இலவச ரேஷன் அரிசி இனி இல்லையா? மாநில அரசுக்குக் கைவிரிக்கும் மத்திய அரசு!

ஏழை எளிய அன்றாடங்காய்ச்சிகளுக்கு ஒருவேளை கஞ்சியாகவாவது வயிற்றை நிரப்பிவரும் ரேஷன் அரிசிக்கும் ஆப்பு வைக்கப்போகிறது, மத்திய அரசின் திடுக் அறிவிப்பு! ஆம், மாநிலங்களுக்கு விநியோகிக்கப்பட்டு வரும் மானிய விலையிலான அரிசி, கோதுமையை நிறுத்தப்போவதாக வெளியிட்டிருக்கும் அறிவிப்பால், தமிழக அரசுக்கு ஏற்பட்டிருக்கிறது புது தலைவலி!2006- சட்டமன்றத் தேர்தலின் போது 2 ரூபாய்க்கு 1 கிலோ அரிசி வாக்குறுதியே தி.மு.க. ஆட்சி அமையக் காரணமாக இருந்தது. அடுத்து நடந்த 2011- சட்டமன்றத் தேர்தலில் விலையில்லா 20 கிலோ அரிசி வாக்குறுதி, அ.தி.மு.க. ஆட்சியைப் பிடிக்க முக்கியப் பங்கு வகித்தது. இதுபோன்ற திட்டங்களுக்கு செக் வைக்கும் வகையில்தான், மாநிலங்களுக்கு குறைந்த விலையில் வழங்கி வந்த அரிசியை நிறுத்தப்போவதாக மத்திய அரசு அறிவித்துள்ளது..இது குறித்து தமிழ்நாடு கூட்டுறவு ஊழியர் சம்மேளன தலைவர் ஏ.கிருஷ்ணமூர்த்தியிடம் பேசினோம். “தமிழகத்தைப் பொறுத்தவரை ஐந்து வகையான ரேஷன் அட்டைகள் உள்ளன. மொத்தம் 2 கோடியே 23 லட்சத்து 52 ஆயிரத்து 873 ரேஷன் அட்டைதாரர்கள் உள்ளனர். இதில் 2 கோடியே 20 லட்சம் குடும்ப அட்டைதாரர்களுக்கு இலவச அரிசி வழங்கப்படுகிறது. மாதந்தோறும் இந்த குடும்ப அட்டைகளுக்கு 3 லட்சத்து 40 ஆயிரம் மெட்ரிக் டன் அரிசி தேவை. அதில், அந்தியோதயா பிரிவு அட்டைகளுக்கு தேவைப்படும் 2 லட்சம் டன்அரிசியை இலவசமாக கொடுக்கும் மத்திய அரசு, வறுமைக் கோட்டுக்கு கீழுள்ள குடும்ப அட்டைகளுக்கான 93 ஆயிரம் டன் அரிசியை 1 கிலோ 8 ரூபாய் 30 காசுக்கும், வறுமைக் கோட்டுக்கு மேலுள்ள குடும்ப அட்டைகளுக்கான 47 ஆயிரம் டன் அரிசியை கிலோ 35 ரூபாய் 40 காசுக்கும் வழங்குகிறது..இந்த அரிசியை மத்திய அரசுக்குச் சொந்தமான தேசிய உணவுப் பாதுகாப்புத் திட்டத்தின் கீழ் மலிவு விலையில் வாங்கிவருகிறது தமிழக அரசு. இந்தியா முழுவதும் வெளிச்சந்தையில் கடந்த சில வாரங்களாக அரிசி மற்றும் கோதுமை விலை கடுமையாக அதிகரித்து வரும் நிலையில், விலை உயர்வைக் கட்டுப்படுத்தும் நோக்கத்துடன், வெளிச்சந்தை விற்பனை முறையில் தனியாருக்கு அதிக அளவில் அரிசி மற்றும் கோதுமையை வழங்கமத்திய அரசு முடிவு செய்திருக்கிறது. அதை ஈடு செய்யவே மாநிலங்களுக்கு அரிசி மற்றும் கோதுமை வழங்குவதைநிறுத்துவதாக மத்திய அரசு அறிவித்திருக்கிறது.