ஸ்கிராப் எடு கொண்டாடு! சென்னையை மிரட்டும் ரவுடிகள் ராஜ்ஜியம்

ஸ்ரீபெரும்புதூர் கொலைகள்' என சீரியலே எடுக்கும் அளவுக்குக் கடந்த சில ஆண்டுகளாக டி.எம்.சி கணக்கில் ரத்த ஆறுகளை ஓடவிட்டுள்ளனர், ரவுடிகள். அதையொட்டி நடந்த என்கவுன்ட்டரும் தொழிற்சாலைகளை முன்வைத்து நடக்கும் பரமபத ஆட்டமும் காஞ்சியை உலுக்கும் பரபர டாபிக்.செங்கல்பட்டு மாவட்டம் ஊரப்பாக்கத்தை சேர்ந்த சோட்டா வினோத், ரமேஷ் ஆகியோரை ஆகஸ்ட் 1ம் தேதி கூடுவாஞ்சேரி போலீஸார் என்கவுன்ட்டர் செய்தனர். வாகன சோதனையில் ஈடுபட்டிருந்த போலீஸாரின் வாகனத்துடன் மோதியதோடு, எஸ்.ஐ.யை ஆயுதங்களால் தாக்க முயன்ற ரவுடிகளை என்கவுன்ட்டர் செய்ததாக போலீஸ் கூறுகிறது. `உண்மையில் நடந்தது வேறு' என்கிறது, ரவுடிகள் தரப்பு.ஆகஸ்ட் 1.. அதிகாலையில் நடந்தது என்ன?தி.மு.க விவசாய அணி செயலாளர் சக்கரபாணியை பணம் கேட்டு மிரட்டி கொலை முயற்சியில் ஈடுபட்டதாக, தீவிரமாக தேடப்பட்டு வந்த ரவுடிகள் சோட்டா வினோத்தும் ரமேஷும் ஜூலை 30ம் தேதி ஞாயிற்றுக்கிழமை பழைய மாமல்லபுரம் சாலை, ஏகாட்டூரிலுள்ள தனியார் ஓட்டலில் அறை எடுத்து தங்கியுள்ளனர்.ஓட்டலின் ஒன்பதாவது தளத்தில் அறை எண் 911ல் தங்கியிருந்த ரவுடி வினோத் இரவு 11:45 வரையில் தனது நண்பர்களிடமும் வழக்கறிஞர்களிடமும் பேசிக்கொண்டு இருந்துள்ளார். 31ம் தேதி நள்ளிரவு 12:30 மணிக்கு ஓட்டலுக்குள் நுழைந்திருக்கிறது போலீஸ் டீம். வினோத்தையும் ரமேஷையும் பார்க்க வந்த இரண்டு ரவுடிகள் தப்பிவிட, துப்பாக்கி முனையில் சுற்றிவளைத்திருக்கிறது போலீஸ். உயிர் பயத்தில் நடுங்கிய இருவரையும் அவர்களின் வெள்ளை நிற ஸ்கோடா காரிலேயே ஏற்றிச்சென்றுள்ளது..அதன்பிறகு, போலீஸ் வாகனத்தின் மீது காரை மோதியதாகவும் எஸ்.ஐ. சிவகுருநாதனை இடது கையில் வெட்டி மீண்டும் தலையில் வெட்ட முற்பட்டபோது, கூடுவாஞ்சேரி இன்ஸ்பெக்டர் முருகேசனும் எஸ்.ஐ. சிவகுருநாதனும் சேர்ந்து துப்பாக்கியால் சுட்டதாகவும் செய்தி வெளியானது.