மாநில கல்விக் கொள்கையா, தேசிய கல்விக் கொள்கையா? கொந்தளிக்கும் கல்வியாளர்கள்

நாடுமுழுதும் ஒரே கல்வி என்ற திட்டத்துடன் மத்திய பா.ஜ.க அரசு, மாநிலக் கல்வித்துறையில் மூக்கை நுழைத்தபோது, அதற்கு எதிராக சாட்டையைச் சுழற்றிய முதல்வர் ஸ்டாலின், “தனியாக மாநிலக் கல்விக் கொள்கையை உருவாக்குவோம்” என்று சூளுரைத்தார். அதற்காக ஒரு குழுவும் அமைக்கப்பட்டது. ஆனால் முதல்வரின் முதன்மைச் செயலர் உதயசந்திரனுடன் முட்டல், மோதல், விலகல் என சிக்கி சீரழிகிறது அந்தக் குழு!என்னதான் நடக்கிறது என்று கல்வியாளர் ஒருவரிடம் பேசினோம். “தி.மு.க. ஆட்சிக்கு வந்ததுமே, ‘மும்மொழிக் கொள்கை, அனைத்து இளங்கலை படிப்புகளுக்கான நுழைவுத் தேர்வு’ என்கிற மத்திய அரசின் புதிய கல்விக் கொள்கையை கடுமையாக எதிர்த்தது. 2021-22ம் ஆண்டுக்கான இடைக்கால பட்ஜெட்டை தாக்கல் செய்யும்போது, புதிய கல்விக் கொள்கையை நிராகரித்து, தமிழ்நாட்டுக்கென ஒரு புதிய கல்விக் கொள்கையை உருவாக்கும் அறிவிப்பை தி.மு.க. அரசு வெளியிட்டது..தொடர்ந்து 2022, ஏப்ரல் 5ம் தேதி முதல்வர் மு.க.ஸ்டாலின், டெல்லி உயர்நீதிமன்ற முன்னாள் தலைமை நீதிபதி டி.முருகேசன் தலைமையிலான 13 பேர் கொண்ட குழுவை அமைத்தார். அந்தக் குழுவில் பல்வேறு பேராசிரியர்களும், கல்வியாளர்களும் இடம் பெற்றனர். இதுதொடர்பான முதல் ஆலோசனைக் கூட்டம் தலைமைச் செயலகத்தில் ஸ்டாலின் தலைமையில் நடந்தது.இந்தக் குழுவினர்,தங்கள் பரிந்துரைகளை சமர்ப்பிக்க ஓராண்டு அவகாசம் கேட்டிருந்தனர். அனைவருக்கும் உயர்கல்வி, தேர்வு முறைகளில் சீர்த்திருத்தம் உள்ளிட்ட 10 வழிகாட்டுதல்களை அடிப்படையாகக்கொண்டு மாநில கல்விக் கொள்கையை தயார் செய்யவேண்டும் என்று முதல்வர் உத்தரவிட்டிருந்தார்.குழு அமைக்கப்பட்டு ஓராண்டு நிறைவடைந்து, தங்கள் பரிந்துரைகளை சமர்ப்பிக்கவேண்டிய நேரத்தில் அந்தக் குழுவின் ஒருங்கிணைப்பாளராகவும், உறுப்பினராகவும் செயல்பட்டு வந்த பேராசிரியர் ஜவஹர் நேசன், முதல்வரின் முதன்மைச் செயலாளர் உதயச்சந்திரன் மீது புகார்களை முன்வைத்து குழுவிலிருந்து விலகியிருப்பது கவலையளிக்கிறது” என்றார்..இந்த விவகாரம் குறித்து ஜவஹர் நேசனிடம் பேசினோம். “மாநில கல்விக் கொள்கையை வகுத்திட உருவாக்கப்பட்ட குழுவின் ஆலோசனைக் கூட்டங்கள் சுமார் 17 முறை நடந்துள்ளது. பிப்ரவரி 28-ம் தேதி குழுத் தலைவர் தலைமையில் ஓர் ஆலோசனைக் கூட்டம் நடைபெற்றது. அதற்கான அழைப்புக் கடிதத்தை 15க்கும் மேற்பட்ட துறை சார்ந்த செயலாளர்களுக்கு பிப்ரவரி 2-வது வாரத்தில் கடிதம் அனுப்பியிருந்தார்கள். ஆனால், எனக்கு மட்டும் கூட்டம் நடைபெறுவதற்கு 2 நாட்களுக்கு முன்புதான் கடிதம் அனுப்பப்பட்டது.