சுற்றிவளைத்த என்.ஐ.ஏ. டார்கெட் 2047 - ஐ.எஸ்.ஐ.எஸ் காலிபா...

தமிழகத்தில் மீண்டும் தடதடக்கின்றன என்.ஐ.ஏ-வின் அதிரடி ரெய்டுகள். பாப்புலர் ஃப்ரன்ட் ஆஃப் இந்தியா தடை செய்யப்பட்ட பிறகு அதன் நிழல் அமைப்பு தொடங்கப்பட்டு, இந்து மதத் தலைவர்களை கொலை செய்ய திட்டமிட்டதை என்.ஐ.ஏ கண்டுபிடித்ததே இந்த ரெய்டுக்கு காரணம் என்று படபடக்கிறார்கள் அதிகாரிகள்!இதுகுறித்து நம்மிடம் விரிவாக பேசினார் என்.ஐ.ஏ அமைப்பின் டாப் ரேங்க் அதிகாரி ஒருவர்... “பி.எஃப்.ஐ-யை சேர்ந்த முக்கிய புள்ளிகளுக்கு இந்திய அரசு அந்த அமைப்பை தடை செய்யப் போவது முன்பே தெரிந்துவிட்டது. கடந்த 2022, செப்டம்பர் மாதம் அந்த அமைப்பு தடை செய்வதற்கு முன்பே, ‘ஷேடோ’ இயக்கம் ஒன்றை அவர்கள் உருவாக்கிவிட்டனர். பி.எஃப்.ஐ- ன் நோக்கம், 2047ம் ஆண்டில் இந்தியாவில் ‘ஐ.எஸ்.ஐ.எஸ் காலிஃபா’வை உருவாக்கிவிட வேண்டும் என்பதே. அந்த அஜெண்டாவை அடைவதற்கு அவர்கள் ஒரு ஸ்கெட்ச் போட்டுள்ளனர். அதன்படி முதலில், ‘இந்துத்துவா’பேசும் பா.ஜ.க தலைவர்கள், இந்து இயக்கத் தலைவர்கள், பிரபல மடங்களின் சந்நியாசிகளைத் தேர்ந்தெடுத்து அவர்களை கொலை செய்ய வேண்டும்..அடுத்து, இஸ்லாமிய இளைஞர்களை மூளைச் சலவை செய்து, அவர்களை வெளிநாடுகளுக்கு வேலைக்கு அனுப்புவதுபோல, ஐ.எஸ்.ஐ.எஸ் முகாம்களில் பயிற்சி எடுக்க அனுப்புவது. அவர்கள் திரும்பி வந்ததும், நாட்டில் பல்வேறு இடங்களில், பயங்கரவாதத் தாக்குதலில் ஈடுபட வைப்பது. அடுத்து, மத்திய கிழக்கு நாடுகளில் உள்ளது போன்ற நிலையை இந்தியாவில் உருவாக்குவது. அதாவது உள்நாட்டு கலவரத்தை ஏற்படுத்தி, அரசாங்கத்தை கவிழ்த்து, பயங்கரவாதிகள் ஆட்சியைப் பிடிப்பதுபோல, இந்தியாவில், இஸ்லாமிய - இந்து கலவரத்தைத் தூண்டி, நாடு முழுவதும் சட்டம் ஒழுங்கைச் சீர்குலைத்து, பிறகு அரசாங்கத்தையும் கவிழ்க்க வேண்டும்.ஆனால், இவை எல்லாம் சுலபமான காரியம் கிடையாது. அதனால்தான் இந்த திட்டத்திற்கான ‘டைம் லைனை’2047-ம் ஆண்டு என்று டார்கெட் நிர்ணயித்துள்ளனர். பி.எஃப்.ஐ தடை செய்யப்பட்டதிலிருந்தே அந்த அமைப்பினரை நாங்கள் வாட்ச் செய்து வந்தோம். அப்போதுதான், ஷேடோ இயக்கம் ஒன்று செயல்பட்டு வருவதும் அதற்குப் பின்புலத்தில் இந்தத் திட்டங்கள் இருப்பதும் தெரியவந்தது.இதையடுத்தே சரியான சந்தர்ப்பத்திற்கு காத்திருந்து, தற்போது ரெய்டு நடத்தப்பட்டுள்ளது. மதுரை, தேனி, திண்டுக்கல், சென்னை ஆகிய பகுதிகளில் பி.எஃப்.ஐ அமைப்பினருடன் தொடர்புடைய இடங்களில் சோதனைகள் நடைபெற்றன. இதில் சென்னையைச் சேர்ந்த அப்துல் ரசாக் வீட்டில் சோதனை நடத்தியபோது பயங்கரவாதத்தைத் தூண்டும் வகையிலான புத்தகங்கள் மற்றும் சி.டிக்கள் சிக்கின. மதுரையிலுள்ள வழக்கறிஞர் முகமது அப்பாஸ், திண்டுக்கல் கிஸர் மற்றும் தேனியைச் சேர்ந்த சாதிக் அலி ஆகியோர் வீடுகளிலும் சோதனை நடந்தது..