டிஷ்யூம்... டிஷ்யூம் : விஸ்வகர்மா யோஜனா: குலக்கல்வியின் மறுவடிவமா?

ராஜாஜியின் குலக்கல்வித் திட்டத்துக்கு எழுந்த எதிர்ப்பு, 1954ல் காமராஜரை தமிழ்நாட்டின் முதலமைச்சராக்கியது. அந்தவரிசையில், மத்திய அரசின் ‘விஸ்வகர்மா யோஜனா’ திட்டமும் `குலக்கல்வியின் மறுவடிவம்' என்று போர்க்குரல் எழுப்புகின்றன, எதிர்க்கட்சிகள். சரி, இவர்கள் என்ன சொல்கிறார்கள்? கடிகாரத்தைத் தலைகீழாக திருப்பி வைப்பதா? அ.அருள்மொழி, திராவிடர் கழக பிரசார செயலாளர் மத்திய அமைச்சரவையின் பொருளாதார குழு கடந்த ஆகஸ்ட் 16 அன்று ‘பி.எம். விஸ்வகர்மா’திட்டத்தை ஏற்று 13,000 கோடி ரூபாயை ஒதுக்கியுள்ளது. பள்ளிக்கூடங்களுக்குப் பதிலாக குரு - சிஷ்ய பரம்பரைக் கல்விப் பயிற்சியாம் இது. 2023-2024 முதல் 2027-2028 வரை இத்திட்டப்படி குலத்தொழிலை அவர்களின் வாரிசுகளுக்கு, குடும்பத்தினருக்கு கற்றுக் கொடுப்பார்களாம். இதில், 18 பாரம்பரிய குலத்தொழிலை அடையாளம் கண்டுள்ளார்கள். தச்சுத் தொழில், படகு செய்தல், கருமான் பட்டறைத் தொழில், குயவன் மண்பாண்டத் தொழில், சுத்தி முதல் துடைப்பம் - விளக்குமாறு கட்டும் தொழில், பொம்மை செய்தல், சிகை திருத்தும் தொழில், கைத்தறித் தொழில், பூ கட்டும் தொழில், சலவைத் தொழில், தையல் தொழில், மீன் பிடித் தொழில் முதலியன இத்திட்டத்தில் வருகிறது என்கிறார்கள். இவற்றைச் செய்யப் பழகுவோருக்கு ஒரு லட்சம் ரூபாய் முதல் 2 லட்சம் ரூபாய்வரை மானிய அடிப்படையில் கடன் அளிக்க உள்ளனர். எவ்வளவு லாவகமாக தூண்டில் போடுகிறார்கள் பாருங்கள்… சமூகநீதிக்காகப் போராடி, சலவைத் தொழிலாளியின் மகன் மீண்டும் அதே தொழிலில்போய் அவமானமும் தற்குறித்தனத்தையும் பெறாமல், அவரைப் படிக்க வைத்து ஆட்சிப் பணியாளராக்கி வெற்றி கண்டதுதான், திராவிடத்தின் அடிப்படை. `பிறப்பொக்கும் எல்லா உயிர்க்கும்’ என்ற குறள் பிறந்த மண்ணில் இப்படி மீண்டும் குலக்கல்வியா? இதைவிட கடைந்தெடுத்த பிற்போக்குத்தனம் உண்டா? முன்னேற்ற கடிகாரத்தை தலைகீழாகத் திருப்பி வைப்பதா? தொழிலை ஏன் பாரம்பரியமாக செய்ய வற்புறுத்தவேண்டும்? செருப்புத் தைப்பவர், துணி வெளுப்பவர், சிகை திருத்துபவர்களின் பிள்ளைகள் வேறு படிப்பைப் படித்து முன்னேற முடியாமல் இப்படி முட்டுக்கட்டை போடுவதை எப்படி ஏற்க முடியும்? தமிழகத்தில் 70 ஆண்டுகளுக்கு முன் புதைகுழிக்கு அனுப்பப்பட்ட குலக்கல்வித் திட்டம், ஆர்.எஸ்.எஸ் ஆட்சியின் மூலம் மீண்டும் புதிய அவதாரம் எடுத்துள்ளது. ஒடுக்கப்பட்டோர் எல்லாம் டாக்டராக, பொறியாளராக, வக்கீலாக, நீதிபதியாக ஆகாமல் தடுப்பதற்கான திட்டமே இந்தப் புதிய குலதர்மத் தொழில் திட்டம்..