கரூர் அவமானத்துக்கு கோவையில் கண்டனம் என்னத்துக்கு? கர்புர் உடன்பிறப்புகள்

’தி.மு.கவுக்கு ஒரு எம்.எல்.ஏ. கூட இல்லாத கோவையில் கண்டன கூட்டம் நடக்கிறது. தி.மு.கவிற்கு மூன்று எம்.எல்.ஏக்கள், இருந்தும், செந்தில்பாலாஜியின் சொந்த மண்ணான கரூரில் கண்டன கூட்டம் நடத்த தயங்கியது ஏன்? தமிழ்நாடே அசந்துபோகும் அளவிற்கு பிரமிக்கும் கூட்டம் திரட்டிய செந்தில்பாலாஜியை இப்படியா அவமானப்படுத்துவது?’ என்று குமுறிக் கொந்தளிக்கிறார்கள் கரூர் தி.மு.க.காரர்கள்.தமிழகத்தின் அத்தனை அரசியல் டாபிக்குகளும் செந்தில் பாலாஜி என்ற ஒற்றை நபரை சுற்றைவர ஆரம்பித்துள்ள நிலையில், அவரது கைதுக்கு எதிர்ப்பாக தி.மு.க நடத்திய கண்டனக்கூட்டமும் பேசுபொருளாகியிருக்கிறது. அந்த கண்டனக்கூட்டத்தை கோவையில் நடத்தியிருக்கவேண்டிய அவசியம் என்ன என்பது குறித்து விசாரணை மேற்கொண்டோம்..கோவையில் நடந்த கண்டன பொதுகூட்டத்திற்கு கரூரிலிருந்து தொண்டர்களை அழைத்து செல்ல சில தனியார் பஸ் கம்பெனியினர் வாகன ஏற்பாடு செய்திருந்த நிலையில், தெருத்தெருவாக ஆட்களை தேடி வார்டு பொறுப்பாளர்கள் அலையாக அலைந்தும், ’இங்கிருந்து கோயமுத்தூரா? போக 4 மணி நேரம், வர நாலு மணி நேரம், நம்மாள ஆகாது’ என்று பலரும் ஜகா வாங்கி தெறித்து ஓடிக்கொண்டிருந்த நிலையில், கோவைக்கு பஸ் ஏற தயாராக அண்ணாநகர் கோவிந்தன் நம்மிடம், ’’கருணாநிதி என்று இறந்தாரோ அன்றிலிருந்து சாகும் வரை கருப்பு சட்டையை தவிர வேறு சட்டையை அணிய மாட்டேன் என்கிற சபதம் ஏற்று அதன்படி கருப்பு சட்டை கோவிந்தனாகவே வாழ்ந்து வருகிறேன்.செந்தில்பாலாஜி எங்கள் ஊர் எம்.எல்.ஏ, எங்கள் மாவட்ட செயலாளர், எங்கள் ஊர் அமைச்சர், எங்கள் மண்ணின் மைந்தர், அவரை கைது செய்துள்ளார்கள். இந்த கைதை கண்டித்து கண்டன ஆர்பாட்டம் கரூரில்தானே வைக்க வேண்டும் கோயமுத்தூரில் வைத்தது எப்படி சரியாகும். கரூர் மாவட்டத்தில் மூன்று எம்.எல்.ஏக்கள் இருக்கிறார்கள். அவர்கள் நினைத்தால் கரூரில் கூட்டத்தை சிறப்பாக நடத்தி மத்திய அரசுக்கு எதிர்ப்பை காட்டலாம். ஏன் செய்யவில்லை என்று தெரியவில்லை. கோயமுத்தூருக்கு வர பலரும் தயங்கினார்கள்..தலைமை உத்தரவை என்று மீறாதவனாக இதோ என் சொந்த காசை செலவு செய்து கோவைக்கு பஸ் ஏறிவிட்டேன். ஆனாலும் சொல்கிறேன், இந்த கூட்டத்தை கரூரில்தான் நடத்தியிருக்கவேண்டும்”என்றார்.கரூர் மாவட்ட இளைஞரணி பொறுப்பாளர் ஒருவரிடம் பேசினோம்,’’கரூரில் வருமான வரித்துறை ரெய்டின் போது ஏற்பட்ட அடிதடி பிரச்சனை பெரிதாகி ஓய்ந்திருந்த நிலையில், செந்தில்பாலாஜி கைது அறிவிப்பு வந்ததுமே, கரூரில் போராட்டாமோ, ஆர்ப்பாட்டமோ செய்யவேண்டாம் என்று எங்களுக்கு நாங்களே கட்டுப்பாடு விதித்துக்கொண்டு இருந்துவிட்டோம். கண்டன பொதுக்கூட்டத்தை கரூரில் நடத்தலாம் என்று தலைமை முதலில் முடிவு செய்து பின்புதான் கோவைக்கு மாற்றினார்கள்..செந்தில்பாலாஜி இல்லாத நிலையில் அவரின் சொந்த ஊரில் நாங்கள் முன்னின்று செலவு செய்து கூட்டம் நடத்துகிறோம் என்று மாவட்டத்திலுள்ள மூன்று எம்.