அப்போது முகமது அப்பாஸின் அண்ணன் சையது அபுதாஹிருக்குச் சொந்தமான தோட்டத்தில் பட்டாக் கத்திகள், குத்துவாள், கோடரி போன்றவை கைப்பற்றப்பட்டன. இவற்றை விவசாயத்திற்குப் பயன்படுத்தும் கருவிகளைப் போல ஒளித்துவைத்திருந்தாலும், உண்மையில், இந்தக் குழுவினருக்கு கத்தி, கோடரிகளில்தான் பயிற்சி அளிக்கப்படுகிறது. ஒரு டார்கெட் நபரை, எப்படிச் சுற்றி வளைக்க வேண்டும், அவர் தப்பிக்காமல் இருக்க, காலில் எந்த நரம்பை வெட்ட வேண்டும், உடனடியாகக் கொல்ல எங்கே வெட்ட வேண்டும் என்றெல்லாம் பயிற்சி அளிப்பது, இந்த அமைப்பினரின் வழக்கமாக உள்ளது.இந்த ஆயுதங்களை நாச வேலைக்குப் பயன்படுத்துவது உறுதி செய்யப்பட்டதை அடுத்தே அப்துல் ரசாக், முகமது அப்பாஸ், முகமது யூசுஃப், கிஸர் மற்றும் எஸ்.டி.பி.ஐ கட்சியின் மண்டலத் தலைவர் சாதிக் அலி ஆகிய ஐவரும் கைது செய்யப்பட்டுள்ளனர். அவர்களிடம் தொடர்ந்து விசாரணை நடத்தப்பட உள்ளது. பி.எஃப்.ஐ அமைப்பினர் சிலர் எஸ்.டி.பி.ஐ கட்சியிலும் உறுப்பினர்களாக உள்ளனர். விரைவில் அவர்களிடமும் விசாரணை நடத்த வாய்ப்பு உள்ளது. அடுத்தடுத்த விசாரணைகளின் முடிவில், அவர்களது ஹிட் லிஸ்டில் இருப்பவர்கள் யார் யார்? அவர்களின் மற்ற திட்டங்கள் என்ன என்பது போன்ற தகவல்கள் தெரியவரும்” என்று சொல்லி முடித்தார்.இந்த விவகாரம் தொடர்பாக எஸ்.டி.பி.ஐ கட்சியின் முன்னாள் மாநிலத்தலைவரும், தேசிய பொதுக்குழு உறுப்பினருமான தெகலான் பாகவியிடம் கேட்டபோது, ”அடிப்படை ஆதாரமே இல்லாமல் ஓர் இயக்கம் தடை செய்யப்பட்டுள்ளது. அந்தத் தடையை நியாயப்படுத்தும் விதமாகவே தற்போது ரெய்டுகளை நடத்தி வருகின்றனர். தடை செய்யப்பட்ட அமைப்பைச் சேர்ந்தவர்களை கைது செய்வதோ, விசாரணை நடத்துவதோ கூட பிரச்சனை இல்லை. ஆனால் கூடவே முகமது அப்பாஸ் மற்றும் முகமது யூசுஃப் ஆகிய இரண்டு வழக்கறிஞர்களையும் கைது செய்துள்ளனர்.இருவருமே தடை செய்யப்பட்ட பி.எஃப்.ஐ அமைப்பைச் சேர்ந்தவர்கள் கிடையாது. மாறாக பி.எஃப்.ஐ அமைப்பைச் சேர்ந்தவர்களுக்கு சட்ட உதவி அளித்துவந்தவர்கள். நீதிமன்றத்தில் அவர்கள் சிறப்பாக வாதாடி, பி.எஃப்.ஐ அமைப்பினருக்கு ஆதரவாகச் செயல்படுவதைத் தடுப்பதற்காகவே கைது செய்யப்பட்டுள்ளனர். இது முழுக்க முழுக்க சிறுபான்மையினர் விரோதச் செயலாகும். எஸ்.டி.பி.ஐ-யை பொருத்தவரை இது தேர்தல் ஆணையத்தால் அங்கீகரிக்கப்பட்ட ஒரு கட்சி. எங்கள் நிர்வாகிகளை விசாரிக்க வேண்டும் என்றால் தாராளமாக செய்து கொள்ளட்டும்” என்று முடித்தார்.பயங்கரவாதத்தைக் கட்டுப்படுத்துவதில் மதவாதம் தலைதூக்காமல் இருந்தால் சரிதான்! - அபிநவ்

சுற்றிவளைத்த என்.ஐ.ஏ. டார்கெட் 2047 - ஐ.எஸ்.ஐ.எஸ் காலிபா...

Related Stories