தம் விவகாரம்... தம் கட்டும் பா.ம.க மீண்டும் மீண்டும் சீண்டும் விஜய்!

வாக்கிங் முடிந்த கையோடு வியர்க்க விறுவிறுக்க வந்த வம்பானாந்தாவுக்கு மாதுளை ஜூஸைக் கொடுத்து வரவேற்ற சிஷ்யை, “அசோக் விவகாரம் ஒரே மர்மமாக இருக்கிறதே சுவாமி?” என்றபடியே செய்தி கச்சேரியை தொடங்கி வைத்தார். “அமைச்சர் செந்தில்பாலாஜியின் தம்பி அசோக் விவகாரத்தைப் பொறுத்தவரை ஆளும் தரப்பின் மேல்மட்ட அளவிலேயே ஏகப்பட்ட குழப்பங்கள் நிலவுகின்றன. ஆகஸ்ட் 13 அன்று மதியம் 3 மணி அளவில் அசோக் கைது என்று தேசிய செய்தி சேனல்கள் தொடங்கி லோக்கல் சேனல்கள் வரை பிரேக்கிங் நியூஸ் பரபரத்தன. மறுநாள் அச்சு ஊடகங்கள் பலவற்றிலும் அசோக் கைது என்கிற செய்தியே பிரதானமாக இடம்பெற்றது. டெல்லியில் சில பத்திரிகையாளர்கள் கைது சம்பவத்தை உறுதிசெய்தபோதும் அன்றைய தினமே ஆஃப் தி ரிக்கார்டாக அமலாக்கத்துறை அதிகாரிகள் இதை மறுத்தனர்.தொடர்ந்து சுமார் 24 மணி நேரம் கழித்து ஆகஸ்ட் 14 மதியம் 3 மணி அளவில் அமலாக்கத்துறை சார்பில், ‘அசோக் கைது என்று வெளியான செய்திகளில் உண்மை இல்லை’ என்று அதிகாரப்பூர்வமாக அறிக்கை வெளியானது. இதுபற்றி அன்றைய தினம் பேசிய மூத்த பத்திரிகையாளர்கள் சிலர், ‘செந்தில்பாலாஜியை கைது செய்வதில் சந்தித்த சிக்கல்கள், அசோக் விவகாரத்தில் நடந்துவிடக் கூடாது என்று அமலாக்கத்துறை நினைக்கிறது. இதனால், கொச்சியில் அசோக்கை கைது செய்த அதிகாரிகள், அவரை சட்டவிரோத காவலில் எடுத்திருக்கலாம்’ என்று கருத்து தெரிவித்தனர். ஆனால், அடுத்தடுத்த நாட்களில் அந்த தகவலும் உண்மை இல்லை என்றே உளவுத்துறை அதிகாரிகள் தெரிவித்தனர். அப்படி எனில் ‘அசோக் கைது’ என்கிற தகவலை கசியவிட்டது யார், அப்படி கசியவிட்டதால் அவர்களுக்கு என்ன லாபம்?’ என்கிற விசாரணையில் இறங்கியிருக்கிறது மத்திய உளவுத்துறை.”.“சுவாமி, பத்து ரூபாய் விவகாரத்தில் செந்தில்பாலாஜி சிறையில் புலம்பித் தள்ளிவிட்டாராமே?””பரவாயில்லையே, புழல் சிறையிலும் சோர்ஸ் வைத்திருக்கிறாய் போலிருக்கிறது. சில நாட்களுக்கு முன்பு சிறையில் தனக்கு வேண்டப்பட்ட ஒருவரிடம் பேசிய செந்தில்பாலாஜி, ‘அண்ணே, டாஸ்மாக் பார் விவகாரங்களில் என்னை பத்தி சொல்லுங்க ஒரு நியாயம் இருக்கு. ஆனா, டாஸ்மாக் கடைகள்ல கூடுதல் தொகை வசூலிக்குறதா சொல்லப்படுற பாட்டிலுக்கு பத்து ரூபாய் விவகாரத்துக்கும் எனக்கும் எந்த