சுவாமி வம்பானந்தா: லைக் பண்ணுஙக ஷேர் பண்ணுஙக... லைக்காவுக்கு மத்திய அரசு ஷாக்!

“இனியும் சென்னை வெயிலை தாக்குப் பிடிக்க முடியாது. ஊட்டிக்கு ஓடப்போகிறேன். அடுத்த இதழ் செய்திகளுக்கு வீடியோ கால்களில் பேசிக்கொள்ளலாம்” தொப்பலாக நனைந்த ஜிப்பாவுடன் ஆசிரமத்துக்குள் என்ட்ரி கொடுத்தார் வம்பு. அவரை கூல் பண்ணுவதற்காக இளநீர் ஜூஸை தயாராக வைத்திருந்த சிஷ்யை ,”லண்டனில் நல்ல குளிர் வாட்டுகிறதே. அங்கு போய்வரவேண்டியதுதானே சுவாமி?’’ என்று ஹின்ட் கொடுத்தபடியே ஜூஸையும் கொடுத்தார்..“பரவாயில்லையே என் சிஷ்யை என்கிற பெருமையை நிலைநாட்டும்படி படு அப்டேட்டாகத்தான் இருக்கிறாய்” என்றபடி லைகா நிறுவன ரெய்டுகளின் பின்னணி குறித்து பேசலானார் வம்பு. ” தமிழக அமைச்சரவை மே 11ம் தேதி மாற்றி அமைக்கப்பட்டவுடனேயே மேலிட முக்கியப் புள்ளிகள் சிலர் வெளிநாடு கிளம்பினார்கள். அங்கு அவர்கள் ஜாலியாக சுற்றிப் பார்த்துக்கொண்டிருக்க, இதைத் தீவிரமாக கண்காணித்த மத்திய உளவுத்துறை,ஒரு ரிப்போர்ட்டை டெல்லிக்கு ‘சப்மிட்’ செய்திருக்கிறது. இதன் தொடர்ச்சியாகவே சென்னையில் லைகா நிறுவனம் தொடர்பான இடங்களில் அதிரடி ரெய்டை நடத்தி ஷாக் கொடுத்திருக்கிறது அமலாக்கத்துறை.” “இந்த ரெய்டின் அடுத்த எபிசோட் என்னவாக இருக்கும் சுவாமி?” “தமிழ்சினிமாவின் நம்பர் ஒன் தயாரிப்பு நிறுவனமாக, முன்னணி நட்சத்திரங்களை வைத்து பெரும் பட்ஜெட்டில் படங்களைத் தயாரித்துவரும் லைகா, தமிழகத்தைப் பொறுத்தவரை அனைத்து கட்சிகளுக்கும் கட்ட வேண்டிய கப்பத்தைக் கட்டி நட்பாகிவிட்டது. தயாரிப்பு வேலைகளைப் பொறுத்தவரை உச்ச நிறுவனத்துடன் படு நெருக்கமாகிவிட்டது. இந்த நெருக்கம்தாம் டெல்லியின் கண்ணை உறுத்தியதாம். அதை ஒட்டியே லைகா மீது அமலாக்கத்துறையின் ரெய்டு நடந்தது. இன்னொரு பக்கம், ஜி ஸ்கொயர் நிறுவனத்தில் ஏற்கெனவே நடந்த ஐ.டி ரெய்டின்போது, கிடைத்த சில தகவல்களின் அடிப்படையில்தான் லைகாவில் அமலாக்கத்துறை ரெய்டை நடத்தியதாகவும் சொல்லப்படுகிறது. இந்த ரெய்டின்போது கிடைத்த சில டாகுமென்ட்களை தக்க சமயத்தில் டெல்லி லைக் செய்வதுடன் சம்மந்தப்பட்ட துறைகளுடன் ஷேர் செய்து அடுத்தக்கட்ட நடவடிக்கைக்கு தயாராகும் என்கிறார்கள்” என்றபடி அடுத்த செய்திக்குத் தாவினார் வம்பு. “அமைச்சரவை மாற்றம் அதிரடியாக நடந்ததுபோல அதிகாரிகளின் அதிரடி மாற்றத்துக்கும் நிர்வாகச் சீர்கேடுகள் காரணம் என்று மீடியாக்களில் விவாதிக்கப்படுவதை முதல்வர் ஸ்டாலின் ரசிக்கவில்லை.”