மாயமாகும் சரக்கு லாரிகள்... கேள்விக்குறியாகும் துறைமுகப் பாதுகாப்பு - தூத்துக்குடி அவலம்!

போதைப்பொருள் முதல் கள்ளத்தங்கம் வரை கடத்தலுக்குப் பெயர்போன தூத்துக்குடி துறைமுகத்தில் சமீபகாலமாக சரக்குகள் லாரியோடு கடத்தப்படுகின்றன. இதனால் துறைமுக சபை நிர்வாகம் தொடங்கி மத்திய தொழிற்பாதுகாப்புப் படையின் பாதுகாப்பு நடவடிக்கை வரை கேள்விக்குறி ஆகியிருக்கிறது.சில நாட்களுக்கு முன்பு ரஷ்யாவில் இருந்து 33 ஆயிரம் டன் பொட்டாஷ் உரம் தூத்துக்குடி துறைமுகத்தில் இறக்குமதியானது. அந்த உரம் துறைமுகத்தில் இருந்து குடோன்களுக்கு கொண்டு செல்லப்படும் வழியில் இரண்டு லாரிகள் மாயமாகிவிட்டன. அவற்றில் இருந்த 150டன் உரத்தின் மதிப்பு சுமார் 1 கோடி ரூபாய்.அவசர அவசரமாகக் களமிறங்கிய போலீஸார் தீவிர தேடுதல் வேட்டையில் ஈடுபட்டனர். அப்போது, முள்ளக்காடு அருகே உப்பு குடோனில் உர லாரிகள் இருப்பதாக தகவல் கிடைத்ததை அடுத்து போலீஸார் அங்கு சென்றார்கள். அங்கு உரத்தை 50 கிலோ சாக்குகளில் பேக்கிங் செய்துக்கொண்டிருந்தது ஒரு கும்பல். அவர்களை சுற்றிவளைத்த போலீஸார் அய்யன்கோவில் தெருவைச் சேர்ந்த மாதவன் என்பவரைக் கைது செய்தனர்..துறைமுகத்தில் இருந்து லாரியோடு சரக்கு கடத்தப்படுவது இது முதல் முறையல்ல. யூரியா, பொட்டாஷ், நிலக்கரி, கோதுமை என்று எது கிடைத்தாலும் கடத்திவிடுகிறார்கள். கன்னியாகுமரி மாவட்டத்தில் இருந்து துறைமுகம் கொண்டுவரப்பட்டு ஏற்றுமதியாகவிருந்த முந்திரிப் பருப்பை லாரியோடு கடத்திய விவகாரத்தில் முன்னாள் அ.தி.மு.க. அமைச்சர் ஒருவரின் மகன் கைது செய்யப்பட்டு அவர் மீது குண்டர் சட்டம் பாய்ந்த சம்பவங்களெல்லாம் இங்கே உண்டு. இதுபற்றி துறைமுகத்தில் சரக்குகளைக் கையாளும் சங்கத்தின் செயலாளர் ஜேசய்யா வில்வராயரிடம் கேட்டோம். “ இதுபோன்ற கடத்தல்கள் சென்னை துறைமுகத்தில்தான் அதிகம் நடந்தன. இப்போது அந்த இடத்தை தூத்துக்குடி பிடித்துவிட்டது. இதன் பின்னணியில் மிகப்பெரிய நெட்வொர்க் உள்ளது. வெளிநாட்டில் இருந்தோ அல்லது வேறு மாநிலத்தில் இருந்தோ தூத்துக்குடி துறைமுகத்துக்கு ஒரு சரக்கு ஏற்றப்படும்போதே கள்ளத் துப்பு கொடுக்க புரோக்கர்கள் இருக்கிறார்கள். கொள்ளை அடிக்கிறார்களோ இல்லையோ துப்புக் கொடுக்கும் புரோக்கர்களுக்கு கமிஷன் கொடுத்துவிட வேண்டும்..இந்த விவகாரம் வெளிநாடுகளில் உள்ள ஏற்றுமதியாளர்கள் வரை தெரிந்துவிட்டது. இதனால், பலரும் தூத்துக்குடிக்கு சரக்கு அனுப்பவே பயப்படுகிறார்கள். திருட்டைத் தடுக்க வேண்டிய துறைமுக சபை நிர்வாகம், கைகட்டி வேடிக்கை பார்க்கிறது. மத்திய தொழில் பாதுகாப்புப் படையினர் பாதுகாப்புப் பணியில் இருந்தாலும், அவர்களை மீறி யார் வேண்டுமானாலும் துறைமுகத்திற்குள் போய்வரலாம் என்கிற நிலைதான் நீடிக்கிறது.