எல்.ஏ.க்களும் தலைமையை அணுகவில்லை. செந்தில்பாலாஜிக்கு செல்வாக்குள்ள கரூரில் கூட்டம் நடத்த மூத்த அமைச்சர்களை சந்தித்து அனுமதி வாங்கியிருக்க வேண்டியது இந்த மூன்று எம்.எல்.ஏக்களின் கடமை. செந்தில்பாலாஜி ஆஸ்பத்திரியில் அனுமதிக்கப்பட்ட அடுத்த நொடியிலிருந்தே கரூர் தி.மு.க.வில் ஆளாளுக்கு நாட்டாமை செய்ய ஆரம்பித்துவிட்டார்கள். கோவை கூட்டம் முடிந்ததும் மூன்று எம்.எல்.ஏக்களிடமும் கூட்டம் நடத்த கேட்பேன், கூட்டம் நடத்த காசில்லை என்று சொன்னால் ரோட்டில் துண்டு ஏந்தி வசூல் செய்து செந்தில்பாலாஜிக்காக கரூரில் கண்டன பொதுக்கூட்டம் நடத்துவேன்’’ என்றார்..இதுபற்றி அரவக்குறிச்சி எம்.எல்.ஏ இளங்கோவிடம் கேட்டோம்,’’கரூரில்தான் நடத்தவேண்டும் என்பதில்லை. கோவையிலும் நடத்தலாம். ஏன் கரூரில்தான் நடத்துணுமா? என்று கோபப்பட்டவரிடம், இந்த கண்டன கூட்டம், அமைச்சரின் சொந்த தொகுதியில் நடந்திருந்தால்தான் சரியானதாக இருக்கும் என்று உங்கள் தி.மு.க தொண்டர்கள்தான் சொல்கிறார்கள், மேலும், கூட்டம் நடத்தும் செலவை எம்.எல்.ஏக்கள் யாரும் ஏற்றுக்கொள்ள முன்வராததால் கோவைக்கு மாற்றப்பட்டதாக சொல்கிறார்கள் என்று சொல்கிறார்கள் என்று சொன்னதும், இணைப்பை துண்டித்தார். பிறகு அரை மணி நேரம் கழித்து அவரே நம்மை அழைத்தார். ’’கரூரில் கண்டன கூட்டம் நடத்த தலைமையிடம் அனுமதி கேட்போம். அனுமதி கொடுத்தால் கூட்டம் நடத்துவோம்’’ என்று முடித்துக்கொண்டார்..கிருஷ்ணராயபுரம் எம்.எல்.ஏ சிவகாமசுந்தரியிடம் பேசினோம்,’’தலைமை கோவையை அறிவித்திருக்கிறது. கரூரில் கூட்டம் நடத்துவது பற்றி இன்னும் முடிவெடுக்கவில்லை மற்றவைகளை நேரில் வந்தால் பதில் சொல்கிறேன்’’ என்று புதிருடன் இணைப்பை துண்டித்தார்.குளித்தலை எம்.எல்.ஏ மாணிக்கத்திடம் பேசினோம், ’’அதான் கோவையில நடக்குதே. நாங்கெல்லாம் கோவைக்கு சென்று கண்டன கூட்டத்தில் கலந்துகொண்டோம். கரூரில் நடத்தவேண்டும் என்று தலைமை அறிவிக்கவில்லை. அதனால் கூட்டம் கோவையில் நடந்தது’’ என்று முடித்துக்கொண்டார்.கைது செய்யப்படுவதற்கு முந்தைய வாரம் கருணாநிதி முதன் முதலாக வெற்றி பெற்ற தொகுதியான குளித்தலையில் கலைஞரின் நூற்றாண்டு விழாவை லியோனியை கூட்டி வந்து நடத்தினார் செந்தில் பாலாஜி. அந்த கூட்டத்தில் சுமார் 5 ஆயிரம் பேர் கலந்துகொண்டார்கள். இப்போது செந்தில் பாலாஜிக்காக நடக்கும் கோவை கூட்டத்திற்கு எத்தனை பேருடன் செல்கிறீர்கள் என்று கரூர் மேயர் கவிதாவை தொடர்பு கொண்டோம். கவிதாவின் கணவரும் கரூர் நகர செயலாள்ருமான கணேசன் பேசினார், ’’இப்பத்தான் ஒவ்வொருத்தரா வராங்க, நாலஞ்சு பஸ்ல போவோம்’’ என்றார். அரவக்குறிச்சி நகர செயலாளர் பி.எஸ்.மணியிடம் கேட்டோம், ’இரண்டு பஸ்ஸில் 70 பேர் செல்கிறோம்’ என்றார்.பள்ளபட்டி நகர செயலாளரரிடம் கேட்டோம், ’ஒரு பஸ்ஸில் 60 பேர் செல்கிறோம்’ என்றார். செந்தில்பாலாஜி இல்லாத கரூர் தி.மு.க. மெல்ல அஸ்தமனத்தை நோக்கி செல்ல ஆரம்பித்துள்ளது.-கரூர் அரவிந்த்.