சுவாமி வம்பானந்தா: ”ஆட்சியே போனாலும் கவலையில்லை…” சூளுரைத்த ஸ்டாலின்… கை கொடுத்த அழகிரி…

“வெல்கம் சுவாமி. சுடச்சுட தக்காளி சூப் இருக்கிறது”- செல்வச் செழிப்புடன் வரவேற்ற சிஷ்யை, மகளிர் உரிமைத் தொகையில் ஆயிரம் ரூபாய் வாங்கிவிட்டதுபோல பிரகாசமாகக் காணப்பட்டார். “ சலுகை விலையில் வாங்கிய தக்காளியில் செய்த சூப்தானே?” என்றபடி செய்திக்கு தாவினார் வம்பு. “ தக்காளி விலை விர்ரென உச்சம் தொட்டதைத் தொடர்ந்து, அதை தி.மு.க அரசுக்கு எதிராக திருப்பும் முயற்சியில் இறங்கியிருக்கிறது அ.தி.மு.க. முதல்கட்டமாக ஜூலை 6ம் தேதி வடசென்னை வடக்கு கிழக்கு மாவட்ட செயலாளர் ஆர்.எஸ்.ராஜேஷ் ஒரு டன் தக்காளியை தண்டையார்பேட்டையில் மக்களுக்கு இலவசமாக வினியோகம் செய்தார். தென் சென்னையிலும் மாவட்டச் செயலாளர் விருகை ரவி தக்காளி, இஞ்சி, காய்கறிகள் என ஒரு காம்போவாக பேக் செய்து மக்களுக்கு விநியோகம் செய்து வருகிறார். இதற்கு நல்ல ரெஸ்பான்ஸ் கிடைக்கவே, சென்னையில் உள்ள மாவட்டச் செயலாளர்கள் அனைவரும் காய்கறிகளை வாங்கி வினியோகம் செய்ய வேண்டும் என எடப்பாடி வலியுறுத்தி இருக்கிறார். இப்போது மொத்த டீமும் கோயம்பேட்டை முற்றுகையிட்டுள்ளது.”.“இதற்கு தி.மு.க-வின் ரியாக்ஷன்?”“இதையெல்லாம் பொருட்படுத்தும் மனநிலையிலையிலேயே அவர்கள் இல்லை. முதல்வரைப் பொறுத்தவரை ஒட்டுமொத்த தமிழக மக்களின் மனநிலையை தங்களுக்கு ஆதரவாக மாற்ற என்னவெல்லாம் செய்யவேண்டும் என்கிற யோசனையிலேயே இருக்கிறார். அதையொட்டி இப்போது அதிரடியாக அவர் கையிலெடுத்திருப்பது மகளிர் உரிமைத் தொகை திட்டத்தை.ஜூலை 7-ம் தேதி மகளிர் உரிமை தொகை தொடர்பாக தலைமைச் செயலகத்தில் முதல்வர் தலைமையில் ஆலோசனைக் கூட்டம் நடைபெற்றது. தொடர்ந்து, ’ஒரு கோடி மகளிர் இந்த திட்டத்தால் பயன் அடைவார்கள்’ என்று ஸ்டாலின் தெரிவித்திருந்தார். இதைத்தான் எடப்பாடியும் அண்ணாமலையும் பிலுபிலுவென பிடித்துக்கொண்டார்கள். ‘அனைத்து பெண்களுக்கும் என்று அறிவித்துவிட்டு, இப்போது ஒரு கோடி மகளிருக்கு மட்டுமே என தெரிவித்திருப்பது ஏமாற்று வேலை’ என்று அவர்கள் குற்றம்சாட்டுகிறார்கள்.ஆனால், இதை எல்லாம் கண்டுகொள்ளாத முதல்வர், உரிமைத் தொகை விவகாரத்தில் பெண்கள் மத்தியில் அதிருப்தி வந்துவிடாமல் திறம்பட பணியாற்ற ஐ.ஏ.