சம்பந்தமும் இல்லை... என்னை தேவையில்லாம பத்து ரூபாய் பாலாஜின்னு அசிங்கப்படுத்துறாங்க. தமிழ்நாடு முழுவதும் டாஸ்மாக்குல இருக்குற மாவட்ட மேலாளர்கள், மண்டல முதுநிலை மேலாளர்கள் இவங்க எல்லாம் வருவாய் துறையில் இருந்து டெபிடேஷன் அடிப்படையில் பல ஆண்டுகளாக நியமிக்கப்பட்டிருக்காங்க. விற்பனையாளர்கள் வாங்குவதாக சொல்லப்படும் பத்து ரூபாயில் பங்கை அனுபவிப்பது இந்த அதிகாரிகள்தான். வருவாய்த்துறையில் இருக்கும் இந்த அதிகாரிகள் என் கட்டுப்பாட்டிலேயே இல்லை. இவங்களுக்கு பொறுப்பு வகிப்பது அமைச்சர் கே.கே.எஸ்.எஸ்.ஆர்.ராமசந்திரன் தான். அப்படி இருக்கும்போது என்னை பத்து ரூபாய் பாலாஜி என்று கேவலப்படுத்துவது நியாயம்தானா?” என்று அழாத குறையாகக் கேட்டுள்ளார் பாலாஜி!.“பிள்ளையாருக்கு பூஜை செய்தால், அடி விழும் என்று சொல்லியிருக்கிறாரே?”“ஓ... ஜெ.தீபாவைதானே சொல்கிறாய். போயஸ் கார்டனின் வேதா இல்லம் வளாகத்தில் சிறிய பிள்ளையார் கோயில் ஒன்று இருக்கிறது. ஜெயலலிதா உயிரோடு இருந்தபோதிருந்தே அந்தக் கோயிலில் ஹரிஹரன் என்பவர்தான் பூஜைகள் செய்துவருகிறார். ஜெயலலிதா மறைவுக்குப் பிறகு சசிகலாதான் அந்த நபருக்கு சம்பளம் கொடுத்துவருகிறார். இந்தநிலையில் ஆகஸ்ட் 15 சுதந்திர தினத்தன்று வழக்கம்போல ஹரிஹரன் அந்த விநாயகர் கோயிலில் பூஜைக்கு தயாராகிக்கொண்டிருந்தார். அப்போது அங்கு வந்த ஜெ.தீபா, ‘இந்த பில்டிங் முழுவதும் எனது கட்டுப்பாட்டில் உள்ளது. மீறி நீ உள்ளே வந்தால் நடப்பதே வேறு...’ கடும் செம டோஸ் விட்டிருக்கிறார். இதையடுத்து, ஹரிஹரன் தேனாம்பேட்டை காவல் நிலையத்தில் இதுகுறித்து புகார் அளித்துள்ளார். ஒவ்வோர் ஆண்டும் விநாயகர் சதுர்த்தி அன்று சசிகலா இந்த பிள்ளையார் கோயிலில் விழா எடுத்து வழிபடுவது வழக்கம். அடுத்த மாதம் விநாயகர் சதுர்த்தி வருவதால், சசிகலா மீண்டும் இங்கு வந்துவிடக் கூடாது என்பதற்காகவே இந்த உருட்டல், மிரட்டலாம்...”.“அ.தி.மு.க தகவல்கள் ஏதேனும் உண்டா சுவாமி?”“ஆகஸ்ட் 11 அன்று டெல்லியில் தேசிய ஜனநாயகக் கூட்டணியின் ஆலோசனைக் கூட்டம் பா.ஜ.க தேசிய தலைவர் நட்டா தலைமையில் நடந்தது. இந்தக் கூட்டத்தில் அ.தி.மு.க சார்பாக இலக்கிய அணிச் செயலாளர் வைகை செல்வன், செய்தித் தொடர்பாளர் கல்யாண சுந்தரம் ஆகியோர் கலந்துக்கொண்டனர். 