போலீஸ் என்கவுன்ட்டரில் இறந்த ரவுடி வினோத்தின் அம்மா ராணியிடம் பேசினோம். இவர், ஓட்டேரி காவல்நிலையத்துக்குட்பட்ட மண்ணிவாக்கம் பகுதியைச் சேர்ந்தவர். “31ம் தேதி நைட் என்கிட்ட பேசிட்டு இருந்தான். `உன்னால, உன் அண்ணனுக்கும் பிரச்னையா இருக்கு. நீ சரண்டர் ஆகிடுப்பா'ன்னு சொன்னேன். அவனும், சரண்டர் ஆகப்போறதா சொன்னான். அதுக்குள்ள இப்படி பண்ணிட்டாங்களே” என்றுகூறி கண்கலங்கினார்.சோட்டா வினோத்தின் அண்ணன் சீனிவாசன் நம்மிடம், “சோட்டா வினோத், ஏ ப்ளஸ் கேட்டகிரி ரவுடியெல்லாம் இல்லைங்க. வினோத் மேல எத்தனை வழக்குகள் இருக்குன்னு கேட்டாகூட சொல்ல மாட்டேங்கறாங்க. தம்பியை தேடிவரும் ஓட்டேரி போலீஸ், என்னையும் பொய் கேஸுல அரெஸ்ட் பண்ணியிருக்காங்க. இப்போ, எஃப்.ஐ.ஆர் காப்பியைகூட கொடுக்கமாட்டேங்கறாங்க” என்கிறார் வேதனையோடு..A + ரவுடிகளின் ஆதிக்கம்``தமிழ்நாட்டில் மட்டுமல்ல, இந்தியாவிலேயே மிகப்பெரிய தொழில்நகரங்களின் ‘ஹப்’ ஆக உருவெடுத்துக்கொண்டிருக்கிறது, ஸ்ரீபெரும்புதூர். இதனால், ரவுடிகளின் ராஜ்ஜியமும் தன்னால் உருவாகிவிடுகிறது. ஆனால், பெரிய பெரிய ஏ பிளஸ் ரவுடிகளை விட்டுவிட்டு, சாதாரண ரவுடிகளையே போட்டுத் தள்ளியிருக்கிறது போலீஸ்'' என்கின்றனர், அப்பகுதியை சேர்ந்த சமூக ஆர்வலர்கள். தொடர்ந்து ரவுடியிஸயத்தின் பின்னணியை விவரித்தனர்.“ஸ்ரீபெரும்புதூரில் உள்ள தொழிற்சாலைகளில் ஸ்கிராப் எனப்படும் இரும்புக்கழிவுகளை எடுத்து விற்கும் வேலையை செய்ததோடு ரவுடியிஸத்திலும் உச்சத்தில் இருந்தார், பி.பி.ஜி குமரன். பிரபலமான கம்பெனிகளின் ஸ்கிராப், கேபிள் ஆகியவற்றைத் திருடி விற்பதுதான் இங்கு சிலருக்குத் தொழில். 2012ல் குன்றத்தூர் வைரம் டீம், மதுரை அப்பளம் ராஜாவை வைத்து பி.பி.ஜி.குமரனின் கதையை முடித்தது.2011ல் மார்க்கெட் சிவா கேங்கில் இருந்த படப்பை குணா என்ட்ரி ஆனார். குடும்பத்தோடு மதுரமங்கலம் கிராமத்தில் குடியேறிய குணா, சுற்றுவட்டார பகுதியில் ரவுடியிஸத்தை காட்டிக்கொள்வதில்லை. அங்கு, ‘நாட்டாம பாதம் பட்டா வெள்ளாம வெளையுமடி’ என்று பாட்டு பேக் கிரவுண்டில் ஒலிக்க, நில புலன்களுடன் வாழ்ந்துவருகிறார்.ஆனால், தாம்பரம் டு செங்கல்பட்டு வரை படப்பை குணாவின் கண்ட்ரோல்தான். கூடுவாஞ்சேரி, ஊரப்பாக்கம், மறைமலைநகர் ஏரியாக்களில் குணாவின் கைதான் ஓங்கியிருக்கிறது'' என்கின்றனர்.தொடர்ந்து பேசும்போது, ``பி.பி.