தமிழக அரசின் ரகசிய சட்டம்… விவசாயத்தை கொல்லும்! கொந்தளிக்கும் விவசாயிகள்…

மத்திய அரசின் புதிய வேளாண் சட்டத்திற்கு எதிராக டெல்லியில் விவசாயிகளுக்கு ஆதரவுக் கரம் நீட்டிய தி.மு.க. அரசு, அதே கரத்தால் புதிய நில ஒருங்கிணைப்புச் சட்ட மசோதாவை சத்தமின்றி நிறைவேற்றி தங்களுக்கு துரோகம் இழைத்துள்ளதாக கொதிக்கிறார்கள் விவசாயிகள்.சமீபத்தில் குற்றாலத்தில் நடந்த தமிழக அனைத்து விவசாய சங்கங்களின் ஒருங்கிணைப்புக் குழுவின் மாநில பொதுக்குழு கூட்டத்தில் தமிழக அரசின் புதிய நில ஒருங்கிணைப்புச் சட்டத்தை வாபஸ் பெறக் கோரி தீர்மானம் நிறைவேற்றப்பட்டது. தொடர்ந்து விவசாயிகள் சாலை மறியலிலும் ஈடுபட்டனர்.ஏன் இவ்வளவு ஆவேசம்? என்று பி.ஆர்.பாண்டியனிடம் கேட்டோம். ” தமிழக சட்டமன்றத்தின் கடைசி நாளான ஏப்ரல் 21 அன்று 17 மசோதாக்கள் சட்டமாக நிறைவேற்றப்பட்டன. அவற்றில் ஒன்று, நில ஒருங்கிணைப்புச் சட்டம் 2023. இந்தச் சட்டம் படு ரகசியமாக, சட்டமன்ற உறுப்பினர்களுக்குக்கூட தகவல் தெரிவிக்காமல் கொண்டுவரப்பட்டுள்ளது.இப்படி ரகசியமாக கொண்டுவர வேண்டிய அவசியம் என்ன என்று விசாரித்தபோதுதான், சில கார்ப்பரேட் கம்பெனிகளின் நிர்ப்பந்தத்தாலேயே இச்சட்டம் கொண்டு வரப்பட்டிருப்பது தெரியவந்தது. அண்மையில் முதல்வர் ஸ்டாலின் 12 மணி நேர வேலை சட்டத்தைக் கொண்டு வந்ததும் இதே கார்ப்பரேட்டுகளின் நிர்ப்பந்தத்தால்தான். ஆனால், அனைத்து தரப்பினரின் எதிர்ப்பால் அச்சட்டம் வாபஸ் பெறப்பட்டது..இப்போது நில ஒருங்கிணைப்புச் சட்டத்தைக் கொண்டுவந்திருக்கிறார்கள். கார்ப்பரேட்கள் , கம்பெனி தொடங்க நிலம் கையகப்படுத்தும்போது வரும் எதிர்ப்பை சமாளிப்பது பெரிய சிக்கலாக இருக்கிறது. அந்த சிக்கலை தடுக்க உதவுவதுதான் இச்சட்டம். ஒரு கார்ப்பரேட் கம்பெனி தொழிற்சாலை அமைக்கும் போது நீர்நிலைகள், கால்வாய்கள், கண்மாய்கள், குளம், குட்டைகள், நீர்வழிப்பாதைகள் குறுக்கிட்டால் அந்த இடத்தில் தொழிற்சாலையோ, சாலைகளோ போடக் கூடாது என்கிறது இதுவரை இருந்த சட்டம்.ஆனால், புதிய சட்டத்தின்படி தொழிற்சாலை அமைக்க, இந்த நீர்நிலைகள் தடையாக இருக்குமானால் நீர்நிலைகள், கால்வாய்களை அந்த கார்ப்பரேட் கம்பெனியே பயன்படுத்திக் கொள்ளலாம். குளத்திலிருந்து எவ்வளவு தண்ணீர் வேண்டுமானாலும் எடுத்துக்கொள்ளலாம். நீர்நிலைகள் எல்லாம் சங்கிலித் தொடர்போல ஒன்றுக்கு ஒன்று தொடர்புடையதாக இருப்பதால், இந்தச் சட்டத்தால் தமிழகத்தின் அனைத்து நீர்நிலைகளுக்கும் பாதிப்பு ஏற்படும். அதன் தொடர்ச்சியாக விளைநிலங்களும் பாதிக்கப்படும்.