இது இளைஞர்களின் வெற்றி!

-என் சத்திய மூர்த்தி, கொள்கை மற்றும் அரசியல் ஆய்வாளர்.ஜல்லிக்கட்டு வழக்கில் உச்ச நீதிமன்றம், தமிழ்நாடு அரசுக்கும் மக்களுக்கும் ஆதரவாக தீர்ப்பு வழங்கினாலும் வழங்கியது, இங்கு அரசியல் லாவணியை ஆரம்பித்துவிட்டார்கள். ’மாநிலத்தில் அ.தி.மு.க அரசும் மத்தியில் கூட்டணி கட்சியான பா.ஜ.க-வின் நரேந்திர மோடி பிரதமராகவும் பதவி வகித்ததால் மட்டுமே, 2017-ல் இதற்கான சட்டம் நிஜமானது’ என்பதே சம்மந்தப்பட்டவர்களின் வாதம்..தமிழ் மக்களின் வீர விளையாட்டுக்கு தடை விதிக்கப்பட்ட முந்தைய காலத்தில், மாநிலத்தில் தி.மு.க-வும், மத்தியில் அந்த கட்சி பங்குவகித்த காங்கிரஸ் தலைமையிலான மன்மோகன் சிங் அரசும் பதவியில் இருந்தன என்பதும் குற்றச்சாட்டு. இரண்டாவது வாதம் ஓரளவிற்கு உண்மை. ஆனால், ஏனோ அ.தி.மு.க அரசு, தானாகவே இந்த சட்டத்தை முன்னெடுத்ததாகவும், அதற்கு மோடி அரசு முழு மனதுடன் ஆதரவு தெரிவித்ததாகவும் ஒரு ‘அடேங்கப்பா’ கதை பரப்பப்பட்டு வருகிறது.உண்மை என்னவென்றால், அவர்கள் அவ்வாறு செய்ய கட்டாயப்படுத்தப்பட்டனர். சென்னையின் மெரினா கடற்கரையிலும், தமிழகம் முழுவதும் லட்சக்கணக்கான இளைஞர்கள் தங்களது எதிர்காலத்தை துச்சமென எண்ணி போராட்டத்தில் இறங்கியதால்தான் அன்றைக்கு மத்திய, மாநில அரசுகள் இறங்கிவந்தன. அன்று அந்த போராட்டம் நடக்கவில்லை என்றால், இன்று இந்த சட்டமும் இல்லை. கட்சிகள் அதற்கு சொந்தம் கொண்டாடுவதற்கான வாய்ப்பும் இல்லை..தமிழ் இனத்தின் போராட்டம்!ஜல்லிக்கட்டு போராட்டம் நடந்து ஆறு ஆண்டுகளாகிவிட்டன அதை தமிழ் மக்களே மறந்துவிட்டார்கள். அதேசமயம் இன்றளவும் 1960களில் அரங்கேறிய இந்தி எதிர்ப்பு போராட்டம் குறித்து திராவிட கட்சிகள் வருடத்திற்கு ஓரிரு முறையாவது மக்களுக்கு நினைவுறுத்துகின்றன. ஜல்லிக்கட்டு போராட்டம் அப்படியல்ல... அந்த போராட்டத்திற்கு அரசியல் தலைமைகள் இருக்கவில்லை. சொல்லப்போனால், போராட்டத்தை முன்னெடுத்த இளைஞர்கள், தங்களது முயற்சியில் அரசியல் பங்களிப்போ குறுக்கீடோ இருக்கக் கூடாது என்பதை செயல்படுத்தி காட்டினர். வைகோ, திருமா உள்ளிட்ட அரசியல் தலைவர்களை மெரினாவில் இருந்து ஒரு போட்டோ கூட எடுத்துக்கொள்ள அனுமதிக்காமல் திருப்பி அனுப்பினர்.கட்சி அரசியலுக்கு அப்பாற்பட்ட தமிழ் இனத்தின் போராட்டமாகவே அந்த போராட்டம் நடைபெற்றது. தங்களது சொந்த விருப்பு - வெறுப்புகள், மதம், சாதி, சித்தாந்தம் ஆகியவற்றை ஒதுக்கி வைத்துவிட்டு, ஒன்றாக களத்தில் இறங்கினர். தமிழினத்தின் போராட்டத்தை இலங்கை தமிழரின் இனப்பிரச்னையின் ஒரு பகுதியாக மாற்ற நினைத்தவர்களுக்கும் இடம் கொடுக்கவில்லை. போராட்டக் களத்தில் சுயநலத்திற்கும், சுயவிளம்பரத்திற்கும் இடம் இருக்கவே இல்லை. வன்முறைக்கு வேலை இல்லை.