தமிழ்நாடு முன்னேற்ற முன்னணி! பன்னீருக்கு பா.ஜ.க புது அசைன்மென்ட்!

செந்தில்பாலாஜி மீதான வழக்கில் குற்றப்பத்திரிகை தாக்கல் செய்யப்பட்ட செய்தி சேனலில் ஒளிப்பரப்பாகிக்கொண்டிருந்த வேளையில் என்ட்ரி கொடுத்த வம்பானாந்தாவுக்கு வாழைப்பழ ஐஸ்கிரீம் கொடுத்து வரவேற்றார் சிஷ்யை. “இதுதொடர்பாக உமது நிருபர் எழுதியிருக்கும் கட்டுரையை வாசித்தேன், என்னிடமும் ஒரு தகவல் உள்ளது. மேற்கண்ட வழக்கை உற்று கவனித்துவருகிறாராம் கவர்னர் ஆர்.என்.ரவி. கடந்த வாரம் டெல்லி சென்றிருந்தபோது அமித் ஷாவிடம் நேரடியாகவும் பிரதமருக்கு ஒரு முக்கிய அதிகாரி வழியாகவும் இந்த வழக்கின் போக்கு குறித்து விளக்கியிருக்கிறார் கவர்னர். அவர்களுக்கு அமலாக்கத்துறை அதிகாரிகள் தரப்பில் ரெகுலராக நோட் போடப்பட்டாலும், கவர்னர் சில புதிய தகவல்களைச் சொன்னாராம். அதேபோல தமிழகத்தில் சட்டம் ஒழுங்கு பற்றியும் விடுதலைப்புலிகள் ஆதரவாளர்கள் இங்கு பிடிபட்டதை குறிப்பிட்டும் சில முக்கிய விஷயங்களை நோட் போட்டு டெல்லி தலைமைக்கு அனுப்பியிருக்கிறாராம்.” “விவசாயி ஒருவர் கவர்னரைப் பற்றி நெகிழ்ந்திருக்கிறாரே, கவனித்தீரா?” “ஆம், திருச்சியில் இருக்கும் மத்திய அரசின் தேசிய வாழை ஆராய்ச்சி நிறுவனத்தின் சார்பில் தமிழகத்தின் வாழை விவசாயிகள், வாழை வணிகர்கள், வாழை மதிப்புகூட்டு தொழில் முனைவோர்கள், வாழை ஆராய்ச்சியாளர்கள் கலந்துகொண்ட கருத்தரங்கு ஒன்று நடைபெற்றது. இதில் சிறப்பு விருந்தினராக கவர்னர் ரவி கலந்துகொண்டார். அப்போது விவசாயி ஒருவர், ‘எனக்கு 65 வயதாகிறது. ஒரு கடைநிலை விவசாயியை நேரில் சந்தித்த முதல் ஆளுநர் நீங்கள்தான். இவ்வளவு எளிமையான அரசு பிரதிநிதி ஒருவரை என் அனுபவத்தில் பார்த்ததில்லை’ என்று நெக்குருகியிருக்கிறார்.” “டி.டி.வி.தினகரன் தரப்பு பெரும் ஸ்வீட் பாக்ஸ் ஒன்றை தேடி வருகிறதாமே?” “உன்னிடமும் விசாரித்தார்களா, பெரிய ஆள் தான் நீ” என்று சிஷ்யையைக் கலாய்த்த வம்பு, “கடந்த 2019 நாடாளுமன்றத் தேர்தலின்போது தேர்தல் வேலைகளைப் பார்த்த அன்றைய கட்சி பொருளாளர் வெற்றிவேலிடம் பட்டுவாடாவுக்காக படா ஸ்வீட் பாக்ஸ் ஒன்றை கொடுத்திருந்ததாம் கட்சி. அதில் 39 லட்டுகளை மட்டுமே விநியோகித்த வெற்றிவேல் தரப்பு, மீதத்தை அப்போதே கட்சித் தலைமையிடம் கொடுக்க முன்வந்தது. ஆனால், ‘உங்ககிட்டயே இருக்கட்டும் அண்ணே, நீங்கதான் அதை பொறுப்பா பார்த்துப்பீங்க’ என்று சொல்லிவிட்டது தலைமை. தொடர்ந்து பலமுறை வெற்றி தரப்பில் பெட்டியை தர முன்வந்தும் அப்போது பெரிதாக தேவை இல்லாததால், ‘இதோ அதோ’ என்று