சுவாமி வம்பானந்தா: வாரியத் தலைவர்பதவி!... உடன்பிறப்புகளுக்கு ஸ்டாலின் பூஸ்ட்

“ஐ.பி.எஸ் அதிகாரிகள் மாற்றத்தையும் முன்கூட்டியே சொல்லி…” பாராட்ட எத்தனித்த சிஷ்யையைக் கைகாட்டி தடுத்த வம்பு, நேரடியாக செய்திகளை வாசிக்கத் தொடங்கினார்….“மே 16ம் தேதி லைகாவில் ரெய்டு நடந்த அதே நேரத்தில் சென்னை ‘லீலா பேலஸ்’ ஹோட்டல் அருகே ஆளும் கட்சிக்கு நெருக்கமான வி.ஐ.பி ஒருவர் வீட்டிலும் ரெய்டு நடந்திருக்கிறது. அந்தத் தகவலை அப்படியே அமுக்கிவிட்டார்கள். சென்னையில் 11 இடங்களை குறி வைத்து, 8 இடங்களில் நடந்த அதிரடி ரெய்டில் ’லைகா’ நிறுவனத்தில் மட்டும் சில ஆவணங்களைக் கைப்பற்றி இருக்கிறார்கள். அதில் அந்த நிறுவனத்தில் வி.ஐ.பி-க்கள் பலர் செய்திருந்த முதலீடு பற்றிய விவரங்கள் இருந்தனவாம். தவிர சில சீக்ரெட் பாஸ்வேர்டுகளும் சிக்கியிருக்கின்றன. இதை நூல் பிடித்து போனபோது பணிவுப் பிரமுகரின் வாரிசும் பல கோடிகளை லைகாவில் கொட்டியது தெரியவந்திருக்கிறது. ஆனால், இப்போதைக்கு ஆக்ஷன் எதுவும் வேண்டாம் என்று டெல்லியில் இருந்து சிக்னல் கொடுத்திருக்கிறார்கள்...””பேச்சுவார்த்தை நடத்துவார்களோ...?” “அது அடுத்த ரெய்டில் தெரிந்துவிடும். விலையில்லா சைக்கிள் திட்டம் குறித்து சமீபத்தில் சோஷியல் மீடியாக்களில் ஒரு தகவல் வைரலானது. அதாவது, ’மற்ற மாநிலங்களைவிட தமிழக அரசு தரப்பில் கொள்முதல் செய்யப்படும் சைக்கிளின் விலை அதிகமாக இருக்கிறது’ என்பதே அது. தவிர, இதற்கான விலை ஒப்பீட்டு பட்டியலையும் வெளியிட்டு அரசு தரப்புக்கு அதிர்ச்சியைக் கொடுத்திருக்கிறார்கள் நெட்டிசன்கள். குறிப்பிட்ட சைக்கிளை மற்ற மாநிலங்கள் 3,600 ரூபாய்க்கு வாங்கியுள்ள நிலையில் தமிழக அரசு மட்டும் 4,950 ரூபாய்க்கு வாங்கியிருக்கிறது என்பதுதான் அவர்கள் வைக்கும் புகார்... ஆனால் அதிகாரிகள் தரப்போ, ‘முதல்வர் இதில் குளறுபடிகள் எதுவும் நேர்ந்துவிடக் கூடாது என்பதில் கடும் கண்டிப்புடன் இருக்கிறார். அவரை மீறி தவறு நடக்க வாய்ப்பே இல்லை. ஜி.எஸ்.டி., வாட் வரி , தொழிற்சாலையில் இருந்து பள்ளிகளுக்கு சப்ளை செய்யும் போக்குவரத்து செலவு என அனைத்தையும் சேர்த்துதான் 4,950 ரூபாய்க்கு தமிழக அரசு சைக்கிள்களை கொள்முதல் செய்திருக்கிறது. மேலும் நடப்பாண்டில் 11 லட்சம் சைக்கிள் வாங்க தமிழக அரசு டெண்டர் விட்டிருக்கிறது. அதில் இன்னும் 250 ரூபாய் குறைத்திருக்கிறோம்’ என்கிறார்கள்.”“அ.தி.மு.க-வில் என்ன நடக்கிறது சுவாமி?”“மே 17ம் தேதி சென்னையில் நடந்த அ.தி.மு.க மாவட்டச் செயலாளர்கள் கூட்டத்தில் சீனியருக்கும் சீனியருக்கும் சண்டை. கூட்டத்தில் பேசிய மாஜி அமைச்சர் முனுசாமி, ’கர்நாடகா தேர்தலில் பா.ஜ.