2024 நாடாளுமன்றத் தேர்தல் பிரசாரம் தொடர்பான கூட்டம் இது என்கிறார்கள். இதன் தொடர்ச்சியாக அடுத்தடுத்த கூட்டங்கள் அந்தந்த மாநிலங்களில் இனி நடைபெறும் என்று சொல்லியிருக்கிறார்கள். அதன்படி அக்டோபர் மாதம் தமிழகத்தில் தேசிய ஜனநாயகக் கூட்டணிக் கட்சிகளின் கூட்டம் நடக்கும் என்று பா.ஜ.க தரப்பில் சொல்லப்பட்டது. அப்போது குறுக்கிட்ட வைகைசெல்வன், “தமிழகத்தில் அப்படியொரு கூட்டம் நடந்தால், அது எடப்பாடி பழனிசாமி தலைமையில்தான் நடக்கும்” என்று சொல்லியிருக்கிறார். இப்போதைக்கு மெளனமாக தலையாட்டியிருக்கிறது டெல்லி!” என்ற வம்பு சிணுங்கிய தனது மொபைலின் வாட்ஸ் அப்பை பார்த்துவிட்டு தொடர்ந்தார்...“மதுரை மாநாட்டை நாடே திரும்பிப் பார்க்க வேண்டும் என்று கட்டளையிட்டுள்ளாராம் எடப்பாடி. மொத்தம் பத்து லட்சம் பேரைக் கூட்ட வேண்டும் என்பது அவரது இலக்கு. அதற்காக தன் கட்சியினரைக்கூட நம்பாமல் தனியார் ஏஜென்சிகளை நியமித்திருக்கிறார். அவர்கள் கொடுத்த ஐடியாவின்படி அனைத்து மாவட்டச் செயலாளர்கள் மற்றும் சார்பு அணிச் செயலாளர்களுக்கும் கிடுக்கிப்பிடி போட்டிருக்கிறார் எடப்பாடி. அதாவது, ஒவ்வொருவரும் தொண்டர்களை எத்தனை வண்டிகளில் அழைத்து வரப்போகிறார்கள் என்பதை வண்டிகளின் பதிவு எண்ணோடு வாட்ஸ் அப் செய்ய வேண்டும் என்று கட்டளையிடப்பட்டுள்ளது. மேலும் அந்த வண்டிகள் மதுரையில் எங்கு பார்க் செய்யப்பட வேண்டும் என்பதையும் தலைமை அலுவலகமே இடத்தை குறிப்பிட்டுள்ளது. அதாவது, யாரும் டிமிக்கி கொடுத்துவிடக் கூடாது; மதுரையில் எட்டிப் பார்த்துவிட்டு, அப்படியே கொடைக்கானலுக்கு எஸ்கேப் ஆகிவிடக் கூடாது என்பதற்காகவே இந்த கிடுக்கிப்பிடி ஏற்பாடாம். இதை எல்லாம் கண்காணிக்கும் பொறுப்பு தனியார் ஏஜென்சிகளிடம் கொடுக்கப்பட்டுள்ளது.”“டி.டி.வி தினகரன் விவகாரத்தில் டெல்லியில் இருந்து ஏதோ சிக்னல் வந்திருக்கிறதாமே?””சில நாட்களுக்கு முன்பு நடந்த அ.ம.மு.க-வின் பொதுக்குழுவில், ’டெல்லி பா.ஜ.க எடப்பாடியுடன் மட்டுமே இணக்கமாக இருப்பதால், நாம் தனித்து போட்டியிடவும் தயாராக இருக்க வேண்டும்’ என்று டி.டி.வி கூறியிருந்தார் அல்லவா... இதையடுத்து, டெல்லி பா.ஜ.க தரப்பிலிருந்து, ‘அவசரப்பட வேண்டாம், நாடாளுமன்ற தேர்தலுக்கு இன்னும் நாட்கள் இருக்கின்றன. நாம் ஏற்கெனவே திட்டமிட்டபடி ஓ.பி.எஸ். சசிகலா, அ.ம.மு.க., எடப்பாடி, பா.ஜ.க இணைந்து செயல்படும் காலம் வரும்’ என்று சொல்லப்பட்டிருக்கிறது. இதனால், நம்பிக்கையுடன் காத்திருக்கிறாராம் தினகரன்...”