தும் எடப்பாடி பழனிசாமியின் ஆட்சியில்தானே நடைபெற்றது?கொரோனா காலத்தில் உலகமே ஸ்தம்பித்துப் போயிருந்த நிலையிலும்கூட, தமிழகத்தில் இரண்டு விஷயங்கள் தடை இல்லாமல் நடைபெற்றுக் கொண்டிருந்தது. ஒன்று விவசாயம், மற்றொன்று ஆன்லைன் கல்வி. விவசாயம் தடை இல்லாமல் இயங்குவதற்கு பல்வேறு முயற்சிகளை எடப்பாடி பழனிசாமி மேற்கொண்டார். வரலாற்றிலேயே பேரிடர் சமயங்களில் அதிகமான அரசாணைகளை வெளியிட்டு துரித நடவடிக்கைகள் மேற்கொள்ளப்பட்டது எடப்பாடி ஆட்சியில்தான்.இதுபோல், எண்ணற்ற புரட்சிகளை செய்ததால்தான் மாநாட்டில் அவருக்கான அங்கீகாரத்தை நாங்கள் அனைவரும் கொடுத்துள்ளோம். அ.தி.மு.கவை வழிநடத்த ஏகமனதாகவும் இரண்டரைக் கோடி தொண்டர்களின் விருப்பமாகவும் கட்சியை சிறந்தமுறையில் வழிநடத்தக் கூடிய தலைவராகவும் பொறுப்பேற்றுக் கொண்டவருக்கு ‘புரட்சித் தமிழர்’ பட்டம் கொடுத்தோம். அதில் என்ன தவறை இவர்கள் கண்டுபிடித்துவிட்டார்கள்?தமிழ்நாட்டை மீட்டெடுக்கும் முயற்சியில் எம்.ஜி.ஆர், ஜெயலலிதா ஆகிய இருபெரும் தலைவர்களின் வழியில் மக்களுக்கு நல்ல ஆட்சியைக் கொடுக்க வேண்டும் என்ற நோக்கம் முக்கியமானது. அதற்காக, எந்த சமரசமும் இல்லாமல் ஒன்றிணைத்து தலைமை வகிப்பதற்காகவும்தான் இந்தப் பட்டம் கொடுக்கப்பட்டது. அரசியலில் எந்த பின்புலமும் இல்லாமல் உழைப்பால் உயர்ந்து நிற்பவருக்காக ‘புரட்சித் தமிழர்’ என்ற பட்டம் கொடுப்பதே, நாங்கள் அவருக்கு செலுத்தும் மரியாதை. - தர்ஷினி