டிஷ்யூம் டிஷ்யூம்: ஜி 20 வெற்றியா, தோல்வியா?

`உலகத் தலைவர்களைவிட அதிகம் பேசப்படுபவராக மாறிவிட்டார், பிரதமர் மோடி' என ஜி20 மாநாட்டை முன்வைத்து பா.ஜ.க.வினர் பெருமை பேசிக்கொண்டிருக்க, `சேரிகளை மறைக்க செலவிட்ட கோடிகளுக்கு நிறைய திட்டங்களை முன்னெடுத்திருக்கலாம். உலகளவில் சுழற்சிமுறையில் கிடைக்கும் வாய்ப்பை வைத்து ஆதாயம் தேடுகிறது, பா.ஜ.க' என வரிந்துகட்டுகின்றன எதிர்க்கட்சிகள். உண்மையில், ஜி 20 மாநாடு வெற்றியா, தோல்வியா? இவர்கள் என்ன சொல்கிறார்கள்? ``மோடி சாதிப்பதை பொறுக்க முடியவில்லை!" பேராசிரியர் ராம.சீனிவாசன், பா.ஜ.க. மாநில பொதுச்செயலாளர் வரலாற்றில் முதல்முறையாக ஜி 20 மாநாட்டுக்கு இந்தியா பொறுப்பேற்றிருக்கிறது. அதுவும் பிரதமர் மோடி தலைமையில் நடந்திருப்பது கூடுதல் பெருமையைச் சேர்த்திருக்கிறது. ஆனால், இதைப் பொறுத்துக்கொள்ள முடியாத எதிர்க்கட்சிகள் வழக்கம்போல் குறை சொல்கின்றன. பிரதமர் மோடி, வெளிநாடுகளில் சுற்றுப்பயணம் செய்யும்போதெல்லாம் உலக அரங்கில் இந்தியாவுக்குப் பெருமை சேர்த்துக்கொண்டிருக்கிறார். ஆனால், வெளிநாடுகளில் சுற்றுப்பயணம் மேற்கொண்டுள்ள ராகுல்காந்தி, நாட்டின் இறையாண்மைக்கு எதிராகப் பேசக்கூடிய எழுத்தாளர்கள், பேச்சாளர்களை சந்தித்து தேசத்துக்கு இழிவைத் தேடிக்கொடுத்துவருகிறார். ஒரேசமயத்தில் பல வெளிநாட்டுத் தலைவர்கள் நம் நாட்டுக்கு வந்திருக்கிறார்கள். இதுவே மிகப்பெரிய பெருமை. `எல்லா உயிரும் ஒரே பூமித் தாயின் பிள்ளைகள்' என்பதை ஜி 20 மாநாட்டின் மூலம் உலக நாடுகளுக்கான செய்தியாக பிரதமர் மோடி கொண்டுசேர்த்திருக்கிறார். ஆப்பிரிக்க நாடுகளை தவறான கண்ணோட்டத்தோடுதான் உலக நாடுகள் பார்த்துவந்தன. அதை பிரதமர் மோடி மாற்றியிருக்கிறார். இதன்மூலம் ஆப்பிரிக்க நாடுகள் வளர்ச்சியைப் நோக்கிப் பயணிக்கும். ஜி 20 நாடுகளுக்கு இடையேயான வர்த்தகம், ஒத்துழைப்பு, சுற்றுச்சுழல் பாதுகாப்பு, நாடுகளுக்குக் இடையிலான பிரச்னைகளைப் பேசித் தீர்த்துக்கொள்வது எனப் பல விஷயங்கள் ஆலோசிக்கப்பட்டுள்ளன. குறிப்பாக, ஜி 20 மாநாட்டில் ரஷ்யா–உக்ரேன் போர் ஆலோசிக்கப்பட்டதன் காரணமாக, போர் நிறுத்தப்படுவதற்கான அறிகுறிகள் தென்படத் தொடங்கியுள்ளன. இப்படிப் பல வெற்றிகளை மோடி சாதித்துக் காட்டியிருக்கிறார். ஆனால், சிறுசிறு குறைகளைச் சுட்டிக்காட்டி ஜி 20 மாநாட்டில் தோல்வி எனச் சொல்லிக் கொள்வதில் எதிர்கட்சிகளுக்கு ஒரு சுகம் இருக்கிறது. உடலில் லேசாக அரிப்பு ஏற்பட்டால் சொறிந்து கொள்வதில் சுகம் இருக்கும். அதுவே, அதிகமாக செறிந்தால் ஆறாத புண்ணாகிவிடும். எதிர்கட்சிகள் இந்த விவகாரத்தில் தங்களைத் தாங்களே புண்ணாக்கிக் கொள்கின்றனர்..