தி.மு.க. வெளியே... அ.தி.மு.க. உள்ளே! அம்பர் கிரீஸ் கடத்தல்

அம்பர் கிரீஸ். ஆழ்கடலில் இருந்து மேலே வரும்போது திமிங்கிலம் துப்பும் கழிவு. திமிங்கிலத்தின் எச்சம்தான். என்றாலும் ஆண்மைக் குறைவுக்கான மருந்தில் மூலப்பொருள் என்ற நம்பிக்கையும், அரேபிய வாசனை திரவியத்தில் பயன்பாடும் இதன் மதிப்பை எகிறச் செய்துள்ளன.அம்பர் கிரீஸுக்கு உலகம் முழுக்க பெரும் மதிப்பு என்பதால் அப்பாவித் திமிங்கிலங்கள் அநியாயமாகக் கொல்லப்படுவதும் நிகழ்கிறது. திமிங்கில வேட்டையைத் தவிர்க்கவே, இந்தியா அம்பர் கிரீஸைத் தடைசெய்திருக்கிறது. இதை வைத்திருப்பதுமேகூட குற்றம்தான்.அதேசமயம், அம்பர் கிரீஸுக்கு அயல்நாடுகள் பணத்தை அள்ளிக் கொட்டுவதால், சட்டவிரோதமாக கள்ளத்தனமாக அம்பர் கிரீஸ் கடத்தல் சக்கைப்போடு போடுகிறது. அதுவும் அரசியல்வாதிகள் துணையோடு நடக்கிறது என்பதுதான் அதிர்ச்சியான விஷயம்..ஒன்றரை வருடத்துக்கு முன் அம்பர் கிரீஸைக் கடத்தியதாக, தி.மு.க. முன்னாள் கவுன்சிலர் ஒருவர் கைதாகி சிறையில் இருந்து வெளியே வந்த நிலையில், இப்போது அ.தி.மு.க. முன்னாள் கவுன்சிலர் ஒருவர் சிக்கியிருக்கிறார்.தூத்துக்குடியில் ஒரு கும்பல் அம்பர் கிரீஸ் பதுக்கி வைத்திருப்பதாக தகவல் கிடைத்ததையடுத்து, மத்திய புலனாய்வுத் துறை நடத்திய அதிரடி வேட்டையில்தான், முன்னாள் மாநகராட்சி அ.தி.மு.க. கவுன்சிலர் ஈஸ்வரன் கைது செய்யப்பட்டுள்ளார்.அவருடன் கேரளாவைச் சேர்ந்த அனில்குமார், ஆனந்தராஜ், பெத்தேன் ஆகியோரும் கூட்டாகச் சேர்ந்து அம்பர் கிரீஸை விற்க முயன்றிருக்கிறார்கள். அவர்களிடம் இருந்து 18 கிலோ அம்பர் கிரீஸை கைப்பற்றியிருக்கிறார்கள். அதன் சர்வதேச மதிப்பு 30 கோடியாம்!இதுபற்றி உளவுத்துறை போலீஸாரிடம் கேட்டோம். “அம்பர் கிரீஸ் போன்ற தடைசெய்யப்பட்ட பொருளை ஓர் இடத்தில் இருந்து இன்னொரு இடத்துக்கு எளிதாகக் கடத்துவதற்காகவே கவுன்சிலர் போன்றவர்களை கடத்தல்காரர்கள் தேர்வு செய்கிறார்கள்..முன்பு தி.மு.க. கவுன்சிலர், இப்போது அ.தி.மு.க. கவுன்சிலர் என்று இந்த விஷயத்தில் கவுன்சிலர்கள் கைதாவது, உளவுத்துறை போலீஸார் மத்தியில் சலசலப்பை ஏற்படுத்தியிருக்கிறது. இதையடுத்து, தூத்துக்குடி மாநகராட்சி முன்னாள் மற்றும் இந்நாள் கவுன்சிலர்கள் சிலர் தீவிர கண்காணிப்பில் இருக்கிறார்கள் என்றார்கள்!இந்த நிலையில், ‘முன்னாள் அ.தி.மு.க. கவுன்சிலர் ஈஸ்வரனிடம் இருந்து கைப்பற்றப்பட்டதாக தற்போது கணக்குக் காட்டப்பட்டுள்ள 18 கிலோ அம்பர் கிரீஸ், ஒன்றரை வருடங்களுக்கு முன்பு முன்னாள் தி.மு.க. கவுன்சிலரிடம் இருந்து கைப்பற்றப்பட்டது.உண்மையில் இப்போது ஈஸ்வரனிடம் இருந்து கைப்பற்றப்பட்ட அம்பர் கிரீஸ் என்ன ஆனது? அவர்களிடம் இருந்து அம்பர் கிரீஸ் மட்டும் கைப்பற்றப்பட்டதா? அல்லது வேறு பொருள் ஏதாவது கைப்பற்றப்பட்டதா? தெரியவில்லை என்று சந்தேகத்தை கிளப்புகிறார்கள், சிலர்.இதுகுறித்துக் கேட்டால், மத்திய வருவாய்ப் புலனாய்வுத் துறை அதிகாரிகள் மௌனம் காக்கிறார்கள்.கடத்தல் திமிங்கிலங்களை வேட்டையாட முடியாதா! -எஸ்.அண்ணாதுரை