தி.மு.க.வே குலத்தொழில் கட்சிதான்! பேராசிரியர் ராம.சீனிவாசன், பா.ஜ.க. மாநில பொதுச்செயலாளர் திராவிடர் கழகத்தினர், இப்படி பேசிப் பேசியே கெடுத்து வைத்திருக்கிறார்கள். தொழிற்கல்வி என்று வந்தாலே அது குலக்கல்வி என்று சொல்ல ஆரம்பித்து விட்டனர். ராஜாஜி தமிழக முதலமைச்சராக இருந்தபோதுகூட, குலக்கல்வி என்ற வார்த்தையை எங்கும் பயன்படுத்தியது கிடையாது. ஆனால், `ராஜாஜி குலக்கல்வி கொண்டுவந்தார்' என்று பிரசாரம் செய்தே அவரை இழிவுபடுத்தினார்கள். யாரையும் ஐ.ஏ.எஸ். ஐ.பி.எஸ். படிக்க வேண்டாம் என்று சொல்லவில்லை. 140 கோடிப் பேர் இருக்கும் இந்தியாவில் ஆண்டுக்கு 600 முதல் 800 பேர் வரைதான் ஐ.ஏ.எஸ்., ஐ.பி.எஸ்., ஆகிறார்கள். இது எல்லாம் போக கோடிக்கணக்கான இளைஞர்கள் வேலை இல்லாமல் இருக்கிறார்கள். அவர்களுக்கு எல்லாம் திராவிடர் கழகம் என்ன வழி சொல்லும்? அவர்களுக்கு வழி சொல்வதுதான் விஸ்வகர்மா யோஜனா திட்டம். கல்வி நிறுவனங்களில் கற்றுக் கொடுக்காமல், தங்களின் குடும்பம் மூலமாக கற்றுக்கொண்டு தொழில் செய்கிறார்கள். நகை செய்யும் தொழில் மூலம் எவ்வளவு வருவாய் நாட்டுக்கு கிடைக்கிறது. நகை செய்யும் தொழிலை எந்தக் கல்வி நிறுவனத்தில் கற்று தருகிறார்கள்? பெரியார் பல்கலைகழகத்தில் இதற்குப் பயிற்சி தருகிறார்களா? சின்னச்சின்ன மூலதனத்தில் அரசாங்கம் கொடுக்கும் கடன் மூலமாக ஏழைகள் உச்சம் பெறுவார்கள். வேலைவாய்ப்புகள் உருவாகும். எந்த ஜாதியாக இருந்தாலும் ஐ.ஏ.எஸ். படிப்பவர்கள் படிக்கட்டும், டாக்டருக்கு படிக்க விரும்புபவர்கள் படிக்கட்டும். இதையெல்லாம் தாண்டி, வேலை இல்லாமல் இருக்கும் இளைஞர்களுக்கு மோடியிடம் பதில் உள்ளது. மத்திய அரசின் திட்டத்தை திராவிடர் கழகம் எதிர்க்கிறது என்றால், தி.மு.க.வின் அரசியலும் குலத்தொழில் அரசியல்தான். கோபாலபுர குடும்பத்தைத் தாண்டி தி.மு.க.வில் தலைமைக்கு வேறு யாரும் வர முடியாது. கருணாநிதி மகன் என்பதால் ஸ்டாலின் முதல்வர். ஸ்டாலினின் மகன் என்பதால் உதயநிதி அமைச்சர். ஸ்டாலினின் தங்கை என்பதால் கனிமொழி எம்.பி. இப்படி குலத்தொழிலுக்கே முன்னுதாரமாக இருக்கும் ஒரே கட்சி தி.மு.க. அந்தக் கட்சியை ஆதரிக்கும் திராவிட கழகத்தினருக்கு மோடியை பற்றிப் பேச எந்தத் தகுதியும் கிடையாது. நம்முடைய கலாசார பாரம்பரியத்தைப் பாதுகாத்து பொருளாதார மேம்பாடும் அதிகரிக்கும் உன்னதமான இந்தத் திட்டம், கைவினை கலைஞர்களின் வாழ்க்கைத் தரத்தை மேம்படுத்தும் உதவும். - அரியன் பாபு படங்கள்: செந்தில்நாதன்