தட்டிக்கழித்துவிட்டதாம் தலைமை. அதன்பின்பு நடந்தவைதான் அனைவருக்கும் தெரியுமே. எதிர்பாராத வகையில் வெற்றி கொரோனாவால் இறக்க... இப்போது பெட்டி எங்கு இருக்கிறது என்கிற விவரம் அவரின் குடும்பத்தினர் உட்பட யாருக்குமே தெரியவில்லையாம். இப்போது மீண்டும் தேர்தல் செலவுகள் நெருக்கவே, வெற்றி எங்கெல்லாம் சென்றார், யாரையெல்லாம் பார்த்தார், பெட்டி எங்கு இருக்கிறது என்று இண்டு இடுக்கெல்லாம் தேடி வருகிறார்களாம்.” “தென் சென்னையில் மழை தினமும் வெளுத்துவாங்குகிறதே சுவாமி?” “நீர் எதற்கு அடி போடுகிறாய் என்பது தெரிகிறது... தென் சென்னை தொகுதியை வாங்கியே தீருவது என்கிற பா.ஜ.க முடிவில் குஷ்பு ஒரு யோசனையை சொல்லியிருக்கிறார். அதாவது, ’தென் சென்னை ஒருவேளை கிடைக்காவிட்டால், மத்திய சென்னையை வாங்குங்கள், அங்கு தி.மு.க. சார்பில் தயாநிதி மாறன் தான் போட்டியிடுவார். அவரை எதிர்த்து நான் நிற்கிறேன். ஏற்கெனவே 2019 எம்.பி தேர்தலில் மக்கள் நீதி மய்யம் சார்பாக போட்டியிட்ட கமீலா நாசர் அவரது கட்சியில் பூத் ஏஜென்ட் இல்லாத நிலையிலும் ஒன்றரை லட்சம் ஓட்டுகளை வாங்கினார். அவற்றில் பெரும்பாலும் சிறுபான்மையினர் ஓட்டுகள். நானும் முஸ்லிம்தான். என்னால் அதைவிட அதிக ஓட்டுகள் பெற்று வெற்றி பெற முடியும்’ என்று இப்போதே டெல்லி தலைமையிடம் கோரிக்கை வைத்துள்ளார். நெல்லையில் தற்போது எம்.எல்.ஏ-வாக இருக்கும் நயினார் நாகேந்திரனும் எம்.பி தேர்தலில் போட்டியிடுவார் என்று சொன்னேன் அல்லவா... அதை நமது இதழில் படித்தவர், ‘எனக்கு மத்திய இணை அமைச்சர் பதவி கொடுப்பதாக உறுதியளித்தால் மட்டுமே எம்.எல்.ஏ பதவியை ராஜினாமா செய்துவிட்டு எம்.பி தேர்தலில் போட்டியிடுவேன். இல்லையென்றால் சீட்டே வேண்டாம்’ என்று டெல்லி தலைமைக்கு தகவல் அனுப்பியிருக்கிறாராம்.” “தைலாபுரத்தில் கருகும் வாடை அடிக்கிறதே சுவாமி?” .“நல்ல மோப்ப சக்திதான் உனக்கு. ஆகஸ்ட் 30 அன்று கடலூர் மாவட்டம் வடலூர் பஸ் நிலையம் அருகே பொதுக்கூட்டம் நடத்த பா.ம.க அனுமதி கேட்டிருந்தது. ஆனால், போலீஸ் தரப்பில், ‘அங்கு பொதுக் கூட்டம் நடத்த அனுமதி இல்லை, வேண்டுமானால் விழுப்புரம் அல்லது கள்ளக்குறிச்சியில் நடத்திக்கொள்ளுங்கள்’ என்று சொல்லிவிட்டது. ஆனால், கடலூர் மாவட்டத்தில்தான் ஸ்கோர் செய்ய முடியும் என்று நினைத்த பா.ம.க தரப்பு நீதிமன்ற படியேறிவிட்டது. அங்கும் அரசு வழக்கறிஞர்கள், ‘கடலூர் மாவட்டத்தில் ஏற்கெனவே என்.எல்.சி பிரச்னை இருக்கிறது. சட்டம் ஒழுங்கு பிரச்னை வரும்’ என்று கட்டையைப் போட்டுவிட்டார்கள். இதனால், கடுப்பான ராமதாஸ், அன்புமணியின் ஆட்களிடம், ‘கடலூரில் நமக்கு அனுமதி மறுக்கிறார்கள். ஆனால், சில நாட்களுக்கு முன்பு தி.