.”என்னவாம் சுவாமி?” ” அடுத்த ஆண்டு மே மாதம் லோக்சபா தேர்தல் நடக்கப்போகிறது. 2019-யைப்போல அந்த தேர்தலில் அவ்வளவு எளிதாக வெற்றியை பெற முடியாது என நினைக்கிறார் முதல்வர் ஸ்டாலின். காரணம், மக்களுக்கு இருக்கும் அதிருப்தி. இதை மாற்றி தன் பக்கம் வாக்குகளாக திருப்ப வியூகம் அமைத்து வருகிறார். அதற்கு முன்னோட்டம்தான் இந்த அதிகாரிகள் மாற்றம். முதற்கட்டமாக அரசின் நலத்திட்டங்கள், கட்சிக்காரர்களின் தலையீடு இல்லாமல், எளிதாக மக்களை சென்றடைய வேண்டும் என்பதே முதல்வரின் ‘டார்கெட்’. எனவேதான் 16 மாவட்டங்களுக்கு மின்னல் வேகத்தில் கலெக்டர்களை மாற்றி இருக்கிறார் ஸ்டாலின். இதில் இன்னும் சில விஷயங்கள் இருக்கிறது” ”விபரங்கள் ப்ளீஸ்...” ”அதாவது அமைச்சர் பி.டி.ஆர்.பழனிவேல் தியாகராஜனுடன் மிக நெருக்கமாக இருந்தவர் மதுரை மாவட்ட கலெக்டர் அனீஷ் சேகர். இவரை தனது துறைக்கு மாற்ற வேண்டும் என்று முதல்வரிடத்தில் கோரிக்கை வைத்தார் பழனிவேல் தியாகராஜன். இதை மன நிறைவுடன் ஏற்றுக்கொண்ட முதல்வர் இப்போது அவரை எல்காட் எம்.டி-யாக நியமித்திருக்கிறார். டாஸ்மாக் எம்.டி-யாக இருந்த சுப்ரமணியம் கடந்த சில மாதங்களாகவே அப்செட்டில் இருந்திருக்கிறார். தன்னை வேறு ஏதாவது வேறு துறைக்கு மாற்றிவிட்டால்கூட பரவாயில்லை என்று அவர் முதல்வர் அலுவலகத்துக்கு கோரிக்கை வைத்து வந்தார். அதனாலேயே அவரை மாற்றிவிட்டு, அந்த இடத்தில் திண்டுக்கல் மாவட்ட கலெக்டராக இருந்த விசாகனை நியமித்து இருக்கிறார் முதல்வர். பாவம், விசாகன். எப்படி சமாளிக்கப் போகிறார் என்று பார்ப்போம்... அதேபோல் வேங்கைவயல் விவகாரத்தை சரியாக அணுகாத புதுக்கோட்டை மாவட்ட கலெக்டர் கவிதா ராமுவும் பணியிட மாற்றம் செய்யப்பட்டிருக்கிறார். இப்படி 16 மாவட்ட கலெக்டர்கள் மற்றும் சில துறை அதிகாரிகள் மாற்றப்பட்டதற்கு பல்வேறு விவகாரங்கள் பின்னணியில் இருக்கின்றன “என தடதடவென தகவல்களைக் கொட்டி மூச்சு வாங்கினார் வம்பு.அவரை ஆசுவாசப்படுத்த குளிர்ந்த லஸ்ஸியை கொடுத்த சிஷ்யை, ”பால்வளத்துறை கை மாறிய பிறகு, அந்தத் துறையில் முன்னேற்றம் ஏற்பட்டிருப்பதாக சொல்லப்படுவது உண்மையா?” என்று குறும்புப் பார்வை பார்த்தார்..” தி.மு.க ஆட்சி பொறுப்பேற்ற காலகட்டத்தில் ஆவின் பால் கொள்முதல் 44 லட்சம் லிட்டரில் இருந்தது. இது சர்ர்ரென 23 லட்சம் லிட்டராக குறையத் துவங்கியது. தற்போது மனோ தங்கராஜ் புதிய அமைச்சராக பொறுப்பேற்ற பிறகு ஒரே வாரத்தில் மூன்று லட்சம் லிட்டர் பால் கொள்முதல் அதிகரிக்க ஆரம்பித்து இருக்கிறது. அது மட்டுமல்ல. அ.