ஜி குமரன் டீமில் இருந்த போந்தூர் சேட்டு, அவனது தம்பி சிவா இருவரும் குணா குரூப்பில் நெருக்கம் ஆகிறார்கள். படப்பை குணாவின் ஸ்பெஷாலிட்டியே சின்னப் பையனா இருந்தாலும் ‘ அண்ணா.. அண்ணா ’ என்று அழைப்பதுதான்.குன்றத்தூர் வைரமும் படப்பை குணாவும்தான் இப்போது இரண்டு டீமாக இருக்கிறார்கள். பணக்கார ரவுடிகள்னா இவங்கதான். ஏ ப்ளஸ் ரவுடிகளான இவர்களை நோக்கி போலீஸும் நெருங்காது. ஸ்கிராப்பில் பெரிய பிசினஸே பெரிய கம்பெனிகளிலிருந்து எடுக்கப்படும் இரும்புகள், உதிரி பாகங்கள் விற்பனைதான்.இதில், புனேவைச் சேர்ந்த இரண்டு நிறுவனங்கள்தான், இரும்பு கழிவுகளை எடுத்து விற்கும் வியாபாரத்தை செய்துவருகிறது. எந்தக் கட்சி ஆட்சிக்கு வந்தாலும் கொடுக்க வேண்டியதை கொடுத்துவிட்டு இந்த இரண்டு கம்பெனிகளும் பிசினஸை கைப்பற்றிக் கொள்வார்கள். இவர்களை யாரும் தொடக் கூட முடியாது..இதற்கு, அடுத்த லெவலில் ஒரு கம்பெனி ஆரம்பிக்கப் போறாங்கன்னா ரவுடிகள் குரூப் வந்து இறங்கும். ஒரு கம்பெனியை தொடங்க, எல்லா அப்ரூவலும் வாங்கின பிறகும்கூட கவுன்சிலர், லோக்கல் அரசியல்வாதின்னு சொல்லிக்கிட்டு ஒரு குரூப் வரும். நாங்கதான் செங்கல், ஜல்லி, மணல் சப்ளை எல்லாம் பண்ணுவோம்னு மிரட்டும்.டீலா... நோ டீலா?அனைத்து கம்பெனி ஹெச்.ஆர்களுக்கும் ஆசை காட்டி டீல் பேசுவார்கள். `பணம் வேணுமா பணம், பொண்ணுங்க வேணுமா பொண்ணுங்க. என்ன வேணும் உனக்கு?'ன்னு டீல் நடக்கும். எல்லாம் பேசி முடியலைன்னா கடைசியா மிரட்டல். பி.பி.ஜி குமரனின் உறவினர் பி.பி.ஜி. சங்கரையும் சமீபத்தில் போட்டுத் தள்ளிவிட்டதால 34 வயது குல்லா என்கிற விஷ்வநாத், இப்போது அதைக் கையில் எடுத்திருக்கிறார்.படப்பை குணாவை போலவே ராஜ்ஜியம் நடத்துவது நெடுங்குன்றம் சூர்யா, போலீஸையே மிரட்டி அசால்ட் பண்ணக்கூடிய ரவுடி. படப்பை குணா எப்படின்னா ‘அய்யா எப்படி சொல்றீங்களோ அப்படி கேட்குறேன்’ன்னுதான் போலீஸ்கிட்ட பேசுவார். ஆனா, சூர்யா அப்படி கிடையாது. கூடுவாஞ்சேரி, நெடுங்குன்றம்னு எல்லா இடத்திலும் மிரட்டல், வசூல்வேட்டைதான்'' என்றனர்.