எஸ் அதிகாரியான இளம் பகவத்தை இதற்கு பொறுப்பாக நியமித்துள்ளார். திருமண ஆகாத இளம் பகவத், இதுவரை நான்கு துறைகளுக்கு செயலாளராக நியமிக்கப்பட்டு, தனது பணியை திறமையாக செய்யக்கூடியவராம்.”.“மகளிர் உதவித்தொகை என்றதும்தான் நினைவுக்கு வருகிறது. த.வா.க. தலைவர் வேல்முருகன் மீது சீறியிருக்கிறாரே அவரின் மனைவி?” “வேல்முருகன் தன் மனைவி காயத்ரியை 2018ல் விவாகரத்து செய்துவிட்டார். இது தொடர்பான தீர்ப்பில் மனைவிக்கு மாதம் வேல்முருகன் 25 ஆயிரம் ரூபாய் ஜீவனாம்சமாக தரவேண்டும் என கோர்ட் உத்தரவிட்டது. ஆனால், ஜீவனாம்ச தொகையை வேல்முருகன் இதுவரை கொடுக்கவே இல்லையாம். இதனால், காஞ்சிபுரம் நீதிமன்றத்தில் வழக்கு தொடர்ந்த காயத்ரி, ”கோர்ட் தீர்ப்பை மதித்து என் ஒருத்திக்கே வாழ்வுரிமையைத் தராத வேல்முருகன், தமிழகத்துக்கே வாழ்வுரிமையை மீட்டுத்தருவேன் என்று சொல்வது வெட்கக்கேடு. வளசரவாக்கத்தில் எனது பெயரில் ஒரு வீடு உள்ளது. அது என் அப்பா வாங்கிக் கொடுத்தது. அந்த வீட்டையும் வேல்முருகன் ஆக்கிரமித்துள்ளார். அதை முதலில் என்னிடம் ஒப்படைக்க சொல்லுங்கள்’ என்று உரிமைக்குரல் எழுப்பியிருக்கிறார். “சமீபகாலமாக டெல்லி செல்லும் விமானங்களை தமிழக அரசியல்வாதிகள் ஹவுஸ்ஃபுல் ஆக்குகிறார்கள் போல?”“காரியம் ஆகவேண்டுமென்றால் பறக்கத்தானே வேண்டும்? கவர்னர், அண்ணாமலைக்கு அடுத்தபடியாக தமிழக காங்கிரஸ் தலைவர் கே.எஸ்.அழகிரியும் அடிக்கடி டெல்லிக்கு பறக்க ஆரம்பித்திருக்கிறார். அவரது பதவிக் காலம் முடிந்து பல மாதங்கள் ஆகிவிட்டன. மூன்றே ஆண்டுகளில் திண்ணையைக் காலி செய்திருக்க வேண்டியவர் நான்கரை ஆண்டுகளாக பெவிகால் போட்டு ஒட்டிக்கொண்டிருப்பது பலருக்கும் எரிச்சலை ஏற்படுத்தியுள்ளது.இதனால், மாநில தலைவரை மாற்ற வேண்டுமென தொடர்ந்து டெல்லி காங்கிரஸ் தலைவர்களுக்கு அழுத்தம் கொடுக்கப்பட்டு வருகிறது. அதே நேரத்தில் மாநில தலைவர் பதவியை பிடிக்க செல்லகுமார், திருநாவுக்கரசர், கார்த்தி சிதம்பரம், ஜோதிமணி என ஒரு டஜன் தலைவர்கள் தீவிரம் காட்டி வருகின்றனர். ஆனால், பதவியிலிருந்து கீழே இறங்க கே.