காதலிக்க மறுத்த சிறுமி... ஓடும் காரில் நடந்த பயங்கரம்!

பாலியல் வன்கொடுமைகளுக்கு எதிராக கடுமையான சட்டங்கள் வந்தாலும், குற்றவாளிகளின் எண்ணிக்கை குறைவதாக இல்லை. தேசிய குற்ற ஆவணக் காப்பகத்தின் புள்ளிவிவரங்களும் அதையே சொல்கின்றன. அதிலும், அரக்கோணத்தில் ஓடும் காரில் சிறுமி ஒருவருக்கு நடந்த கூட்டு பாலியல் வன்கொடுமை, நெஞ்சைப் பதறவைக்கும் கொடூரம்.``என்ன நடந்தது?" என நெமிலி காவல்நிலைய போலீஸாரிடம் கேட்டோம். “அரக்கோணம் தாலுகா திருமால்பூர் பகுதியை சேர்ந்த 15 வயது சிறுமி, அரசுப் பள்ளியில் பத்தாம் வகுப்பு படிக்கிறார். செப்டம்பர் 11ம் தேதி ஸ்கூலுக்கு போய்விட்டு வந்தவர், அருகில் இருக்கும் கடையில் நோட்டு, பேனா வாங்கச் சென்றுள்ளார். அப்போது, அதே பகுதியைச் சேர்ந்த எம்.சதீஷ், கே.சதீஷ் ஆகிய இருவரும் சிறுமியை சீண்டியுள்ளனர். அதைக் கண்டுகொள்ளாமல் சிறுமி சென்றிருக்கிறார். இதனால் கோபமான அவர்கள் இருவரும், சிறுமியை அடித்து உதைத்து காரில் கடத்திச் சென்றுள்ளனர்..அதன்பிறகு காருக்குள் வைத்து சிறுமியை பாலியல் வன்கொடுமை செய்துள்ளனர். இரவு முழுக்கவே ஓடும் காரில் வைத்து சிறுமிக்கு தொல்லை கொடுத்துள்ளனர். மறுநாள் மதியம் ஒன்றரை மணியளவில் பள்ளூர் ரயில்நிலையத்தில் சிறுமியை இறக்கிவிட்டுச் சென்றுவிட்டனர். எப்படியோ பேருந்தில் ஏறி வீடு வந்துசேர்ந்துள்ளார், சிறுமி. மகளின் நிலையைப் பார்த்து பதறிய பெற்றோர், காவல்நிலையத்துக்கு வந்து அழுதபடியே புகார் கொடுத்தனர். நெமிலி போலீஸ் இன்ஸ்பெக்டர் லட்சுமிபதி, வழக்கைப் பதிவு செய்தார்” என்றனர்.இந்தச் சம்பவம் குறித்துப் பேசும் சமூக ஆர்வலர் ஒருவர், `` பரபரப்பான இடத்தில் இப்படியொரு சம்பவம் நடந்திருக்கிறது. இதற்குக் காரணம், இங்கே 24 மணிநேரமும் போதை வஸ்துகள் கிடைப்பதுதான். இதனைக் கண்காணித்து நடவடிக்கை எடுக்க வேண்டிய காவல்துறையும் அமைதியாக இருக்கிறது” என்கிறார், கொதிப்புடன்..தற்போது அரும்பாறை அரசு மருத்துவமனையில் சிகிச்சையில் இருக்கிறார், சிறுமி. அவரின் பெற்றோர் பேசத் தயாராக இல்லாததால், நெமிலி காவல்நிலைய பொறுப்பு எஸ்.ஐ அஞ்சுகம் பாரதியிடம் பேசினோம். “இந்த வழக்கில் கைதானவர்கள் மீது போக்சோ பிரிவில் வழக்குகள் பதிவு செய்யப்பட்டுள்ளன. அவர்கள் சிறையில் அடைக்கப்பட்டுள்ளனர். எம்.சதீஷ் என்பவன், அந்தப் பெண்ணை காதலிப்பதாகச் சொல்லியிருக்கிறான். ஆனால், சிறுமி ஒப்புக்கொள்ளாததால் இப்படிச் செய்துள்ளான். அந்தச் சிறுமி வாய்திறந்து பேசவே நடுங்குகிறார். மருத்துவ அறிக்கை வந்த பின்னர்தான் பல உண்மைகள் தெரியவரும்” என்றார்..இந்தநிலையில், ``எங்கள் மகள் கிடைத்துவிட்டாள். வழக்கை வாபஸ் வாங்கிக் கொள்கிறோம்" என பெற்றோர் கூறிவிட்டனர். இதனை ஏற்காத போலீஸார், ‘யார் மிரட்டலுக்கோ பயந்து வாபஸ் வாங்குவது சரியல்ல. இது போக்சோ வழக்கு. மனித உரிமை ஆணையம் உள்பட பல பிரச்னைகள் வரலாம்' என அறிவுறுத்தி அனுப்பியுள்ளனர்.பயந்துகொண்டே போனால், பாலியல் குற்றவாளிகளை யார் தண்டிப்பது? -அன்பு வேலாயுதம்