தொழிற்சாலைகளுக்காக நிலம் கையகப்படுத்தப்படும்போது வனம், விளைநிலம், நீர்நிலைகள் இருந்தால் என்ன செய்வது என்பதை ஐந்து பேர் கொண்ட குழு தீர்மானிக்கும் என்று சட்டம் சொல்கிறது. அக்குழு ஆய்வு செய்து, ‘நிலம் கையகப்படுத்துவதால் நீர்நிலைகளுக்கு உண்மையிலேயே பாதிப்பு ஏற்படும்’ என்று அறிக்கை கொடுத்தாலும்கூட தொழிற்சாலையின் அனுமதி கேன்சல் ஆகாது. மாறாக, சில திருத்தங்கள் செய்து தொழிற்சாலைக்கு அனுமதி கொடுக்கப்படும்.அமைச்சர்கள் வட்டாரத்தில் விசாரித்தால், இந்த புதிய சட்டம் பற்றி சம்பந்தப்பட்ட துறை அமைச்சருக்கே விவரம் தெரியாது என்கிறார்கள். ஆட்சி அதிகாரம் யார் கையில் இருக்கிறது, முதல்வர் கையிலா. அல்லது கார்ப்பரேட்டுகளின் கையிலா?.காவிரிப் படுகையை பாதுகாக்கப்பட்ட வேளாண் மண்டலமாய் மத்திய அரசு அறிவித்துவிட்டது. ஆனால், தமிழக முதல்வரின் இந்த நில ஒருங்கிணைப்புச் சட்டம் அதை தவிடுபொடியாக்கியிருக்கிறது. இனி காவிரிப் படுகையும் கார்ப்பரேட்டுகளின் வேட்டைக்காடாக மாறும் என்பதில் சந்தேகம் இல்லை. அதனால்தான், அரசின் இந்த கொடுமையான சட்டத்தை வாபஸ் பெறக்கோரி அனைத்து மாவட்ட தலைநகரங்களில் ஆர்ப்பாட்டம் நடத்த தீர்மானித்திருக்கிறோம். தவிர, ஆளுநர் ரவியை சந்தித்து இந்தச் சட்டத்திற்கு ஒப்புதல் வழங்கக்கூடாது என்றும் மனு கொடுக்கப் போகிறோம்” என்றவர், சற்றே நிறுத்தி, ”கேரள மாநிலம் விழிஞ்ஞத்தில் அதானி துறைமுகம் கட்டி வருகிறார். அதற்காக நெல்லை, தூத்துக்குடி, கன்னியாகுமரி, தென்காசி ஆகிய நான்கு மாவட்ட கனிம வளங்கள் கார்ப்பரேட்டுகளால் கடத்தப்படுகின்றன.இதனால் மேற்குத் தொடர்ச்சி மலையில் உள்ள 200 காப்புக் காடுகள் அழிக்கப்பட்டுவிட்டன. இனியும் கனிம வளங்கள் கடத்தப்பட்டால் மேற்குத் தொடர்ச்சி மலையில் உள்ள நீர்ப்பிடிப்பு பகுதிகள் அழிந்து, குடிநீருக்கே வழியில்லாமல் போய்விடும். எனவே, கனிம வளக் கடத்தல் தடுத்து நிறுத்தப்பட வேண்டும்” என்றார்.இதுகுறித்து துறை அமைச்சர் கே.என்.நேருவிடம் கேட்க முயற்சித்தோம். அவர் நமது அழைப்பை ஏற்கவில்லை. தி.மு.க. செய்தி தொடர்பாளர்களோ, ” கழக ஆட்சி அமைந்த பிறகு பெரு முதலாளிகள் தமிழ்நாட்டில் முதலீடு செய்வது அதிகரித்திருக்கிறது. தொழிற்சாலைகளுக்கு அனுமதி கொடுப்பதில் சுணக்கம் இருக்கக் கூடாது, நடைமுறைகள் எளிமையாக இருக்க வேண்டும் என்பதற்காக இச்சட்டம் கொண்டு வரப்பட்டிருக்கிறது.இதனால் நீர் நிலைகள் அழியும் என்று சொல்வது அபத்தமானது. அப்படி பொதுமக்களுக்கு பாதிப்பு ஏற்படும் என்கிற சந்தேகம் எழுந்தால் அதை களைவதற்காக முதல்வர் தலைமையில் தனி குழு அமைக்கப்பட்டிருக்கிறது. 12 மணி நேர வேலைச் சட்டத்தை எந்தவித ஈகோவும் பார்க்காமல் வாபஸ் பெற்றவர் முதல்வர். அப்படி இருக்கும் போது இந்தச் சட்டத்தால் யாருக்கும் பாதிப்பு வராது” என்றார்.வரும் முன் காப்பதே விடியலுக்கு வழி! -அ.துரைசாமி

தமிழக அரசின் ரகசிய சட்டம்… விவசாயத்தை கொல்லும்! கொந்தளிக்கும் விவசாயிகள்…

Related Stories