காலை உணவுத் திட்டம்… அட்சயப் பாத்திரமா, வசூல் பாத்திரமா?

மாணவர்களின் காலை நேர பசிப்பிணியைப் போக்குவதற்காக அட்சயப் பாத்திரம் போன்று கொண்டுவரப்பட்டதுதான் தொடக்கப் பள்ளி மாணவர்களுக்கான காலை உணவுத் திட்டம். ஆனால், அந்த அட்சயப் பாத்திரத்தை அடித்துப் பிடுங்கும் வசூல் பாத்திரமாக சிலர் மாற்றிவிட்டதுதான் அதிர்ச்சி!மாணவர்களுக்கு காலை உணவு திட்டத்தை தொடங்க வேண்டும் என்பது கல்வியாளர்களின் பல்லாண்டு கோரிக்கை. 2018-ல் அன்றைய முதல்வர் ஜெயலலிதா இதை அமல்படுத்தினாலும், தொடர்ந்து நடத்தவில்லை. பிறகு கடந்த செப்டம்பர் மாதம் முதல்வர் ஸ்டாலின் இந்தத் திட்டத்தை தொடங்கிவைத்தார். முதல்கட்டமாக 1, 545 பள்ளிகளில் மட்டுமே செயல்படுத்தப்பட்ட இந்தத் திட்டம், 2023-2024 கல்வியாண்டு முதல் அனைத்து அரசு தொடக்கப் பள்ளிகளுக்கு விரிவாக்கம் செய்யப்படுகிறது. இப்படியான சூழலில்தான் இந்தத் திட்டத்தில் பெண்களை வேலைக்கு தேர்வு செய்வதில் வசூல் நடப்பதாக புகார் எழுந்துள்ளது..இதுபற்றி விவரமறிந்த சிலர் நம்மிடம், “இந்த திட்டத்தில் பெண்களை நியமிப்பதற்காக அரசு சில விதிமுறைகளை வகுத்துள்ளது. ஒரு பள்ளிக்கு மூன்று பெண் பணியாளர்களை தேர்வு செய்ய வேண்டும். அவர்கள், அந்தப் பகுதியில் உள்ள மகளிர் சுய உதவிக் குழுவில் குறைந்தது மூன்று ஆண்டுகளாவது உறுப்பினராக இருக்க வேண்டும். அத்துடன் அவர்கள் பணிபுரியவிருக்கும் பள்ளியில் அவர்களுடைய குழந்தை படிக்க வேண்டும்.ஆனால், இந்த விதிமுறைகளை காற்றில் பறக்கவிட்டுவிட்டார்கள். அரசியல் கட்சி பிரமுகர்கள், எம்.எல்.ஏ-க்களின் சிபாரிசு கடிதங்களோடு பலரும் முற்றுகையிடுகிறார்கள். இதைப் பயன்படுத்தி, ஒரு பணியிடத்துக்கு 50 ஆயிரம் ரூபாய் வசூலிக்கிறார்கள்” என்றார்கள்.சமூக ஆர்வலரும் உயர் நீதிமன்ற வழக்கறிஞருமான ரவி, “ஒரு பள்ளியில் பணிபுரியும் மூன்று பெண்களுக்குமே சேர்த்து மொத்த சம்பளமே ஐந்தாயிரம் ரூபாய்தான். இதற்கு ஆயிரத்தெட்டு விதிமுறைகள். அதை வைத்து இப்போது கல்லாவும் கட்டுகிறார்கள். அப்படி வருபவர்கள் எப்படிப் பொறுப்புடன் சமைப்பார்கள்? குழந்தைகளுக்கு உணவு தரும் விஷயத்தில் பொறுப்பில்லாமல் விளையாடலாமா? அலட்சியமாக சமையல் செய்து, குழந்தைகளுக்கு உடல்நலக் கோளாறு ஏற்பட்டால் என்ன ஆவது?” என்றார் ஆதங்கத்துடன்..சமூக ஆர்வலர் மனோகரன், “இந்தத் திட்டத்துக்கு பெண்களை தேர்வு செய்ய தர்மபுரி மாவட்டத்தில் ஒரு கமிட்டி போட்டுள்ளனர். கண்துடைப்பு கமிட்டி அது. ஒவ்வொரு ஒன்றியத்திலும் ஆளுங்கட்சியைச் சேர்ந்த ஒன்றியச் செயலாளர்கள்தான் ஆட்களைத் தேர்வு செய்கின்றனர். அரூர் ஒன்றியத்தில் 34 பஞ்சாயத்துகளில் 140 பள்ளிகள் உள்ளன. ஒன்றியச் செயலாளர்கள் 25 ஆயிரம் முதல் 50 ஆயிரம் வரை வசூல் செய்து கொண்டு, கட்சி லெட்டர் பேடு கொடுத்து அனுப்பினால் அதனை அப்படியே ஏற்றுக்கொள்கின்றனர்” என்றார் காட்டமாக..அரூர் வட்டார மகளிர் திட்ட ஒருங்கிணைப்பாளர் அறிவழகனிடம்பேசினோம். “தேர்வு செய்யப்பட்டவர்களை அழைத்து சான்றிதழ் ஆய்வு செய்கிறோம். சமையல் செய்யச் சொல்லி டெஸ்ட் வைக்கிறோம். சிபாரிசுடன் வருபவர்களிடம் அரசு விதிமுறைகளைச் சொல்லி அனுப்பி விடுகிறோம். பணம் வாங்குவது குறித்தெல்லாம் எனக்குத் தெரியாது. நாங்கள் பயிற்சி மட்டுமே கொடுக்கிறோம்” என்றார்.மாவட்ட மகளிர் திட்ட இயக்குநர் பத்ஹி முகம்மது நசீரிடம் விளக்கம் கேட்டோம். “அரசு விதிமுறைகளின் படிதான் ஆட்கள் தேர்வு நடக்கிறது” என்றார் மழுப்பலாக. குழந்தைகளின் உயிரோடு விளையாட வேண்டாம்! -பொய்கை.கோ.கிருஷ்ணா