அடுத்தடுத்த தப்பால் அம்பேல் ஆகும் ஆவின்பால்

-பொய்கை.கோ.கிருஷ்ணா“வெளுத்ததெல்லாம் பால் ஆகாது. ஆவின் பால் தரம் வேறு எதிலும் இருக்காது!” என்றெல்லாம் தமிழக பால்வளத்துறை அமைச்சர் மனோ தங்கராஜ் மார்தட்டி வரும் நிலையில், தர்மபுரி பால் உற்பத்தியாளர்கள், தனியார் பால் நிறுவனங்களை நோக்கி கூட்டம் கூட்டமாகத் தாவிக் கொண்டிருக்கிறார்கள்.ஏன்? என்று, தர்மபுரி மாவட்டம் மாவேரிப்பட்டி கூட்டுறவு பால் உற்பத்தியாளர் சங்க உறுப்பினர் மூர்த்தியிடம் கேட்டோம். “மாவேரிப்பட்டி பால் கூட்டுறவு சங்கத்தில் 100 பேர் அங்கத்தினர்களாக இருந்தனர். ஒரு வேளைக்கு 20 கேன் பால் ஏற்றி அனுப்பினோம். இப்போது பலர் விலகிவிட்டதால், ஒரு நாளைக்கு 10 கேன்தான் போகிறது. இதற்குக் காரணம், சொசைட்டி செகரட்டரி தென்னரசு மற்றும் மாவட்ட நிர்வாகத்தின் செயல்பாடுகள்தான்..பால் டெஸ்ட் என்ற பெயரில் 1 லிட்டருக்கு 100 மில்லி பிடித்தம் செய்வது, தரமில்லை, ஃபேட், எஸ்.என்.எஃப் வரவில்லை என்று குறைசொல்லி லிட்டருக்கு 28 முதல் 32 ரூபாய் வரையே ரேட் போடுவது, பணத்தைப் பட்டுவாடா செய்வதில் தாமதம் என்று, தென்னரசுவின் அட்ராசிட்டி மிக அதிகம்.இவர் குறைசொல்லும் பாலை, தனியார் கம்பெனியில் கொண்டுபோய் டெஸ்ட் செய்தால், அளவு, தரம் எல்லாமே அதிகமாக வருகிறது. இதுகுறித்து கேட்டால், ‘உங்களால் எதுவும் பண்ண முடியாது’ என்று தெனாவெட்டாகப் பேசுகிறார். டி.ஆர்.ஓ., எஸ்.ஓ. என நேரில் சென்று புகார் அளித்தும் பலனில்லை. இதனாலேயே ஏராளமானோர் தனியார் பால் நிறுவனங்களை நோக்கித் தாவிவிட்டார்கள். இப்படியே போனால், சங்கத்தையே மூடவேண்டிவரலாம்!” என்றார், வாட்டத்தோடு..இதுகுறித்து தமிழக விவசாய சங்க மாநிலத் தலைவர் ராமு கவுண்டர் “தமிழகம் முழுவதும் தினமும் சுமார் 36 லட்சம் லிட்டர் பாலை ஆவின் கொள்முதல் செய்கிறது. அதேசமயம், தனியார் நிறுவனங்கள் தினமும் 2 கோடியே 57 லட்சம் லிட்டர் பால் கொள்முதல் செய்கின்றன. அதற்குக் காரணம் ஆவினில் 1 லிட்டர் பசும்பாலுக்கு 32 ரூபாயும், எருமைப்பாலுக்கு 42 ரூபாயும்தான் தருகின்றனர். தனியாரில் 1 லிட்டர் பசும்பாலுக்கு 42 முதல் 45-ரூபாயும், எருமைப் பாலுக்கு 65 ரூபாயும் தருகிறார்கள்..தமிழகத்தில் ஏற்கெனவே உள்ள தனியார் பால் நிறுவனங்கள் போதாதென்று குஜராத்தைச் சேர்ந்த அமுல் நிறுவனமும் இங்கே காலூன்ற முயற்சிக்கிறது. தனியாருக்குச் செல்வதைத் தடுக்க வேண்டும் என்றால், ஆவின் மற்றும் பால் உற்பத்தியாளர்கள் கூட்டுறவுச் சங்கங்களை மறுசீரமைப்பு செய்ய வேண்டும்’’ என்றார்.. இதுகுறித்து டெய்ரி டி.ஆர்.ஓ. கோவிந்தசாமியிடம் கேட்டதற்கு, “மாவேரிப்பட்டி பால் உற்பத்தியாளர் சங்கத்தில் பல்வேறு முறைகேடுகள் நடந்தது உண்மைதான். அதில் சங்கத்தின் மெம்பர்ஸ் கூடி முடிவெடுக்க வேண்டும். எங்கள் மீது குறைசொல்லிப் பயன் இல்லை” என்று முடித்துக்கொண்டார். விளக்கம் கேட்க பால்வளத் துறை அமைச்சர் மனோ தங்கராஜை தொடர்புகொண்டோம். குறுந்தகவல் அனுப்பினோம். நோ ரெஸ்பான்ஸ்!அடுத்தடுத்து நடக்கிற தப்பால் களைகட்டத் துவங்கியிருக்கும் தனியார் பால்.