எஸ். அழகிரிக்கு விருப்பமில்லை. ஜூன் 26-ம் தேதி டெல்லி கிளம்பி சென்ற அழகிரி அங்கு சோனியா, ராகுல், மல்லிகார்ஜூன கார்கே ஆகியோரை சந்தித்து பேசியிருக்கிறார். அப்போது தனது பதவியை நீட்டிக்கும் வாய்ப்பையும் கேட்டுள்ளார். தொடர்ந்து ஜூலை 5-ம் தேதி பெங்களூரு சென்றவர், அங்கு தினேஷ் குண்டுராவை சந்தித்தும் இதே கோரிக்கையை வைத்திருக்கிறார்” என்ற வம்பு, “இதுவும் அழகிரி செய்திதான், ஆனால், வேறு அழகிரி” என்றபடி தொடர்ந்தார்..“ஜூலை 9-ம் தேதி மறைந்த தி.மு.க தலைவர் கருணாநிதியின் மனைவி தயாளு அம்மாள் பிறந்தநாளையொட்டி கோபாலபுரம் இல்லத்தில் முதல்வர் ஸ்டாலின், மு.க.அழகிரி, கனிமொழி, செல்வி, உதயநிதி உட்பட மொத்தக் குடும்பதினரும் சங்கமித்துள்ளனர். அதேநாளில் முன்னதாக அறிவாலயத்தில் திருமண நிகழ்வில் பேசிய ஸ்டாலின், ‘ஆட்சியே போனாலும் இம்மியளவும் கவலைப்பட வேண்டாம்’ என்று உடன்பிறப்புகளிடம் சூளுரைத்திருந்தார். இதுபற்றியும் சிலாகித்து அழகிரி உட்பட குடும்ப உறுப்பினர்கள் ஸ்டாலினுக்குக் கை கொடுத்து வாழ்த்து தெரிவித்திருக்கிறார்கள். இந்த சந்திப்பில் நீண்ட ஆண்டுகளுக்கு பிறகு அண்ணனை பார்த்ததில் மிகவும் நெகிழ்ந்துபோனாராம் ஸ்டாலின். இருவருமே பரஸ்பரம் உடல்நலம் உள்ளிட்ட விஷயங்களை விசாரித்துக்கொண்டதில் உதயநிதிக்குதான் மிகவும் மகிழ்ச்சியாம். அதனால்தான் “முதல்வரும் அழகிரியும் எப்போது சண்டைப் போட்டுக்கொண்டார்கள், இப்போது சமாதானம் ஆவதற்கு?” என்று தனக்கேயுரிய ஹேஷ்யத்துடன் பத்திரிகையாளர்களிடம் பேசியிருக்கிறார் உதயநிதி. இதே உற்சாகத்துடன் கிளம்பிச் சென்ற ஸ்டாலின், கையோடு, ஆளுநர் ஆர்.என்.ரவி மீது புகார் கடிதம் ஒன்றையும் ஜனாதிபதிக்கு அனுப்பியிருக்கிறார்” என்ற வம்பு முன்பாக பிஸ்கெட்டுகளை வைத்தபடி, “ ஜூலை 9ம் தேதி ‘தி.மு.க. ஃபைல்ஸ் 2’ வெளியிடப்படும் என்று டீஸர் வெளியிட்டிருந்தாரே அண்ணாமலை?” நினைவூட்டினார் சிஷ்யை.“ஃபைல்ஸ் ஒன்னில் தி.மு.க-வினரின் சொத்துப் பட்டியலை வெளியிட்டிருந்த நிலையில் இரண்டாவது ஃபைலில் அவர்களது ஊழல் பட்டியலும் வெளியிடப்படும் என்று புகார் கிளப்பியிருந்தது மலையின் ஐ.டி. கேங். ஆனால், ஜூலை 9ம் தேதியன்று சைலன்ட் மோடுக்குப் போய்விட்டார்கள். அண்ணாமலையின் ரெட் அலர்ட்தான் இதற்குக் காரணமாம். ஏற்கெனவே சொத்துப்பட்டியல் வெளியிட்டதற்கே வக்கீல் நோட்டீஸ்கள் வரிசை கட்டி நிற்கின்றன. அதனால் கொஞ்சம் பொறுமை காப்போம் என்பது அண்ணாமலையின் எண்ணமாம்.”