தி.மு.க ஆட்சிக்காலத்தில் ராஜேந்திர பாலாஜி அமைச்சராக இருந்த கால கட்டம் முதல் நாசர் அமைச்சராக இருந்த இரண்டு ஆண்டு கால கட்டம் வரை 300 கோடி ரூபாய் அளவுக்கு முறைகேடு நடந்திருப்பதை அதிகாரிகள் மனோ தங்கராஜிடம் தெரிவித்தனர். ஆனால் அமைச்சரோ அதில் ஆர்வம் காட்டாமல் ‘பழைய விவகாரங்களை எல்லாம் ஓரமாக வையுங்கள். துறையை முன்னேற்ற என்ன செய்ய முடியும் என்பதை மட்டும் பாருங்கள்’ என ஒற்றைவரியில் உத்தரவு போட்டு இருக்கிறார். “அப்படி பழைய விஷயங்களைக் கிளறுவதற்குத்தான் அண்ணாமலை இருக்கிறாரே?” “அடடே சபாஷ். சரியான நேரத்தில் ஞாபகப்படுத்தினாய். பல மாதங்களாக மாய்ந்து மாய்ந்து திட்டமிட்ட பாத யாத்திரையை ரத்து செய்யவிருக்கிறார் அண்ணாமலை. காரணம் இதுதான். கன்னியா குமரி, கோவையை தவிர்த்து அனைத்து மாவட்டங்களிலும் பா.ஜ.க படுவீக். இப்படிப்பட்ட நிலையில் பாத யாத்திரையை நடத்தினால், நிதி விஷயத்தில் மாவட்ட தலைவர்கள் திணறிவிடுவார்கள். அதிலும் குறிப்பாக, டெல்டா மாவட்டங்களில் நிலைமை இன்னும் படுமோசம் என சொல்ல பாதயாத்திரை ப்ளானில் இருந்து அப்படியே ட்ராப் மூடுக்கு வந்து விட்டார் அண்ணாமலை. இன்னொரு ஷாக் தகவலும் இருக்கிறது. சென்னையில் ஐ.பி.எல் போட்டிகள் நடக்கின்றன அல்லவா? இதில் ஒவ்வொரு போட்டியின்போதும் 200 டிக்கெட் அண்ணாமலையின் ஆதரவாளர்களுக்கு இலவசமாக சென்றனவாம். அதை சென்னையை சேர்ந்த 7 மாவட்ட தலைவர்களுக்கு பிரித்து கொடுத்து ‘உண்மையாக உழைக்கும் தொண்டர்களுக்கு கொடுங்கள்’என உத்தரவு போட்டிருக்கிறார். ஆனால் அவர்களோ டிக்கெட்களை வைத்து செமத்தியாக் கல்லா கட்டிவிட்டார்களாம். விஷயம் அண்ணாமலைக்கு தெரியவர சூடாகி சம்மந்தப்பட்டவர்களை வறுத்தெடுத்துவிட்டார். ”கோட்டை வட்டார தகவல்கள் ஏதும் உண்டா சுவாமி ?” “ தலைமை செயலாளர் இறையன்பு வரும் ஜூன் மாதம் இறுதியில் ஓய்வுபெறுகிறார். இவரது இடத்தை யார் நிரப்பப் போவது யார் என்பதுதான் கோட்டை வட்டாரத்தில் மில்லியன் டாலர் கேள்வி. இதற்கு நடுவே அவரது பணியை மேலும் நீட்டிக்க அரசு தரப்பு முன்வந்தது. ஆனால், இறையன்பு மறுத்துவிட்டார். தற்போதைய நிலவரப்படி காலியாக உள்ள தலைமை தகவல் ஆணையர் பதவியில் இறையன்பு நியமிக்கப்படலாம் என்றதகவல் உலா வருகிறது. இது ஒரு பக்கம் இருக்க முதல்வரின் செயலாளரான உமாநாத்தும், முதல்வரின் செயலாளராக இருந்த