மு.க இளைஞரணிச் செயலாளர் உதயநிதியின் பிரமாண்ட நிகழ்ச்சிக்கு மட்டும் போலீஸ் எப்படி அனுமதி அளித்தது? நீங்கள்தான் தேவையில்லாமல் தி.மு.க எதிராக எதுவும் பேசாமல் ஆதரவு அளிக்கிறீர்கள், அவர்கள் நம்மை வேண்டுமென்றே சீண்டுகிறார்கள்’ என்று சீறியிருக்கிறார். “செய்தி துறையிலிருந்து செய்தி ஒன்று கசிகிறது, கவனீத்தீரா சுவாமி?” ”ஆமாம், அந்த துறையின் முக்கியமான அதிகாரி ஒருவர்மீது முதல்வர் அலுவலகத்தினர் கோபமாக இருக்கிறார்களாம். முதல்வர் அலுவலகம் தொடர்பான செய்திகள் பத்திரிகை மற்றும் சேனல்களில் சரியாக வெளியிடப்படுவதில்லை; அதற்கு அந்த அதிகாரியின் மெத்தனம்தான் காரணம் என்று நினைக்கிறது முதல்வர் தரப்பு. கடந்த ஆகஸ்ட் 15 சுதந்திர தினம் அன்று கோட்டை கொத்தளத்தில் முதல்வர் தலைமையில் நடந்த கொடியேற்று நிகழ்வில் கலந்துக்கொள்ளாமல், காஞ்சிபுரத்தில் அவரது நெருங்கிய உறவு பொறுப்பில் இருக்கும் நிகழ்ச்சியில் கலந்துக்கொண்டாராம். இதுபற்றி முதல்வர் அலுவலக அதிகாரிகள் விசாரித்தபோது ஏற்கெனவே கடந்த காலங்களில் பசையான பதவிகளில் இருந்தவருக்கு, இப்போது இருக்கும் துறை பிடிக்கவில்லையாம். அதனாலேயே இப்படி நடந்துகொள்கிறார் என்று தெரியவந்திருக்கிறது. விரைவில் இதைவிட டம்மியான துறை அன்னாருக்கு ஒதுக்கப்படலாம் என்கிறது கோட்டை பட்சி.” “அ.தி.மு.க அப்டேட்ஸ்..?” ”எடப்பாடி நடத்திய மதுரை மாநாடு குறித்த ஐ.பி ரிப்போர்ட் டெல்லி பா.ஜ.க தலைமைக்குச் சென்றுள்ளது. மாநாட்டுக்கு வந்திருந்த பஸ் உள்ளிட்ட வாகனங்களை வைத்துதான் ரிப்போர்ட் தயார் செய்யப்பட்டுள்ளது. அதன்படி கோவை, ஈரோடு, நாமக்கல், கரூர், சேலம் உள்ளிட்ட கொங்கு மண்டலத்தில் இருந்துதான் 72 சதவிகித தொண்டர்கள் வந்திருக்கிறார்கள். டெல்டா மற்றும் தென் மாவட்டங்களில் இருந்து பெரிதாக ஆட்கள் வரவில்லை என்று தெரிவிக்கப்பட்டுள்ளது. அதேபோல பெண்கள் கூட்டம் பெரிதாக இல்லை; பிற்படுத்தப்பட்டோர் சமூக பங்கேற்பு இல்லை என்றும் ரிப்போர்ட்டில் குறிப்பிடப்பட்டுள்ளது. ”ஓஹோ...”.“இன்னும் இருக்கிறது கேள். மேற்கண்ட பலவீனங்களைச் சொல்லியே ஓ.பி.எஸ்ஸை வைத்து கூட்டணியில் டபுள் கேம் ஆடவும் திட்டம் வகுத்துள்ளதாம் டெல்லி பா.ஜ.க. அதாவது, ’தமிழ்நாடு முன்னேற்ற முன்னணி’ என்கிற பெயரில் ஓ.பி.எஸ்., அ.ம.மு.க., சசிகலா, பா.ம.க., தே.மு.தி.க உள்ளிட்ட கட்சிகளை ஒருங்கிணைத்து கூட்டணி ஏற்படுத்தி, அ.தி.மு.