சப்ஸ்டியூட் பன்னீர்...சர்ப்ரைஸ் தினகரன்...அ.ம.மு.க. புது ட்விஸ்ட்!

அரியன் பாபுபடங்கள் : ம.செந்தில்நாதன் விளையாட்டு அணிகளில் அவசர தேவைக்கு என்று மாற்று வீரரை ஓரமாக உட்கார வைத்திருப்பார்கள். அரசியலில் ஓ.பன்னீர்செல்வத்தின் நிலைமை அப்படியாகிவிட்டது, அ.தி.மு.க-வில் அம்மாவுக்கு பதிலாக மூன்று முறை தமிழக முதல்வராக இருந்த பன்னீரை இப்போது சின்னம்மாவுக்கு பதிலாக அ.ம.மு.க தலைவராக்க திட்டமிட்டுள்ளார் டி.டி.வி.தினகரன்!.அ.தி.மு.க.வை மீட்டெடுக்க என்ற பீடிகையுடன் அ.ம.மு.க. கட்சியைத் தொடங்கினார், டி.டி.வி.தினகரன். ஆனால், அவர் நினைத்தது எதுவும் நடக்கவில்லை. அதனால், சசிகலாவை அ.ம.மு.க-வுக்குத் தலைவராக்கி, அ.தி.மு.க-வுக்கு டஃப் கொடுக்கலாம் என்று திட்டமிட்டார். அதிலும் மண் அள்ளிப் போட்டுவிட்டார் சசி. அடுத்து என்ன என்று அவர் அகோர பசியோடு யோசித்தபோது, மட்டன் பிரியாணிக்கு ஆடு சிக்கியதுபோல சிக்கியிருப்பவர்தான் பன்னீர்! இதுகுறித்து அ.ம.மு.க.வின் மூத்த தலைவர் ஒருவரிடம் பேசினோம். “தினகரன் தனிக்கட்சியை தொடங்கியபோது அ.தி.மு.க.வை மீட்டெடுக்கவே அ.ம.மு.க. என்றார். கொரோனா ஊரடங்கு காரணத்தால் தள்ளிப்போன முதல் பொதுக்குழு 2022 ஆகஸ்ட் 15-ம் தேதி வானகரத்தில் நடைபெற்றது. அ.ம.மு.க. சட்ட விதிகளின்படி பொதுச்செயலாளர், துணைத் தலைவர் பொறுப்புகளுக்கான பதவிக்காலம் 2023ம் ஆண்டு ஏப்ரல் மாதத்தோடு நிறைவடைந்துவிட்டது. மேலும் கட்சி தொடங்கி ஐந்தாண்டுகள் நிறைவடைந்துவிட்டது. ஆனாலும், சசிகலாவுக்காகவே தலைவர் பதவியை காலியாக வைத்திருந்தார் தினகரன். இந்த விஷயத்தில் சசிகலா, ஆரம்பத்தில் இருந்தே ஆர்வம் காட்டவில்லை. அ.ம.மு.க. தலைமை பொறுப்பை ஏற்றால், பொதுச்செயலாளர் வழக்கில் சசிகலாவிற்கு பின்னடைவு ஏற்படும் என்பதுதான் அதற்குக் காரணம். தவிர, அ.தி.மு.க-வை ஒருங்கிணைக்கும் முயற்சியில் சசிகலா ஈடுபடுவதாலும் இதை அவர் தவிர்க்கிறார். .இதுவே தினகரனுக்கும் சசிகலாவுக்கும் மோதல் ஏற்படக் காரணமாக அமைந்துவிட்டது. இதனாலேயே ஜெயா டிவியில் தினகரன் தொடர்பான செய்திகள் நேரடி ஒளிபரப்பு செய்வது நிறுத்தப்பட்டது. அதற்கு பதிலடி கொடுக்கும் வகையில்தான், சில மாதங்களாக அ.ம.மு.க-வின் அறிவிப்புகள், அறிக்கைகளில் சசிகலா படம் இடம்பெறுவதில்லை. கடந்த ஜூன் 20-ம் தேதி நடைபெற்ற அ.ம.மு.க. செயற்குழு மேடை பேனரில்கூட சசிகலா படம் இடம்பெறவில்லை.இன்னொரு பக்கம் ஐந்தாண்டுகளுக்கு மேலாக கட்சியின் தலைவர் பதவி காலியாக இருப்பதால், தேர்தல் ஆணையமும் தினகரனை நெருக்க ஆரம்பித்துவிட்டது. 2022ம் ஆண்டு பொதுக்குழு தீர்மானங்களை தேர்தல் ஆணையத்திற்கு அனுப்பி வைத்தபோதே, தலைவர் பதவியை விரைவில் நிரப்ப வேண்டுமென நோட்டீஸ் அனுப்பி, நிபந்தனை விதித்தே அப்போதைய பொதுக்குழு தீர்மானத்தை ஏற்றுக்கொண்டது. ஆண்டுக்கு இரண்டு முறை செயற்குழு, ஒரு பொதுக்குழுவை கூட்ட வேண்டும் என்பது அ.