.“பா.ம.க-வை வைத்து செய்துவிட்டது நடிகர் விஜய் தரப்பு என்று செய்திகள் வருகின்றனவே சுவாமி?”“அந்தக் கொடுமையை ஏன் கேட்கிறாய்! சில மாதங்களுக்கு முன்பு விஜய் பிறந்தநாள் அன்று அவரது ‘லியோ’ படத்தின் ஃபர்ஸ்ட் லுக் வெளியானது. அதில் விஜய் கையில் துப்பாக்கியையும் வாயில் சிகரெட்டையும் வைத்துக்கொண்டு ஸ்டைலாக போஸ் கொடுத்தார். இதையடுத்து வழக்கம்போல பா.ம.க-வில் ராமதாஸும் அவரின் மகன் அன்புமணியும் இதற்கு எதிராக கொந்தளித்து கண்டனம் தெரிவித்தனர். இதற்கு விஜய் அல்லது படக்குழு தரப்பில் இருந்து எந்த ரெஸ்பான்ஸும் வரவில்லை. தொடர்ந்து 15 நாட்கள் கழித்து படத்தின் முக்கிய வில்லன் ரோலில் நடிக்கும் சஞ்சய் தத் வாயில் சுருட்டு வைத்து புகைப்பதுபோல மற்றுமொரு வீடியோ வெளியிடப்பட்டது. சுதாரித்துக்கொண்ட அய்யா தரப்பினர், ‘நம் எதிர்ப்பை வைத்து விளம்பரம் தேடிக்கொள்ளலாம் என வேண்டும் என்றே சீண்டுகிறார்கள்’ என்று நினைத்து அமைதியாக இருந்துவிட்டனர். இந்த நிலையில்தான் ஆகஸ்ட் 15 அன்று ‘லியோ’ படத்தின் மற்றுமொரு வீடியோ வெளியிடப்பட்டது. அதில் படத்தின் மற்றொரு வில்லனான அர்ஜுன், வாயில் சிகரெட்டை வைத்துக்கொண்டு ‘த்தேறி...’ என்று சொல்கிறார். இதற்கும் பா.ம.க தரப்பில் இருந்து எந்த சலனமும் இல்லை... அமைதியோ அமைதி. இதையடுத்து, வேண்டும் என்றே பா.ம.க-வை சீண்டுவதாக கிளம்பியிருக்கிறது சர்ச்சை!” என்றபடி நடையைக் கட்டினார் வம்புஸ்நாக்ஸ்தமிழகத்தை சேர்ந்த பா.ஜ.க. தலைவர் ஒருவர் வட்டிக்கு விடும் தொழிலில் கில்லி. அந்தத் தொழிலில் கிடைத்த தொகையைக்கொண்டுதான் கட்சிக்கு செலவு செய்து பதவியையும் தக்கவைத்து வந்தார். இப்போது நாளுக்குள் நாள் கட்சியின் தனது முக்கியவம் குறைக்கப்படுவதை உணர்ந்தவர், இப்போதெல்லாம் பாக்கெட்டில் இருந்து பத்து பைசாகூட எடுப்பதில்லையாம். தவிர, அண்ணாமலையின் வார் ரூமுக்கு போட்டியாக மாதம் மூன்று லட்சம் ரூபாய் செலவில் ஐ.டி. டீம் ஒன்றையும் உருவாக்கியிருக்கிறார் அந்தத் தலைவர்! பா.ஜ.க தலைவர் அண்ணாமலை செல்லும் நடைபயணம் செல்லும் வழியெல்லாம் கட்சியை வளர்க்கிறாரே இல்லையோ, அந்தந்த பகுதியின் கட்சி நிர்வாகிகள் செமத்தியாக கல்லா கட்டுகிறார்களாம். இவையெல்லாம் தினம் தினம் புகாராகக் குவிய... டென்ஷனின் உச்சத்தில் தவிக்கிறார் மலை! - சுவாமி வம்பானந்தா