க-வுக்கு அதிர்ச்சி வைத்தியம் தரவும் திட்டமிட்டிருக்கிறார்களாம். எல்லாம் சீட் பேரத்துக்குதானாம். டெல்லி கொடுத்த இந்த புது அசைன்மென்ட் தெம்பில்தான் செப்டம்பர் 3-ம் தேதி காஞ்சிபுரத்தில் இருந்து தனது தமிழக சுற்றுப்பயணத்தைத் தொடங்குகிறார் ஓ.பி.எஸ்.” “ம்க்கும்... அவர் இதையாவது உருப்படியாக உருட்டுகிறாரா என்று பார்ப்போம்... ‘புழல் சிறையில் மருத்துவர்கள் தப்பி ஓட்டம்’ செய்தி கேள்விபட்டீரா சுவாமி?” “ஆமாம்... அமைச்சர் செந்தில்பாலாஜியின் உடல்நிலையைக் கவனிப்பதற்காக சிறையில் சுழற்சி முறையில் வேலை பார்க்க இரண்டு பெண் மருத்துவர்கள் உட்பட மூன்று மருத்துவர்கள் நியமிக்கப்பட்டனர். ஆனால், அமைச்சர் மீதான சிறைத்துறையின் அதீத பாசம் காரணமாக டாக்டர்களுக்கு டார்ச்சரோ டார்ச்சராம். இதனால், நொந்து நூடுல்ஸான பெண் டாக்டர்கள் இருவரும் ஏதேதோ காரணங்களைச் சொல்லி டூட்டிக்கு வர மறுத்துவிட்டார்களாம். இப்போது ஒரே ஒரு ஆண் டாக்டர் மட்டும் புழல் சிறையில் இருந்து தப்பிக்க முடியாமல் முழு நேர டூட்டியில் மாட்டிக்கொண்டு கதறுகிறாராம்!” என்ற சுவாமிக்கு சுடச்சுட வாழைப்பூ வடைகளை தட்டில் வைத்து பரிமாறினார் சிஷ்யை. வடையை கொறித்தபடியே மீண்டும் செய்திக்கடையை திறந்தார் வம்பு. “தாமரை தரப்பில் மாநிலச் செயலாளர்களில் ஒருவரான நடிகரின் பெயரைக் கொண்டவருக்கு அமெரிக்காவிலிருந்து பசையாக ஒன்று வந்துள்ளது. யார் அனுப்பினார்கள் என்கிற ஒரு மில்லியன் டாலருக்கு... சாரி, ஒரு மில்லியன் டாலர் கேள்விக்கு விடை தேடினால், அமெரிக்காவில் வசிக்கும் இந்திய தொழிலதிபர்கள் தரப்பு என்று பதில் கிடைத்துள்ளது. அன்னார் இங்கு பா.ஜ.க-வுக்கு ஆதரவாக நடத்தும் இரண்டு ஆன்லைன் சேனல்களை வலுப்படுத்தவே இந்தத் தொகையாம். இதை ஏற்பாடு செய்து கொடுத்ததே மேலிடத்து பெண்மணி ஒருவர்தான் என்கிறார்கள். இதை மோப்பம் பிடித்த தமிழக ஆளும் தரப்போ, ‘இதெல்லாம் சட்டவிரோத பண பரிவர்த்தனையில் வராதா?’ என்று முணுமுணுக்கிறது.” “பிரக்யானந்தாவுக்கு 30 லட்சம் நிதி கொடுத்து அசத்திவிட்டாரே முதல்வர் ஸ்டாலின்!” “நல்ல விஷயம்தான். ஆனால், இதில் அரசியல் விளையாடுவதுதான் கொடுமை. பிரக்ஞானந்தாவை வளைக்க பா.ஜ.க போட்டா போட்டி போடுகிறது. சிறுவன் பிரக்ஞானந்தா திருநீரும் நெற்றியுமாக காட்சியளிக்கிறான் என்பதால், அதைச் சொல்லியே சொந்தம் கொண்டாடுகிறது பா.ஜ.க தரப்பு. இப்போது முதல்கட்டமாக பிரக்ஞானந்தாவின் செஸ் மாஸ்டரான ரமேஷிடம் பேச்சுவார்த்தை நடத்திவருகிறதாம் பா.ஜ.க தரப்பு...” என்ற வம்பு தோட்டத்தில் இருந்த செடிகளுக்கு தண்ணீர் ஊற்றத் தொடங்கினார்! - சுவாமி வம்பனந்தா