க படுதோல்வியை சந்தித்துள்ளது. இது நாடு முழுவதும் எதிரொலிக்கும். எனவே நாடாளுமன்றத் தேர்தலின்போது நாம் கரிசனம் காட்ட கூடாது’என்று மூச்சுவிடாமல் வாசித்துக்கொண்டிருக்கும்போதே குறுக்கிட்டார் மாஜி அமைச்சர் வேலுமணி. ‘மத்தியில் மீண்டும் பா.ஜ.க ஆட்சிதான் அமைய போகிறது. தேவை இல்லாமல் பா.ஜ.க-வை பகைத்துக்கொண்டால், நமக்குதான் தலைவலி’ சொல்லியிருக்கிறார். பதிலுக்கு முனுசாமி, ‘நீங்க வேணும்னா பயப்படலாம்...’ என்கிற ரீதியில் எகிற அங்கு பெரும் கூச்சல், குழப்பம் ஏற்பட்டிருக்கிறது. பதறிப்போன எடப்பாடி பழனிசாமி, “பஞ்சாயத்து முடிஞ்சுது... கிளம்புங்க... கிளம்புங்க’என்று துண்டை விசிறி படாதபாடுபட்டு சபையைக் கலைத்திருக்கிறார்.. “கனிம வளத்துறையில் ஏதோ கருகும் வாடை அடிக்கிறதே?” “ கொங்கு மண்டலத்தில் நடக்கும் கனிமவளக் கொள்ளை பற்றி ஆரம்பத்திலேயே ஆதாரத்துடன் ‘அலாரம்’அடித்தது நமது குமுதம் ரிப்போர்ட்டர் இதழ்தான். ஆனாலும், கட்டிங்கை விடுவதற்கு மனமில்லாமல் அதிகாரிகள் அலட்சியம் காட்டினர். இதனால் பாதிக்கப்பட்ட திருப்பூர் மாவட்ட விவசாய அமைப்பினர் மாவட்ட ஆட்சியரிடம் புகார் கொடுத்ததை அடுத்து அதிரடியாக களமிறங்கினார் ஆட்சியர் வீனித். இதில் கனிம வளத்துறை உதவி இயக்குநர் வள்ளலின் வண்டவாளம் தண்டவாளம் ஏறியிருக்கிறது. அனுமதிக்கப்பட்ட அளவைத் தாண்டி கனிமங்களை அள்ள அனுமதித்தது, குவாரிகள் தரப்பில் டீல் பேசுவதற்காக அலுவலகத்தில் சம்பந்தமே இல்லாத ஒருவரை அமர வைத்திருந்தது என்று அம்பலப்பட்டிருக்கிறார் உதவி இயக்குநர். ஆனாலும், ஆட்சியரை லெஃப்டில் டீல் செய்திருக்கிறார் வள்ளல். காரணம், சீனியர் அமைச்சர் ஒருவரின் ஆதரவுதானாம். இதற்கிடையே சில நாட்களில் ஆட்சியரை பணியிட மாற்றம் செய்தது தமிழக அரசு. கடுப்பான ஆட்சியர், வள்ளலை பணியிலிருந்து விடுவித்து உத்தரவிட்ட பிறகே கிளம்பியிருக்கிறார். ஆனாலும் அமைச்சரின் ஆசியால் மீண்டும் அந்த பதவியில் வந்தமரும் முயற்சியில் இருக்கிறாராம் வள்ளல்...”கொறிக்க ஸ்நாக்ஸ் கொடுத்த சிஷ்யை, “பா.ஜ.க தகவல்கள் ஏதாவது இருக்கிறதா?” என்று சுவாமியை பல்ஸ் பார்த்தார்.“கர்நாடக தேர்தலுக்கு பிறகு சூழ்நிலைக்கேற்றபடி பா.ஜ.க வளைந்து செல்லும் என்று எதிர்பார்க்கப்பட்டது. ஆனால், நிலைமை அப்படி இல்லை. கோவையில் மே 19ம் தேதி நடந்த செயற்குழுவில் அ.தி.மு.க கூட்டணியில் 10-க்கும் மேற்பட்ட தொகுதிகளை வாங்கவேண்டும் என அழுத்தம் கொடுக்கப்பட்டிருக்கிறது. தவிர, கோவை தொகுதியில் பா.ஜ.க-தான் போட்டியிட வேண்டும் என்றும் வலியுறுத்தியிருக்கிறார்கள். “கைவசம் இருக்கும் இரண்டாயிரம் ரூபாய் நோட்டுகளை என்ன செய்வதாக உத்தேசம் சுவாமி. சிஷ்யைக்கு கொஞ்சம் கருணை காட்டலாமே?”