காந்திஜியின் சுதந்திர போராட்டம் தொடங்கி தமிழ் நாட்டில் இந்தி எதிர்ப்பு போராட்டம் (1965) அஸ்ஸாம் மாநிலத்தில் மாணவர் போரட்டம் (1979), தலைநகர் டெல்லியில் சமூக ஆர்வலர் அன்னா ஹசாரே தலைமையில் ஊழலுக்கு எதிரான போராட்டம் (2011) பெண்கள் பாதுகாப்பிற்கான மாணவர்களின் நிர்பயா போராட்டம் (2013) உள்ளிட்ட எதுவுமே ஜல்லிக்கட்டு போராட்டத்திற்கு நிகராகாது. காரணம், மேற்கண்டவற்றில் அரசியல் கலப்பு இருந்தது அல்லது அதன் தலைவர்களில் சிலர் கடைசியில் அரசியலில் தஞ்சமடைந்தனர். அன்னா ஹசாரேயின் போராட்டத்தில் முன்னணியில் நின்றவர்களில் ஒருவர்தான், தற்போதைய டெல்லி முதல்வர் அரவிந்த் கெஜ்ரிவால். அவருக்கு தோள் கொடுத்து நின்ற கிரண் பேடி. பா.ஜ.கவில் ஐக்கியமாகி, புதுச்சேரி துணைநிலை ஆளுநரானார்.காந்தியின் போராட்டத்தில் வன்முறை இருக்கவில்லை. ஆனால் அரசியல் இருந்தது. இந்தி எதிர்ப்பு போராட்டத்தின் ’மொழிப் போர் தியாகி’களை தொடர்ந்து நினைவுகூரும் எவருமே, அந்த போராட்டத்தில் திருப்பூரில் இரண்டு காவல்துறை அதிகாரிகள் உயிருடன் எரித்துக்கொல்லப்பட்டதை எண்ணிப் பார்ப்பதில்லை. ஈரோட்டில் சிறுபான்மை இனத்தவரான ஒரு போலீஸ் அதிகாரி, தண்ணீரில் மூழ்கடித்து கொல்லப்பட்டதை நினைத்துப் பார்ப்பதில்லை. அந்த வகையில், மெரினாவில் ஒரு வன்முறைக்கு வித்திட்டபோது அழைப்பாளர்கள், தங்களது போராட்டத்தை அமைதியாக, வெற்றிகரமாக முடித்துக்கொண்டனர். வன்முறையாளர்களின் குறி, அடுத்த நாள் காந்தி சிலை முன்னர் குடியரசு தின விழா அணிவகுப்பு மரியாதை கொண்டாட்டங்களை நடைபெறாமல் தடுப்பதுதான். அவர்களைதான் காவல்துறை பதம்பார்த்தது. அதற்கு இவ்வாறு கவனமாக செயல்பட்டதில் போராட்டத் தலைவர்களின் ஆளுமையும், அறிவுகூர்மையும், நாட்டுப்பற்றும் வெளிப்பட்டன. குறிப்பாக, பா.ஜ.க தலைவர்களும், ஆதரவாளர்களும் போராட்டகாரர்களை தேசவிரோதிகள் என்று பச்சைக்குத்த நினைத்தது, நிறைவேறாமல் போனது. அதுபோன்றே, இன்றளவும் தங்களை முன்னிலைப்படுத்திக்கொள்ளாமல், பெருமை அடித்துக்கொள்ளாமல் காணாமல் போய்விட்டதிலேயே, போராட்டக்காரர்களின் தன்னலமற்ற தன்மையும் தெளிவாகிறது..மாற்றாந்தாய் மனப்பான்மை!ஒவ்வோர் ஆண்டும் பொங்கல் திருவிழாவிற்கு சில வாரங்களுக்கு முன்னர், கிடப்பில் போட்டுவைத்த ஜல்லிக்கட்டு வழக்கை தூசிதட்டி எடுத்து, அந்த வீரவிளையாட்டை ஏதோ தெய்வக்குற்றம் போல மட்டம் தட்டி, பின்னர் உச்ச நீதிமன்றம் அந்த ஆண்டுக்கு மட்டும் அனுமதி கொடுப்பது வாடிக்கையாக இருந்தது. குறிப்பாக, கிராமங்களில் இருந்து நகரங்களுக்கு குடிபெயர்ந்த லட்சக்கணக்கான இளைஞர்களின் இனமானத்தை தட்டி பறித்தது. இதுபோன்றே, தமிழ் உணர்வுடன் ஒட்டி உறவாடும் காவிரி நீர் பிரச்னை. ஐந்து தசாம்சங்களாக மாறிமாறி வந்த மத்திய அரசுகளின் மாற்றாந்தாய் மனப்பான்மை, உச்ச நீதிமன்றத்தின் போக்கு ஆகியவை விவசாய பின்னணியிலிருந்து வந்த, புதிய தலைமுறை இளைஞர்களை குமுற வைத்தது. குறிப்பாக, 2016 அக்டோபர் மாதம் உச்ச நீதிமன்றத்தில் அடுத்தடுத்து இரண்டு நாட்களில் மோடி அரசு எடுத்த தலைகீழ் நிலைப்பாடு தமிழர்களையும், தமிழ்நாட்டையும் எள்ளி நகையாடியது.