இதனால், தமிழ்நாட்டிற்கு ஆண்டுக்கு 24 கோடி கிலோ அரிசி பற்றாக்குறை ஏற்படும். சராசரியாக 10 லட்சம் முதல் 12 லட்சம் குடும்பங்களுக்கு இலவச அரிசி வழங்க முடியாத நிலை ஏற்படும். மாநில அரசுகளுக்கான ஒதுக்கீடு ஒரு லட்சம் டன் குறையும் போது, அதை சம்பந்தப்பட்ட மாநில அரசுகள் வெளிச்சந்தையிலிருந்துதான் வாங்க வேண்டும். அப்போது வெளிச்சந்தையில் தானாகவே அரிசியின் தேவை அதிகரித்து, விலையும் கணிசமாக உயரும். அதிக விலைக்கு அரிசி வாங்குவதால், மாநில அரசுகளுக்கு நிதி நெருக்கடி ஏற்படும். வெளிச்சந்தையில் அரிசி வாங்க முடியவில்லை என்றால் இலவச அரிசி வழங்க முடியாது..இந்தியாவிலேயே பொதுவிநியோக திட்டத்தை சிறப்பாக செயல்படுத்தி வரும் மாநிலமாக தமிழகம் விளங்குகிறது. விலையில்லா அரிசி மட்டுமல்லாது, கோதுமை, பருப்பு வகைகள், பாமாயில், சர்க்கரை உள்ளிட்ட பொருட்கள் குறைந்த விலையில் குடும்ப அட்டைதாரர்களுக்கு வழங்கப்படுகிறது. இந்த உணவுப் பொருட்களை ரேஷன் அட்டைதாரர்களுக்கு வழங்க சிறப்பு மானிய தொகையை தமிழக அரசு ஆண்டுதோறும் ஒதுக்கி வருகிறது.ஏற்கெனவே நிதிச்சுமையில் சிக்கித் தவிக்கும் தமிழக அரசு, விலையில்லா அரிசி திட்டத்திற்கு மாதந்தோறும் மத்திய அரசு ஒதுக்கி வந்த 2 லட்சம் மெட்ரிக் டன் அரிசியை நிறுத்திவிட்டதால், வெளிச்சந்தையில் விலை கொடுத்து வாங்க வேண்டியிருக்கும். தற்போதைய நிதிச்சுமையில் இது சாத்தியமா என்பது தெரியவில்லை” என்றார் கவலையுடன்.இதுகுறித்து உணவுத்துறை அமைச்சர் சக்கரபாணியிடம் கேட்டோம். “ரேஷன் அட்டைதாரர்களுக்கு மட்டுமல்லாது, பள்ளி மாணவர்களுக்கான சத்துணவுத் திட்டம், அம்மா உணவகங்களுக்குத் தேவையான அரிசியையும் மத்திய அரசின் உணவுப் பாதுகாப்பு திட்டத்தின் கீழ் 35 ரூபாய் 40 காசுக்கு வாங்கி வருகிறோம். அதேபோன்று ரேஷன் கடைகளுக்கான கோதுமை அளவையும் குறைத்துவிட்ட மத்திய அரசு, 15 ஆயிரம் டன் கோதுமையையும் வெளிச்சந்தையில் இருந்து வாங்க வேண்டிய நிலைக்குத் தள்ளியுள்ளது. இந்த விவகாரம் குறித்து ஆலோசித்து வருகிறோம். எந்த நிலையிலும் விலையில்லா அரிசி வழங்கும் திட்டம் நிறுத்தப்படாது” என்றார் உறுதியுடன். பாமரரின் பசிக்கு பங்கமில்லாமல் உணவு கிடைக்கட்டும்! -ரய்யான் பாபு