சிஷ்யையின் கமென்ட்டை கண்டுக்கொள்ளாத வம்பு, “ஒரு குரூப் 56 ஆயிரம் கோடி ரூபாய் அளவுக்கு கருப்பு பணத்தை இரண்டாயிரம் ரூபாய் நோட்டுக்களாக பதுக்கி வைத்திருப்பதை மத்திய அரசு கண்டுபிடித்திருக்கிறது. அதை முடக்கத்தான் பண மதிப்பிழப்பு அறிவிப்பு என்கிறது டெல்லி பட்சி. நாடாளுமன்றத் தேர்தல் நெருங்கி வரும் நிலையில் எதிர்க்கட்சிகளின் பணபலத்தை முடக்கி, தேர்தல் பணிகளின் வேகத்தை குறைக்க வேண்டும் என்பதும் அடிசனல் அஜெண்டாக்கள்!” “ஓஹோ... தி.மு.க.செய்திகள் ஏதாவது...” “தி.மு.க ஆட்சிக்கு வந்த புதிதில் வாரியத் தலைவர் பதவிகளை நிரப்ப வேண்டும் என்பதில் கவனம் செலுத்தினார் முதல்வர் ஸ்டாலின். விஷயம் வெளியே ‘லீக்’ஆகவே கூட்டணி கட்சி தலைவர்கள் ‘கோட்டா’கேட்கத் தொடங்கினர். இதனால் குழப்பம் ஏற்படவே வாரியங்களுக்கு தலைவர் பதவிகளை நிரப்புவதை அப்படியே நிறுத்திவைத்தார் முதல்வர். இப்போது நாடாளுமன்றத் தேர்தல் நெருங்குவதால் தனது கட்சி நிர்வாகிகளுக்கு ‘பூஸ்ட்’ கொடுக்க வேண்டும் என்று நினைக்கிறார் முதல்வர். இதைத் தொடர்ந்து கட்சிக்கு உண்மையாக உழைப்பவர்களைப் பற்றிய விவரங்களை சேகரித்து வருகிறார்கள். காலியாக இருக்கும் வாரியத் தலைவர் பதவிகளுக்கு விரைவில் அறிவிப்பு வரலாம். இது ஒருபுறமிருக்க, தி.மு.க. உயர்நிலைச் செயல்திட்டக் குழுவின் கூட்டம் அக்கட்சி தலைவர் ஸ்டாலின் தலைமையில் மே 21 அன்று நடைபெற்றது. இந்தக் கூட்டத்தில் கருணாநிதியின் நூற்றாண்டு விழாவை அனைத்து மாவட்டங்களிலும் சிறப்பாகக் கொண்டாடும் வகையில் 2023 ஜூன் 3 தொடங்கி, 2024 ஜூன் 3 வரை ஓராண்டு காலத்திற்குத் தொடர்ச்சியான நிகழ்ச்சிகளை நடத்த வேண்டும் என்பது உட்பட பல்வேறு தீர்மானங்கள் நிறைவேற்றப்பட்டன” என்ற வம்பு கடைசியாக, “செலவுகளுக்குத்தான் தி.மு.க நிர்வாகிகள் யோசிப்பதாக தகவல்...” என்றபடி சைக்கிளை மிதித்துக் கிளம்பினார்!.பாக்ஸ்டெல்லி வாத்தியார்ஜப்பானில் நடந்த ’குவாட்’ கூட்டமைப்பு சந்திப்பில் பிரதமர் மோடியிடம் அமெரிக்கா அதிபர் ஜோ பைடன் ஆட்டோகிராப் கேட்டது தாமரை தரப்பினரை உச்சிக்குளிர வைத்துள்ளது. மேலும், அடுத்த மாதம் மோடியின் அமெரிக்க பயணத்தில் அவரிடம் 50 பேர் ஆட்டோகிராஃப் வாங்க ஆர்வமுடன் இருக்கிறார்கள் என்றும் பைடன் சொல்லியிருக்கிறார். இதையடுத்து, அடுத்த நாடாளுமன்றத் தேர்தலில் மட்டுமல்ல… இந்தியாவின் நிரந்தர பிரதமர் மோடி என்று கூவுகிறார்கள் அவரின் ஆதரவாளர்கள்!கர்நாடகா அமைச்சரவையில் பெண்களுக்கு இடம் கொடுக்காதது சர்ச்சையைக் கிளப்பியிருக்கிறது. இது பற்றி பல பெண் எம்.எல்.ஏ-க்கள் பிரியங்கா காந்தியிடம் முறையிட்டுள்ளனர். அதற்கு பிரியங்கா, ” விரைவில் ஒரு முக்கிய பதவிக்கு பெண்ணொருவர் நியமிக்கப்படுவார். அதன் பிறகு அமைச்சரவையிலும் பெண்கள் வலம்வருவார்கள்” என்று கண்சிமிட்டினாராம். “கார்கே கழற்றிவிட்டு அந்த இடத்தில் பிரியங்கா வருவதற்கான சிக்னல்தான் இது” என்கிறது டெல்லி வட்டாரம்!

சுவாமி வம்பானந்தா: வாரியத் தலைவர்பதவி!... உடன்பிறப்புகளுக்கு ஸ்டாலின் பூஸ்ட்

Related Stories