இதில், ஆச்சர்யமான விஷயம், ஸ்ரீபெரும்புதூர் பேரூராட்சியில் ரவுடிகள் கோலோச்சி வருவதுதான். அங்கு 15 வார்டுகள் உள்ளன. வார்டு நம்பர்-12ல் சரித்திர பதிவேடு குற்றவாளியான போந்தூர் மோகனின் மனைவிதான் பேரூராட்சி கவுன்சிலர். வார்டு 13ல் ரவுடி நவீனின் மனைவி, கவுன்சிலர். வார்டு-11 ரவுடி வீரபத்திரன் கவுன்சிலர். வார்டு 15ல் ரவுடி சாந்தகுமார் கவுன்சிலர் என குற்றப்பின்னணி உள்ளவர்கள்தான் கோலோச்சுகின்றனர். சாந்தகுமாரும் வீரபத்திரனும் இப்போது குண்டாஸில் இருக்கிறார்கள். காரணம், கட்டப்பஞ்சாயத்து, வசூல்வேட்டை..எதற்காக இந்த என்கவுன்ட்டர்?``ஏ ப்ளஸ் ரவுடிகளுக்கு தொழில் வந்துவிட்டது. ஆனால், சோட்டா வினோத் மாதிரியான ஆட்கள் இப்போதான் வளர்ந்து வந்தாங்க. இப்படியே விட்டா அடுத்தது படப்பை குணா, நெடுங்குன்றம் சூர்யா, குன்றத்தூர் வைரம் மாதிரி வளர்ந்து உட்கார்ந்துவிடுவான் என்பதால்தான் இந்த என்கவுண்டர். ஆனா, இந்த என்கவுன்ட்டர் மூலமா மட்டும் ரவுடியிஸத்தை ஒழிச்சுட்டோம்னு சொல்லவே முடியாது” என அதிரவைக்கின்றனர், உள்விவகாரம் அறிந்த ரவுடிகள்.கூடுவாஞ்சேரி என்கவுன்ட்டர் தொடர்பாக, `பீப்பிள்ஸ் வாட்ச்' அமைப்பின் காஞ்சிபுரம் மாவட்ட செயற்பாட்டாளர் ஆசீர்வாதத்திடம் பேசினோம். “கைது செய்தபிறகு நடந்ததால் இது காவல் மரணம். அப்பட்டமான மனித உரிமை மீறல் நடந்திருக்கிறது. வினோத், ரமேஷ் ஆகியோர் தங்கியிருந்த ஓட்டலின் சி.சி.டி.வியை ஆராய்ந்தாலே போலீஸார் மாட்டிக்கொள்வார்கள். அரசியல் செல்வாக்கு, பணபலம் இருந்தால் அவர்களையெல்லாம் போலீஸின் தோட்டா துளைக்காதா?” என்று கேள்வி எழுப்புகிறார்.கூடுவாஞ்சேரி என்கவுன்ட்டர் எழுப்பும் சந்தேகம் குறித்து, இன்ஸ்பெக்டர் முருகேசனிடம் கேட்டோம். “என்கவுன்ட்டர் செய்யப்பட்ட வினோத் என்கிற சோட்டா வினோத் மீது கொலை, கொலை முயற்சி, வழிப்பறி என 50க்கும் மேற்பட்ட வழக்குகளும் மற்றொரு ரவுடி ரமேஷ் மீது 20க்கும் மேற்பட்ட வழக்குகளும் உள்ளன.இதற்குமுன் ரவுடிகள் சோட்டா வினோத், ரமேஷை எனக்குத் தெரியாது. 31ம் தேதி இரவு வாகன தணிக்கையில் ஈடுபட்டுக் கொண்டிருக்கும்போது போலீஸ் வாகனத்தை மோதியதோடு, எஸ்.ஐ.யை தாக்க முயற்சித்ததால் தற்காத்துக் கொள்ள துப்பாக்கியால் சுடவேண்டிய சூழல் ஏற்பட்டது. மற்றபடி, ஓட்டலுக்குச் சென்று கைது செய்தோம் என்பதெல்லாம் பொய்” என்றார்.-மனோசெளந்தர்