அந்தக் கூட்டத்தில் குழுத் தலைவர் முருகேசன், தேசிய கல்விக் கொள்கையை மாநில கல்விக் கொள்கையில் கொண்டு வருவது குறித்து துறை சார்ந்த செயலாளர்களின் கருத்துகளை கோரினார். அதற்கு அப்போதே நான் எதிர்ப்பு தெரிவித்தேன். ‘அதிகாரிகளை அழைத்து ஆலோசனை நடத்துவதை குழுக் கூட்டத்தில் வைத்துக்கொள்ளாமல் தனியாக வைத்துக் கொள்ளுங்கள்’ என்றேன். மேலும், மத்திய அரசின் புதிய கல்விக் கொள்கையைப் புறக்கணித்து மாநில கல்விக் கொள்கையை உருவாக்கத்தான் இந்தக் குழு அமைக்கப்பட்டுள்ளது. அதற்குப் புறம்பாகச் செயல்படுகிறார்கள் என்று குழுத் தலைவரிடம் பதிவு செய்தேன். ஆனால், எனது கருத்தை தலைவர் ஏற்காததால் அந்தக் கூட்டத்தைப் புறக்கணித்துவிட்டுச் சென்றேன்..அதற்குப் பிறகு, அவர்களின் செயலுக்கு ஒத்துழைக்குமாறு அதிகாரிகள், குழுத் தலைவர்கள் மூலம் உதயச்சந்திரன் எனக்குத் தொடர்ந்து அழுத்தம் கொடுத்தார். நான் ஒத்துழைக்க மறுத்ததால், என்னை நேரில் அழைத்த உதயச்சந்திரன், ஒருமையில் பேசியதோடு, ‘ குழு கருத்துகளை எல்லாம் தூக்கி எறிந்துவிட்டு, மாநில கல்விக் கொள்கையை நானே எழுதப் போகிறேன்’ என்றார்.இதன் பிறகு மார்ச் 12-ம் தேதி குழுத் தலைவர் தலைமையில் மாநில கல்விக் கொள்கை கூட்டம் தலைமைச் செயலகத்தில் நடைபெறும்; அரசு அதிகாரிகள் கருத்துக் கேட்டு கல்விக் கொள்கை உருவாக்கப்படும் என்று ஒரு தீர்மானம் நிறைவேற்றப்பட்டது. இதற்கும் நான் எதிர்ப்பை பதிவு செய்தேன். இதுகுறித்து விரிவான கடிதத்தையும் முதல்வருக்கு அனுப்பினேன். இரண்டு வாரங்களாகியும் முதல்வரிடமிருந்து பதில் வராததால், குழுவில் இருந்து விலகிவிட்டேன்” என்றார்.பொதுக்கல்விக்கான மாநில மேடையின் பொதுச்செயலாளர் பிரின்ஸ் கஜேந்திரபாபு, “மாநில கல்விக் கொள்கை வகுக்கும் குழு தனது கடமையைச் சுதந்திரமாக செய்கிறதா அல்லது அதிகாரிகள் சிலரால் வழிநடத்தப்பட்டு, தேசிய கல்விக் கொள்கை 2020-யை தமிழில் பெயர் சூட்டி, ‘மாநில கல்விக் கொள்கை’ என்ற பெயரில் தரப்போகிறதா? இந்த அச்சம் அனைவர் மத்தியிலும் எழுந்துள்ளது” என்று சந்தேகத்தைக் கிளப்பினார்.இதுகுறித்து உதயச்சந்திரனை தொடர்புகொண்டு விளக்கம் கேட்க முயன்றோம். அவர் நமது அழைப்பை ஏற்கவில்லை. நமது குறுந்தகவலுக்கும் பதில் அளிக்கவில்லை.இதையடுத்து, மாநிலக் கல்விக் கொள்கை குழுத் தலைவர் முருகேசனிடம் பேசினோம். “ஜவஹர் நேசனின் குற்றச்சாட்டுகள் ஆதாரமற்றவை. மாநில கல்விக் கொள்கைக் குழு, சீரிய முறையில் செயல்பட்டு வருகிறது. தமிழ்நாட்டிற்கென சுதந்திரமான தனித்துவமான கல்விக் கொள்கையை உருவாக்க வேண்டும் என்ற நோக்கில் பயணித்து வருகிறோம்” என்றார்.ஈகோ மோதலில் மாணவர்களின் எதிர்காலத்தை பாழாக்கிவிட வேண்டாம்! - ரய்யான் பாபு

மாநில கல்விக் கொள்கையா, தேசிய கல்விக் கொள்கையா? கொந்தளிக்கும் கல்வியாளர்கள்

Related Stories