கப்பலில் வரும் சரக்குகளை துறைமுகத்தில் இருந்து குடோன்களுக்குக் கொண்டுசெல்லும் பணியை நிறைய நிறுவனங்கள் செய்கின்றன. சரக்கை எடுத்துச் செல்லும் லாரிகளின் எண்ணிக்கை, லாரியின் பெயர், பதிவு எண் உள்ளிட்ட எல்லா விவரங்களும் துறைமுகத்திற்குத் தரப்படும். அதனை ஒழுங்காக ஆய்வு செய்து சரக்குகளை அனுப்பினாலே கடத்தலைத் தடுக்கலாம். ஆனால், அதனைச் சரிவர சரிபார்ப்பதில்லை..கடத்தல் சம்பவங்கள் பெரும்பாலும் இரவில்தான் நடக்கிறது. எனவே, மாலை 6 மணி முதல் காலை 6 மணி வரை சரக்குகளை குடோன்களுக்கு அனுப்புவதை நிறுத்தவேண்டும் என துறைமுக அதிகாரிகளிடம் பலமுறை தெரிவித்தும் பலன் இல்லை. லாரி உரிமையாளர் மற்றும் புக்கிங் ஏஜென்ட் சங்கங்களும் இந்த விஷயத்தில் உஷாராக இருக்க வேண்டும்” என்றார், முன் எச்சரிக்கை அறிவிப்பாக.இதுகுறித்து, துறைமுக சபை ஊழியர்களிடம் கேட்டோம். “ தூத்துக்குடி, முத்தையாபுரம், பழையகாயல் பகுதிகளைச் சேர்ந்த ஒரு கும்பல்தான் இந்தக் கடத்தல் தொழிலைச் செய்து வருகிறது. சமுதாய ரீதியாகப் பிரிந்து இரு தரப்பினர் தற்போது யார் பெரிய ஆள் என்கிற கோதாவில் இறங்கியிருக்கிறார்கள்.இந்தப் போட்டியில் மூன்று கொலைகள்கூட நடந்துள்ளன.கடத்தல் கும்பலிடம் இருந்து சரக்கை வாங்கி, விற்க, ஏஜென்டுகளும் இருக்கிறார்கள். தெர்மல் நகர், முத்தையாபுரம், சிப்காட் காவல் நிலையத்தின் ஏகபோக ஆதரவு இருக்கிறது. துறைமுகத்தில் அவுட்டோர் கிளார்க் என்று இரவு நேரப் பணியில் இருக்கும் ஒருசிலரும் இதற்கு சப்போர்ட் செய்கிறார்கள். அவர்கள் துணை இல்லாமல் தவறான ஒரு லாரிகூட உள்ளேயோ வெளியேயோ செல்ல முடியாது.இந்த விவகாரத்தில் தலையிட்டால் காவல் நிலையம், நீதிமன்றம் என்று அலையவேண்டும் என்பதால், துறைமுக அதிகாரிகள் ஒதுங்கிவிடுகிறார்கள். சென்னையில் இப்படி நடந்த கடத்தலால் ஏழுமலை என்பவர் கொலை செய்யப்பட்டார். இனியாவது, காவல்துறை விழித்துக்கொள்ள வேண்டும்” என்றார்கள்.தூத்துக்குடி சிட்டி லாரி புக்கிங் ஏஜென்ட் சங்கத் தலைவர் சுப்புராஜிடம் கேட்டோம். “நாங்கள் லாரி உரிமையாளர்களின் நம்பகத் தன்மையை சோதித்தே அனுப்புவோம். அதனால் தவறு நடக்க வாய்ப்பே இல்லாமல் இருந்தது. இப்போது ஷிப்பிங் கம்பெனிக்காரர்களே அந்த பணியைச் செய்கிறார்கள். வரைமுறையில்லாமல் யார் யாரெல்லாமோ லாரியை ஓட்டுகிறார்கள். அதனால் திருட்டும் அமோகமாக நடக்கிறது” என்றார்.தூத்துக்குடி துறைமுக சபையின் பி.ஆர்.ஓ. சசியிடம் கேட்டோம். “சரக்கு கடத்தல் துறைமுக வளாகத்திற்கு வெளியேதான் நடக்கிறது. அதற்கு நிர்வாகம் எப்படிப் பொறுப்பேற்க முடியும்? துறைமுகத்திற்குள் சரக்கு இறங்கு தளத்தில் எந்தத் தவறும் நடக்காமல் பார்த்துக்கொள்கிறோம். அவுட்டோர் கிளார்க் தவறு செய்கிறார்கள் என்கிறார்கள். அது யார் என்று சொன்னால் நிச்சயம் அவர்கள் மீது நடவடிக்கை எடுக்கப்படும்” என்றார். துறைமுகத்தின் மானம் கப்பல் ஏறிப்போகுது! -எஸ்.அண்ணாதுரை

மாயமாகும் சரக்கு லாரிகள்... கேள்விக்குறியாகும் துறைமுகப் பாதுகாப்பு - தூத்துக்குடி அவலம்!

Related Stories