ம.மு.க. கட்சி விதி. அதன்படி, வரும் ஆகஸ்ட் மாதம் 15-ம் தேதிக்குள் அடுத்த பொதுக்குழுவை தினகரன் கூட்ட வேண்டும். எனவே, அதற்குள் அ.ம.மு.க. தலைவரை நியமிக்க வேண்டிய கட்டாயம் தினகரனுக்கு ஏற்பட்டுள்ளது. இவ்வளவு காலம் தலைவர் பதவி குறித்து தினகரன் பேசியதே இல்லை. ஆனால், நடந்து முடிந்த செயற்குழுவில் பேசியபோது, ‘முன்னாள் முதல்வர் ஓ.பன்னீர்செல்வத்துடன் ஒன்றாக இணைந்துதான் செயல்படப் போகிறோம். மறுபடியும் அவரை சந்தித்து அடுத்தகட்ட நடவடிக்கைகள் குறித்துப் பேச இருக்கிறோம்’ என்று ட்விஸ்ட் வைத்தார்..அதோடு, அ.ம.மு.க. தலைவருக்கான தேர்தல் விரைவில் நடைபெறும் எனவும் செயற்குழுவில் தீர்மானம் நிறைவேற்றப்பட்டுள்ளது. எனவே, அ.ம.மு.க. தலைவர் பதவி தொடர்பாக டி.டி.வி.தினகரன் ஓ.பன்னீர்செல்வத்தை விரைவில் சந்தித்துப் பேசுவார் எனத் தெரிகிறது” என்றார். தினகரனை விட்டு சசிகலா ஒதுங்குவது ஏன்? என்று அவரது ஆதரவாளர் ஒருவரிடம் கேட்டோம். “சசிகலா, தான் மறைந்தால், தன் உடல் மீது அ.தி.மு.க. கொடி போர்த்தி மரியாதை செய்யப்படவேண்டும் என்பதில் உறுதியாக உள்ளார். அதோடு, அ.தி.மு.க.வை ஒருங்கிணைக்க திவாகரன் மூலம் தொடர்ந்து பேச்சுவார்த்தை நடத்தி வருகிறார். தினகரனும் ஓ.பி.எஸ்.ஸும் ஒன்று சேர்ந்துவிட்டால், முக்குலத்தோர் வாக்குகளைப் பெற சசிகலாவை தங்களுடன் இணைத்துக்கொள்வதே சரியாக இருக்கும் என எடப்பாடியும் எண்ணத் தொடங்கிவிட்டார். எனவே சசிகலாவிற்கு அதிகாரம் இல்லாத கௌரவமான பதவியைக் கொடுக்கலாம் என்றும் எடப்பாடி ஆலோசித்து வருகிறார். அதனால்தான், பன்னீர் சந்திப்பை தவிர்க்க முன்னாள் அமைச்சர் வைத்திலிங்கம் இல்லத் திருமணத்துக்கூட அவர் வரவில்லை. சசிகலாவின் விருப்பம், அ.தி.மு.க-வில் இடம்பிடிப்பதே. ஆகையால், அ.ம.மு.க. எந்தத் திசையில் போனாலும் அவருக்குக் கவலை இல்லை. தினகரனைப் பொறுத்தவரை, ஆகஸ்ட் 6-ம் தேதி நடக்கவுள்ள பொதுக்குழு கூட்டத்திற்குள் அ.ம.மு.க. தலைவரை அடையாளம் கண்டு பொதுக்குழுவில் அறிவிக்க வேண்டிய கட்டாயத்திற்குத் தள்ளப்பட்டிருக்கிறார். தற்போது அவருக்கு இருக்கும் ஒரே சாய்ஸ் பன்னீர்தான். டெல்லி பா.ஜ.க மேலிடமும் தங்கள் கூட்டணியில் அ.தி.மு.க.வுக்கு மாற்றாக இவர்கள் இருவரையும் இணைக்கவும், அ.தி.மு.க. அல்லாத கட்சிகளை ஒருங்கிணைத்து மெகா கூட்டணியுடன் நாடாளுமன்றத் தேர்தலை சந்திக்கவும் திட்டமிடுகிறது” என்றார்.இதுகுறித்து அ.ம.மு.க. கொள்கை பரப்புச் செயலாளர் சி.ஆர்.சரஸ்வதியிடம் பேசினோம். “தலைவர் தேர்தல் தொடர்பாக செயற்குழுவில் முடிவு செய்தபடி, பொதுச்செயலாளர் உரிய முடிவை எடுப்பார்” என சுருக்கமாக முடித்துக்கொண்டார். இந்த பதவியாவது பன்னீரிடம் நிலைக்குமா?