“11 மருத்துவக் கல்லூரிகள் கட்டியதில் ஊழல் செய்ததாக வழக்கு தொடர்ந்த ராஜசேகரன், தற்போது எடப்பாடி பழனிச்சாமி மீது சி.பி.ஐ. விசாரணை கோர இருக்கிறாராமே?”“தி.மு.க. ஆட்சிக்கு வந்தபிறகு எடப்பாடி மீதான மருத்துவக் கல்லூரி புகாரில் ஆரம்பக்கட்ட விசாரணையில் ஆதாரங்கள் இருப்பது தெரியவந்ததால், விரிவான விசாரணைக்கு கடந்த ஏப்ரல் மாதம் அனுமதி அளித்தது தமிழக அரசு. லஞ்ச ஒழிப்புத்துறையில் விசாரணை தொடர்ந்துகொண்டிருக்கும்போது, திடீரென ராஜசேகர் சி.பி.ஐ விசாரணை கோர காரணம் இருக்கிறது.கே.பி பார்க் ஊழலில் ஈடுபட்ட பி.எஸ்.டி நிறுவனத்துக்கும் 11 மருத்துவக் கல்லூரிகள் கட்டிய ஊழலில் தொடர்பு உள்ளதாம். கே.பி. பார்க் ஊழலில் ஈடுபட்ட பி.எஸ்.டி நிறுவனத்தின் மீது நடவடிக்கை எடுக்காமல், தமிழ்நாடு தொழில் வளர்ச்சி நிறுவனத்தால் கட்டப்பட இருக்கும் ஃபின் டெக் சிட்டி வளாகத்தை கட்ட, அதே பி.எஸ்.டி நிறுவனத்துக்கு டெண்டர் வழங்கி திமுக அரசு கைகோத்ததால், மருத்துவக் கல்லூரி ஊழலில் ஈடுபட்ட எடப்பாடி மீதும் தி.மு.க அரசு நடவடிக்கை எடுக்காது என்ற விரக்திக்குள்ளாகித்தான் ராஜசேகரன் சி.பி.ஐ. விசாரணை கோரி நீதிமன்றத்தை நாட இருக்கிறாராம்.”யார் யாருடன் எப்போது கூட்டு வைப்பார்கள். யார் யாருக்கு எப்போது வேட்டு வைப்பார்கள் என்று எக்காலமும் யாராலும் புரிந்துகொள்ளமுடியாதவர்கள் தான் அரசியல்வாதிகள்” ரொம்ப பழைய தியரி ஒன்றை உதிர்த்தபடி புல்லட்டை ஸ்டார்ட் செய்தார் வம்பு..டெல்லி வாத்தியார்கடந்த இரு மாதங்களில் தமிழகம் மற்றும் புதுச்சேரிக்கு பலமுறை வந்துவிட்டார் மத்திய அமைச்சர் நிர்மலா சீதாராமன். மோடியின் உத்தரவே இதற்குக் காரணம். மத்திய அமைச்சர்கள் அனைவரும் அவரவர் சொந்த மாநிலங்களுக்கு அடிக்கடி சென்று கட்சி பணிகளில் ஈடுபட வேண்டும் என்கிற மோடியின் உத்தரவுக்கு பின்னால், மிகப் பெரிய அரசியல் கணக்கு இருக்கிறதாம்!புதிய நாடாளுமன்ற கட்டிடத்தில் இன்னும் சில வேலைகள் மீதம் இருக்கின்றன. அதனால், மழைக்கால கூட்டத்தொடர் அங்கு நடக்காது என்றே தெரிகிறது. தவிர, தமிழகத்தில் எப்படி ஆடி மாதத்தில் சுப காரியங்கள் செய்ய மாட்டார்களோ அதேபோல டெல்லியிலும் ஆஷாடா மகிதம் என்ற சம்பிரதாயம் உண்டு. அதனால் அந்த மாதத்தில் புதிய நாடாளுமன்றத்துக்குள் செல்ல வேண்டாம் என்று அமித் ஷாவின் ஜோசியர் சொல்லியிருக்கிறாராம்.