முதல் நாள் வழக்கில், ’நதி நீர் ஆணையத்தின் முடிவை உச்ச நீதிமன்றம் விசாரித்து முடிவு எடுக்க வேண்டும்’ என்று மத்திய அரசும் கோரிக்கை விடுத்தது. ஆனால் மறுநாளே, ‘மத்தியில் நரசிம்ம ராவ் அரசால் நியமிக்கப்பட்ட நதி நீர் ஆணையத்தின் முடிவில் தலையிடுவதற்கு உச்ச நீதிமன்றத்திற்கே உரிமை இல்லை’ என்று மத்திய அரசு வாதிட்டது. காரணம், அடுத்த 2017ம் ஆண்டு நடக்கவிருந்த கர்நாடகா சட்டப்பேரவை தேர்தலும், அதில் பா.ஜ.க-வின் வெற்றி வாய்ப்பும்தான்.இதற்கெல்லாம் கையைப் பிசைந்துகொண்டு மக்களிடம் சப்பைகட்டு கட்டுவதை தவிர, அன்றைய அ.தி.மு.க அரசால் எதுவும் செய்யமுடியவில்லை. இதுவும் பா.ஜ.க சார்ந்த கூட்டணி அரசியலே. அன்று மத்திய, மாநில அரசுகளால் கைவிடப்பட்ட மக்களின் இயலாமையை உணர்ந்து செயல்படும் நிலையில் ஆட்சியாளர்கள் இல்லை. இதுவும் சேர்ந்தே பூதாகரமாக உருவெடுத்து ஜல்லிக்கட்டு போராட்டமாக வெடித்தது.கலாசார குறியீடு!தற்போது ஜல்லிக்கட்டு விளையாட்டை பாதுகாப்புகளுடன் நடத்துவதற்கான மாநில அரசின் சட்டத்திற்கு உச்ச நீதிமன்றம் ஒப்புதல் அளித்துள்ளது. மேலும், ’ஜல்லிக்கட்டு தமிழ் இனத்தின் பாரம்பரிய விளையாட்டு மற்றும் கலாசார குறியீடு என்பது இன்னமும் ஆராய்ந்து அறியப்பட வேண்டிய விஷயம்’ என்றும் நீதிமன்றம் கூறி உள்ளது. இது மாநில அரசும் அதன் மூத்த வழக்கறிஞர்களும் ஜல்லிக்கட்டு குறித்து இன்னமும் முழுவதும் படித்து அறிந்திருக்கவில்லை என்பதையே காட்டுகிறது.ஜல்லிக்கட்டு அல்லது எருது தழுவுதல் என்று அறியப்படும் வீர விளையாட்டு குறித்து சங்க இலக்கியங்களான கலித்தொகை மற்றும் பொருநராற்றுப்படை ஆகிய நூல்களில் குறிப்புகள் உள்ளன. கலித்தொகையின் ஒரு பகுதியான முல்லை-கலியில் எருது தழுவுதல், 350 அடிகளில் செய்யுளாக விளக்கப்பட்டுள்ளது.பிற்காலத்தில் 14ம் நூற்றாண்டில், நச்சினார்கினியார் என்ற உரையாசிரியர், தனது காலத்திலும் ஜல்லிக்கட்டு பழக்கத்தில் இருந்தது என்பதை குறிப்பிடுகிறார். 15ம் நூற்றாண்டை சேர்ந்த ஜல்லிக்கட்டு கற்சிற்பம் இன்றளவும் மதுரை அருங்காட்சியகத்தில் உள்ளது. இரண்டாயிரம் வருடங்கள் பழமை உள்ள சங்க இலக்கியங்கள் பாடும் ஒரு கலை, தமிழர்களின் கலாசார குறியீடு இல்லை என்றால், வேறு எதுதான் அவ்வாறு இருக்க முடியும்? இது குறித்து பின்னொரு காலத்தில், யாராவது பிரச்னையை கிளப்பும் முன்னர், தமிழக அரசே, இவற்றை துறைசார் அறிஞர்களின் உதவியுடன் ஆவணப்படுத்தி, ஆதாரப்பூர்வமாக வெளியிட வேண்டும்.

இது இளைஞர்களின் வெற்றி!

Related Stories