``மக்கள் வரிப்பணத்தில் சுயவிளம்பரம்!" எழிலன் நாகநாதன், தி.மு.க எம்.எல்.ஏ., ஜி 20 மாநாட்டை நடத்துவதற்கான வாய்ப்பு, சுழற்சிமுறையில் வரக்கூடியது. அந்தவகையில் இந்தமுறை இந்தியாவுக்கு அந்த வாய்ப்பு கிடைத்திருக்கிறது. விரைவில் வரவுள்ள பல மாநில சட்டமன்ற தேர்தல், அடுத்தாண்டு நடைபெற உள்ள நாடாளுமன்றத் தேர்தல் ஆகியவற்றுக்கு, `ஜி 20 மாநாட்டை வைத்துப் பிரசாரம் செய்து கொள்ளலாம்' என பா.ஜ.க.திட்டமிடுகிறது. இதற்கு முன்பு பிரிக்ஸ் மாநாடு நடந்தது. அதில், வளர்ந்துவரும் நாடுகளில் இந்தியா, தனிநபர் வருமானத்தில் கீழே உள்ளதாகவும் மனிதவளக் குறியீடுகளிலும் பின்னோக்கி சென்றுகொண்டிருப்பதாகவும் சுட்டிகாட்டியது. இந்தக் குறியீடுகளில், பொருளாதார நெருக்கடியில் சிக்கித்தவிக்கும் இலங்கைகூட இந்தியாவைவிட முன்னிலையில் உள்ளது. சுற்றுச்சூழலைப் பாதுகாக்கவே ஜி 20 அமைப்பு உருவாக்கப்பட்டது. ஆனால், மழைநீர் வடிகால், கழிவுநீர் வெளியேற்ற கட்டமைப்புகளை சரிவரச் செய்யவில்லை. இதனால், ஜி 20 மாநாடு நடந்த பிரகதி மைதானம் ஒருநாள் மழைக்கே மிதந்திருக்கிறது. மாநாட்டு அரங்கை வடிவமைக்க 2 ஆயிரத்து 700 கோடி ரூபாயை செலவிட்டுள்ளனர். ஜி 20 மாநாட்டையொட்டி, டெல்லியில் இருக்கும் குடிசைப் பகுதிகளை துணியால் மூடியுள்ளனர். இது, வெட்கப்படவேண்டிய விஷயம். பிரதமர் மோடி தமது ஒன்பது ஆண்டுகால ஆட்சியில் செய்த ஒரே சாதனை, வெளிநாட்டுத் தலைவர்கள் இந்தியா வரும்போதெல்லாம் ஏழை மக்களின் வீடுகளை துணிபோட்டு மூடுவதுதான். ஜி20 உச்சி மாநாட்டில் மோடியுடன் மனித உரிமைகள், பத்திரிகை சுதந்திரம் உள்ளிட்ட பல்வேறு விஷயங்கள் குறித்துப் பேசியதாக அமெரிக்க அதிபர் ஜோ பைடன் கூறியிருக்கிறார். இந்தியப் பத்திரிகையாளர்கள், ஜே பைடனை சந்திக்க பிரதமர் மோடி தடை போட்டதன் காரணமாகவே வியட்நாம் சென்று இதை ஜே பைடன் கூற வேண்டிய நிலை ஏற்பட்டுவிட்டது. இது இந்தியாவுக்கு ஏற்பட்ட மிகப்பெரிய அவமானம். அதேநேரம், மத்திய பா.ஜ.க அரசு மீது எவ்வளவு வெறுப்பு இருந்தாலும் ஜி 20 மாநாட்டில் ஸ்டாலின், மம்தா, நிதிஷ்குமார், சிபு சோரன் உள்ளிட்ட இந்தியா கூட்டணியின் தலைவர்கள் பங்கேற்றனர். தன்னை முன்னிலைப்படுத்திகொள்ளும் ஒரு நிகழ்வாக ஜி 20 மாநாட்டை பிரதமர் மோடி நடத்தி முடித்திருக்கிறார். இதற்காக பல ஆயிரம் கோடி ரூபாயை வீணடித்துள்ளனர். இந்த மாநாட்டில், பிரதமர் மோடி என்ற பெயர்ப் பலகையில் `இந்தியா' என்பதற்கு பதிலாக `பாரத்' என எழுதப்பட்டிருந்தது. `இது சரியா?' என மக்களே கேள்வி எழுப்புகிறார்கள்! - அரியன் பாபு படங்கள்: செந்தில்நாதன்