உதயச்சந்திரனும் தங்களுக்கு தோதான ஷிவ்தாஸ் மீனாவை தலைமை செயலாளர் அந்தஸ்துக்கு கொண்டு வரவேண்டும் என நினைத்தனர். ஆனால்,சீனியாரிட்டி அடிப்படையில் முன்னணியில் இருப்பவர் ஹன்ஸ்ராஜ் வர்மாதான். அதேநேரத்தில் ’இவர் மாஜி அமைச்சர் மிகவும் வேலுமணிக்கு நெருக்கமானவர் என முதல்வரின் காதில் சில அதிகாரிகள் ஓதி வருகிறார்கள். .”பெரிய ஆர்ப்பாட்டங்கள் நடத்தி ஸ்கோர் செய்வதை விட்டு விட்டு கள்ளச்சாராய விவகாரத்தில் கள்ள மவுனம் காக்கிறதே அ.தி.மு.க?” ” கள்ளச்சாராய சாவுகளுக்கு எதிராக ஒருவேளை எடப்பாடி போராட்டம் நடத்த முன்வருவாரேயானால், அவர் பின்னால் அந்தப் போராட்டத்தில் கலந்துகொள்ள நானும் தயார்’’ என்று வி.சி.க. தலைவர் திருமாவளவன் பேட்டி கொடுத்திருப்பதும் ஏறத்தாழ இந்த நக்கல் தொனியில்தான். ஆனாலும் எடப்பாடி தன் பங்குக்கு எதையாவது செய்யத்தான் செய்வார். அவர் தலைமையில் அ.தி.மு.க மாவட்ட செயலாளர்கள் கூட்டம் மே 17ம் தேதி நடந்தது. வழக்கம்போல் உப்புசப்பின்றி நடந்த இக்கூட்டம் குறித்து நிர்வாகிகள் மத்தியில் கடுமையான விமர்சனம் எழுந்ததை ஒட்டி, கள்ளச்சாராய சாவுகளுக்கு நீதி விசாரணை கோரி கவர்னரிடம் மனு கொடுக்கவும், மிக விரைவில் தமிழகம் தழுவிய போராட்டம் நடத்தவும் முடிவெடுக்கப்பட்டிருக்கிறதாம்”. சொல்லிவிட்டு ‘என்னமோ போடா மாதவா’ என்று முணுமுணுத்தபடி கிளம்பினார் வம்பு..டெல்லி வாத்தியார் ராகுல் காந்தி பதவி இழப்பு செய்யப்பட்டதை அடுத்து அவருக்கு ஓய்வூதியம் அளிப்பது தொடர்பான கோப்புகள் சபாநாயகர் ஓம் பிர்லா அலுவலகத்துக்கு அனுப்பப்பட்டுள்ளன. அதன்படி முதல் ஐந்தாண்டுகளுக்கு 25 ஆயிரம் ரூபாயும், அடுத்த 15 வருடங்களுக்கு 30 ஆயிரம் ரூபாயும் அவருக்கு ஓய்வூதியம் வழங்கப்பட உள்ளது. ஓய்வூதியம் பற்றியெல்லாம் சட்டை செய்யாத ராகுல் ஜூலை மற்றும் ஆகஸ்ட் மாதங்களில் லண்டன், அமெரிக்கா, பாரீஸ், ஜெர்மனி, இத்தாலி என டூர் செல்ல திட்டமிட்டுள்ளார். தனக்கு பிரதமருக்கான இமேஜை சர்வதேச அளவில் ஏற்படுத்த இந்த டூர் என்கிறது டெல்லி பட்சி! நாடாளுமன்றக் கட்டிட திறப்புவிழாவை முதலில் மே 26-ல் தான் அறிவித்திருந்தது மத்திய பா.ஜ.க அரசு. இப்போது திடீரென்று அதை மே 28-க்கு மாற்றியிருக்கிறார்கள். காரணம், அன்றுதான் சாவர்க்கர் பிறந்தநாள்! சர்ச்சை வெடியைக் கொளுத்த தயாராகிவருகின்றன எதிர்க்கட்சிகள்.

சுவாமி வம்பானந்தா: லைக் பண்ணுஙக ஷேர் பண்ணுஙக... லைக்காவுக்கு மத்திய அரசு ஷாக்!

Related Stories